Agrega Debocion na Dios na Boso Perseverancia

“Añadi na boso fe . . . perseverancia, y na boso perseverancia, santidad [“debocion na Dios”, NW].”—2 PEDRO 1:5, 6.

1, 2. (a) Den ki sentido un mucha tin cu crece? (b) Con importante crecemento spiritual ta?

TA IMPORTANTE pa un mucha crece, pero no ta crecemento fisico so ta importante. Mucha mester crece tambe den sentido mental y emocional. Cu tempo mucha lo stop di haci cos di mucha y desaroya bira un homber of mohe madura. Apostel Pablo a referi na esaki ora el a skirbi: “Tempo mi tawata mucha, mi tawata papia manera mucha, pensa manera mucha, rasona manera mucha; ma awor cu mi a bira homber, mi a pone cos di mucha un banda.”—1 Corintionan 13:11.

² E palabranan di Pablo ta presenta un punto importante tocante crecemento spiritual. Cristiannan tin cu progresa for di ser mucha spiritual pa bira ‘madura den pensamento.’ (1 Corintionan 14:20) Nan tin cu haci esfuerso y purba alcansa “e midi di e estatura di e plenitud di Cristo.” Nan lo no ta “mucha mas, tira p’aki p’aya door di olanan, y hiba door di tur biento di doctrina.”—Efesionan 4:13, 14.

3, 4. (a) Kico nos tin cu haci pa madura spiritualmente? (b) Ki cualidadnan cu ta agrada Dios nos mester manifesta, y con importante nan ta?

³ Con nos por madura spiritualmente? Bou di sircunstancianan normal curpa di hende ta crece casi automaticamente, pero pa crece den sentido spiritual si nos tin cu haci esfuerso. Pa cuminsa, nos tin cu gana conocemento berdadero of exacto di e Palabra di Dios y actua na harmonia cu loke nos ta siña. (Hebreonan 5:14; 2 Pedro 1:3*) Esaki ta permiti nos manifesta cualidadnan cu ta agrada Dios. Mescos cu crecemento fisico y loke ta bai compaña cu ne, por lo general crecemento den varios cualidad di Dios tambe ta tuma luga simultaneamente. Apostel Pedro a skirbi: “Pa e mesun motibo aki tambe, haciendo tur diligencia, añadi na boso fe, birtud, y na boso birtud, conocemento; y na boso conocemento, dominio propio, y na boso dominio propio, perseverancia, y na boso perseverancia, santidad *; y na boso santidad cariño fraternal, y na boso cariño fraternal, amor.”—2 Pedro 1:5-7.

⁴ Tur e cualidadnan cu Pedro ta menciona ta vital, y no por salta ningun di nan. “Si e cualidadnan aki ta den boso y ta aumentando, nan lo no laga boso keda inutil ni sin fruta den e conocemento berdadero di nos Señor Hesucristo.” (2 Pedro 1:8) Laga nos enfoca riba e necesidad pa agrega santidad of debocion na Dios na nos perseverancia.

Nos Tin Cu Persevera

5. Pakico nos tin cu persevera?

⁵ Tanto Pedro como Pablo a conecta debocion na Dios cu perseverancia. (1 Timoteo 6:11) Perseverancia ta nifica mas cu djis para firme y soporta ora tin dificultad. E ta encera mustra pasenshi, curashi y lealtad, sin perde speransa ora nos haya nos cu prueba, obstaculo, tentacion of persecucion. E echo cu nos ta hiba un “bida santo [“deboto na Dios”, NW] den Cristo Hesus”, ta pone cu nos por ser persigui. (2 Timoteo 3:12) Si nos kier demostra nos amor pa Yehova y desaroya e cualidadnan necesario pa salbacion, nos tin cu persevera. (Romanonan 5:3-5; 2 Timoteo 4:7, 8; Santiago  1:3, 4, 12) Sin perseverancia, nos lo no haya bida eterno.—Romanonan 2:6, 7; Hebreonan 10:36.

6. Kico kiermen persevera te na fin?

⁶ Maske con bon nos cuminsa, loke ta conta finalmente ta cu nos a persevera. Hesus a bisa: “Esun cu persevera te na fin, esei lo ta salba.” (Mateo 24:13) Si, nos tin cu persevera te na fin, sea cu esei ta e fin di nos bida actual of e fin di e mal sistema di cosnan aki. Den ambos caso nos tin cu mantene nos integridad na Dios. Pero si nos no agrega debocion na Dios na nos perseverancia, nos no por agrada Yehova, y nos lo no haya bida eterno. Pero kico ta debocion na Dios?

Loke Debocion na Dios Ta Nifica

7. Kico ta debocion na Dios y kico e ta motiva nos pa haci?

⁷ Debocion na Dios ta nifica tene un respet profundo pa Yehova Dios, ador’e y rindi sirbishi na dje pa motibo di nos lealtad na su gobernacion supremo y universal. Pa nos por ta deboto na Yehova, nos mester tin conocemento exacto di dje y di su camindanan. Nos lo mester kier conoce Dios personalmente y intimamente. Esaki lo motiva nos pa desaroya un laso tierno cu ne, un laso cu ta bisto na nos manera di actua y biba. Nos mester desea di ta mas tanto posibel manera Yehova: imita su maneranan y refleha su cualidadnan y personalidad. (Efesionan 5:1) Si, debocion na Dios ta motiva nos deseo pa agrada Dios den tur loke nos ta haci.—1 Corintionan 10:31.

8. Ki relacion estrecho tin entre debocion na Dios y debocion exclusivo?

⁸ Pa por practica berdadero debocion na Dios, nos tin cu adora Yehova so y no permiti nada otro ocupa su luga den nos curason. Como nos Creador, e tin derecho riba nos debocion exclusivo. (Deuteronomio 4:24 *; Isaias 42:8) No obstante, Yehova no ta forsa nos ador’e. E ta desea nos debocion boluntario. Ta nos amor pa Dios, basa riba un conocemento exacto di dje, ta motiva nos pa drecha nos bida y haci un dedicacion incondicional na dje y cumpli cu nos dedicacion.

Cultiva un Relacion cu Dios

9, 10. Con nos por cultiva y mantene un relacion estrecho cu Dios?

⁹ Despues cu nos a simbolisa nos dedicacion na Dios door di batisa, nos tin cu sigui cultiva un relacion asta mas estrecho cu ne. Pesei nos deseo pa haci esaki y pa sirbi Yehova fielmente ta motiva nos pa sigui studia su Palabra y medita riba dje. Segun cu nos ta permiti e spirito di Dios influencia nos mente y curason, nos amor pa Yehova ta bira mas profundo. Nos relacion cu ne ta sigui ser e cos mas importante den nos bida. Nos ta mira Yehova como nos miho Amigo y kier agrad’e na tur momento. (1 Huan 5:3) E goso cu nos relacion placentero cu Dios ta duna ta sigui crece, y nos ta gradicido cu E ta instrui nos cu amor y ta corigi nos caminda ta necesario.—Deuteronomio 8:5.

¹⁰ A menos cu constantemente nos ta dal paso pa fortalece nos relacion precioso cu Yehova, e por bira debil. Si esei sosode, lo no ta Dios su falta, pasobra “E no ta leu di cada un di nos.” (Echonan 17:27) Nos ta masha contento cu Yehova no ta stroba nos di acerc’e! (1 Huan 5:14, 15) Claro cu nos tin cu haci esfuerso pa mantene un relacion personal estrecho cu Yehova. Sinembargo, E ta yuda nos hala serca dje door di duna nos tur e yudansa necesario pa cultiva y mantene debocion na dje. (Santiago 4:8) Con nos por haci uzo completo di tur e percuracionnan amoroso aki?

Keda Spiritualmente Fuerte

11. Den ki manera asina nos ta manifesta nos debocion na Dios?

¹¹ Nos amor profundo pa Dios lo motiva nos pa demostra con grandi nos debocion na dje  ta, na harmonia cu e conseho di Pablo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.” (2 Timoteo 2:15) Pa logra esaki nos mester tin un bon rutina cu ta consisti di studia Bijbel, asisti na reunion y participa den sirbishi di veld cu regularidad. Tambe nos por keda fiel na Yehova door di “haci oracion sin stop.” (1 Tesalonicensenan 5:17) Tur esakinan ta maneranan importante cu nos por manifesta nos debocion na Dios. Si nos neglisha cualkier un di nan, nos por bira spiritualmente malo y vulnerable pa e mañanan di Satanas.—1 Pedro 5:8.

12. Con nos por enfrenta prueba cu exito?

¹² Door di keda spiritualmente fuerte y activo tambe nos por enfrenta e hopi pruebanan cu ta bini riba nos. Pruebanan por bini di fuentenan cu por causa nos hopi dificultad. Indeferencia, oposicion y persecucion por ta mas dificil pa soporta ora nan ta bini di famia pega of biciña. Presionnan sutil pa compromete nos principionan cristian por surgi na trabou of na scol. Desanimacion, enfermedad y depresion por debilita nos fisicamente y hacie mas dificil pa enfrenta prueba di fe. Pero nos por enfrenta tur prueba cu exito si nos persevera “den un conducta santo y deboto, sperando y purando e binida di e dia di Dios.” (2 Pedro 3:11, 12) Y nos por mantene nos goso ora nos ta haci e cosnan aki como cu nos ta sigur di Dios su bendicion.—Proverbionan 10:22.

13. Kico nos mester haci si nos kier keda deboto na Dios?

¹³ Aunke Satanas ta mik riba esnan cu ta practica debocion na Dios, nos no mester tin miedo. Pakico? Pasobra “Señor sa tambe con pa rescata e santonan [“esnan deboto na dje”, NW] for di tentacion.” (2 Pedro 2:9) Pa nos por wanta prueba y experimenta e liberacion ei, nos tin cu “renuncia impiedad y deseonan mundano y . . . biba huicioso, husto y santo [“cu debocion na Dios”, NW] den e siglo presente.” (Tito 2:12) Como cristiannan, nos tin cu tene cuidou pa ningun debilidad cu tin di aber cu deseo- y actividadnan carnal no afecta nos debocion na Dios y caba cu ne. Laga nos considera algun di e menasanan aki.

Cuidou cu Loke Por Afecta Nos Debocion na Dios

14. Si e trampa di materialismo ta tenta nos, kico nos tin cu corda?

¹⁴ Materialismo ta un trampa pa hopi hende. Nos por gaña nos mes pensando cu debocion na Dios “ta un medio pa haci ganashi [financiero].” Nos por kere cu hewon asina nos por abusa di e confiansa cu nos rumannan den fe ta pone den nos. (1 Timoteo 6:5) Nos por asta conclui ekibocadamente cu no tin nada malo den pone presion riba un cristian rico pa e fia nos placa cu probablemente nos lo no por paga bek. (Salmo 37:21) Ma ta debocion na Dios “ta contene promesa pa e bida presente y pa esun cu ta bin” y no cos material. (1 Timoteo 4:8) “Nos no a trece nada den mundo, y nos no por hiba nada for di dje tampoco”, pesei laga nos haci mas esfuerso cu nunca pa sigui ta deboto na Dios “acompaña pa contentamento”  y ‘keda contento cu cuminda y paña pa bisti.’—1 Timoteo 6:6-11.

15. Kico nos por haci si coremento tras di placer ta menasa nos debocion na Dios?

¹⁵ Coremento tras di placer no ta laga luga pa debocion na Dios. Nos lo tin cu haci cambio inmediato den e asunto aki? Ta berdad cu ehercicio fisico y dibirticion ta trece algun beneficio. Pero e recompensanan ei ta nada na comparacion cu bida eterno. (1 Huan 2:25) Awe, hopi hende ta “mas bien stimado di placer cu stimado di Dios; cu tin aparencia di ta religioso en berdad, ma cu ta nenga su poder.” Y nos tin cu evita e tipo di hendenan aki. (2 Timoteo 3:4, 5) Esnan cu ta pone enfasis riba debocion na Dios ta “montona pa nan mes e tesoro di un bon fundeshi pa futuro, pa nan gara loke ta bida berdadero.”—1 Timoteo 6:19.

16. Ki deseonan pecaminoso ta stroba algun hende di cumpli cu e rekisitonan husto di Dios, y con nos por domina e deseonan aki?

¹⁶ Alcohol y uzo di droga, inmoralidad y deseonan pecaminoso por ruina nos debocion na Dios. Si nos sede na esakinan nos lo no por cumpli cu e rekisitonan husto di Dios. (1 Corintionan 6:9, 10; 2 Corintionan 7:1) Asta Pablo tawatin un lucha continuo cu e carni pecaminoso. (Romanonan 7:21-25) Nos tin cu tuma medida fuerte pa elimina mal deseo. Na prome luga, nos mester ta determina pa keda moralmente limpi. Pablo ta bisa nos: “Considera e miembronan di boso curpa terenal como morto pa inmoralidad, impuresa, pasion, deseo malo, y golosidad, cu ta igual na idolatria.” (Colosensenan 3:5) Pa nos considera miembronan di nos curpa como morto relaciona cu cosnan pecaminoso, nos mester ta determina pa elimina nan, core cu nan. Oracion sinsero pa e yudansa di Dios lo yuda nos rechasa mal deseo y sigui husticia y debocion na Dios den e mundo malbado aki.

17. Con nos mester mira disiplina?

¹⁷ Desanimacion por debilita nos perseverancia y perhudica nos debocion na Dios. Hopi sirbido di Yehova a pasa den periodonan di desanimacion. (Numbernan 11:11-15; Esdras 4:4; Yonas 4:3) Desanimacion por tin un efecto specialmente devastador riba nos ora e ta compaña pa rencor pa motibo cu nos ta sinti nos ofendi of pasobra nos a ser disiplina severamente. Sinembargo, reprendemento y disiplina ta evidencia di e interes y amor cu Dios tin pa nos. (Hebreonan 12:5-7, 10, 11) Nos tin cu mira disiplina no simplemente como castigo sino como un medio pa entrena nos den e caminda di husticia. Si nos ta humilde, nos lo acepta y mira e balor di conseho, realisando cu “e reprendementonan di disiplina ta e caminda di bida.” (Proverbionan 6:23) Esaki por yuda nos progresa bon den sentido spiritual y sigui ser deboto na Dios.

18. Ki responsabilidad nos tin ora nos ta sinti nos personalmente ofendi of ora nos ofende otro hende?

 ¹⁸ Malcomprendemento y rencor contra otro por dificulta nos debocion na Dios. Esakinan lo por causa ansiedad of pone algun dal e paso imprudente di isola nan mes for di nan rumannan spiritual. (Proverbionan 18:1) Pero ta bon pa corda cu cargamento di rencor y keda desgusta cu otro hende por perhudica nos relacion cu Yehova. (Levitico 19:18) De echo, “esun cu no ta stima su ruman cu el a mira, no por stima Dios, kende e no a mira.” (1 Huan 4:20) Den su Sermon Riba Sero, Hesus a enfatisa cu nos mester dal paso mesora pa resolve desacuerdonan personal. El a bisa su oyentenan: “Si bo presenta bo ofrenda na altar, y ayanan bo corda cu bo ruman tin algo contra bo, laga bo ofrenda ayanan dilanti di altar, y bai; reconsilia cu bo ruman prome, y despues bin presenta bo ofrenda.” (Mateo 5:23, 24) Un despensa por yuda cura un herida causa pa palabra of accion cu no tawata bondadoso. Nos por cura un herida y drecha un relacion hacie pacifico bek si nos pidi pordon y admiti cu nos no a atende un asunto corectamente. Tambe Hesus a ofrece otro conseho pa atende desacuerdonan. (Mateo 18:15-17) Nos ta keda masha contento ora nos esfuersonan pa resolve problema ta duna fruta!—Romanonan 12:18; Efesionan 4:26, 27.

Sigui Hesus Su Ehempel

19. Pakico ta asina importante pa imita e ehempel di Hesus?

¹⁹ Nos lo haya nos cu prueba sigur, pero nan no mester kita nos for di e careda pa bida eterno. Corda cu Yehova por libra nos for di prueba. Segun cu nos ta “pone un banda tur strobacion” y ‘core e careda cu ta poni nos dilanti cu perseverancia’, laga nos ‘fiha nos wowo riba Hesus, e Autor y Cumplidor di nos fe.’ (Hebreonan 12:1-3) Ora nos analisa bon e ehempel di Hesus y haci esfuerso pa imit’e cu palabra y accion, esei lo yuda nos cultiva debocion na Dios y manifest’e na un grado mas cabal.

20. Si nos persevera y keda deboto na Dios, con E ta recompensa nos?

²⁰ Perseverancia y debocion na Dios ta dos cualidad cu hunto ta yuda nos haci nos salbacion sigur. Door di desplega e cualidadnan precioso aki, nos por cumpli fielmente cu nos sirbishi sagrado na Dios. Asta ora nos haya nos cu prueba, nos por ta felis pasobra Yehova ta trata nos cu tierno cariño y ta duna nos su bendicion pa motibo cu nos ta persevera y mustra debocion na dje. (Santiago 5:11) Ademas, Hesus mes a sigura nos: “Door di boso perseverancia boso lo gana boso alma.”—Lucas 21:19.

[Nota]

Con Lo Bo Contesta?

• Pakico perseverancia ta importante?

• Kico ta debocion na Dios, y con e ta ser manifesta?

• Con nos por cultiva y mantene un relacion estrecho cu Dios?

• Kico ta algun cos cu por dificulta nos debocion na Dios, y con nos por evita nan?

[Preguntanan di Estudio]

[Komentario di e plachi na página 12]

Nos ta manifesta debocion na Dios den hopi manera

[Komentario di e plachi na página 14]

Cuidou cu loke por afecta bo debocion na Dios