Adora Dios “den Spirito”

“Cu ken boso kier compara Dios anto, cu cua imagen boso kier represent’e?”—ISAIAS 40:18, “BEIBEL NA PAPIAMENTU KORIENTE”

KISAS bo ta sinseramente combenci cu ta aceptabel pa uza prenchi den adoracion di Dios. Podise bo ta haya cu esaki ta trece bo mas serca di Esun cu ta scucha oracion, kende ta invisibel y lo por parce impersonal y dificil pa imagina.

Pero nos ta completamente liber pa scohe nos propio manera di acerca Dios? No ta Dios mester ta esun cu na final di cuenta ta dicidi kico ta aceptabel y kico no? Hesus a splica con Dios ta mira e asunto ora el a bisa: “Ami ta e caminda, y e berdad, y e bida; ni un hende no ta bin serca e Tata, sino pa medio di mi.” (Huan 14:6) E palabranan ei mes caba ta prohibi uzo di prenchi of cualkier otro obheto sagrado.

Kiermen anto cu tin un tipo di adoracion spesifico cu Yehova Dios ta acepta. Y cua esei ta? Na un otro ocasion Hesus a splica: “E ora lo yega, y ta awor, cu e adoradonan berdadero lo adora e Tata den spirito y berdad; pasobra ta hendenan asina e Tata ta busca pa ador’e. Dios ta spirito, y esnan cu ta ador’e mester adora den spirito y berdad.”—Huan 4:23, 24.

Un imagen traha por representa Dios—kende “ta spirito”? No. Maske con impresionante un prenchi por ta, nunca e no por iguala e gloria di Dios. Pues un imagen di Dios nunca lo por ta un berdadero representacion di dje. (Romanonan 1:22, 23) Un persona lo ta rindiendo ‘adoracion den berdad’ si e ta acerca Dios via un prenchi cu hende a traha?

Un Siñansa Biblico Bon Cla

E Lei di Dios a prohibi hende di traha imagen como obheto di adoracion. E di dos di e Dies Mandamentonan a decreta: “No traha  ningun imagen graba pa bo mes, ni nada semehante na loke tin ariba den shelo, ni abou riba tera, ni den e awa bou di tera. No adora nan ni sirbi nan.” (Exodo 20:4, 5) E Scritura Cristian inspira tambe ta manda: “Mi stimanan, hui for di idolatria.”—1 Corintionan 10:14.

Ta cierto cu hopi hende ta insisti cu nan uzo di imagen den adoracion no ta idolatria. Por ehempel cristiannan ortodox, hopi bes ta bisa cu no ta adora nan ta adora e prenchinan ora nan buig, hinca rudia y resa nan dilanti. Un pasto ortodox a skirbi: “Nos ta venera nan pasobra nan ta obhetonan santo, y pasobra nos tin respet profundo pa loke e Prenchinan ta representa.”

Pero toch ta keda e pregunta: Dios ta aproba pa uza prenchi supuestamente pa vener’e indirectamente? Ningun caminda den Bijbel nos no ta haya cu E ta autorisa esei. Ora e Israelitanan a traha un imagen di un bishe, supuestamente pa venera Yehova, El a desaproba esei totalmente y a bisa cu nan a corumpi nan mes.—Exodo 32:4-7.

E Peliger Scondi

Uzo di imagen den adoracion ta un practica peligroso. Facilmente hende por cai den e tentacion pa adora e obheto en bes di e Dios cu e obheto supuestamente ta representa. Cu otro palabra, e prenchi ta bira e obheto central pa idolatria.

 Esei a sosode cu varios obheto den tempo di e Israelitanan. Por ehempel, durante nan biahe door di e desierto, Moises a traha un colebra di brons. Originalmente, imagen di e colebra pega riba un palo a sirbi como un medio pa haya curacion. Esnan cu a ser castiga cu un mordi di colebra lo por a wak e colebra di brons y ser cura door di Dios. Pero ta parce cu despues cu e pueblo a establece nan mes den e Tera Priminti, nan a haci e colebra riba e palo aki un idolo, como si fuera ta e colebra di brons mes tawatin e poder pa cura. Nan tawata kima sencia p’e y asta a dun’e un nomber, Nehustan.—Numbernan 21:8, 9; 2 Reinan 18:4.

E arca di aliansa tambe e Israelitanan a purba uza como un talisman contra nan enemigonan, y esei tawatin resultado desastroso. (1 Samuel 4:3, 4; 5:11) Y den tempo di Yeremias, e ciudadanonan di Herusalem tawata mas interesa den e tempel cu den e Dios cu nan a adora den e tempel.—Yeremias 7:12-15.

E tendencia di adora cos en bes di Dios te ainda ta tur caminda. Investigado Vitalij Ivanovich Petrenko a bisa: “E prenchi . . . ta bira e obheto di adoracion y ta core peliger di ta idolatria . . . Mester admiti cu basicamente esaki ta un idea pagano cu nan a introduci den adoracion di prenchi.” Asina tambe e pasto Griego ortodox Demetrios Constantelos ta bisa den su buki Understanding the Greek Orthodox Church (Comprende e Iglesia Griego Ortodox): “Ta posibel pa un cristian haci un prenchi e obheto di adoracion.”

E argumento cu prenchinan ta simplemente yudansa pa adora Dios ta un argumento sumamente cuestionabel. Dicon? Wel, bo no a  ripara cu hende ta considera cierto prenchinan di Maria of di “santo” como mas digno di debocion y mas util cu otro prenchinan di e mesun persona cu tin hopi tempo morto? Por ehempel, un cierto prenchi cu ta representa Maria na Tínos, Grecia, tin su propio debotonan ortodox cu ta siguie na comparacion cu e debotonan mesun fiel di un prenchi cu ta representa Maria na Soumela, den parti nort di Grecia. Ambos grupo ta kere cu nan prenchi ta superior y ta haci milagernan mas impresionante cu e otro, maske tur dos ta representa e mesun persona cu tin hopi tempo morto. Pues den practica, hende ta atribui berdadero poder na cierto prenchinan y ta adora nan.

Mester Resa na “Santo” of na Maria?

Pero kico di e veneracion di personanan individual, manera Maria of un “santo”? Ora Hesus a contesta un tentacion di Satanas, el a referi na Deuteronomio 6:13 y a bisa: “Adora SEÑOR bo Dios, y sirbi E so.” (Mateo 4:10) Mas despues el a bisa cu adoradonan berdadero mester adora “e Tata”, y ningun otro persona. (Huan 4:23) Conciente di esaki, un angel a scual apostel Huan pasobra Huan a purba ador’e, y el a bisa: “No haci e cos ei . . . adora Dios.”—Revelacion 22:9.

Ta corecto pa resa na Hesus su mama humano, Maria, of na cierto “santo”, pidiendo nan pa roga Dios pa nos? Bijbel ta contesta bon cla: “Ta un Dios so tin, y un Mediador tambe entre Dios y hende, e hende Cristo Hesus.”—1 Timoteo 2:5.

Proteha Bo Relacion cu Dios

Uzo di prenchi den adoracion no por yuda hende haya Dios su aprobacion ni gana salbacion ya cu esei ta contra di e siñansa bon cla di Bijbel. Di otro banda, Hesus a bisa cu pa haya bida eterno nos mester gana conocemento di e unico Dios berdadero, y siña conoce su personalidad inigualabel y tambe su proposito y e manera cu El a trata hende. (Huan 17:3) Prenchinan cu no ta mira, sinti ni papia no por yuda un persona siña conoce Dios y ador’e na un manera aceptabel. (Salmo 115:4-8) E educacion sumamente importante ei ta disponibel solamente mediante un studio di e Palabra di Dios, Bijbel.

Fuera cu adoracion di prenchi no ta duna ningun beneficio, e por ta peligroso tambe den sentido spiritual. Con asina? Principalmente pasobra e por kibra bo relacion cu Yehova. Dios a bisa di Israel, ‘cu a proboc’e na rabia cu cosnan abominabel’: “Lo mi sconde mi cara pa nan.” (Deuteronomio 32:16, 20, 21) Pa nan por a drecha nan relacion cu Dios nan mester a ‘deshaci di nan idolonan.’—Isaias 31:6, 7.

Pesei e siguiente conseho biblico ta masha na su luga: “Yiu chikitonan, warda boso di idolonan”!—1 Huan 5:21.

[Cuadro na pagina 6]

Yuda pa Adora Dios “den Spirito”

Olivera tawata un miembro deboto di Iglesia Ortodox na Albania. Ora cu na 1967 e pais a prohibi religion, Olivera a sigui practica su religion den secreto. E tawata uza gran parti di su pida pension pa cumpra prenchi di oro y plata, sencia y bela. E tawata sconde nan den su cama y hopi bes a drumi den un stul banda di e cama pasobra e tawatin miedo pa hende mira nan of horta nan. Ora Testigonan di Yehova a bishita Olivera na comienso di añanan ’90, el a reconoce e berdad biblico den nan mensahe. El a mira cu Bijbel ta bisa cu adoracion berdadero mester ta “den spirito”, y el a siña kico Dios ta pensa di e uzo di prenchi. (Huan 4:24) E Testigo cu tawata studia Bijbel cu ne a ripara cu cada bes cu e bishita Olivera tawatin menos prenchi den cas. Finalmente no a keda niun. Despues cu Olivera a batisa el a bisa: “Awe mi tin Yehova su spirito santo en bes di prenchinan inutil. Mi ta masha gradicido cu mi por tin su spirito santo sin mester uza prenchi.”

Athena, cu ta di e isla Lesbos na Grecia, tawata un miembro masha activo mes di Iglesia Ortodox. E tawata canta den cor y a sigui tradicion religioso a pie de la letra, entre otro, e uzo di prenchi. Testigonan di Yehova a yuda Athena realisa cu no ta tur loke el a siña tawata di acuerdo cu Bijbel. Esaki a inclui e uzo di prenchi y crus den adoracion. Athena a insisti pa e mes investiga e origen di e obhetonan religioso aki. Despues di a investiga varios buki di referencia, el a keda combenci cu e obhetonan aki no a origina di e prome cristiannan. Su deseo pa adora Dios “den spirito” a motiv’e pa deshaci di su prenchinan, apesar cu nan tawata bal hopi placa. Pero Athena gustosamente a hiba cualkier perdida basta e por a adora Dios den un manera limpi y aceptabel.—Echonan 19:19.

[Cuadro/Plachi na pagina 7]

Prenchi Como Arte?

Ultimo añanan, hende rond mundo a cuminsa colecciona prenchi ortodox. Por lo general coleccionistanan ta considera prenchi no como un obheto religioso sagrado, sino como un obra di arte cu ta refleha e cultura di e era bizantino. Hopi bes bo por haya e prenchinan religioso aki ta decora cas of oficina di un persona cu ta bisa cu e no ta kere den Dios.

Sinembargo, cristiannan no ta lubida e proposito principal di prenchi. Prenchi ta un obheto di adoracion. Aunke cristiannan ta laga cada ken cu su derecho di tin prenchi, nan mes personalmente no tin prenchi den nan pocesion, ni sikiera como obra di arte. Esaki ta na harmonia cu e siguiente principio cu ta para skirbi na Deuteronomio 7:26: “No trece un abominacion [imagennan uza den adoracion] den bo cas, pa bo no bin bou di maldicion mescos cu ne; odi’e di henter bo curason y aborec’e di henter bo curason.”

[Plachi na pagina 7]

Dios no a permiti uzo di imagen den adoracion

[Plachi na pagina 8]

Conocemento di Bijbel ta yuda nos adora Dios den spirito