“Bini Serca Mi, . . . y Lo Mi Refresca Boso”

“Laga Nos Haci Bon na Tur Hende”

E ACTIVIDAD principal di Hesus tawata di siña y predica e evangelio di e Reino di Dios. (Marco 1:14; Lucas 8:1) Door cu e siguidonan di Cristo kier imit’e, nan ta mira e trabou di siña hende loke Bijbel ta bisa tocante e Reino di Dios como e actividad di mas importante. (Lucas 6:40) Ora Testigonan di Yehova mira con e mensahe di Reino awe tambe ta trece refrescamento duradero pa esnan cu ta acept’e, mescos cu den e tempo cu Hesus tawata riba tera, esei en berdad ta alegra nan curason.—Mateo 11:28-30.

Ademas di siña hende e Palabra di Dios, Hesus a efectua otro bon obranan tambe. Entre otro cosnan, el a cura e enfermonan y alimenta esnan cu tin hamber. (Mateo 14:14-21) Di igual manera, Testigonan di Yehova ta complementa nan trabou di siña hende Bijbel cu obranan cu ta yuda hende den necesidad. De echo, e Scritura ta ekipa cristiannan “pa tur bon obra” y ta urgi nan pa “haci bon na tur hende.”—2 Timoteo 3:16, 17; Galationan 6:10.

“Nos Rumannan A Presenta”

Na september 1999, un temblor devastador a sagudi Taiwan. Un par di luna despues, awasero torencial y lawina (avalancha) a causa un di e piyo desasternan natural den historia di Venezuela. Mas resien, inundacionnan fuerte a causa hopi daño na e pais Mozambique. Den tur e tres casonan aki, Testigonan di Yehova a presenta mesora cu cuminda, awa, remedi, paña, tent y cos di cushina cu ne pa e victimanan. Boluntarionan riba tereno medico a lanta hospitalnan improvisa pa trata esnan herida, y trahadonan di construccion boluntario a traha cas nobo pa esnan cu a keda desampara.

E yudansa oportuno cu e victimanan a ricibi a conmove nan. “Den nos momentonan di mayor desesperacion, nos rumannan a presenta”, segun Malyori, kende su cas a ser destrui door di un avalancha na Venezuela. Despues cu boluntarionan a construi un cas nobo nobo pa su famia, Malyori a  bisa tur emociona: “Nos no por caba di gradici Yehova pa tur loke El a haci pa nos!” Y ora e victimanan di inundacion na Mozambique a ricibi yabi di nan casnan resien construi, henter e grupo a cuminsa canta e cantica di Reino “Yehova Ta Nos Refugio.” *

E echo cu e boluntarionan por a yuda hende den necesidad a pone cu nan mes tambe a sinti nan refresca. “Mi tawata contento di por a yuda e rumannan aki cu a sufri hopi”, segun Marcelo, kende a sirbi como broeder den un campamento di refugiado na Mozambique. Huang, boluntario na Taiwan, a remarca: “Mi a sinti un gran goso di por a yuda entrega cuminda y tent na e rumannan den necesidad. Esei a fortalece mi fe.”

Un Programa di Boluntario Cu Ta Duna Resultado

Trabou di boluntario tawatin efecto refrescante den sentido spiritual tambe pa decena di miles di preso rond mundo. Con asina? Den añanan resien, Testigonan di Yehova a percura literatura di Bijbel pa mas cu 30.000 persona deteni den mas o menos 4.000 prizon na Merca so. Ademas, caminda ta posibel, Testigonan ta bishita e prizonnan ei personalmente pa studia Bijbel cu e presonan y pa conduci reunionnan cristian. E presonan ta saca beneficio?

Algun preso cu ta studia Bijbel ta cuminsa comparti e siñansanan refrescante di e Palabra di Dios cu otro preso. Como resultado, rond mundo den un cantidad di prizon tin gruponan di preso cu awor ta adora Yehova hunto. “Nos grupo ta creciendo”, un preso na Oregon, Merca, a informa na 2001. “Nos tin 7 publicado di Reino y nos ta conduciendo 38 studio di Bijbel. Mas cu 25 persona ta asisti na e discurso publico y Studio di Toren di Vigilancia y 39 persona a asisti na e Conmemoracion [di e morto di Cristo]. Dentro di poco tres persona mas lo batisa!”

Beneficio y Goso

Funcionarionan di prizon a ripara cu e trabou boluntario aki ta duna resultado. Loke ta impresiona e funcionarionan aki mas tanto ta e beneficionan duradero di e programa di boluntario aki. Un informe ta remarca: “Den e dies añanan cu e programa aki ta andando, ningun exprizonero cu a ser batisa den prizon como Testigo di Yehova a cai preso atrobe. Di otro gruponan si un 50 pa 60 porshento ta bini bek.” Motiva pa e resultadonan cu boluntarionan Testigo a logra, un pasto di prizon na Idaho a bisa den un carta na e sede mundial di Testigonan di Yehova: “Aunke personalmente mi no ta di acuerdo cu boso creencianan religioso, mi ta masha impresiona cu boso organisacion.”

Pa e boluntarionan mes tambe ta un placer cu nan por yuda e presonan. Despues di a conduci un reunion cu un grupo di preso cu a canta un cantica di Reino pa prome bes, un boluntario a skirbi: “Tawata un animacion pa mira 28 homber canta cantica di alabansa na Yehova. Y nan a canta na bos halto! Mi tawatin e privilegio di ta presente na e ocasion ei!” Un boluntario cu ta bishita prizonnan na Arizona a bisa: “Tawata un bendicion grandi pa participa den e trabou special aki!”

Testigonan boluntario di rond mundo gustosamente ta bisa mescos cu Hesus: “Ta mas bendiciona pa duna cu pa ricibi.” (Echonan 20:35) Tambe nan ta confirma cu ta refrescante berdad pa sigui e conseho di Bijbel di haci bon na tur hende.—Proverbionan 11:25.

[Nota]

[Plachi na pagina 8]

Venezuela

[Plachi na pagina 8]

Taiwan

[Plachi na pagina 8]

Mozambique