Storia di Bida

Nos Hermandad Mundial A fortalece Nos

SEGUN E RELATO DI THOMSON KANGALE

Mi a haya invitacion pa asisti na un programa di dedicacion dia 24 di april 1993 di un compleho nobo di sucursal cu ta consisti di 13 edificio na Lusaka, Zambia. Door cu mi tawatin dificultad pa cana, e ruman mohe cristian cu tawata duna nos un tour den e edificionan a puntra mi cariñosamente: “Ruman kier pa mi bai cu un stul pa ruman, asina ruman por sosega de bes en cuando?” Mi ta un hende colo scur, y e ta blanco, pero esei no tawata importante p’e. Profundamente conmovi mi a gradicie, pasobra su bondad a haci posibel cu mi por a haya tour den tur e edificionan.

ATRAVES di añanan, experencianan manera esaki a conmove mi curason, reconfirmando asina e conviccion cu mi tin, esta, cu den e asociacion cristian di Testigonan di Yehova bo ta haya e amor cu, segun Cristo, lo a identifica su berdadero siguidonan. (Huan 13:35; 1 Pedro 2:17) Laga mi conta boso con mi a conoce e cristiannan aki aya na 1931, e aña cu nan a declara publicamente cu nan ta desea di ser conoci bou di e nomber basa riba Bijbel, Testigonan di Yehova.—Isaias 43:12.

Mi Ministerio Inicial na Africa

Na november 1931, mi tawatin 22 aña di edad y mi tawata biba den e region di Copperbelt di Nort Rodesia (awe Zambia). Un amigo cu kende mi tawata hunga bala a sera mi conoci cu e Testigonan. Mi a asisti na algun di nan  reunionnan y a skirbi e oficina di sucursal na Kaapstad, Sur Africa, y a pidi nan e publicacion pa studia Bijbel E Harpa di Dios. * E buki tawata na Ingles, y mi a hay’e dificil pa comprend’e pasobra mi no tawata sa mucho Ingles.

Den region di Copperbelt, situa rond di 240 kilometer suitwest di Lago Bangweulu, serca di e region caminda mi a crece, tawatin hopi hende di otro provincia ta traha den minanan di oro. Varios grupo di Testigo tawata topa einan regularmente pa studia Bijbel hunto. Despues di un par di tempo mi a muda for di Kitwe bai Ndola, un pueblo den bicindario, y mi a cuminsa asocia cu un grupo di Testigo einan. E tempo ei mi tawata capitan di un team di futbol cu tawata yama Prins di Wales. Tambe mi a traha como cria di cas serca un manager blanco di e Corporacion di Lagonan Africano, un compania cu tawatin un cadena di negoshi na Africa central.

Mi no tawatin masha scol, y ta for di e Europeonan cu tawata traha hunto cu mi, mi a siña e poco Ingles cu mi tawata sa. Sinembargo, mi tawatin masha gana di haya mas educacion y mi a inscribi mi mes na un scol na Plumtree, na Sur di Rodesia (awor Zimbabwe). Sinembargo, mientras tanto mi a bolbe skirbi e oficina di sucursal na Kaapstad pa di dos bes. Mi a laga nan sa cu mi a ricibi E Harpa di Dios y cu mi kier a sirbi Yehova como un sirbido full-time.

Mi a keda sorprendi ora mi a haya nan contesta cu a bisa: “Nos ta aprecia cu bo kier sirbi Yehova. Nos kier anima bo pa haci oracion tocante e asunto aki, y Yehova lo yuda bo haya un miho comprendemento di e berdad y lo E haya un luga pa bo sirbie.” Despues di a lesa e carta varios bes, mi a puntra un par di Testigo kico mi mester a haci. Nan a bisa mi: “Si di berdad bo ta desea di sirbi Yehova, dal bai y cuminsa mesora.”

Henter un siman largo mi a haci oracion tocante e asunto, y finalmente mi a dicidi di leumai mi educacion na scol y sigui cu mi studio di Bijbel cu e Testigonan. E siguiente aña, na januari 1932, mi a simbolisa mi dedicacion na Yehova Dios door di bautismo bou di awa. Despues cu mi a muda bai e stad den cercania, Luanshya, mi a topa cu Jeanette un compañera creyente, y nos a casa na september 1934. Ora nos a casa Jeanette tawatin dos yiu caba, un homber y un mohe.

Paso a paso mi a crece spiritualmente, y na 1937 mi a cuminsa traha den sirbishi full-time. Djis despues mi a ser nombra como un sirbido biahero cu awendia ta ser yama un superintendente di sircuito. Superintendentenan biahero ta bishita e congregacionnan di Testigonan di Yehova pa fortalece nan spiritualmente.

Predicacion Durante e Prome Añanan

Na januari 1938 mi a haya asignacion pa bishita un lider  Africano cu yama Sokontwe, kende a pidi pa Testigonan di Yehova bishit’e. Pa mi por a yega e area ei, mi a core tres dia largo riba bais. El a keda masha contento ora mi a bis’e cu mi a ser manda como contesta riba e carta cu el a skirbi nos oficina na Kaapstad.

Mi a bai di hut pa hut serca su hendenan y a invita nan pa bai na e insaka (stand publico). Ora nan a reuni einan, mi a papia cu e multitud. Hopi studio di Bijbel a cuminsa como resultado di esei. E cabesante di e pueblo y su asistent tawata e promenan cu a bira superintendente di e congregacionnan den e pueblo aki. Awe, tin mas cu 50 congregacion den e area ei cu awor ta conoci como e districto di Samfya.

Di 1942 te cu 1947, mi a sirbi den e region rond di Lago Bangweulu. Mi tawata pasa 10 dia cu cada congregacion. Siendo cu e tempo ei e trahadonan cu tawata participa den e cosecha spiritual tawata tiki, nos a sinti mescos cu nos Señor Hesucristo, ora el a bisa: “E cosecha ta masha grandi, ma trahado ta poco. Pesei, pidi e Señor di cosecha pa manda trahado na su cosecha.” (Mateo 9:36-38) E tempo ei no tawata facil pa biaha, pesei generalmente Jeanette tawata keda na Luanshya hunto cu e muchanan ora mi tawata bishita e congregacionnan. Pa e tempo ei, ami cu Jeanette a haya dos yiu mas, pero un di nan a muri ora e tawatin dies luna.

E tempo ei no tawatin hopi auto, y claro cu no tawatin hopi caminda tampoco. Un dia mi a cuminsa un biahe di mas cu 200 kilometer riba Jeanette su bais. Tawatin bes cu ora mi mester a crusa un riu chikito, mi a pone e bais riba mi scouder, ten’e cu un man, y landa cu e otro man. Por cierto, e cantidad di Testigo a crece considerablemente na Luanshya, y na 1946, tawatin 1.850 persona cu a asisti na e Memorial di Cristo su morto.

Enfrentando Oposicion Contra Nos Trabou

Na un ocasion durante Segundo Guera Mundial, e funcionario di gobierno di districto na Kawambwa a manda yama mi y el a bisa mi: “Mi kier pa bo stop di uza e bukinan di Sosiedad Watch Tower pasobra nan ta prohibi awor. Pero mi por duna bo algun obra di referencia cu bo por uza pa skirbi otro buki pa uza den boso trabou.”

“Mi ta satisfecho cu e literatura cu nos tin”, mi a contesta. “Mi no tin mester di nada mas.”

El a bisa mi: “Bo no conoce e Mericanonan, nan ta gaña bo.” (E tempo ei nos literatura tawata ser imprimi na Merca).

“No esnan cu mi ta asocia cu ne”, mi a contesta.

Despues el a puntra: “Bo no por anima bo congregacionnan pa haci donacion di placa pa duna un man na guera mescos cu otro religionnan ta haci?”

“Esei ta trabou di gobierno su mensaheronan”, mi a contesta.

E di: “Dicon bo no ta bai cas y pensa riba e asunto?”

“Na Exodo 20:13 y 2 Timoteo 2:24, Bijbel ta manda nos pa no mata ni pleita”, mi a contesta.

Aunke el a permiti mi bai, despues e funcionario di gobierno di districto na Fort Rosebery, un stad cu awor nan ta yama Mansa, a manda yama mi. El a bisa mi: “Mi a manda yama bo pa laga bo sa cu gobierno a prohibi boso bukinan.”

“Si. Asina mi a tende”, mi a contesta.

“Pues, bo tin cu bai na tur boso congregacionnan y bisa e hendenan cu ta adora hunto cu bo pa nan trece tur e bukinan akinan. Bo a comprende?”

Mi a contest’e: “Esei no ta mi trabou. Esei ta responsabilidad di e mensaheronan di gobierno.”

Un Encuentro Incidental Ta Duna Fruta

Despues di guera nos a keda cu e derecho di predica. Na 1947 djis despues cu mi a caba di sirbi un congregacion den e pueblo Mwanza, mi a puntra unda mi por a cumpra un copi di  te. Nan a manda mi na cas di un sr. Nkonde, caminda tawatin un cafe. Sr. Nkonde y su casa a ricibi mi cu hopi cariño. Mi a puntra sr. Nkonde si mientras mi ta bebe mi te, e por a lesa e capitulo “Fierno, un Luga di Sosiego y Speransa” den e buki “Laga Dios Sea Haya Berdadero.”

Ora mi a caba di bebe mi te, mi a puntr’e: “Bo a comprende awor kico ta fierno?” Asombra pa loke el a lesa, el a cuminsa studia Bijbel cu Testigonan y despues e cu su casa a batisa hunto. Maske e mes no a keda un Testigo, su casa y varios di su yiunan si. De facto, un di su yiunan, Pilney, ta sirbi ainda na e oficina di sucursal di Testigonan di Yehova na Zambia. Y aunke Pilney su mama ta hopi grandi awor, keto bai e ta un Testigo fiel.

Un Estadia Cortico na Africa Oriental

Nos oficina di sucursal na Nort Rodesia, cu a ser estableci na principio di 1948 na Lusaka, a asigna mi pa bai Tanganyika (awor Tanzania). Un otro Testigo a compaña ami cu mi casa durante e biahe na pia den e teritorio yen di sero. Nos a cana tres dia largo y a yega hopi cansa. Ami a carga e cantidad grandi di buki, mi casa a carga nos pañanan, y e otro Testigo a carga nos pañanan di cama.

Ora nos a yega Mbeya na maart 1948, tawatin hopi trabou. Mester a yuda e rumannan haci ahuste pa asina nan cumpli mas plenamente cu e siñansanan di Bijbel. Por ehempel, den e area ei nos tawata conoci como e hendenan di Watchtower. Aunke e rumannan a acepta e nomber Testigonan di Yehova, nan no a promov’e publicamente. Ademas, tawatin Testigonan cu mester a bandona cierto custumbernan relaciona cu dunamento di honor na hende morto. Pero probablemente e cambio di mas dificil cu mayoria ruman mester a haci tawata di registra nan matrimonio legalmente y haci esaki honorabel den bista di tur hende.—Hebreonan 13:4.

Despues, mi a haya e privilegio di sirbi den otro areanan di Africa Oriental, incluso Uganda. Mi a pasa rond di seis siman na Entebbe y Kampala, caminda nos a yuda hopi hende haya conocemento di e berdad di Bijbel.

Invitacion pa Bai New York City

Despues cu mi a sirbi na Uganda pa un par di tempo, na principio di aña 1956, mi a yega Dar es Salaam, e capital di Tanganyika. Einan tawatin un carta di e sede mundial di Testigonan di Yehova ta warda mi. Den dje mi a haya instruccion pa cuminsa haci preparacion pa mi bini New York pa asisti na un congreso internacional cu lo a ser teni for di 27 di juli te cu 3 di augustus 1958. Ta mas cu claro cu e invitacion ei a emociona mi masha.

Ora tawata asina leu, ami cu un otro superintendente biahero, Luka Mwango, a bula for di Ndola bai Salisbury (awor Harare), na Sur Rodesia, y despues nos a bula pa Nairobi, Kenia. For di einan nos a tuma avion atrobe bai Londen, Inglatera, caminda e rumannan a ricibi nos cordialmente. E anochi cu nos a yega, nos a bai drumi masha emociona y a keda papia di e manera hospitalario cu e hendenan blanco a ricibi nos cu ta Africano. E experencia aki a anima nos masha.

Finalmente nos a yega New York caminda e congreso a tuma luga. Tawatin un dia durante e congreso cu mi a duna informe di e actividad  di Testigonan di Yehova na Nort Rodesia. E dia ei tawatin un asistencia di casi 200.000 persona cu a reuni na Polo Grounds y Yankee Stadium di New York City. E anochi ei mi no por a drumi, henter anochi mi a keda pensa riba e privilegio maravioso cu mi a haya.

E congreso a pasa masha lihe y nos a bolbe cas. Durante nos biahe di regreso nos a bolbe experencia e hospitalidad amoroso di nos rumannan na Inglatera. Durante e biahe aki nos a mira prueba inolvidabel di e unidad cu ta existi entre e pueblo di Yehova, sin importa rasa of nacionalidad!

Mi A Sigui Sirbi Apesar di Prueba

Na aña 1967 mi a ser nombra como sirbido di districto, un sirbido cu ta biaha di sircuito pa sircuito. Pa e tempo ei e cantidad di Testigo na Zambia a bira mas cu 35.000. Debi cu mi salu a bai atras, mas despues mi a wordo asigna atrobe como sirbido di sircuito den e teritorio di Copperbelt. Cu tempo Jeanette a bira malo y na december 1984 el a muri fiel na Yehova.

Despues di Jeanette su morto mi tawata sinti mi hopi tristo pasobra su famianan cu no ta creyente a bisa cu ta ami a haci bruha y mata Jeanette. Pero algun di nan cu si tawata sa di e malesa di Jeanette y cu a papia cu su docter a splica e famianan aki e berdad tocante e asunto. Despues mi a haya mi cu un otro prueba. Algun miembro di famia tawata kier pa mi a cumpli cu e custumber tradicional cu nan a yama ukupyanika. E region for di cua mi ta bini tin e tradicion cu ora un casa muri, esun cu keda bibo tin cu tene relacion sexual cu un miembro di famia hopi yega di e defunto. Claro cu mi a nenga.

Finalmente e famianan a stop di pone presion riba mi. Mi tawata masha gradicido na Yehova, pasobra El a yuda mi para firme. Despues di un luna cu nos a dera mi casa, un ruman homber a bini serca mi y a bisa mi: “Ruman Kangale, ora bo casa a muri bo tawata realmente un animacion pa nos pasobra bo no a sucumbi na ningun tradicion pagano. Masha danki.”

Un Cosecha Maravioso

Awor mi tin 65 aña como Testigo di Yehova den e sirbishi di tempo completo. Durante e añanan ei tawata realmente un goso pa mi mira cientos di congregacion ser forma y hopi Salon di Reino ser construi den e areanan caminda mi a yega di sirbi como superintendente biahero! Nos a crece for di rond di e 2.800 Testigonan na 1943, te na mas cu 122.000 proclamado di Reino na Zambia. Si, aña pasa mas cu 514.000 persona a asisti na e Memorial den e pais aki cu tin un poblacion di menos cu 11 miyon hende.

Mientrastanto, Yehova ta percura bon pa mi. Ora mi mester bai docter, un ruman homber cristian ta hiba mi. Ainda e congregacionnan sa invita mi pa duna discurso publico, y esaki ta anima mi masha tanto. Na e congregacion caminda mi ta asisti tin areglo pa e ruman mohenan limpia mi cas beurt pa beurt, y pa ruman hombernan boluntario hiba mi reunion tur siman. Mi sa cu si mi no tawata sirbi Yehova, hamas lo mi a haya e cuido amoroso ei. Mi ta gradicie cu E ta sigui uza mi den su sirbishi di tempo completo y pa e hopi responsabilidadnan cu mi por a cumpli cu ne te cu awor.

Mi bista a bai hopi atras, y ora mi ta cana bai Salon di Reino, mi tin cu sosega un par di bes na caminda. E dianan aki mi tas ta parce mas pisa, pues mi ta hacie mas leve door di saca tur buki cu lo mi no bai uza na reunion. Mayoria parti di mi sirbishi di veld ta consisti di conduci studio di Bijbel cu studiantenan cu ta bini serca mi na cas. Sinembargo, ta cu gran placer mi ta wak bek atrabes di añanan y refleha riba e maravioso aumento cu a tuma luga. Mi a sirbi den un teritorio caminda Yehova su palabranan registra na Isaias 60:22 a haya un cumplimento sobresaliente. Einan Bijbel ta bisa: “Esun di mas chikito lo bira un tribu, y esun di mas menos lo bira un nacion poderoso. Na su debido tempo, ami, SEÑOR, lo pura haci esaki.” Si, durante mi bida mi a mira esaki cumpli no solamente na Zambia, sino rond mundo. *

[Nota]

[Plachi na pagina 24]

Ruman Thomson, y den fondo e sucursal di Zambia

[Plachi na pagina 26]

Sucursal di Zambia awe