Sigui e Patronchi di Reinan

“E mester skirbi pa su mes un copia di e lei aki riba un rol . . . Y e mester tin esaki hunto cu ne y mester les’e tur e dianan di su bida.”—DEUTERONOMIO 17:18, 19.

1. Manera ken un cristian lo kier ta?

LO BO no compara bo mes facilmente cu un rei of un reina. Cua cristian fiel y studiante di Bijbel lo imagina su mes ta actua cu autoridad real, manera e bon reinan David, Hosias, Ezekias of Yehosafat? Toch, den por lo menos un manera special, bo por y bo mester ta manera nan. Den ki manera? Y pakico lo bo mester kier ta manera nan den e sentido ei?

2, 3. Kico Yehova a premira relaciona cu un rei humano, y kico un rei asina mester a haci?

² Den e dianan di Moises, hopi tempo prome cu Dios aproba pa e Israelitanan haya un rei humano, El a premira cu den su pueblo lo lanta e deseo pa nan haya un rei. Pesei El a inspira Moises pa inclui instruccionnan cu tin di aber cu esei, esta, instruccionnan pa un rei, den e pacto di Lei.

³ Dios a bisa: “Ora bo drenta e tera cu SEÑOR bo Dios ta duna bo, . . . y bo bisa: ‘Lo mi pone un rei riba mi, manera tur e nacionnan cu tin rond di mi’, e ora ei siguramente bo mester pone un rei riba bo cu SEÑOR bo Dios scohe. . . . Awor lo sosode cu ora e sinta riba trono di su reino, e mester skirbi pa su mes un copia di e lei aki . . . Y e mester tin esaki hunto cu ne y mester les’e tur e dianan di su bida, pa e siña teme SEÑOR su Dios, door di percura di cumpli cu tur e palabranan di e lei y di e statuutnan aki.”—Deuteronomio 17:14-19.

4. Kico tawata un di e instruccionnan cu Dios a duna reinan?

⁴ Si, e rei cu Yehova lo a scohe pa su adoradonan mester a traha un copia personal di scrituranan cu abo por haya den bo Bijbel. Anto, e rei mester a lesa for di e copia ei tur dia, bes tras bes. No tawata djis pa siña esakinan fo’i cabes. E mester a studi’e cu un bon meta. E rei cu lo tawatin e aprobacion di Yehova mester a studia e scrituranan inspira pa e por a desaroya y keda cu un actitud corecto di curason. Tambe e mester a studia nan pa e por a bira un rei sabi y exitoso.—2 Reinan 22:8-13; Proverbionan 1:1-4.

Siña Manera un Rei

5. Ki parti di Bijbel Rei David tawatin cu copia y lesa, y kico el a pensa di esaki?

⁵ Kico bo ta kere esei lo a nifica pa David ora el a bira rei riba Israel? Wel, lo e tawatin cu traha un copia di e bukinan di e Pentateuco (Genesis, Exodo, Levitico, Numbernan, Deuteronomio). Ora David a traha un copia di e Lei cu su propio bista y mannan, esei lo mester a haci un impresion profundo riba su mente y curason. Probablemente, Moises a skirbi tambe e buki di Job y tambe Salmo 90 y 91. David lo a copia esakinan tambe? Tal bes. Ademas, cu tur probabilidad e tawata dispone di e bukinan di Hosue, Huesnan y Rut. Pues bo por mira cu Rei David lo tawatin un parti grandi di Bijbel pa  lesa y absorba. Y bo tin motibo pa kere cu ta esei el a haci tambe, specialmente ora bo lesa su comentarionan tocante e Lei di Dios na Salmo 19:7-11.

6. Con nos por ta sigur cu Hesus tawatin mesun interes den e Scritura cu su antepasado David?

⁶ E David Mayor—Hesus, Yiu di David—a sigui e mesun patronchi. Hesus tawatin e custumber di bai na e sinagoga local tur siman. Ei e tawata tende nan lesa y splica e Scritura. Mas cu esei, na algun ocasion Hesus mes a lesa publicamente na bos halto for di e Palabra di Dios y a splica su aplicacion. (Lucas 4:16-21) Bo por mira mesora cu e tawata conoce e Scritura hopi bon. Djis lesa e relatonan di Evangelio, y ripara cuanto bes Hesus a bisa “ta para skirbi” of a referi den otro maneranan na pasashinan spesifico di e Scritura. Un ehempel ta su Sermon Riba Sero cu Mateo a skirbi. Den e parti aki Hesus a cita 21 biaha for di e Scritura Hebreo.—Mateo 4:4-10; 7:29; 11:10; 21:13; 26:24, 31; Huan 6:31, 45; 8:17.

7. Con distinto Hesus tawata for di lidernan religioso?

⁷ Hesus a sigui e conseho na Salmo 1:1-3: “Bendiciona ta e hende cu no ta cana den e conseho di malbadonan, . . . Ma su delicia ta den e lei di SEÑOR, y den su lei e ta medita di dia y anochi. . . . Tur loke cu e haci ta prospera.” Esei tawata na contraste skerpi cu e lidernan religioso di su tempo, kendenan a “sinta riba stul di Moises” pero a ignora “e lei di SEÑOR.”—Mateo 23:2-4.

8. Pakico ta pornada e lidernan religioso Hudiu tawata lesa y studia Bijbel?

⁸ Sinembargo, tin un pasashi den Bijbel cu lo por confundi algun hende pasobra nan ta interpret’e como si fuera Hesus a desanima hende pa studia Bijbel. Na Huan 5:39 y 40 nos ta lesa loke Hesus a bisa algun hende den su tempo: “Boso ta scudriña e Scrituranan, pasobra boso ta kere cu ta den nan boso tin bida eterno; y ta esakinan ta duna testimonio di mi; y boso no kier bin serca mi pa boso por tin bida.” Cu e comentario ei Hesus no a desanima su oyentenan Hudiu pa studia e Scritura. Mas bien, el a saca na cla con insinsero y inconsistente nan tawata. Nan a realisa cu e Scritura lo por a guia nan na bida eterno, pero e mesun Scritura cu nan tawata investiga lo mester a dirigi nan tambe na e Mesias, Hesus. Toch nan a nenga di acept’e. Pues ta pornada nan tawata studia pasobra nan no tawata sinsero ni dispuesto pa siña.—Deuteronomio 18:15; Lucas 11:52; Huan 7:47, 48.

9. Ki bon ehempel e apostelnan y e profetanan mas prome a pone?

⁹ E situacion tawata completamente diferente si serca Hesus su disipelnan, entre cua e apostelnan! Nan a studia “e scrituranan santo, cualnan por duna [hende] e sabiduria cu ta hiba na salbacion.” (2 Timoteo 3:15) Den esaki nan tawata manera e profetanan mas prome cu “a haci buskeda y investigacion cu tur diligencia.” E profetanan ei no a mira e investigacion ei como un solo periodo di estudio intenso pa un par di luna of un aña. Apostel Pedro ta bisa cu nan tawata “buscando”, particularmente tocante e Cristo y con su papel como salbado di humanidad a resulta den gloria p’e. Den su prome carta Pedro ta cita 34 biaha for di dies buki di Bijbel.—1 Pedro 1:10, 11.

10. Pakico cada un di nos mester ta interesa den un studio di Bijbel?

¹⁰ Claramente anto, e reinan di Israel di  antiguedad tawatin e tarea pa studia e Palabra di Dios cuidadosamente. Ta e patronchi aki Hesus a sigui. Y esnan cu lo goberna cu Cristo como rei den shelo tambe tin cu studia e Palabra di Dios. (Lucas 22:28-30; Romanonan 8:17; 2 Timoteo 2:12; Revelacion 5:10; 20:6) Awe, tur hende cu ta anhela pa ricibi e bendicionnan riba tera bou di gobernacion di Reino tin cu sigui e mesun patronchi aki di reinan.—Mateo 25:34, 46.

Instruccion pa e Reinan Ta Conta pa Abo Tambe

11. (a) Pa loke ta studiamento di Bijbel, ki peliger cristiannan ta core? (b) Kico nos tin cu puntra nos mes?

¹¹ Nos por bisa enfaticamente y cu tur sinseridad cu cada cristian berdadero mester examina Bijbel personalmente. Esei no ta algo cu bo tawatin cu haci solamente ora bo a studia Bijbel cu Testigonan di Yehova pa prome biaha. Cada un di nos mester ta determina pa evita di bira manera algun persona den tempo di apostel Pablo cu despues di poco tempo a cuminsa neglisha nan studio personal. Nan a siña “e principionan elemental di e palabra di Dios”, manera “siñansa elemental tocante di e Cristo.” Pero nan no a sigui studia y pesei no a “sigui padilanti pa yega na madures.” (Hebreonan 5:12–6:3) Pesei, nos por puntra nos mes: ‘Sea cu mi ta asociando cu e congregacion cristian pa un poco tempo of pa hopi aña caba, kico mi ta pensa di un studio personal di e Palabra di Dios? Pablo a pidi den oracion pa e cristiannan den su tempo “crece den e conocemento di Dios.” Mi ta mustra cu mi tin e mesun deseo ei?’—Colosencenan 1:9, 10.

12. Pakico ta importante pa nos cultiva un amor continuo pa e Palabra di Dios?

¹² Pa bo por haya bon custumbernan di studia ta importante pa bo siña stima e Palabra di Dios. Salmo 119:14-16 ta mustra cu loke por yuda bo haya delicia den e Palabra di Dios ta ora bo ta medita regularmente riba dje cu un proposito na mente. Y maske cuanto aña bo tin como cristian, esei ta conta pa bo tambe. E ehempel di Timoteo ta enfatisa esei. Corda cu aunke e anciano cristian aki tawata sirbiendo caba como “un bon solda di Cristo Hesus”, toch Pablo a urgie pa e haci tur su esfuerso pa e “parti e palabra di berdad na un manera corecto.” (2 Timoteo 2:3, 15; 1 Timoteo 4:15) Sin duda, bo maximo “esfuerso” ta ensera tambe desaroya un bon custumber di studia.

13. (a) Con bo por saca mas tempo pa studia Bijbel? (b) Ki cambionan lo bo por haci pa saca mas tempo pa studia?

¹³ Pa bo logra desaroya un bon custumber di studia, bo tin cu aparta tempo regularmente pa studia Bijbel. Con ta bai cu esei? Sea cual sea bo contesta franco, bo no ta kere cu ta cumbini bo dedica mas tempo na studio personal? Kisas bo ta puntra: ‘Unda mi ta saca tempo pa esei?’ Wel, algun persona a logra gana mas tempo pa studia Bijbel bon door di lanta un tiki mas tempran mainta. Tal bes nan ta lesa Bijbel pa 15 minuut of traha riba un proyecto di studio personal. Tin posibilidad tambe pa bo haci un ahuste chikito den bo programa semanal? Por ehempel, si bo tin e custumber di lesa corant casi tur dia of wak noticia anochi na television, ta posibel pa bo salta esei maske ta un dia pa siman? Lo bo por uza e tempo riba e dia ei pa studia Bijbel mas tanto. Si bo uza e tempo di lesa of wak noticia di un dia y dedica un 30 minuut asina na studio personal, lo bo gana mas cu 25 ora pa aña. Imagina bo e beneficionan di 25 ora mas na lesa of studia Bijbel! Ata un otro sugerencia aki: Den curso di otro siman, analisa bo actividadnan na fin di cada dia. Wak si bo por haya algo cu no ta indespensabel of cu bo por dedica menos tempo na dje pa asina bo sobra mas tempo pa lesa y studia Bijbel.—Efesionan 5:15, 16.

14, 15. (a) Pakico ta importante pa pone meta ora ta trata di studio personal? (b) Kico ta e posibel metanan relaciona cu lesamento di Bijbel?

¹⁴ Kico lo haci studiamento mas facil y mas interesante pa bo? Pone meta. Ki metanan rasonabel di studio lo bo por pone? Pa hopi  hende, un di e prome bon metanan ta esun di lesa Bijbel completo. Talbes te awor, bo a lesa seccionnan di Bijbel na algun ocasion y bo a beneficia di dje. Pakico no sea determina awor pa lesa Bijbel completo? Pa bo logra den esei, bo por cuminsa na lesa e cuater evangelionan, despues bo por pone bo pa lesa e resto di e Scritura Griego Cristian. Una bes bo a haya e satisfaccion den esei y e beneficionan cu e ta trece cu ne, bo siguiente paso lo por ta pa lesa un pa un e bukinan di Moises y e bukinan historico y yega te Ester. Ora bo logra esei, lo bo mira cu ta realistico pa completa e resto di Bijbel. Un señora cu a bira cristian tempo cu e tawatin rond di 65 aña di edad, a skirbi riba e kaft paden di su Bijbel e fecha cu el a cuminsa lesa y despues e fecha cu el a caba. Awor e tin cinco par di fecha! (Deuteronomio 32:45-47) Y en bes di lesa riba monitor di computer of papel di print, el a lesa direct for di Bijbel.

¹⁵ Algun persona cu ya a cumpli cu e meta di lesa Bijbel completo ta dal otro stap pa haci nan estudio continuo mas productivo y mas placentero. Un manera cu nan ta haci esei ta door di studia informacion tocante e buki di Bijbel prome cu nan lesa e buki mes. Den “Tur Scritura Ta Inspira pa Dios y Ta Beneficioso” y Perspicasia pa Comprende e Scritura, bo por haya excelente informacion tocante e marco historico, estilo y e beneficionan cu bo por saca for di cada buki di Bijbel. *

16. Ken su ehempel nos mester evita ora nos ta studia Bijbel?

¹⁶ Durante bo estudio, evita e metodo comun di e asina yama eruditonan of analistanan di Bijbel. Nan ta pone demasiado atencion riba analisa textonan como si fuera Bijbel ta di origen humano. Algun di nan ta purba saca afo ta pa ken cierto buki a ser skirbi, of ta imagina nan ki meta of punto di bista e autor humano di cada buki lo tawatin na mente. Door di tal rasonamento humano nan ta rebaha Bijbel na un simpel buki di historia of nan ta consider’e como e fuente di cambio den religionnan di mundo. Otro eruditonan ta dedica nan na estudio di palabra, manera e aspectonan linguistico di literatura di Bijbel. Nan ta ocupa nan mes mas cu studiamento di origen di palabra y nificacionnan Hebreo y Griego, cu e mensahe di Dios mes. Abo ta kere cu un metodo asina lo por duna bo un fe motivador y profundo?—1 Tesalonicencenan 2:13.

17. Pakico nos mester mira Bijbel como un buki cu tin un mensahe pa tur hende?

¹⁷ E conclusionnan cu e eruditonan ta saca ta sikiera valido? Acaso cada buki di Bijbel tin un punto clave so of ta intenciona pa un solo auditorio? (1 Corintionan 1:19-21) Echo ta cu e bukinan di e Palabra di Dios tin un balor permanente pa hende di tur edad y antecedente. Asta si un buki a ser dirigi inicialmente na un solo persona, manera Timoteo of Tito, of na un grupo particular, talbes e Galationan of e Filipensenan, nos tur por y mester studia e bukinan ei. Nan ta importante pa cada un di nos, y kisas un buki en particular ta trata varios tema cu ta na beneficio di varios auditorio. Si, e mensahe di Bijbel ta universal, y esaki ta yuda nos comprende pakico el a ser  traduci den e idiomanan di hende rond mundo.—Romanonan 15:4.

Beneficioso pa Abo y pa Otro Hende

18. Riba kico bo tin cu medita ora bo ta lesa e Palabra di Dios?

¹⁸ Ora bo ta studia, lo bo haya cu ta masha beneficioso pa trata na comprende Bijbel y tambe pa purba mira con tur e detayenan ta relaciona cu otro. (Proverbionan 2:3-5; 4:7) Loke Yehova a revela mediante su Palabra ta estrechamente liga cu su proposito. Pues segun cu bo ta lesa, relaciona e echonan y e conseho cu bo ta haya den Bijbel cu e proposito di Dios. Bo por puntra bo mes con un incidente, idea of profecia ta relaciona cu e proposito di Yehova. Puntra bo mes: ‘Kico esaki ta siña mi di Yehova? Con e ta relaciona cu e proposito cu e Reino di Dios lo cumpli cu ne?’ Tambe bo por medita riba: ‘Con mi por uza e informacion aki? Mi por uz’e pa siña of conseha otro hende basa riba e Scritura?’—Hosue 1:8.

19. Ken ta beneficia ora bo ta conta otronan di e cosnan cu bo a siña? Splica.

¹⁹ E beneficionan di pensa riba otro hende ta hopi. Ora bo ta lesa y studia Bijbel, lo bo siña cosnan nobo y haya un comprendemento mas profundo. Purba inclui esakinan den bo combersacionnan edificante cu miembronan di bo famia of cu otro hende. Si bo haci esei na oranan apropiado y na un manera modesto, sin duda e combersacionnan ei lo ta placentero. Ora bo ta conta na un manera sinsero y entusiasma tocante loke bo a siña of e aspectonan cu bo a haya interesante, probablemente e informacion ei lo haci un impresion riba otro hende. Mas cu esei, lo bo saca beneficio personal tambe. Den ki manera? Expertonan a remarca cu un persona lo corda loke el a siña of studia miho ora e ta uza of ripiti loke ta fresco ainda den su mente; por ehempel, ora e ta papia cu otro hende tocante eseinan. *

20. Pakico ta probechoso pa lesa Bijbel bes tras bes?

²⁰ Cada bes cu bo pasa door di un buki di Bijbel, sigur lo bo siña algo nobo. Cierto pasashinan  cu anteriormente no tawata nifica mucho pa bo, awor ta impresiona bo mas. Nan lo haya un nificacion nobo. Esaki mester subraya e echo cu e bukinan di Bijbel no ta simplemente literatura humano, sino tesoronan rico pa bo studia bes tras bes y saca beneficio. Corda cu asta un rei, manera David, mester a “les’e tur e dianan di su bida.”

21. Ki recompensa bo por spera di ricibi ora bo dedica mas tempo na studia e Palabra di Dios?

²¹ Si, esnan cu ta saca tempo pa studia Bijbel a fondo ta saca masha hopi probecho. Nan ta gana tesoro y comprendemento spiritual. Nan relacion cu Dios ta bira mas fuerte y mas intimo. Tambe nan lo por ta un gran yudansa pa miembro di famia, pa e rumannan den e congregacion cristian y pa esnan cu ainda tin cu bira adorado di Yehova.—Romanonan 10:9-14; 1 Timoteo 4:16.

[Nota]

Bo Ta Corda?

• Kico e reinan di Israel mester a haci?

• Ki ehempel Hesus y e apostelnan a pone pa loke ta studiamento di Bijbel?

• Ki ahustenan bo por haci pa aumenta e tempo cu bo ta dedica na studio personal?

• Cu ki actitud mental bo tin cu studia e Palabra di Dios?

[Preguntanan di Estudio]

[Cuadro na pagina 15]

“Den Nos Man”

“Si nos kier haya . . . un concordancia di Bijbel, no tin miho instrumento cu Internet. Pero si nos kier lesa Bijbel, studi’e, pensa riba dje, medita riba dje, nos mester tin e den nos man, pasobra esei ta e unico forma pa nos logra hay’e den nos mente y curason.”—Gertrude Himmelfarb, distinguido profesor pensiona di City University, New York.