Problemanan di Humanidad—Nan Lo Caba un Dia?

“UN DI cada cuater hende riba tera ta biba den pobresa, 1,3 mil miyon ta biba cu menos di un dollar pa dia, mil miyon tin masha poco educacion, 1,3 mil miyon no ta dispone di awa limpi pa bebe y mil miyon ta drumi cu hamber tur dia.” Asina un informe di Irlanda ta bisa tocante e condicion di mundo.

E comentario tristo ei ta mustra cu hende no ta capas pa haya solucion duradero pa e problemanan di humanidad. E problemanan ei ta parce asta mas teribel ainda ora bo realisa cu e gran mayoria di hende menciona den e informe ei ta hende mohe y mucha indefenso. No ta algo spantoso cu asta aworaki, den siglo 21, “tur dia ta trapa e derechonan humano di asina tanto hende”?—The State of the World’s Children 2000.

“Un Mundo Nobo Denter di un Solo Generacion”

E Fondo di Nacionnan Uni pa Mucha a expresa su confiansa cu “por elimina e ambiente di desesperacion cu e abusonan aki . . . a causa pa bida di hende rond mundo.” E organisacion aki ta bisa cu e condicionnan teribel cu e miles di miyones di hendenan desafortuna aki ta pasa aden actualmente “no ta inevitabel ni incambiabel.” De echo, nan a emiti un yamada pa “tur hende traha riba un mundo nobo denter di un solo generacion.” E organisacion aki ta spera cu esaki lo ta un mundo den cua henter humanidad lo ta “liber di pobresa y descriminacion, liber di violencia y enfermedad.”

Esnan cu ta expresa e sintimentonan ei ta basa nan mes riba e echo cu asta aworaki hende cu tin nan prohimo na pecho ta haci un tremendo trabou pa alivia e consecuencianan tristo di un “serie di conflicto y crisis cu aparentemente no tin fin.” Por ehempel, durante e ultimo 15 añanan, e Proyecto pa Mucha di Chernobyl “a yuda suavisa sufrimento di centenares di mucha cu a bin haya cancer como consecuencia di un explosion den un planta nuclear.” (The Irish Examiner, 4 di april 2000) E organisacionnan cu ta duna asistencia humanitario, grandi y chikito, sigur ta haci un diferencia grandi den e bida di un cantidad incontabel di victima di guera y desaster.

Pero esnan cu ta participa den e esfuersonan humanitario ei ta realista. Nan sa cu e problemanan cu nan ta enfrenta “tin raiz profundo y ta hopi mas extenso cu asta un decada pasa.” David Begg, ehecutivo principal di e organisacion di caridad Precupacion di Irlanda, ta bisa cu “e trahadonan, e donornan y esnan cu ta sostene e organisacion aki a responde na un manera magnifico” ora cu un inundacion catastrofico a dal Mozambique. “Pero”, e ta agrega, “e magnitud di e desaster ta pone cu nos so no por haci masha.” Relaciona cu e esfuersonan di yudansa pa Africa, e ta admiti francamente: “No tin mucho motibo pa carga speransa. Si tin mes, lo e ta manera lus di bela cu ta serca di paga.” Hopi hende ta haya cu su comentario ta resumi e situacion mundial mes tambe na un manera hopi cla.

Ta realista pa nos anhela e tan spera “mundo nobo denter di un solo generacion”? Aunke nos en berdad ta elogia e esfuersonan humanitario di actualidad, ta bale la pena sigur pa considera un otro speransa pa un mundo nobo cu ta husto y pacifico. Bijbel ta papia di e speransa ei, manera e siguiente articulo lo splica.

 [Reconocemento di plachi na pagina 2]

Pagina 3, mucha: Potret di UN/DPI saca door di James Bu