E Origen Antiguo di Prenchi Religioso

“Prenchi ta un manera di uni nos cu e bondad y santidad di Dios y Su Santonan.”—ARSOBISPADO GRIEGO ORTODOX DI AUSTRALIA

RIBA un dia calor den augustus, e rayonan di solo tawata kima riba e trapi di cement cu ta hiba na e monasterio di “Santisima Mama di Dios” na e isla Tínos, den Lama Egeo. E calor sofocante no a kita nada di e determinacion di e mas cu 25.000 peregrinonan deboto di e religion Griego Ortodox cu tawata cana poco poco pa yega na e prenchi tur dorna di e mama di Hesus.

Un hobensita lam, claramente yen di dolo y cu un cara di desesperacion, ta gatia riba su rudianan cu ta sangra pisa. No leu for di dje, un señora bieu agota cu a biaha for di e otro punta di e pais, ta forsa su pianan pa sigui cana. Un homber di rond di 40 aña, papa soda ta purba pasa ansiosamente door di e multitud cu ta pusha den otro. Tur hende kier yega pa nan sunchi un prenchi di Maria y hinca rudia dilanti dje.

No tin duda cu e hendenan sumamente religioso aki ta sinsero den nan deseo pa adora Dios. Pero cuanto di nan ta conciente cu veneracion di prenchi religioso a cuminsa hopi siglo prome cu cristianismo tawata existi?

Popularidad di Prenchi

Den e mundo ortodox, tin prenchi religioso tur caminda. Den edificionan di iglesia, prenchi di Hesus, di Maria y di hopi “santo” ta ocupa un luga central. Hopi bes e creyentenan ta honra e prenchinan cu sunchi, sencia y bela sendi. Ademas, casi tur cas ortodox tin nan mes huki di prenchi, caminda nan ta resa. Ta masha normal pa un cristian ortodox bisa cu ora e ta venera un prenchi, e ta sintie mas serca Dios. Hopi di nan ta kere cu prenchi a haya gracia dibino y poder milagroso.

Probablemente e creyentenan ei lo keda sorprendi di sa cu e cristiannan di prome siglo no a aproba uzo di prenchi den adoracion. E buki Byzantium ta bisa: “E prome cristiannan, cu a hereda for di e Hudiunan un sintimento di repugnancia pa cu idolatria, a desaproba tur veneracion di prenchi di personanan santo.” E mesun buki ta remarca: “For di Siglo 5 padilanti, prenchi of imagen . . . a bira mas y mas popular den adoracion publico y priva.” Si no ta den cristianismo di prome siglo uzo di prenchi religioso a origina, ta na unda anto?

 Yegando na e Origen di Prenchi Religioso

E investigado Vitalij Ivanovich Petrenko a skirbi: “Uzo di imagen y su tradicionnan ta bini for di hopi tempo prome cu e era cristian y a ‘origina den paganismo.’” Hopi historiado ta di acuerdo cu esei, y ta bisa cu adoracion di prenchi a origina den e religionnan di Babilonia, Egipto y Grecia. Por ehempel, Grecia di pasado tawatin hopi simbolo religioso den forma di imagen. Supuestamente, esakinan tawata dota cu poder dibino. Tambe tawata reina e pensamento cu no ta man di hende a traha algun di e imagennan aki sino cu nan a cai for di shelo. Durante cierto fiestanan special, nan tawata cana cu e imagennan religioso ei den un procesion rond di e stad y ofrece sacrificio na nan. “Aunke filosofonan Griego a haci intento . . . pa distingui entre e dios y su imagen, hende deboto tawata mira imagen religioso como un dios mes”, segun Petrenko.

Con e ideanan y practicanan ei a filtra drenta cristianismo? E investigado Petrenko a remarca cu den e siglonan despues cu e apostelnan di Cristo a muri, specialmente na Egipto, “creencianan cristian a haya nan confronta cu un ‘mescla di tradicionnan pagano’—cu a consisti di custumber- y creencianan Egipcio, Griego, Hudiu, Oriental y Romano cu tawata ser practica hunto cu e fe cristian.” Consecuencia di esei tawata cu ‘artesanonan cristian a adapta un metodo di union di fe y a haci uzo di simbolonan pagano, dunando nan un nificacion nobo den cristianismo, sinembargo sin purifica nan totalmente for di influencia pagano.’

No a dura mucho cu prenchinan a haya un luga importante den tanto luganan publico religioso como den casnan priva. Den e buki The Age of Faith (Epoca di Fe), historiado Will Durant ta describi con esaki a tuma luga. E ta bisa: “Segun e cantidad di santonan a multiplica, a surgi e necesidad pa identifica nan y corda nan; a produci prenchi di nan y di Maria na gran cantidad; y den e caso di Cristo, no ta Su aparencia fisico imagina so a bira obheto di veneracion sino tambe Su crus. Asta pa mente simpel, e prenchinan a bira talisman magico. E pueblo su  habilidad natural di imaginacion a comberti relikia-, prenchi- y imagennan santo den obhetonan di adoracion; hende tawata buig dilanti nan, sunchi nan, sende bela y kima sencia nan dilanti, corona nan cu flor, y busca milager for di nan influencia sobrenatural. . . . Na varios ocasion e Tatanan y consilionan di Iglesia a splica cu e imagennan mes no tawata dios, sino simplemente algo pa yuda hende corda riba dios; e pueblo si no kier a haci e distincion ei.”

Awe, hopi hende cu ta uza prenchi religioso tambe lo ta bisa cu e imagennan ta simplemente obhetonan di respet, y no pa adora. Kisas nan ta pretende cu pintura religioso ta un yudansa legitimo—asta indespensabel—pa adora Dios. Talbes bo ta pensa mescos. Pero e pregunta ta: Con Dios ta mira esaki? Ta existi e posibilidad cu venera un prenchi ta mescos cu ador’e? E practicanan ei realmente por tin un peliger scondi den nan?

[Cuadro/Plachi na pagina 4]

Prenchi Religioso

Mientras cu hopi hende den religion Catolico Romano ta uza imagen den adoracion, Iglesia Ortodox tin hopi prenchi of cuadro (yama tambe icono) di Cristo, di Maria, di “santo”, di angel, di personahenan y susesonan di Bijbel, of di susesonan den historia di Iglesia Ortodox. Por lo general ta pinta e prenchinan religioso aki riba tabla di palo portatil.

Segun Iglesia Ortodox, “den Prenchi di e Santonan, e figuranan no ta parce figura di hende normal di carni y sanger.” Generalmente “no tin sombra, ni manera pa mustra di dia y anochi.” Tambe hende ta kere cu e palo y ferf di un prenchi por “yena cu e presencia di Dios.”

[Plachi na pagina 4]

Uzo di imagen a origina di custumbernan pagano

[Reconocemento di plachi na pagina 3]

© AFP/CORBIS