Yehova Ta Embeyece Su Pueblo cu Lus

“Lanta, briya, pasobra bo lus a yega, y e gloria di [Yehova] ta briya riba bo.”—ISAIAS 60:1.

1, 2. (a) Den ki situacion humanidad ta? (b) Ken ta responsabel pa e scuridad cu humanidad ta aden?

“MARE nos tawatin un Isaias of un San Pablo!” Asina Presidente Mericano Harry Truman a lamenta den añanan ’40 di siglo 20. Dicon el a bisa asina? Pasobra e tawata sinti cu e mundo di su tempo tawatin mester di lider di un caliber moral halto. Humanidad a caba di pasa door di e periodo di mas scur di siglo 20: e segundo guera mundial. Sinembargo, aunke e guera a caba, mundo no tawatin pas. Scuridad a persisti. De echo, 57 aña despues cu e guera ei a termina, mundo ainda ta den scuridad. Si Presidente Truman tawata na bida awe, sin duda lo el a haya cu mundo ainda tin mester di lider di e caliber moral di Isaias of di apostel Pablo.

² Nos no sa si Presidente Truman tawata na haltura di esaki, pero apostel Pablo a papia di e scuridad cu ta aflihi humanidad, y el a spierta p’e den su cartanan. Por ehempel, el a spierta su compañeronan di fe: “Nos lucha no ta contra carni y sanger, sino contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e luganan celestial.” (Efesionan 6:12) Cu e palabranan aki Pablo a mustra cu e tawata conciente di e scuridad spiritual cu ta rondona mundo y tambe cu e sa ken ta e berdadero fuente di esei: forsanan demoniaco poderoso cu el a describi como “forsanan mundial.” Siendo cu ta spiritonan poderoso ta responsabel pa e scuridad di mundo, kico simpel hende por haci pa core cu e scuridad ei?

3. Apesar di e situacion scur cu humanidad ta aden, kico Isaias a profetisa pa hende fiel?

³ Isaias tambe a papia di e scuridad cu ta aflihi humanidad. (Isaias 8:22; 59:9) Sinembargo, mirando padilanti na nos tempo, el a profetisa bou di inspiracion cu asta den e tempo scur aki, Yehova lo ilumina e porvenir di esnan cu ta stima lus. Pues aunke nos no tin Pablo ni Isaias en persona hunto cu nos, nos tin si loke nan a skirbi bou di inspiracion pa guia nos. Pa mira ki un bendicion esei ta pa esnan cu stima Yehova, laga nos considera e palabranan profetico di Isaias cu nos ta haya na capitulo 60 di su buki.

Un Mohe Profetico Ta Laga Lus Briya

4, 5. (a) Kico Yehova ta manda un mohe haci, y kico E ta primintie? (b) Ki informacion emocionante Isaias capitulo 60 ta contene?

⁴ E prome palabranan di Isaias capitulo 60 ta dirigi na e mohe menciona anteriormente na Isaias 54:1. Isaias capitulo 60 ta present’e den un situacion hopi tristo: e ta drumi plat abou den scuridad. Diripiente, lus ta penetra door di e scuridad, y Yehova ta proclama: “Lanta, briya, pasobra bo lus a yega, y e gloria di SEÑOR ta briya riba bo.” (Isaias 60:1) A yega ora pa e mohe simbolico lanta para y refleha Dios su lus, Dios su gloria. Dicon? Nos ta haya e contesta den e siguiente versiculo: “Mira, scuridad lo tapa tera, y scuridad profundo e pueblonan; ma SEÑOR lo briya riba bo, y su gloria lo aparece riba bo.” (Isaias 60:2) Yehova ta sigura e mohe cu ora e obedece su mandamento lo e ricibi un resultado maravioso. Yehova ta bisa: “Nacionnan lo  bin na bo lus, y reinan na e claridad di bo manece.”—Isaias 60:3.

⁵ E palabranan emocionante di e tres versiculonan aki ta un introduccion y a la bes resumen di loke e resto di Isaias capitulo 60 ta contene. E capitulo ta profetisa e experencianan di un mohe simbolico y ta splica con nos por biba den e lus di Yehova apesar di e scuridad cu tin riba humanidad. Pero kico precis e simbolonan den e tres versiculonan aki di introduccion ta representa?

6. Ken e mohe di Isaias capitulo 60 ta, y ken ta represent’e aki riba tera?

⁶ E mohe cu Isaias 60:1-3 ta referi na dje ta Sion, Yehova su organisacion celestial di criaturanan spiritual. Awe, ta esnan cu a resta di “e Israel di Dios” ta representa Sion riba tera. Nan ta e congregacion internacional di cristiannan ungi pa spirito cu tin e speransa di goberna cu Cristo den shelo. (Galationan 6:16) E nacion spiritual aki cu tempo ta yega na un total di 144.000 miembro, y e cumplimento moderno di Isaias capitulo 60 ta drei rond di esnan cu ta na bida riba tera durante “e ultimo dianan.” (2 Timoteo 3:1; Revelacion 14:1) Tambe e profecia ta duna hopi detaye di e compañeronan di e cristiannan ungi aki, esta, e “multitud grandi” di ‘otro carne.’—Revelacion 7:9; Huan 10:16.

7. Den ki condicion Sion tawata na 1918, y con Bijbel a profetisa esaki?

⁷ Tawatin un tempo cu “e Israel di Dios” tawata drumi den scuridad, manera e mohe simbolico ei a prefigura? Si, esaki a sosode mas cu 80 aña pasa. Durante prome guera mundial, cristiannan ungi a lucha duro pa sigui cu e trabou di predica. Pero na 1918, e ultimo aña di e guera, e predicacion organisa a para casi completamente. Joseph F. Rutherford, kende tawata supervisa e trabou di predica rond mundo, hunto cu otro rumannan prominente a ricibi sentencianan largo di prizon a base di acusacionnan falso. Den e buki di Revelacion cristiannan ungi cu tawata e tempo ei riba tera a ser describi profeticamente manera cadaver benta “riba e caya di e gran stad, cu spiritualmente yama Sodoma y Egipto.” (Revelacion 11:8) Esei tawata berdaderamente un tempo scur pa Sion, representa riba tera pa su yiunan ungi!

8. Ki cambio drastico a tuma luga na 1919, y cu ki resultado?

⁸ Sinembargo, na aña 1919 tawatin un cambio drastico. Yehova a laga lus briya riba  Sion! E sobrevivientenan di e Israel di Dios a lanta para pa nan refleha e lus di Dios, y sin miedo nan a reanuda e proclamacion di e bon nobo. (Mateo 5:14-16) E celo renoba di e cristiannan aki a atrae mas hende na e lus di Yehova. Na principio e hende nobonan aki tawata ungi como miembronan adicional di e Israel di Dios. Na Isaias 60:3 nan ta ser yama ‘rei’, ya cu nan lo ta coheredero cu Cristo den Dios su Reino celestial. (Revelacion 20:6) Mas despues un multitud grandi di otro carne a ser atrai na e lus di Yehova. Nan ta e “nacionnan” menciona den e profecia.

E Yiunan di e Mohe Ta Bin Cas!

9, 10. (a) Ki esena remarcabel e mohe ta mira, y kico esaki a prefigura? (b) Ki motibo Sion tawatin pa alegra?

⁹ Awor Yehova ta cuminsa suministra mas detaye di e resumen duna na Isaias 60:1-3. E ta duna e mohe un otro ordo. Scucha loke E ta bisa: “Hisa cara y wak tur rond di bo”! E mohe ta haci esei y ta haya un bista masha alentador: su yiunan ta biniendo cas! E texto ta sigui bisa: “Nan tur ta bin hunto, nan ta bin serca bo. Bo yiu hombernan lo bin for di leu, y bo yiu mohenan lo wordo carga na hep.” (Isaias 60:4) E proclamacion mundial di Reino cu a cuminsa na 1919 a atrae miles di hende nobo pa bin sirbi Yehova. Nan tambe a bira ‘yiu homber’ y ‘yiu mohe’ di Sion, es decir, miembronan ungi di e Israel di Dios. Pues, Yehova a embeyece Sion door di trece e ultimo miembronan di e 144.000 na e lus.

¹⁰ Bo por imagina e goso cu Sion ta sinti di por tin su yiunan hunto cu ne? Pero Yehova ta duna Sion mas motibo pa alegra. Nos ta lesa: “E ora ei lo bo mira y keda radiante, y bo curason lo ta yen yen di goso, pasobra e abundancia di lama lo wordo entrega na bo, e rikesa di e nacionnan lo bin serca bo.” (Isaias 60:5) Na harmonia cu e palabranan profetico ei, desde e decada di 1930 padilanti, multitud di cristian cu e speransa di biba riba tera pa semper a basha bai Sion. Nan a sali for di e “lama” di humanidad aleha for di Dios, y nan ta representa e rikesa di e nacionnan. Nan ta “e cosnan deseabel di tur e nacionnan.” (Hageo 2:7, NW; Isaias 57:20) Ripara tambe cu e “cosnan deseabel” aki no ta bai sirbi Yehova cada un na su manera. No, mas bien nan ta haci Sion mas bunita door di bin pa rindi adoracion hunto cu nan rumannan ungi, birando “un tou” bou di “un wardado.”—Huan 10:16.

Comerciante-, Wardado- y Negoshantenan Ta Bin Sion

11, 12. Describi e multitud cu ta riba caminda pa Sion.

¹¹ E recohemento profetisa aki ta resulta den un tremendo aumento di e cantidad di personanan cu ta alaba Yehova. E siguiente palabranan di e profecia ta predeci esaki. Imagina cu bo ta para hunto cu e mohe simbolico riba Sero Sion. Bo ta wak den direccion oost, y kico bo ta mira? “Un multitud di camel lo yena bo tera, camel jong for di Madian y Efa; tur esnan for di Saba lo bin; nan lo trece oro y sencia, y lo trece bon nobo di e alabansanan di SEÑOR.” (Isaias 60:6) Multitud di comerciante ta dirigi nan caravananan di camel riba e ruta cu ta hiba na Herusalem. Tin asina tanto camel cu nan ta manera un dilubio cu ta tapa e pais! E negoshantenan ta bin cu regalonan balioso, “oro y sencia.” Y e comerciantenan aki ta bin na e lus di Dios pa nan por alab’e publicamente, ‘pa trece e alabansanan di Yehova.’

¹² No ta comerciante so ta riba caminda. Tin tambe wardadonan di carne cu ta basha bin Sion. E profecia ta sigui bisa: “Tur e tounan di carne di Kedar lo wordo treci hunto pa bo, e carnenan chubato di Nebaiot lo sirbi bo.” (Isaias 60:7a) Tribunan di wardado di carne tambe ta biniendo na e stad santo pa  ofrece lo miho di nan tou na Yehova. Nan ta ofrece asta nan mes pa sirbi Sion! Con Yehova lo ricibi e stranheronan aki? Dios mes ta contesta: “Nan lo wordo acepta como ofrenda riba mi altar, y lo mi glorifica mi cas glorioso.” (Isaias 60:7b) Yehova den su misericordia ta acepta e ofrenda y sirbishi di e stranheronan aki. Nan presencia ta embeyece su tempel.

13, 14. Kico ta biniendo for di direccion west?

¹³ Awor bira bo cabes den direccion west y inspecciona horizonte. Kico bo ta mira? Leu aya, tin manera un nubia blanco ta plama riba superficie di lama. Yehova ta puntra net loke bo ta pensa: “Ta ken esakinan ta cu ta bula manera nubia, y manera paloma na nan bentananan di trali?” (Isaias 60:8) Yehova mes ta contesta su pregunta: “Siguramente e teranan na costa lo spera mi; y e barconan di Tarsis lo bin prome, pa trece bo yiu hombernan for di leu, cu nan plata y nan oro, pa e nomber di SEÑOR bo Dios, y pa Esun Santo di Israel, pasobra El a glorifica bo.”—Isaias 60:9.

¹⁴ Bo por visualisa e esena? E nubia blanco a yega mas serca y awor e ta parce un troshi di pik pik blanco leu den direccion west. Nan parce un trupa di parha cu ta bula abou, casi pa mishi cu e olanan. Pero segun cu nan ta yega mas serca, bo ta mira cu nan ta barco cu nan belanan habri pa cohe biento. Tin asina hopi barco ta nabega rumbo pa Herusalem cu nan ta parce un trupa di paloma. For di hafnan leu, e flota ta biniendo full speed pa trece creyentenan Herusalem pa adora Yehova.

 Yehova Su Organisacion Ta Expande

15. (a) Ki aumento e palabranan di Isaias 60:4-9 ta predeci? (b) Cristiannan berdadero ta desplega ki actitud?

¹⁵ Na un manera bibo versiculo 4 pa 9 ta pinta un cuadro profetico di e expansion mundial cu a tuma luga desde 1919! Pakico Yehova a bendiciona Sion cu un aumento asina grandi? Pasobra for di 1919 padilanti, e Israel di Dios a plama Yehova su lus obedientemente y consistentemente. Pero bo a ripara cu segun versiculo 7, esnan cu caba di yega ta bin ‘riba Dios su altar’? Un altar ta caminda ta ofrece sacrificio, y e rasgo aki di e profecia ta recorda nos cu sirbi Yehova ta encera sacrificio. Apostel Pablo a skirbi: “Mi ta roga boso . . . pa presenta boso curpanan como sacrificionan bibo y santo, aceptabel pa Dios, cual ta boso sirbishi spiritual di adoracion.” (Romanonan 12:1) Na harmonia cu e palabranan di Pablo, cristiannan berdadero no ta keda satisfecho cu djis asisti na servicionan religioso un biaha pa siman. Nan ta duna di nan tempo, energia y rikesa pa promove adoracion puro. E presencia di adoradonan deboto asina no ta embeyece e cas di Yehova? E profecia di Isaias ta bisa cu si. Y nos por tin sigur cu na nan turno, e adoradonan yen di celo ei ta bunita den Yehova su bista.

16. Ken a yuda den e trabou di reconstruccion den tempo di pasado, y ken a haci esei den tempo moderno?

¹⁶ E hendenan cu a caba di yega kier traha. E profecia ta sigui bisa: “Stranheronan lo lanta bo murayanan di nobo, y nan reinan lo sirbi bo.” (Isaias 60:10) Den e prome cumplimento di e palabranan aki tempo cu e Hudiunan a regresa for di exilio den Babilonia, reinan y otro hende for di e nacionnan di berdad a yuda reconstrui e tempel y e stad di Herusalem. (Esdras 3:7; Nehemias 3:26) Den e cumplimento moderno, e multitud grandi a apoya e resto ungi den edifica adoracion berdadero. Nan a yuda edifica congregacionnan cristian y asina, na moda di papia, ta fortalece e “murayanan” di e organisacion di Yehova cu ta manera un stad. Tambe nan ta yuda den trabou di construccion literal: den construccion di Salonnan di Reino, Salonnan di Asamblea y casnan di Betel. Den tur e maneranan aki, nan ta apoya nan rumannan ungi pa percura pa e necesidadnan di Yehova su organisacion cu ta sigui crece!

17. Cua ta un manera cu Yehova ta embeyece su pueblo?

¹⁷ Ki un gran animacion e ultimo palabranan di Isaias 60:10 ta! Yehova ta bisa: “Den mi furia Mi a dal bo, y den mi misericordia Mi a haya duele di bo.” Si, na aña 1918 pa 1919, Yehova a disiplina su pueblo. Pero esei ta pasado. Awor ta tempo pa Yehova expresa misericordia na su sirbidonan ungi y na nan compañeronan cu ta forma e grupo di otro carnenan. Prueba cu esaki ta e caso ta e aumento extraordinario cu cua El a bendiciona nan. Ta como si fuera El a haci nan mas bunita.

18, 19. (a) Kico Yehova ta priminti relaciona cu hende nobo cu ta bin den su organisacion? (b) Kico e versiculonan cu a resta di Isaias capitulo 60 ta conta nos?

¹⁸ Tur aña, cientos di miles di ‘stranhero’ nobo ta asocia cu e organisacion di Yehova, y e caminda lo keda habri pa hopi mas bini.  Yehova ta bisa Sion: “Bo portanan lo ta habri tur ora; nan lo no wordo sera ni di dia ni anochi, pa hende por trece e rikesa di e nacionnan pa bo, hunto cu nan reinan den procesion.” (Isaias 60:11) Algun opositor lo purba sera e “portanan” ei, pero nos sa cu nan lo no logra. Yehova mes a bisa cu di un manera of otro, e portanan lo keda habri. E aumento lo continua.

¹⁹ Tin mas manera cu Yehova a bendiciona su pueblo, haciendo nan bunita den e ultimo dianan aki. E versiculonan cu a resta di Isaias 60 ta revela profeticamente cua ta e maneranan ei.

Bo Por Splica?

• Ken ta e “mohe” di Dios, y ken ta represent’e riba tera?

• Na ki tempo e yiunan di Sion tawata plat abou drumi, y ki ora y con nan a “lanta”?

• Con Yehova a profetisa e aumento djawe di predicadonan di Reino uzando diferente representacion simbolico?

• Den ki maneranan Yehova a laga su lus briya riba su pueblo?

[Preguntanan di Estudio]

[Plachi na pagina 10]

E “mohe” di Yehova ta haya ordo pa lanta para

[Plachi na pagina 12]

E flota di barco ta parce paloma na horizonte