Kico A Pasa cu Fierno?

KICO ta bini na bo mente ora bo tende e palabra “fierno”? Bo ta mira fierno como un luga literal di candela y suafel, di tormento y angustia eterno? Of kisas fierno ta un descripcion simbolico di un condicion?

Pa hopi siglo, lidernan religioso di cristiandad a mira fierno di tormento doloroso como e destino final pa hende pecado. Ainda e idea aki ta popular den hopi otro religion. U.S.News & World Report ta bisa: “Talbes ta cristianismo a haci fierno un palabra masha conoci, pero no ta nan so tin e doctrina ei. Casi tur religion principal di mundo y algun di e chikitonan tambe ta spierta hende contra un castigo doloroso den e bida despues di morto.” Hindu, budista, moslem y algun otro religion oriental ta kere den un sorto di fierno.

Pero awendia hende a cuminsa haya un otro concepto di fierno. Segun e revista menciona anteriormente, “aunke ainda tin hopi hende ta kere den e fierno tradicional, mas y mas hende tin e punto di bista moderno cu perdicion eterno ta un luga di isolacion particularmente desagradabel; kiermen kisas fierno no ta dje cayente ei toch.”

E revista hesuita La Civiltà Cattolica a remarca: “Ta un engaño . . . pa pensa cu Dios, pa medio di demoño, ta pone esnan cu ta bai perdi pasa den tormento spantoso manera esun di candela.” El a agrega: “Fierno ta existi, no como un luga, sino como un estado, un condicion den cua e persona cu a aleha for di Dios ta sufri dolo.” Papa Huan Pablo II a bisa na 1999: “Fierno no ta un luga literal; e ta mas bien e condicion di esnan cu a scohe pa separa nan mes totalmente for di Dios, e fuente di tur bida y goso.” Pa loke ta e imagennan di un fierno di candela, el a bisa: “Esakinan ta mustra con frustra y bashi un bida sin Dios ta.” Si papa a describi fierno cu palabranan manera “vlam di candela y un diabel cu forki grandi bisti na cora, hende lo no a tuma esei mucho na serio”, segun historiado di iglesia Martin Marty.

Cambionan similar ta tumando luga den otro organisacionnan religioso tambe. Un informe di e comision di doctrina di Iglesia di Inglatera a bisa: “Fierno no ta tormento eterno, sino e curso di bida cu un persona ta scohe irevocablemente cu ta asina contra Dios y asina definitivo cu e unico fin cu e ta hiba na dje ta destruccion completo.”

E catisashi di Iglesia Episcopal di Merca ta defini fierno como “morto eterno pa motibo di a rechasa Dios.” Segun U.S.News & World Report, un cantidad creciente di hende ta promoviendo e idea cu “e fin di e malbadonan ta destruccion, no sufrimento eterno. . . . [Nan] argumento ta cu esnan cu finalmente ta  rechasa Dios lo simplemente disparce for di existencia den e ‘candela ardiente’ di fierno.”

Aunke e tendencia djawe ta pa rechasa e pensamento di candela y suafel, hopi ta sigui pega na e creencia cu fierno ta un luga literal di tormento. “E Scritura ta papia claramente di fierno como un luga literal di tormento di candela”, segun Albert Mohler di e Seminario Teologico di Bautistanan di Suit na Louisville, Kentucky, Merca. Y e informe The Nature of Hell cu e Comision di Aliansa Evangelico a prepara, ta declara: “Fierno ta un experencia conciente di rechaso y tormento.” E ta agrega: “E grado di castigo y sufrimento den fierno ta depende di e gravedad di e picanan cometi riba tera.”

Un biaha mas, fierno ta un luga di candela di tormento eterno of di destruccion? Of e ta simplemente un condicion di separacion for di Dios? Kico realmente ta fierno?

[Cuadro/Plachi na pagina 4]

Un Historia Cortico di Fierno

KI TEMPO esnan cu ta bisa cu nan ta cristian a cuminsa kere den fierno? Hopi tempo despues di Hesucristo y su apostelnan. “E Apocalipsis di Pedro (di dos siglo E.C.) tawata e prome obra cristian [apocrifo] cu ta describi e castigo y torturanan di pecadonan den fierno”, segun e Encyclopædia Universalis Frances.

Sinembargo, entre e prome Tatanan di Iglesia, tawatin un desacuerdo riba fierno. Hustino Martir, Clemente di Alehandria, Tertuliano y Cipriano tur a kere cu fierno ta un luga di candela. Origen y e teologo Gregorio di Nisa a pensa cu fierno ta un luga di separacion for di Dios—di sufrimento spiritual. Di otro banda, pa Agustin di Hipona, sufrimento den fierno tawata tanto spiritual como literal: un punto di bista cu a haya aceptacion amplio. “Pa siglo 5 e doctrina rigido cu pecadonan lo no haya un di dos chens despues di e bida aki y cu e candela cu lo devora nan lo no paga nunca, a bira e siñansa dominante tur caminda”, profesor J.N.D. Kelly a skirbi.

Den siglo 16, pa reformadonan protestant manera Martin Luther y Johannes Calvijn, e tormento di candela den fierno tawata simbolo di un separacion eterno for di Dios. Sinembargo, e idea di fierno como un luga di tormento a regresa den e siguiente dos siglonan. Predicado protestant Jonathan Edwards tawatin custumber di hinca miedo den curason di e Mericanonan colonial cu pinturanan bibo di fierno.

Pero no mucho tempo despues, e vlamnan di fierno a cuminsa baha y caba na nada. “Siglo 20 casi a trece un fin na fierno”, segun U.S.News & World Report.

[Plachinan]

Segun Hustino Martir, fierno tawata un luga di candela

Agustin di Hipona a siña cu hende a sufri den sentido spiritual y literal den fierno