Wak pa Bo No Ser Engaña

ENGAÑO ta casi mes bieu cu humanidad. Un di e prome susesonan di historia skirbi tawata un acto di engaño. Esei tawata ora Satanas a gaña Eva den e hofi di Eden.—Genesis 3:13; 1 Timoteo 2:14.

Aunke semper tawatin engaño tur caminda, awe e ta mas plama cu nunca. Bijbel a premira loke lo sosode den tempo moderno, pesei el a spierta: “Hendenan malbado y gañadonan lo bai di malo pa piyo, gañando y siendo gaña.”—2 Timoteo 3:13.

Tin hopi diferente motibo pakico hende ta gaña otro. Hende tramposo y estafado ta gaña nan victimanan pa ranca placa for di nan. Algun politico ta gaña nan votadonan pa nan por keda na poder cueste loke cueste. Hende ta gaña asta nan mes. En bes di enfrenta berdadnan cu nan no gusta, nan ta combence nan mes cu practicanan peligroso manera huma, uza droga of comete inmoralidad sexual no ta haci daño.

Anto den asuntonan religioso tambe tin engaño. Lidernan religioso den tempo di Hesus tawata gaña e pueblo. Hesus a bisa di e mentirosonan aki: “Nan ta guiado ciego di e ciegonan. Y si ciego guia ciego, tur dos lo cai den buraco.” (Mateo 15:14) Fuera di esei, tin hende cu ta gaña nan mes relaciona cu asuntonan religioso. Proverbionan 14:12 ta declara: “Tin un caminda cu ta parce bon den bista di hende, ma su fin ta e caminda di morto.”

Mescos cu den tempo di Hesus, awe tambe religion ta gaña hopi y esei no ta un sorpresa! Apostel Pablo a bisa cu Satanas “a ciega mente di esnan cu no ta kere, pa nan no mira e lus di e evangelio di e gloria di Cristo, kende ta e imagen di Dios.”—2 Corintionan 4:4.

Si un estafado gaña nos, nos ta perde nos placa. Si un politico gaña nos, nos lo por perde algo di nos libertad. Pero si Satanas gaña nos y pone nos rechasa e berdad tocante Hesucristo, nos lo perde bida eterno! Pues wak pa bo no ser engaña. Habri bo mente y curason pa e fuente indiscutibel di berdad religioso, Bijbel. Di otro manera, lo bo tin hopi di perde.—Huan 17:3.