Cristiannan Ta Adora Dios den Spirito y Berdad

“Dios ta Spirito, y esnan cu ta ador’e mester adora den spirito y berdad.”—HUAN 4:24.

1. Ki clase di adoracion ta agrada Dios?

HESUCRISTO, e Yiu unigenito di Yehova, a indica claramente kico ta agrada su Tata celestial. Ora el a duna un testimonio conmovedor na un señora Samaritano banda di un pos pega cu e stad di Sicar, el a bis’e: “Boso ta adora loke boso no conoce; nos ta adora loke nos conoce, pasobra salbacion ta bin for di e Hudiunan. Ma e ora lo yega, y ta awor, cu e adoradonan berdadero lo adora e Tata den spirito y berdad; pasobra ta hendenan asina e Tata ta busca pa ador’e. Dios ta Spirito, y esnan cu ta ador’e mester adora den spirito y berdad.” (Huan 4:22-24) Con nos mester comprende e palabranan ei?

2. Riba kico e Samaritanonan a basa nan adoracion?

² E Samaritanonan tawatin un punto di bista eroneo encuanto adoracion. Nan a acepta solamente e prome cinco bukinan di e Scritura Santo—anto solamente den nan propio traduccion cu nan a yama e Pentateuco Samaritano. E Samaritanonan no tawata conoce Dios realmente, pero e Hudiunan si a ricibi conocemento di e Scritura. (Romanonan 3:1, 2) Hudiu y otro personanan fiel tawatin oportunidad di disfruta di e fabor di Yehova. Pero kico esaki lo a exigi di nan?

3. Kico nos tin cu haci pa adora Dios “den spirito y berdad”?

³ Kico e Hudiunan, e Samaritanonan y otro hende di pasado tawatin cu haci pa agrada Yehova? Nan tawatin cu ador’e “den spirito y berdad.” Esei ta conta pa nos tambe. En berdad nos tin cu sirbi Dios na un manera bibo, entusiasma y motiva pa un curason yen di amor y fe, pero pa nos adora Dios den spirito, su spirito santo mester ta riba nos y guia nos. Nos mester pone nos spirito, esta, nos disposicion mental, na harmonia cu esun di Dios door di studia y aplica su Palabra. (1 Corintionan 2:8-12) Pa Yehova acepta nos adoracion, nos mester ador’e cu berdad. E mester ta di acuerdo cu loke e Palabra di Dios, Bijbel, ta revela tocante dje y su proposito.

E Berdad Por Ser Haya

4. Con algun hende ta mira berdad?

⁴ Algun studiante di filosofia a desaroya e punto di bista cu berdad absoluto ta fuera di alcanse di humanidad. De echo, e autor Sueco Alf Ahlberg a skirbi: “Hopi pregunta filosofico no ta di e tipo cu bo por duna contesta definitivo p’e.” Aunke algun hende ta bisa cu tin solamente berdad relativo, esei ta realmente e caso? No segun Hesucristo.

5. Pakico Hesus a bini na mundo?

 ⁵ Laga nos imagina nos mes ta observa e siguiente esena: Ta cuminsamento di aña 33 di nos era y Hesus ta para dilanti Gobernado Romano Poncio Pilato. Hesus ta bisa Pilato: “Pa esaki mi a bin den mundo, pa duna testimonio di e berdad.” Pilato ta puntr’e: “Kico ta berdad?” Pero e no ta warda pa Hesus sigui papia.—Huan 18:36-38.

6. (a) Con un diccionario a defini “berdad”? (b) Ki encargo Hesus a duna su siguidonan?

⁶ Un diccionario ta defini “berdad” como “e conhunto di cos, suseso y echo cu ta real.” (Webster’s Ninth New Collegiate Dictionary) Pero, ta di e berdad en general Hesus a duna testimonio? No. E tawatin un berdad spesifico na mente. El a duna su disipelnan e encargo pa declara e berdad ei, pasobra el a bisa nan: “Haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) Prome cu fin di mundo yega, Hesus su siguidonan berdadero lo declara “e berdad di e evangelio” rond mundo. (Galationan 2:14) Esaki lo cumpli cu e siguiente palabranan di Hesus: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) Pues ta vital pa nos wak ta ken ta esnan cu ta siñando tur nacion e berdad door di predica e evangelio di e Reino.

Con Nos Por Siña e Berdad

7. Con abo lo proba cu Yehova ta e Fuente di e berdad?

⁷ Yehova ta e Fuente di berdad spiritual. De echo, e salmista David a yama Yehova “e Dios di e berdad.” (Salmo 31:5; 43:3, NW) Hesus a reconoce cu e palabra di su Tata ta e berdad, y tambe el a declara: “Ta para skirbi den e profetanan: ‘Y nan tur lo wordo siña door di Dios.’ Tur hende cu a tende y a siña di e Tata ta bin serca mi.” (Huan 6:45; 17:17; Isaias 54:13) Claramente anto, esnan cu ta busca e berdad mester ser siña door di Yehova, e Magnifico Instructor. (Isaias 30:20, 21) Esnan cu ta busca e berdad tin cu gana “e conocemento di Dios.” (Proverbionan 2:5) Y den su amor pa hende Yehova a siña nan e berdad of revela esaki na nan den varios manera.

8. Den ki maneranan Dios a siña hende e berdad of revela esaki na nan?

⁸ Por ehempel, ta pa medio di angel Dios a revela e Lei na e Israelitanan. (Galationan 3:19) Den soñonan, El a priminti di bendiciona e patriarcanan Abraham y Yacob. (Genesis 15:12-16; 28:10-19) Dios asta a papia for di shelo, manera ora Hesus a batisa. Hende a tende e palabranan emocionante aki: “Esaki ta mi Yiu stima, den kende mi tin goso.” (Mateo 3:17) Tambe nos por ta gradicido cu Dios a revela e berdad door di inspira escritornan di  Bijbel. (2 Timoteo 3:16, 17) Door di siña for di e Palabra di Dios, nos por tin “fe den e berdad.”—2 Tesalonicensenan 2:13.

E Berdad y e Yiu di Dios

9. Con Dios a uza su Yiu pa revela e berdad?

⁹ Dios a uza specialmente su Yiu Hesucristo pa revela e berdad na humanidad. (Hebreonan 1:1-3) De echo, Hesus a papia e berdad manera ningun otro hende a yega di papi’e. (Huan 7:46) Asta despues cu el a subi na shelo, el a sigui revela e berdad di su Tata. Por ehempel, apostel Huan a ricibi “e revelacion di Hesucristo, cu Dios a dun’e pa mustra su sirbidonan e cosnan cu mester sosode pronto.”—Revelacion 1:1-3.

10, 11. (a) E berdad cu Hesus a duna testimonio di dje ta relaciona cu kico? (b) Con Hesus a pone e berdad bira realidad?

¹⁰ Hesus a bisa Poncio Pilato cu el a bini na tera pa duna testimonio di e berdad. Durante su ministerio, Hesus a revela cu e berdad ei tawatin di aber cu e derecho cu Yehova tin di eherce su soberania pa medio di e Reino di Dios cu Cristo como Rei. Pero Hesus mester a haci mas cu solamente predica y siña hende pa duna testimonio di e berdad. Hesus a haci e berdad ei bira realidad door di cumpli cu ne. En conexion cu esei, apostel Pablo a skirbi: “No laga ni un hende actua como boso hues encuanto comemento of bebemento, of encuanto un dia di fiesta of luna nobo of dia di sabat; cosnan cu ta djis sombra di loke mester bin; ma e realidad ta pertenece na Cristo.”—Colosensenan 2:16, 17.

¹¹ Un manera den cua e berdad a bira realidad tawata pa medio di e nacemento profetisa di Hesus na Bethlehem. (Mikeas 5:2; Lucas 2:4-11) Tambe e berdad a bira realidad ora e palabranan profetico di Daniel tocante aparicion di e Mesias a cumpli na final di 69 ‘siman di aña.’ Esei a tuma luga ora Hesus mes a presenta na Dios pa e batisa, y a ser ungi cu spirito santo, precis na e aña profetisa, na aña 29 di nos era. (Daniel 9:25; Lucas 3:1, 21, 22) Hesus su ministerio di iluminacion como proclamado di Reino a pone e berdad bira realidad. (Isaias 9:1, 2, 6, 7; 61:1, 2; Mateo 4:13-17; Lucas 4:18-21) Tambe el a bira realidad ora Hesus a muri y resusita.—Salmo 16:8-11; Isaias 53:5, 8, 11, 12; Mateo 20:28; Huan 1:29; Echonan 2:25-31.

12. Pakico Hesus por a bisa: ‘Ami ta e berdad’?

¹² Door cu e berdad ta enfoca riba Hesucristo, e por a bisa: “Ami ta e caminda, y e berdad, y e bida; ni un hende no ta bin serca e Tata, sino pa medio di mi.” (Huan 14:6) Hende ta ser libra den sentido spiritual ora nan “ta [di parti] di e berdad” door di acepta e papel di Hesus den e proposito di Dios. (Huan 8:32-36; 18:37) Door cu hende manera carne ta acepta e berdad y sigui Cristo den fe, nan lo ricibi bida eterno.—Huan 10:24-28.

13. Nos lo analisa e berdad biblico den ki tres area?

¹³ E conhunto di berdadnan cu Hesus y su disipelnan inspira a presenta ta forma e berdadero fe cristian. Pues esnan cu ta “obedecido na e fe” ta “cana den e berdad.” (Echonan 6:7; 3 Huan 3, 4) Anto ta ken ta esnan cu awe ta cana den e berdad? Ken realmente ta siñando tur nacion e berdad? Ora nos contesta e preguntanan ei, nos lo enfoca riba e cristiannan di prome siglo y analisa e berdad biblico  relaciona cu (1) creencia, (2) e manera di rindi adoracion y (3) conducta personal.

Creencianan y e Berdad

14, 15. Kico lo bo bisa di e actitud di cristiannan di prome siglo y Testigonan di Yehova pa cu e Scritura?

¹⁴ E cristiannan di prome siglo tawatin masha respet pa Yehova su Palabra skirbi. (Huan 17:17) El a sirbi como base pa tur nan creencia- y practicanan. Clemente di Alehandria di siglo 2 y 3 a bisa: “Esnan cu ta haciendo esfuerso pa desaroya cualidad excelente lo no para den nan buskeda pa e berdad, te ora nan mes haya prueba di loke nan ta kere a base di e Scritura.”

¹⁵ Mescos cu e cristiannan di prome siglo, Testigonan di Yehova tin masha respet pa Bijbel. Nan ta kere cu “tur Scritura ta inspira pa Dios y ta util pa siñansa.” (2 Timoteo 3:16) Pues laga nos considera algun creencia di e prome cristiannan den lus di loke Yehova su sirbidonan actual a siña door cu nan ta uza Bijbel como nan buki di instruccion principal.

E Berdad Tocante Alma

16. Kico ta e berdad tocante alma?

¹⁶ Door cu e prome cristiannan a kere loke ta para skirbi den e Scritura, nan a siña e berdad tocante alma. Nan tawata sa cu e prome hende “a bira un alma bibo” ora Dios a cre’e. (1 Corintionan 15:45) Ademas, nan a reconoce cu alma humano ta muri. (Ezekiel 18:4; Santiago 5:20) Nan tawata sa tambe cu “e mortonan no sa nada.”—Eclesiastes 9:5, 10.

17. Con lo bo splica e speransa cu tin pa hende morto?

¹⁷ Sinembargo, e prome disipelnan di Hesus tawatin e speransa sigur cu e mortonan cu ta den memoria di Dios lo ser resusita, of restaura na bida. Pablo a expresa e creencia ei masha cla ora el a declara: ‘Mi tin speransa den Dios cu lo tin un resureccion di tanto e hustonan como e malbadonan [“inhustonan”, NW].’ (Echonan 24:15) Un poco tempo despues, asta Minucius Felix, kende a bisa cu e ta cristian, a skirbi: “Ta ken ta asina estupido of sin sinti pa e tribi di kere cu Dios, kende ta esun cu originalmente a traha hende, no por crea hende di nobo?” Mescos cu e cristiannan di prome, Testigonan di Yehova ta pega na e berdad biblico tocante alma humano, morto y resureccion. Awor, laga nos considera e identidad di Dios y di Cristo.

E Berdad y Trinidad

18, 19. Pakico nos por bisa cu Trinidad no ta un siñansa biblico?

¹⁸ E cristiannan di prome siglo no a mira Dios, Cristo y spirito santo como un Trinidad.The Encyclopædia Britannica ta bisa: “Ni e palabra Trinidad ni e idea di e doctrina ta aparece den Testament Nobo. Ni Hesus ni su disipelnan no tawatin intencion di contradeci e Shema [un oracion Hebreo] den e Testament Bieu: ‘Tende, o Israel: Señor nos Dios ta un solo Señor’ (Deu. 6:4).” Cristiannan no a adora e trinidad Romano ni ningun otro dios. Nan a acepta e declaracion di Hesus cu ta Yehova so mester adora. (Mateo 4:10) Ademas, nan a kere den e palabranan di Cristo: “E Tata ta mas cu mi.” (Huan 14:28) Awe, Testigonan di Yehova tin e mesun punto di bista.

¹⁹ E prome siguidonan di Hesus a haci un diferencia cla entre Dios, Cristo y spirito santo. De echo, nan a batisa disipelnan (1) den nomber di e Tata, (2) den nomber di e Yiu y  (3) den nomber di spirito santo; no den nomber di un Trinidad. Mescos tambe Testigonan di Yehova ta siña e berdad biblico y pesei ta haci un diferencia cla entre Dios, su Yiu y spirito santo.—Mateo 28:19.

E Berdad y Bautismo

20. Ki conocemento candidatonan pa bautismo mester haya?

²⁰ Hesus a duna su siguidonan e encargo di haci disipel door di siña nan e berdad. Pa nan por batisa, nan mester haya un conocemento basico di e Scritura. Por ehempel, nan mester reconoce e posicion y autoridad di e Tata, y di su Yiu Hesucristo. (Huan 3:16) Tambe candidatonan pa bautismo tin cu comprende cu spirito santo no ta un persona sino e forsa activo di Dios.—Echonan 2:1-4.

21, 22. Pakico lo bo bisa cu bautismo ta pa creyente?

²¹ E prome cristiannan a batisa solamente personanan cu tawatin conocemento y cu a repenti y dedica nan mes incondicionalmente na Dios pa haci su boluntad. Hudiu y proselito cu a reuni na Herusalem na Pentecoste di aña 33 di nos era ya tawatin un conocemento di e Scritura Hebreo. Ora nan a tende apostel Pedro papia tocante Hesus e Mesias, rond di 3.000 di nan a “ricibi su palabra” y “a wordo batisa.”—Echonan 2:41; 3:19–4:4; 10:34-38.

²² Bautismo cristian ta pa creyente. Hende di Samaria a acepta e berdad, y “ora nan a kere Felipe, kende tawata predica e bon nobo tocante di e reino di Dios y e nomber di Hesucristo, nan tawata wordo batisa, tanto homber como mohe.” (Echonan 8:12) Como un proselito deboto cu tawatin conocemento di Yehova, e eunuco Etiope a acepta prome e splicacion di Felipe tocante cumplimento di profecia Mesianico, y despues el a batisa. (Echonan 8:34-36) Mas despues, Pedro a bisa Cornelio y otro paganonan cu “e hende cu ta teme [Dios] y cu ta haci husticia ta aceptabel p’e”, y cu tur hende cu ta pone fe den Hesucristo ta ricibi pordon di pica. (Echonan 10:35, 43; 11:18) Tur esaki ta harmonisa cu e mandamento di Hesus pa ‘haci disipel, y siña nan pa cumpli cu tur loke el a ordena.’ (Mateo 28:19, 20; Echonan 1:8) Testigonan di Yehova tin e mesun norma. Ta solamente esnan cu tin un conocemento basico di e Scritura y cu a haci un dedicacion na Dios por batisa serca nan.

23, 24. Con ta e manera corecto pa cristiannan batisa hende?

²³ E manera corecto pa batisa creyente ta door di baha nan completamente bou di awa. Despues cu Hesus a batisa den Riu Yordan, el a “sali for di awa.” (Marco 1:10) E eunuco Etiope a ser batisa na “un luga cu [tawatin] awa.” E cu Felipe “a baha bai den awa” y despues a “sali for di” dje. (Echonan 8:36-40) E echo cu Bijbel ta conecta bautismo cu un entiero figurativo tambe ta indica cu mester bai completamente bou di awa.—Romanonan 6:4-6; Colosensenan 2:12.

²⁴ The Oxford Companion to the Bible ta bisa: “E descripcionnan di algun bautismo di Testament Nobo ta indica cu tawata manda e persona cu a ser batisa bou di awa.” Segun e obra Frances Larousse du XX^e Siecle (Paris, 1928), “e prome cristiannan a batisa door di bai den awa tur caminda cu tawatin awa.” Y e buki After Jesus—The Triumph of Christianity ta remarca: “Den su forma mas basico,  [bautismo] a exigi pa e candidato haci un confesion di su fe, y despues baha completo bou di awa den nomber di Hesus.”

25. Kico nos lo considera den e siguiente articulo?

²⁵ E puntonan menciona anteriormente relaciona cu creencia- y practicanan basa riba Bijbel di e prome cristiannan ta djis algun ehempel. Nos lo por menciona mas punto riba cua nan creencianan y esnan di Testigonan di Yehova ta cuadra. Den e siguiente articulo nos lo considera mas maneranan pa identifica esnan cu ta siñando hende e berdad.

Con Lo Bo Contesta?

• Ki clase di adoracion Dios ta exigi?

• Con e berdad a bira realidad pa medio di Hesucristo?

• Kico ta e berdad tocante alma y morto?

• Con e bautismo cristian ta ser efectua, y ki rekisito candidatonan di bautismo mester cumpli cu ne?

[Preguntanan di Estudio]

[Plachi na pagina 16]

Hesus a bisa Pilato: ‘Mi a bini pa duna testimonio di e berdad’

[Plachi na pagina 17]

Bo por splica pakico Hesus a bisa: ‘Ami ta e berdad’?

[Plachi na pagina 18]

Kico ta e berdad tocante bautismo cristian?