E Gloria di Yehova Ta Briya Riba Su Pueblo

“Lo bo tin [Yehova] pa un lus eterno.”—ISAIAS 60:20.

1. Con Yehova ta bendiciona su pueblo fiel?

YEHOVA “ta hiba gusto den su pueblo; E ta dorna e aflihinan cu salbacion.” (Salmo 149:4) Asina e salmista di pasado a bisa, y historia a confirma su palabranan. Ora Yehova su pueblo ta fiel, E ta cuid’e, hacie productivo y proteh’e. Den tempo antiguo, El a duna nan victoria riba nan enemigonan. Awe, E ta mantene su pueblo spiritualmente fuerte y ta sigura nan di salbacion a base di e sacrificio di Hesus. (Romanonan 5:9) E ta haci esaki pasobra nan ta bunita den su bista.

2. Aunke Dios su pueblo ta confronta oposicion, di kico nan ta sigur?

² Claro cu den un mundo cu ta den scuridad, hende cu ta “hiba un bida santo” lo confronta oposicion. (2 Timoteo 3:12) Yehova ta tuma nota di hende cu ta bai contra su sirbidonan y ta spierta nan: “E nacion y e reino cu no kier sirbi bo lo perece, y e nacionnan lo keda ruina completamente.” (Isaias 60:12) Awe oposicion ta ser manifesta den varios manera. Den algun pais, hende cu ta contra ta purba restringi of prohibi e adoracion cu cristiannan sinsero ta rindi Yehova. Den otro paisnan, fanaticonan ta ataca e adoradonan di Yehova fisicamente y ta kima nan propiedad. Pero corda cu Yehova ya caba a determina e resultado di cualkier oposicion cu tin contra e cumplimento di su boluntad. Opositornan lo fracasa. Esnan cu ta bringa contra Sion, contra su yiunan riba tera cu ta represent’e, no por tin exito. Esei no ta un garantia alentador di nos gran Dios, Yehova?

Bendiciona Mas di Loke Nan A Spera

3. Con e profecia ta ilustra e beyesa y productividad di hende cu ta adora Yehova?

³ Echo ta cu durante e ultimo dianan di e sistema di cosnan aki, Yehova a bendiciona su pueblo mas di loke nan a spera. Specialmente su luga di adoracion y tambe esnan cu ta carga su nomber, Yehova a embeyece progresivamente. Segun e profecia di Isaias, Yehova ta bisa Sion: “E gloria di Libanon lo bin serca bo, e palonan di pino, bohes y cipres, tur hunto, pa haci e luga di mi santuario bunita; y lo mi haci e luga di mi pianan glorioso.” (Isaias 60:13) Seronan cubri cu mondi berde ta brinda un bista magnifico. Pesei e palonan berde yen di blachi ta un simbolo apropiado di e beyesa y productividad  di hende cu ta adora Yehova.—Isaias 41:19; 55:13.

4. Kico ta e “santuario” y e “luga di [Yehova su] pianan”, y con esakinan ta ser haci bunita?

⁴ Kico ta e “santuario” y e “luga di [Yehova su] pianan” menciona na Isaias 60:13? Nan ta referi na e pationan di Yehova su gran tempel spiritual, cu ta e areglo pa acerca Yehova den adoracion mediante Hesucristo. (Hebreonan 8:1-5; 9:2-10, 23) Yehova a yega di declara cu su proposito ta pa glorifica e tempel spiritual ei door di saca hende for di tur nacion pa bin rindi adoracion einan. (Hageo 2:7) Mas prome Isaias mes a mira multitud di hende for di tur nacion ta basha bai na Yehova su sero eleva di adoracion. (Isaias 2:1-4) Cientos di añanan despues, apostel Huan a mira den vision “un multitud grandi cu ningun hende no por a conta, di tur nacion y tur tribu y pueblo y lenga.” E multitud grandi aki tawata para “dilanti di e trono di Dios . . . ta sirbie di dia y anochi den su tempel.” (Revelacion 7:9, 15) Segun cu e profecianan aki a cumpli den nos tempo, nos por a mira personalmente con e cas di Yehova ta ser haci bunita.

5. Con e condicion di e yiunan di Sion a mehora considerablemente?

⁵ Door di tur esaki e condicion di Sion a mehora considerablemente! Yehova ta bisa: “Maske bo a keda bandona y odia, sin cu ningun hende ta pasa door di bo, lo Mi haci bo un orguyo eterno, un goso di generacion pa generacion.” (Isaias 60:15) Yegando na fin di e prome guera mundial, “e Israel di Dios” en berdad a experencia un periodo di desolacion. (Galationan 6:16) El a sinti su mes “bandona”, pasobra su yiunan riba tera no a compronde bon cla kico tawata Dios su boluntad pa nan. Pero na 1919, Yehova a rebiba su sirbidonan ungi, y djei padilanti El a bendiciona nan cu un prosperidad spiritual maravioso. Ademas, bo no ta haya e promesa den e versiculo aki hopi animante? Yehova lo considera Sion como “un orguyo.” Si, e yiunan di Sion—y asta Yehova mes—lo ta orguyoso di Sion. Tambe Sion lo ta un motibo di “goso” abundante. Y esei lo no ta djis pa un par di dia. E condicion privilegia di Sion, representa pa su yiunan riba tera, lo dura “di generacion pa generacion.” Nunca lo e stop.

6. Con cristiannan berdadero ta uza recursonan di e nacionnan?

⁶ Scucha awor un otro promesa di Dios. Papiando cu Sion, Yehova ta bisa: “Tambe lo bo chupa lechi di nacionnan, y lo chupa pecho  di reinan; e ora ei lo bo sa cu Ami, SEÑOR, ta bo Salbador y bo Redentor, Esun Poderoso di Yacob.” (Isaias 60:16) Den ki sentido Sion ta “chupa lechi di nacionnan” y “pecho di reinan”? Den e sentido cu cristiannan ungi y nan compañeronan cu ta forma e “otro carnenan” ta uza recursonan balioso di e nacionnan pa adelanto di adoracion puro. (Huan 10:16) Contribucionnan financiero duna boluntariamente ta haci posibel pa efectua e gran obra internacional di predica y siña hende. Uzando tecnologia moderno na un manera sabi, a bira mas facil pa publica Bijbel y literatura biblico den cientos di idioma. Awe, e berdad di Bijbel ta disponibel na mas hende cu nunca. Ciudadanonan di masha hopi nacion ta siñando cu Yehova en berdad ta e Salbador, ya cu t’e a libra su sirbidonan ungi for di cautiverio spiritual.

Progreso Organisatorio

7. Ki tremendo progreso e yiunan di Sion a experencia?

⁷ Yehova a embeyece su pueblo den un otro manera mas. El a bendiciona nan cu progreso organisatorio. Na Isaias 60:17, nos ta lesa: “Na luga di brons lo Mi trece oro, y na luga di hero lo Mi trece plata, na luga di palo, brons, y na luga di piedra, hero. Lo Mi haci pas bira bo administradonan, y husticia bira bo mayordomonan.” Remplasa brons cu oro ta un mehoransa, y esei ta conta tambe pa e otro materialnan menciona. Na harmonia cu esaki, e Israel di Dios a conoce mehoransa continuo den areglonan organisatorio durante e ultimo dianan. Considera un par di ehempel.

8-10. Describi algun mehoransa di areglonan organisatorio cu a tuma luga di 1919 padilanti.

⁸ Prome cu 1919, e congregacionnan di e pueblo di Dios a ser administra door di anciano y diacono, kendenan tur a wordo eligi democraticamente door di miembronan di e congregacion. Di 1919 en adelante, “e esclabo fiel y prudente” a cuminsa nombra un director di sirbishi den cada congregacion pa supervisa e actividadnan di sirbishi di veld. (Mateo 24:45-47) Sinembargo, den hopi congregacion e areglo ei no a funciona masha bon pasobra algun anciano eligi no tawata apoya e trabou di sirbishi plenamente. Pesei na 1932 a instrui e congregacionnan pa stop di eligi anciano y diacono. Na luga di esei nan mester a eligi rumannan homber pa sirbi den un comite di sirbishi hunto cu e director di  sirbishi. Esei tawata manera “brons” na luga di “palo”, pues, un gran mehoransa!

⁹ Na 1938 tur congregacion rond mundo a bai di acuerdo pa acepta un areglo mas miho, uno cu tawata mas na harmonia cu e patronchi biblico. Nan a confia e supervision di congregacion na un sirbido di compania hunto cu otro sirbidonan—tur nombra bou di supervision di e esclabo fiel y prudente. Di e manera ei tur sirbido den congregacion a ser nombra di un manera teocratico, y a stop di eligi nan. Esei tawata manera “hero” na luga di “piedra” of “oro” na luga di “brons.”

¹⁰ Djei padilanti nan a sigui haci progreso. Por ehempel, na 1972 nan a bin comprende cu tawata miho pa un cuerpo di anciano nombra teocraticamente supervisa e congregacionnan y no laga un solo anciano tin autoridad riba e sobranan. Esaki tawata casi similar na e manera cu tawata dirigi e congregacionnan cristian di prome siglo. Ademas, rond di dos aña pasa, nan a dal un paso mas di progreso. Tawatin un ahuste den e hunta di director di cierto corporacionnan legal, cu a haci posibel cu e Cuerpo Gobernante por concentra mas plenamente riba e interesnan spiritual di e pueblo di Dios en bes di ser distrai door di asuntonan legal diario.

11. Ken tawata responsabel pa e cambionan organisatorio den e pueblo di Yehova, y den kico e cambionan aki a resulta?

¹¹ Ken ta responsabel pa e cambionan progresivo aki? Definitivamente ta Yehova Dios. Ta E ta esun cu ta bisa: “Lo Mi trece oro.” Y E ta esun cu ta agrega: “Lo Mi haci pas bira bo administradonan, y husticia bira bo mayordomonan.” Si, ta Yehova ta responsabel pa e supervision di su pueblo. E progreso organisatorio aki cu a ser profetisa ta un manera mas cu Yehova ta embeyece su pueblo. Y como resultado di esei, Testigonan di Yehova a ser bendiciona den hopi manera. Na Isaias 60:18, nos ta lesa: “Violencia lo no wordo tendi mas den bo tera, ni ruina ni destruccion paden di bo fronteranan; ma lo bo yama bo murayanan ‘salbacion’, y bo portanan ‘alabansa.’” Esta bunita e palabranan ei ta! Pero con nan a cumpli?

12. Con bin pas ta reina entre cristiannan berdadero?

¹² Cristiannan berdadero ta acudi na Yehova pa haya instruccion y guia, y e resultado ta manera Isaias a profetisa: “SEÑOR lo siña tur bo yiu hombernan, y e prosperidad [of, pas, NW] di bo yiu hombernan lo ta grandi.” (Isaias 54:13) Ademas, Yehova su spirito ta obra riba su pueblo, y un di e frutanan di e spirito ei ta pas. (Galationan 5:22, 23) E pas cu e pueblo di Yehova tin a consecuencia di esei ta haci nan un oasis refrescante den un mundo violento. Nos condicion pacifico, cu ta basa riba e amor cu cristiannan berdadero tin pa otro, ta un muestra adelanta con bida den e mundo nobo lo ta. (Huan 15:17; Colosensenan 3:14) Un cos ta sigur. Ta masha  emocionante cu cada un di nos por disfruta di e pas ei y contribui na dje ya cu e ta trece alabansa y honor pa nos Dios y ta un di e caracteristicanan principal di nos paradijs spiritual!—Isaias 11:9.

E Lus di Yehova Lo Sigui Briya

13. Dicon nos por ta sigur cu e lus di Yehova nunca lo stop di briya riba su pueblo?

¹³ E lus di Yehova lo sigui briya riba su pueblo? Si! Na Isaias 60:19 y 20, nos ta lesa: “Solo lo no ta bo lus mas den dia, ni claridad di luna lo no briya riba bo; pasobra SEÑOR lo ta bo lus eterno, y bo Dios lo ta bo gloria. Bo solo lo no baha mas, ni bo luna lo no mengua; pasobra lo bo tin SEÑOR pa un lus eterno, y e dianan di bo lamentacion lo termina.” Una bes e “lamentacion” di e exiliadonan spiritual a termina na 1919, e lus di Yehova a cuminsa briya riba nan. Mas cu 80 aña despues, nan ta disfruta keto bai di Yehova su aprobacion segun cu su lus ta sigui briya. Y esei lo no stop. Relaciona cu su adoradonan, Dios lo no “baha” manera solo ni “mengua” manera luna. Mas bien, lo E sigui tira lus riba nan pa tur eternidad. Ki un garantia maravioso esei ta pa nos cu ta bibando den e ultimo dianan di e mundo scur aki!

14, 15. (a) Den ki sentido henter e pueblo di Dios ta “husto”? (b) E otro carnenan ta spera ansiosamente riba ki cumplimento importante relaciona cu Isaias 60:21?

¹⁴ Tende awor un promesa mas cu Yehova ta duna relaciona cu e Israel di Dios, Sion su representante riba tera. Isaias 60:21 ta bisa: “Anto henter bo pueblo lo ta husto; nan lo posee e tera pa semper, e rama cu mi a planta, e obra di mi mannan, pa mi wordo glorifica.” Na 1919 ora cristiannan ungi a ser restaura na actividad, nan tawata un grupo di hende remarcabel. Den un mundo sumamente pecaminoso, nan a ser declara “husto” a base di nan fe firme den e sacrificio di rescate di Cristo Hesus. (Romanonan 3:24; 5:1) Anto mescos cu e Israelitanan libra for di cautiverio babilonico, nan a tuma pocesion di un “tera”—un tera spiritual of un area di actividad—caminda nan lo a disfruta di un paradijs spiritual. (Isaias 66:8) E bunitesa paradisico di e tera ei nunca lo disparce pasobra, distinto di Israel di antiguedad, e Israel di Dios como nacion lo no bira infiel. Nan fe, nan perseverancia y nan celo nunca lo stop di trece honor na e nomber di Dios.

 ¹⁵ Tur miembro di e nacion spiritual ei ta den e aliansa of pacto nobo. Nan tur tin e lei di Yehova skirbi riba nan curason, y Yehova, a base di e sacrificio di rescate di Hesus, a pordona nan picanan. (Yeremias 31:31-34) E ta declara nan husto como “yiu” y ta trata nan como si fuera nan ta perfecto. (Romanonan 8:15, 16, 29, 30) Nan compañeronan cu ta e otro carnenan tambe a ser pordona di nan picanan a base di e sacrificio di Hesus y, mescos cu Abraham, nan a ser declara husto como amigo di Dios mediante fe. “Nan a laba nan pañanan y a haci nan blanco den e sanger di e Lamchi.” Y e otro carnenan aki ta spera ansiosamente riba un otro bendicion extraordinario. Despues di sobrevivi e “gran tribulacion”—of despues di ser resusita—nan lo mira un cumplimento literal di e palabranan di Isaias 60:21 ora cu henter e tera bira un paradijs. (Revelacion 7:14; Romanonan 4:1-3) Na e tempo ei, “e humildenan lo hereda e tera, y lo deleita nan mes den pas abundante.”—Salmo 37:11, 29.

E Aumento Ta Sigui

16. Ki promesa remarcabel Yehova a haci, y con el a cumpli?

¹⁶ Den e ultimo versiculo di Isaias 60, nos ta lesa Yehova su ultimo promesa den e capitulo aki. E ta bisa Sion: “Esun di mas chikito lo bira un tribu, y esun di mas menos lo bira un nacion poderoso. Na su debido tempo, Ami, SEÑOR, lo pura haci esaki.” (Isaias 60:22) Yehova a cumpli cu su palabra den nos tempo. Ora El a restaura esnan ungi na actividad na 1919, nan tawata poco na cantidad, di berdad un grupo “chikito.” Nan cantidad a aumenta segun cu a trece mas Israelita spiritual aden. Despues e otro carnenan a cuminsa basha bin join nan na un cantidad cada bes mas grandi. E pas di e pueblo di Dios—e paradijs spiritual cu tin den nan “tera”—a atrae asina tanto hende di curason honrado cu “esun di mas chikito” realmente a bira “un nacion poderoso.” Actualmente e poblacion di e “nacion” aki—cu ta consisti di e Israel di Dios y mas cu seis miyon ‘stranhero’ dedica—ta mas grandi cu di hopi nacion independiente na mundo. (Isaias 60:10) Tur e ciudadanonan di e “nacion” aki ta yuda refleha e lus di Yehova, y esei ta haci nan tur bunita den su bista.

17. Ki efecto e consideracion aki di Isaias capitulo 60 tawatin riba bo?

¹⁷ E consideracion di e puntonan sobresaliente aki di Isaias capitulo 60 no a haci nos fe mas firme? Ta un consuelo pa mira con asina hopi tempo di antemano Yehova tawata sa cu su pueblo lo a bai den exilio spiritual y despues ser restaura. Nos ta keda asombra con asina hopi tempo di antemano Yehova a premira e tremendo aumento di adoradonan berdadero den nos tempo. Ademas ta un gran consuelo pa corda cu Yehova lo no bandona nos! Ta masha amoroso di su parti pa sigura nos cu e portanan di e “stad” semper lo keda habri pa ricibi cordialmente esnan ‘cu tin e disposicion corecto pa bida eterno.’ (Echonan 13:48, NW) Yehova lo sigui briya riba su pueblo. Sion lo sigui ta un motibo di “orguyo” segun cu su yiunan ta laga nan lus briya mas y mas cla. (Mateo 5:16) Un cos ta sigur. Nos ta mas determina cu nunca pa keda pega cu e Israel di Dios y aprecia e privilegio cu nos tin di refleha e lus di Yehova!

Bo Por Splica?

• Relaciona cu oposicion, di kico nos ta sigur?

• Den ki sentido e yiunan di Sion a “chupa lechi di nacionnan”?

• Den ki maneranan Yehova ‘a trece brons na luga di palo’?

• Cua ta e dos cualidadnan cu Isaias 60:17 y 21 ta enfatisa?

• Den ki sentido “esun di mas chikito” a bira “un nacion poderoso”?

[Preguntanan di Estudio]

[Cuadro/Plachi na pagina 18]

E PROFECIA DI ISAIAS—Lus pa Henter Humanidad

Gran parti di e informacion den e articulonan aki a ser presenta den un discurso durante Congresonan di Districto “Siñadonan di e Palabra di Dios” di aña 2001/02. Na final di e discurso e orado den mayoria pais a anuncia publicacion di e buki nobo E Profecia di Isaias—Lus pa Henter Humanidad, Volumen Dos. E aña anterior a publica E Profecia di Isaias—Lus pa Henter Humanidad, Volumen Un. Cu e buki nobo aki nos tin awor na nos disposicion un consideracion actualisa di casi tur versiculo di e buki di Isaias. E dos volumennan aki a resulta di ta un excelente yudansa pa profundisa nos comprendemento y aprecio pa e buki profetico di Isaias, un buki cu ta yuda haci nos fe mas firme.

[Plachi na pagina 15]

Apesar di oposicion violento, ‘Yehova ta dorna su pueblo cu salbacion’

[Plachi na pagina 16]

E pueblo di Dios ta uza recursonan balioso di e nacionnan pa adelanto di adoracion puro

[Plachi na pagina 17]

Yehova a bendiciona su pueblo cu progreso organisatorio y pas