Problemanan di Humanidad Lo Caba Pronto!

“YUDANSA humanitario tin masha poco balor si e no ta forma parti di un plan strategico y politico mas amplio diseña pa atende e causanan basico di conflicto. Experencia a mustra bes tras bes cu yudansa humanitario so no por resolve e problemanan cu tin un caracter fundamentalmente politico.”—The State of the World’s Refugees 2000.

Apesar di e gran esfuerso humanitario, e problemanan di humanidad ta aumenta sin misericordia. Tin posibilidad pa yega na un solucion politico duradero? No masha. Pero na unda otro nos por acudi? Den un pasashi significativo na cuminsamento di apostel Pablo su carta na e cristiannan na Efeso, e ta splica con Dios lo pone fin na tur problema di humanidad. Asta e ta indica ki medio Dios lo uza pa haci esaki: un instrumento cu lo atende e causanan basico di tur e problemanan cu ta aflihi nos awe. Pakico no analisa loke Pablo a bisa? E pasashi ta na Efesionan 1:3-10.

“Recohe Tur Cos Hunto Atrobe den e Cristo”

E apostel ta bisa cu e proposito di Dios ta pa bini cu loke e ta yama “un administracion [of, maneho di asuntonan] na e limite completo di e tempo señala.” Kico esaki ta nifica? E ta nifica cu Dios a fiha un tempo den cua lo e percura pa “recohe tur cos hunto atrobe den e Cristo, e cosnan den shelo y e cosnan riba tera.” (Efesionan 1:10, NW) Si, Dios a cuminsa un areglo pa trece tur cos den shelo y riba tera bek na harmonia bou di su control directo. Relaciona cu e palabranan aki traduci como “recohe tur cos hunto atrobe”, e analista di Bijbel J. H. Thayer ta duna e comentario interesante aki: “Reuni pa su mes atrobe . . . tur cos y criatura bibo (te aworaki desuni door di pica) den un solo estado combina di compañerismo den Cristo.”

Dios tin cu haci esaki pa motibo di e desunion cu a cuminsa reina den principio. Na cuminsamento di historia humano, nos prome  mayornan, Adam cu Eva, a join Satanas e Diabel den rebelion contra Dios. Nan kier tawata independiente pa dicidi pa nan mes loke tawata bon y loke tawata malo. (Genesis 3:1-5) Yehova a cumpli cu su husticia door di saca nan for di su famia. Nan a perd’e como nan Dios. Door di esei, humanidad a bin cai den imperfeccion cu tur e consecuencianan teribel cu nos ta pasa aden awe.—Romanonan 5:12.

Dios Ta Permiti Maldad pa un Tempo

Kisas bo ta puntra: ‘Pakico Dios a laga nan haci esei? Pakico E no a simplemente uza su poder supremo y impone su boluntad, evitando asina tur e dolo y sufrimento cu nos ta pasa aden awor?’ Esei por parce masha logico. Pero kico uzo di un poder aplastante asina lo proba realmente? Abo lo admira of keda contento cu un hende cu riba e prome indicacion cu otro hende no ta di acuerdo cu ne ta simplemente caba cu tur oposicion pasobra e tin e poder pa haci esei? Sigur cu no.

E rebeldenan ei no a reta Dios pa su poder todopoderoso mes. Loke nan a cuestiona particularmente ta su derecho di goberna y su manera di goberna. Pa resolve di una bes pa semper e cuestionnan fundamental cu a lanta, Yehova a laga su criaturanan dirigi nan mes asuntonan sin su intervencion directo pa un tempo limita. (Eclesiastes 3:1; Lucas 21:24) Ora e tempo ei caba, lo E interveni pa bolbe eherce control total riba tera. Pa e tempo ei lo ta claramente bisto cu su manera di goberna ta e unico manera cu por garantisa pas, felicidad y prosperidad duradero pa e habitantenan di tera. E ora ei tur e opresornan di mundo lo ser elimina pa semper.—Salmo 72:12-14; Daniel 2:44.

“Prome Cu Fundacion di Mundo”

E proposito di Yehova tawata pa haci tur esaki for di hopi tempo caba. Pablo ta menciona “prome cu fundacion di mundo.” (Efesionan 1:4) Esei no tawata prome cu e creacion di tera of di Adam cu Eva. E mundo ei tawata “masha bon”, y ainda rebelion no a cuminsa. (Genesis 1:31) Ta na ki “mundo” apostel Pablo a referi anto? Esei tawata e mundo di e yiunan di Adam cu Eva, esta, un mundo di humanidad pecaminoso y imperfecto cu tin e speransa di ser rescata. Prome cu cualkier yiu a nace, ya Yehova tawata sa caba con lo E atende asuntonan pa alivia e desendientenan di Adam cu si por ser rescata.—Romanonan 8:20.

Claro cu esaki no kiermen cu e Soberano di universo tin cu atende asuntonan manera hende ta haci. Den caso di hende, nan ta reconoce cu por surgi un situacion di emergencia, y pesei nan ta plania varios strategia en detaye pa trata cu e situacion. En cambio, e Dios todopoderoso ta simplemente establece su proposito y cumpli cu ne. Toch, Pablo ta splica con Yehova a dicidi di resolve asuntonan pa trece un alivio permanente pa humanidad. Kico e medidanan ei tawata?

Ken Lo Trece Alivio?

Pablo ta splica cu e disipelnan di Cristo ungi cu spirito tin un tarea special pa yuda deshaci di e daño cu e pica di Adam a causa. Segun Pablo, Yehova “a scohe nos den [Cristo]” pa goberna cu Hesus den su Reino selestial. Pablo ta splica mas aleu bisando cu Yehova a “predestina nos pa wordo adopta como su yiunan pa medio di Hesucristo.” (Efesionan 1:4, 5) Naturalmente no ta individualmente Yehova a scohe, of predestina nan. Loke si El a predestina ta un clase di hende fiel y dedica cu hunto cu Cristo lo deshaci di e daño cu Satanas e Diabel y Adam cu Eva, a causa na e famia humano.—Lucas 12:32; Hebreonan 2:14-18.

Esei si ta algo asombroso! Den principio, ora Satanas a cuestiona Dios su derecho di goberna, el a insinua cu Dios a comete un fayo cu su creacion humano, esta cu ora nan haya nan bou di hopi presion of tentacion, nan tur lo rebela contra e mando di Dios. (Job 1:7-12;  2:2-5) Den un demostracion dramatico di “e gloria di su gracia”, Yehova Dios cu tempo a mustra su confiansa den su creacion terenal door di adopta algun miembro di e famia pecaminoso di Adam como yiu spiritual. Esnan cu ta den e grupito aki lo bai shelo pa sirbi einan. Pa ki proposito?—Efesionan 1:3-6; Huan 14:2, 3; 1 Tesalonicencenan 4:15-17; 1 Pedro 1:3, 4.

Apostel Pablo ta bisa cu e yiunan adopta di Dios aki ta bira “coheredero cu Cristo” den su Reino selestial. (Romanonan 8:14-17) Como rei y sacerdote, nan lo yuda libra e famia humano di e dolo y sufrimento cu e ta pasa aden aworaki. (Revelacion 5:10) Berdad, “henter e creacion ta keha y ta sufri e dolonan di parto hunto, te awor.” Pero pronto e yiunan di Dios scohi specialmente aki lo join Hesucristo, y tur hende obediente un biaha mas “lo wordo libra for di . . . sclabitud na corupcion pa drenta den e libertad glorioso di e yiunan di Dios.”—Romanonan 8:18-22.

“Redencion”

Tur esaki a bira posibel pa medio di e sacrificio di rescate di Hesucristo, loke definitivamente ta e expresion mas impresionante y sublime di e bondad inmereci di Dios relaciona cu e mundo aki di humanidad cu ainda por ser rescata. Pablo ta skirbi: “Den [Hesucristo] nos tin redencion pa medio di su sanger, e pordon di nos picanan, segun e rikesa di su gracia.”—Efesionan 1:7.

Hesucristo ta e figura principal den e realisacion di e proposito di Dios. (Hebreonan 2:10) Su sacrificio di rescate ta percura e base legal pa Yehova adopta algun di e desendientenan di Adam den su famia selestial y pa alivia humanidad di e consecuencianan di e pica di Adam, sin suak e confiansa den Su leinan y principionan. (Mateo 20:28; 1 Timoteo 2:6) Yehova a haci cosnan den un manera cu ta sostene su rectitud y cu ta cumpli cu e normanan di husticia perfecto.—Romanonan 3:22-26.

Dios Su “Secreto Sagrado”

Pa miles di aña, Dios no a revela con exactamente lo E cumpli cu su proposito pa tera. Den e prome siglo di nos era, “el a duna [cristiannan] di conoce e secreto sagrado di su boluntad.” (Efesionan 1:9, NW) Pablo y su compañeronan cristian ungi a comprende bon cla e tarea magnifico cu Hesucristo a ricibi pa realisa e proposito di Dios. Tambe nan a cuminsa comprende e papel special cu nan lo hunga como coheredero cu Cristo den su Reino selestial. (Efesionan 3:5, 6, 8-11) Si, e gobernacion di Reino den man di Hesucristo y su cogobernantenan ta e instrumento cu Dios lo uza pa trece pas duradero no solamente den shelo sino tambe riba tera. (Mateo 6:9, 10) Mediante dje, Yehova lo restaura e tera aki den e condicion pa cua El a cre’e originalmente.—Isaias 45:18; 65:21-23; Echonan 3:21.

Su tempo señala pa interveni y elimina tur opresion y inhusticia for di riba tera ta den futuro cercano. Pero, en realidad, Yehova a cuminsa e proceso di restauracion na Pentecoste di aña 33 di nos era. Con El a haci esaki? Door di cuminsa na reuni e tempo ei ‘loke ta den shelo’, es decir, esnan cu lo goberna cu Cristo den shelo. Esakinan a inclui e cristiannan Efesio. (Efesionan 2:4-7) Mas resien, den nos  tempo, Yehova ta reuniendo “loke ta riba tera.” (Efesionan 1:10) Pa medio di un campaña di predicacion mundial, E ta duna di conoce na tur nacion e bon nobo tocante su gobernacion di Reino den man di Hesucristo. Esnan cu ta responde faborablemente ta ser reuni for di awor den un luga di proteccion y curacion spiritual. (Huan 10:16) Pronto, den un paradijs limpi aki riba tera, nan lo haya libertad completo for di tur inhusticia y sufrimento.—2 Pedro 3:13; Revelacion 11:18.

Hende a dal “pasonan asombroso” den nan esfuersonan humanitario pa yuda esnan oprimi di humanidad. (The State of the World’s Children 2000) Pero e paso mas asombroso lo ta ora Cristo Hesus y su cogobernantenan den e gobernacion selestial di Reino interveni pronto den asuntonan humano. Nan lo resolve completamente tur e causanan basico di conflicto y tur e otro cosnan malo cu ta aflihi nos. Nan lo pone fin na tur e problemanan di humanidad.—Revelacion 21:1-4.

[Plachi na pagina 4]

Esfuersonan humanitario no a resolve e problemanan di humanidad

[Plachi na pagina 6]

E sacrificio di rescate di Cristo a percura alivio pa humanidad for di e pica di Adam

[Plachi na pagina 7]

Ta posibel pa haya proteccion y curacion spiritual awe

[Plachi na pagina 7]

Pronto, e Reino Mesianico lo alivia humanidad di tur problema