Kico Realmente Ta Fierno?

SEA cual sea e idea cu abo tin di “fierno”, por lo general mayoria hende ta pensa cu e ta un luga di duna castigo pa pica. Encuanto pica y su efecto, Bijbel ta bisa: “Door di un hende pica a drenta den mundo, y morto door di pica, y asina morto a pasa pa tur hende, pasobra tur a peca.” (Romanonan 5:12) Tambe e Scritura ta bisa: “Pago di pica ta morto.” (Romanonan 6:23) Siendo cu e castigo pa pica ta morto, ta importante pa haya sa ta kico ta e berdadero nificacion di fierno: Kico ta sosode cu nos ora nos muri?

Tin un of otro forma di bida despues di morto? Kico ta fierno, y ki sorto di hende ta bai ei? Tin speransa pa esnan cu ta bai fierno? Bijbel ta duna contesta franco y satisfactorio riba e preguntanan aki.

Tin Bida Despues di Morto?

Tin algo den nos, manera un alma of un spirito, cu ta sigui biba despues cu e curpa muri? Wak con e prome homber Adam, a haya bida. Bijbel ta bisa: “SEÑOR Dios a forma hende di e stof di tera y a supla e rosea di bida den su nanishi.” (Genesis 2:7) Aunke ta halamento di rosea a sostene su bida, ora Yehova a pone “e rosea di bida den su nanishi” esei a encera mas cu simplemente supla aire den su pulmonnan. El a nifica cu Dios a pone den e curpa sin bida di Adam e chispa di bida—“e forsa di bida”, cu ta activo den tur criatura riba tera. (Genesis 6:17; 7:22) Bijbel ta yama e forsa di bida aki “spirito.” (Santiago 2:26) Bo por compara e spirito ei cu coriente cu ta activa un mashin of un aparato y lag’e funciona. Mescos cu coriente mes no ta haya e caracteristicanan di e aparato cu e ta pone traha, e forsa di bida mes no ta tuma over ningun di e caracteristicanan di e criaturanan cu e ta duna forsa. E no tin personalidad ni capasidad mental.

Kico ta sosode cu e spirito ora un persona muri? Salmo 146:4 ta bisa: “Su spirito ta sali, e ta bolbe na tera; e mes dia ei su pensamentonan ta perece.” Ora un persona muri, su spirito impersonal no ta sigui existi den un otro region como un criatura spiritual. E ta “bolbe na Dios, kende a duna esaki.” (Eclesiastes 12:7) Esaki ta nifica cu cualkier speransa pa futuro pa e persona ei ta depende completamente di Dios.

E filosofonan Griego di antiguedad Socrates y Plato tawatin e creencia cu un alma den un persona ta sigui biba despues di morto y no ta muri nunca. Kico Bijbel ta siña tocante alma? Adam “a bira un alma bibo”, segun 1 Corintionan 15:45. E no a ricibi un alma;  e tawata un alma—un persona completo. E Scritura ta papia di alma cu ta bendiciona, alma cu ta pasa amargura, alma cu ta yora di tristesa, etcetera. (Genesis 27:4; Yeremias 13:17; Salmo 119:28) Si, hende mes ta un alma. Ora un persona muri, e alma ei ta muri.—Ezekiel 18:4.

Den ki condicion e mortonan ta anto? Ora Yehova a pronuncia sentencia riba Adam, El a bis’e: “Stof bo ta, y na stof lo bo bolbe.” (Genesis 3:19) Unda Adam tawata prome cu Dios a form’e di stof di tera y dun’e bida? Masha simpel, e no tawata existi! Ora Adam a muri, el a stop di existi completamente. Eclesiastes 9:5 y 10 ta splica bon cla den ki condicion e mortonan ta. Ei e ta bisa: “Mortonan no sa nada mas . . . den e graf caminda bo ta bai no tin trahamento, ni planiamento, ni conocemento, ni sabiduria.” (Beibel na papiamentu koriente) Segun Bijbel, morto ta un estado di no existencia. E mortonan no ta conciente di nada, nan no por sinti ni pensa nada.

Tormento Eterno of Graf Comun?

Siendo cu e mortonan no ta conciente di nada, fierno no por ta un luga ardiente di tormento caminda e malbadonan ta sufri despues di morto. Kico ta fierno anto? Ora nos examina loke a sosode cu Hesus despues cu el a muri, e ta yuda nos contesta e pregunta ei. E escritor di Bijbel, Lucas, ta conta: “E [Hesus] no a wordo laga den Hades [fierno, E Testament Nobo], ni su carni no a mira corupcion.” * (Echonan 2:31) Unda e fierno ei, caminda asta Hesus a bai, ta? Apostel Pablo a skirbi: “Mi a duna boso . . . cu Cristo a muri pa nos picanan segun e Scrituranan y cu el a wordo dera, y cu el a wordo lanta riba e di tres dia segun e Scrituranan.” (1 Corintionan 15:3, 4) Di manera cu Hesus tawata den fierno, esta graf, pero e no a ser laga ei pasobra el a ser lanta, of resusita.

Considera tambe e caso di e homber husto Job, kende a sufri masha tanto. E kier a scapa for di su sufrimento, pesei el a roga: “Bo lo . . . sconde mi den Seol, . . . te ora bo furia pasa!” * (Job 14:13) Ta hopi irasonabel pa pensa cu Job a desea di bai den un luga cayente pa e haya alivio! Pa Job, “fierno” tawata simplemente e graf, caminda su sufrimento lo a caba. Kiermen anto, e fierno di Bijbel ta e graf comun di humanidad caminda tanto bon hende como mal hende ta bai.

Fierno di Candela —Destruccion Completo?

Ta existi e posibilidad cu e candela di fierno ta un simbolo di destruccion completo of cabal? E Scritura ta haci un distincion entre candela y Hades, of fierno, y ta bisa: “Morto y  Hades a wordo tira den e lago di candela.” “E lago” menciona aki ta simbolico, ya cu e morto y fierno (Hades) cu ta ser tira den dje no por kima literalmente. “Esaki [lago di candela] ta e di dos morto”—morto for di cua no tin speransa di bini bek na bida.—Revelacion 20:14.

E lago di candela tin e mesun nificacion cu e “candela di fierno [“candela di Gehena”, NW]” cu Hesus a papia di dje. (Mateo 5:22; Marco 9:47, 48) E palabra Gehena ta aparece 12 biaha den e Scritura Griego Cristian, y e ta referi na e vaye di Hinom, pafo di e murayanan di Herusalem. Tempo cu Hesus tawata riba tera, nan tawata uza e vaye aki como un dump, “caminda tawata tira cadaver di criminal y di animal, y tur otro sorto di sushedad.” (Smith’s Dictionary of the Bible) Tawata mantene e candela sendi door di tira suafel den dje pa kima sushi. Hesus a uza e vaye ei como un simbolo apropiado di destruccion eterno.

Mescos cu Gehena, e lago di candela ta simbolisa destruccion eterno. Morto y Hades ta “wordo tira” den dje den e sentido cu e cosnan aki lo ser elimina ora humanidad wordo libra for di pica y e condena di morto. Hende cu ta peca boluntariamente sin repenti tambe lo bin resulta den e lago ei. (Revelacion 21:8) Nan tambe lo ser elimina pa semper. Di otro banda, esnan cu ta den e memoria di Dios y cu ta den fierno—graf comun di humanidad—tin un futuro maravioso.

Fierno Ta Bira Bashi!

Revelacion 20:13 ta bisa: “Lama a entrega e mortonan cu tawata den dje, y morto y Hades a entrega e mortonan cu tawata den nan.” Si, e fierno di Bijbel lo ser haci bashi. Manera Hesus a priminti, “e ora lo yega den cua tur cu ta den graf lo tende [Hesus] su bos, y lo sali.” (Huan 5:28, 29) Aunke e miyones di mortonan ei cu ta den e memoria di Yehova Dios no ta existi den ningun forma actualmente, nan lo wordo resusita, of treci bek na bida, den un paradijs restaura aki riba tera.—Lucas 23:43; Echonan 24:15.

Den e mundo nobo di Dios, hende resusita cu ta cumpli cu su leinan husto lo no muri nunca mas. (Isaias 25:8) Yehova lo “seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo.” Echo ta cu “e prome cosnan [lo] a pasa.” (Revelacion 21:4) Esnan cu ta den fierno awor, esta “grafnan conmemorativo [NW]”, lo ricibi un gran bendicion. Si, e bendicion aki ta suficiente motibo pa nos gana mas conocemento di Yehova Dios y di su Yiu, Hesucristo.—Huan 17:3.

[Nota]

[Plachi na pagina 5]

Job a pidi pa e bai fierno pa e haya alivio

[Plachi na pagina 6]

Candela di Gehena—simbolo di destruccion eterno

[Plachi na pagina 7]

‘Esnan cu ta den graf lo sali’