Nan Ta Sigui Cana den e Berdad

“No tin goso mas grandi pa mi cu di tende cu mi yiunan ta cana den e berdad.”—3 HUAN 4.

1. Riba kico “e berdad di e evangelio” ta enfoca?

YEHOVA ta aproba solamente esnan cu ta ador’e “den spirito y berdad.” (Huan 4:24) Nan ta obedece e berdad door di acepta e totalidad di siñansanan cristian cu ta basa riba e Palabra di Dios. Tal “berdad di e evangelio” ta enfoca riba Hesucristo y e vindicacion di Yehova su gobernacion supremo pa medio di e Reino. (Galationan 2:14) Dios ta permiti “un influencia di eror” pasa riba esnan cu ta prefera falsedad. Pero pa hende por haya salbacion nan mester tin fe den e evangelio y cana den e berdad.—2 Tesalonicensenan 2:9-12; Efesionan 1:13, 14.

2. Pa ki motibo apostel Huan tawata specialmente gradicido y ki relacion a existi entre e y Gayo?

² Proclamadonan di Reino ta “colaboradonan pa e berdad.” Mescos cu apostel Huan y su amigo Gayo, nan ta pega firme na e berdad y ta cana den dje. Ta riba Gayo Huan tawata pensa ora el a skirbi: “No tin goso mas grandi pa mi cu di tende cu mi yiunan ta cana den e berdad.” (3 Huan 3-8) Asta si no ta e biehito Huan mes a trece Gayo den e berdad, debi na e edad avansa, e madures cristian y e cariño paternal di e apostel, tawata na su luga pa mira e homber aparentemente mas jong aki como un di Huan su yiunan spiritual.

E Berdad y Adoracion Cristian

3. Pa ki proposito e prome cristiannan a tene reunion y ki beneficio esei a trece?

³ Pa siña e berdad, e prome cristiannan a reuni como congregacion, hopi bes den casnan priva. (Romanonan 16:3-5) Di e forma ei nan a ricibi animacion y a stimula otro pa stima y haci bon obra. (Hebreonan 10:24, 25) Relaciona cu esnan cu den siglonan mas despues a afirma di ta cristian, Tertuliano (rond di aña 155 pa despues di 220 Era Comun) a skirbi: “Nos ta reuni pa lesa e bukinan di Dios . . . Cu e palabranan santo ei nos ta alimenta nos fe, nos ta lanta nos speransa, nos ta confirma nos confiansa.”—Apology, capitulo 39.

4. Ki papel cantamento a hunga den reunionnan cristian?

⁴ Cu tur probabilidad nan tawata canta durante e reunionnan cristian di e tempo ei. (Efesionan 5:19; Colosensenan 3:16) Profesor Henry Chadwick ta skirbi cu e analista di siglo 2, Celso, a haya e canticanan canta pa esnan cu a afirma di ta cristian “asina bunita cu  el a cunsumi pa e manera cu esakinan a afecta su emocionnan.” Chadwick ta agrega: “Clemente di Alehandria ta e prome escritor cristian cu a analisa ki clase di musica ta adecua pa cristiannan uza. E ta bisa cu nan no mester ta e sorto di musica liga cu baile erotico.” (The Early Church, pagina 274-5) Mescos cu e prome cristiannan aparentemente a canta ora nan a reuni hunto, asina Testigonan di Yehova hopi bes ta canta canticanan cu letra basa riba Bijbel cu ta alaba Dios y e Reino.

5. (a) Ken a duna guia spiritual den e congregacionnan cristian di prome siglo? (b) Con cristiannan berdadero a aplica e palabranan di Hesus skirbi na Mateo 23:8 y 9?

⁵ Den e congregacionnan cristian di prome siglo, esnan cu tawata siña otro hende e berdad tawata e ancianonan, anto sirbidonan ministerial tawata yuda nan compañeronan di adoracion den varios manera. (Filipensenan 1:1) Un cuerpo gobernante cu a depende riba e Palabra di Dios y spirito santo a duna guia spiritual. (Echonan 15:​6, 23-31) Nan no tawata uza titulonan religioso, pasobra Hesus a manda su disipelnan: “Boso no mester wordo yama rabi, pasobra ta un ta boso maestro, y boso tur ta ruman. Y no yama ningun hende riba tera boso tata, pasobra ta un ta boso Tata, Esun cu ta den shelo.” (Mateo 23:​8, 9) Pa loke ta trata e puntonan aki y hopi otro mas, e prome cristiannan y e Testigonan di Yehova ta para riba mesun liña.

Persigui Door cu Nan A Predica e Berdad

6, 7. Aunke e cristiannan berdadero a proclama un mensahe di pas, con nan a ser trata?

⁶ Aunke e prome cristiannan a proclama e mensahe pacifico di Reino, nan, mescos cu Hesus, tambe a ser persigui. (Huan 15:20; 17:14) Historiado John L. von Mosheim a yama e cristiannan di prome siglo “un grupo di homber cu e caracter di mas inofensivo cu por tin, y cu nunca a cana cu un deseo of pensamento mali­cioso di haci daño contra estado.” Dr. Mosheim a bisa cu loke a “molestia e Romanonan tawata cu e cristiannan a adora Dios na un manera simpel, sin nada cu a parce e ritonan sagrado di otro pueblo.” El a agrega: “Nan no tawatin sacrificio, ni tempel, ni imagen, ni oraculo ni orden sacerdotal; y esaki tawata suficiente pa trece riba nan e reproche di un multitud ignorante cu a imagina nan cu un religion no por laga di tin e cosnan aki. Di manera cu hende a mira e cristiannan como un sorto di  ateista; y, pa lei Romano, hende culpabel di ateismo tawata un pest pa comunidad.”

⁷ Sacerdote-, artesano- y otronan cu tawata gana nan pan di cada dia cu practicanan di idolatria a instiga pueblo pa lanta contra e cristiannan cu no a participa den e practicanan aki. (Echonan 19:​23-40; 1 Corintionan 10:14) Tertuliano a skirbi: “Nan ta kere cu ta e cristiannan ta causante di tur desaster di Estado, di tur calamidad den e pueblo. Si Riu Tiber subi yega muraya di e stad, si Riu Nilo no subi pa muha e cunucunan di cultivo, si no yobe, si tin un temblor, si tin hamber, si tin un plaga, mesora ta sali e grito: ‘Tira e cristiannan pa leon!’” Sea cual sea e consecuencianan, cristiannan berdadero ta ‘warda nan di idolo.’—1 Huan 5:21.

E Berdad y Practicanan Religioso

8. Pakico esnan cu ta cana den e berdad no ta celebra Pasco?

⁸ Esnan cu ta cana den e berdad ta evita practicanan no biblico pasobra ‘lus no tin participacion cu scuridad.’ (2 Corintionan 6:​14-18) Por ehempel, nan no ta celebra Pasco di Nacemento, cu mundo ta celebra dia 25 di decem­ber. The World Book Encyclopedia ta reconoce cu “niun hende no sa e fecha exacto cu Cristo a nace.” The Encyclopedia Americana (edicion di 1956) ta bisa: “Saturnalia, un fiesta Romano cu nan a celebra meimei di december, a bira e modelo pa hopi di e custumbernan di fiesta di Pasco.” M’Clintock and Strong’s Cyclopædia ta remarca: “No ta Dios a manda hende celebra Pasco, ni e no ta den T[estament] N[obo].” Y e buki Daily Life in the Time of Jesus ta remarca: “Tounan di bestia . . . tawata pasa winter bou di dak; y for di e echo aki so caba bo por mira cu e fecha tradicional pa Pasco den winter no por ta corecto, ya cu e Evangelio ta bisa cu e wardadonan tawata den cunucu habri.”—Lucas 2:8-11.

9. Pakico sirbidonan di Yehova di pasado y di e tempo actual a evita celebracionnan di Pasco di Resureccion?

⁹ Pasco di Resureccion supuestamente ta recorda e resureccion di Cristo, pero fuentenan confiabel ta conect’e cu adoracion falso. The Westminster Dictionary of the Bible ta bisa cu Pasco di Resureccion tawata “originalmente e festival di primavera na honor di e diosa Teutonico di lus y primavera conoci den e Anglosahonnan como ‘Eastre’”, of ‘Eostre.’ Sea cual sea, Encyclopædia Britannica (edicion 11) ta declara: “No tin ningun indicacion di fiesta di Pasco di Resureccion den Testament Nobo.” Pasco di Resureccion no tawata un fiesta cu e prome cristiannan a celebra, y e pueblo di Yehova djawe no ta celebr’e tampoco.

10. Kico Hesus a manda pa celebra, y ken ta cumpli cu esei corectamente?

¹⁰ Hesus no a manda su siguidonan recorda ni su nacemento ni su resureccion, pero si el a institui e Conmemoracion di su morto como sacrificio. (Romanonan 5:8) Si, esaki ta e unico evenemento cu el a manda su disipelnan celebra. (Lucas 22:19, 20) Te ainda Testigonan di Yehova ta celebra e evenemento anual aki, yama tambe Cena di Señor.—1 Corintionan 11:20-26.

E Berdad Ta Ser Declara na Tur Parti di Tera

11, 12. Con esnan cu ta cana den e berdad semper a apoya nan actividad di predica?

¹¹ Pa esnan cu conoce e berdad ta un honor di por dedica nan tempo, energia y otro recursonan na e obra di predica e bon nobo. (Marco 13:10) Donacionnan boluntario a sostene e trabou di predica di e prome cristiannan. (2 Corintionan 8:12; 9:7) Tertuliano a skirbi: “Asta si tin un tipo di caha di placa, no ta placa di entrada e tin den dje, como si fuera religion ta un negoshi. Tur hende ta trece un biaha pa luna, of ki ora cu e ta desea, y solamente si e ta desea, y si e por, un suma modesto; pasobra ningun hende no ta obliga; ta un ofrenda boluntario e ta.”—Apology, capitulo 39.

¹² E obra mundial di Testigonan di Yehova di predica e Reino tambe ta ser apoya pa donacionnan boluntario. Ademas di Testigonan, personanan gradicido cu ta mustra interes den e berdad tambe ta apoya e actividad aki cu nan  contribucionnan. Aki tambe tin un similaridad entre e prome cristiannan y Testigonan di Yehova.

E Berdad y Conducta Personal

13. Pa loke ta nan conducta, Testigonan di Yehova ta haci caso di ki conseho di Pedro?

¹³ E prome cristiannan cu a cana den e berdad a cumpli cu e conseho di apostel Pedro: “Laga boso conducta ta excelente meimei di e paganonan, asina cu ora nan calumnia boso como malechor, nan por, pa medio di boso bon obranan cu nan ta observa, glorifica Dios den e dia di bishitacion.” (1 Pedro 2:12) Testigonan di Yehova ta tuma e palabranan ei masha na pecho.

14. Kico ta cristiannan su punto di bista di entretenimento inmoral?

¹⁴ Asta despues cu apostasia a haci su entrada, esnan cu tawata cristian pa nomber a evita actividadnan inmoral. W.D. Killen, profesor di historia eclesiastico, a skirbi: “Den siglo 2 y 3, den tur stad grandi teaternan a sirbi como centro di atraccion; por lo general e actornan tawata personanan masha inmoral y semper nan actuacion tawata dirigi pa satisface e apetit pa cos degenera di e epoca ei. . . . Tur cristian berdadero a mira teater cu asco. . . . Nan a keda leu for di su cosnan obsceno; y su suplicanan constante na e dios- y diosanan di paganismo tawata un insulto contra nan conviccionnan religioso.” (The Ancient Church, pagina 318-19) Hesus su siguidonan berdadero djawe tambe ta evita e formanan obsceno y moralmente degrada di entretenimento.—Efesionan 5:3-5.

E Berdad y “e Autoridadnan Cu Ta Goberna”

15, 16. Ken ta “e autoridadnan cu ta goberna”, y con esnan cu ta cana den e berdad ta mira nan?

¹⁵ Apesar di e bon conducta di e prome cristiannan, mayoria emperado Romano tawatin un punto di bista incorecto di nan. Historiado E. G. Hardy ta bisa cu e emperadonan a mira nan como “fanaticonan un poco despreciabel.” E cartanan cu Gobernado Plinio e Menor di Bitinia y Emperado Trahano a skirbi pa otro ta mustra cu por lo general e gobernantenan no tawata mucho bon na haltura kico realmente ta cristianismo. Con cristiannan ta mira Estado?

¹⁶ Mescos cu e prome siguidonan di Hesus, Testigonan di Yehova ta den un sumision relativo na “e autoridadnan cu ta goberna.” (Romanonan 13:1-7) Si un exigencia humano ta na conflicto cu e boluntad di Dios, nan ta tuma e siguiente posicion: “Nos mester obedece Dios mas cu hende.” (Echonan 5:29) E buki After Jesus—The Triumph of Christianity ta bisa: “Aunke cristiannan no a participa den adoracion di emperado, nan no tawata bochinchero y nan religion, aunke e tawata straño y tin biaha ofensivo for di e punto di bista pagano,  no a representa ningun menasa real pa e imperio.”

17. (a) Ki gobierno e prome cristiannan a apoya? (b) Con e siguidonan berdadero di Cristo a aplica e palabranan di Isaias 2:4 den nan bida?

¹⁷ E prome cristiannan a promove e Reino di Dios, mescos cu e patriarcanan Abraham, Isaak y Yacob a eherce fe den e stad priminti “di cual Dios ta e arkitecto y constructor.” (Hebreonan 11:8-10) Mescos cu nan Doño, Hesus su disipelnan ‘no tawata parti di mundo.’ (Huan 17:14-16) Y pa loke ta guera y conflicto humano, nan a busca pas door di “bati nan spadanan traha ploeg cu nan.” (Isaias 2:4) Den un comentario cu profesor di historia di iglesia Geoffrey F. Nuttall a duna, e ta menciona un paralelo interesante: “E actitud di e prome cristiannan pa cu guera tawata mescos cu di e hendenan cu ta yama nan mes Testigonan di Yehova, maske nos no tin mucho gana di admiti esei.”

18. Pakico ningun gobierno no tin motibo pa tene miedo di Testigonan di Yehova?

¹⁸ Como individuonan neutral sumiso na “autoridadnan cu ta goberna”, e prome cristiannan no tawata un menasa pa ningun entidad politico, y Testigonan di Yehova tampoco. “Bo mester tin un mente basta sera y locamente desconfia pa kere cu Testigonan di Yehova ta representa un menasa pa cualkier regimen politico”, un editorial Norte Americano a skirbi. “Nan ta mes of mas obediente na gobierno y amante di pas cu cualke otro grupo religioso.” Autoridadnan bon informa sa cu nan no tin nodi tene miedo di Testigonan di Yehova.

19. Encuanto belasting, kico nos por bisa di e prome cristiannan y e Testigonan di Yehova?

¹⁹ Un manera den cua e prome cristiannan a mustra respet pa “e autoridadnan cu ta goberna” ta door di paga nan belasting. Ora Hustino Martir a skirbi e Emperado Romano Antonino Pio (138-161 E.C.), el a bisa cu e cristiannan tawata “mas dispuesto” pa paga nan belasting “cu tur otro hende.” (First Apology, capitulo 17) Y Tertuliano a bisa e gobernantenan Romano cu nan cobradonan di belasting tawatin un “debe di gratitud na e cristiannan” pa e echo cu nan a paga nan belasting na un manera conciencial. (Apology, capitulo 42) Cristiannan a  beneficia di e Pax Romana, of Pas Romano, cu su orden y lei, su camindanan den bon estado y e biahamento riba lama relativamente safe. Nan a reconoce cu nan tawata debe sosiedad, pesei nan a obedece e palabranan di Hesus: “Duna Cesar loke ta di Cesar, y Dios loke ta di Dios.” (Marco 12:17) Awe e pueblo di Yehova ta sigui e conseho aki y a ricibi elogio pa nan honestidad, manera den pagamento di belasting.—Hebreonan 13:18.

E Berdad—Un Laso di Union

20, 21. Pa loke ta un hermandad pacifico, kico nos por bisa di tanto e prome cristiannan como di Testigonan di Yehova di e tempo actual?

²⁰ Pa motibo cu e prome cristiannan a cana den e berdad, nan tawata uni den un hermandad pacifico, mescos cu Testigonan di Yehova ta awe. (Echonan 10:​34, 35) Un carta cu The Moscow Times a publica a bisa: “[Testigonan di Yehova] ta bon conoci como personanan amigabel, bondadoso y manso cu ta masha facil pa trata cu ne, cu nunca ta pone presion riba otro hende y cu semper ta busca pas den nan relacion cu otro hende . . . No tin practicante di soborno, burache ni drogadicto den nan, y e motibo ta masha simpel: Nan simplemente ta purba laga nan conviccionnan basa riba Bijbel guia nan den tur loke nan ta bisa of haci. Si tur hende na mundo purba por lo menos biba segun Bijbel manera Testigonan di Yehova ta haci, nos mundo cruel lo ta completamente diferente.”

²¹ Encyclopedia of Early Christianity ta declara: “E iglesia di cuminsamento a mira su mes como un comunidad nobo den cua gruponan cu un tempo tawata enemigo di otro, manera Hudiu y pagano, por a biba hunto na pas cu otro.” Testigonan di Yehova tambe ta un hermandad internacional amante di pas—un berdadero sosiedad humano nobo. (Efesionan 2:11-18; 1 Pedro 5:9; 2 Pedro 3:13) Ora e alto hefe di siguridad di e Tereno di Exhibicion di Pretoria na Sur Africa a mira con Testigonan di tur rasa a reuni pacificamente como delegado di congreso, el a bisa: “Tur hende tawata y ta cortes. Nan tin bon manera di papia cu otro, y nan a manifesta un bunita actitud den e ultimo par di dianan. Tur esaki ta duna testimonio di e caliber halto di e miembronan di boso sosiedad, y cu tur ta biba hunto manera un famia felis.”

E Recompensanan di Siña Otro Hende e Berdad

22. Kico ta sosodiendo actualmente pa motibo cu cristiannan a manifesta e berdad?

²² Door di nan conducta y actividad di predica, Pablo y otro cristiannan a ‘manifesta e berdad.’ (2 Corintionan 4:2) Bo no ta di acuerdo cu Testigonan di Yehova ta haciendo mescos y ta siñando tur nacion e berdad? Rond mundo mas y mas hende ta acepta adoracion berdadero y ta basha bai na “e sero di e cas di SEÑOR.” (Isaias 2:​2, 3) Tur aña miles ta ser batisa pa ­simbolisa nan dedicacion na Dios, loke ta resulta den formacion di hopi congregacion nobo.

23. Con abo ta mira esnan cu ta siña tur nacion e berdad?

²³ Aunke e sirbidonan di Yehova ta bini di varios rasa y rango social, nan ta uni den adoracion berdadero. E amor cu nan ta desplega ta identifica nan como disipel di Hesus. (Huan 13:35) Abo por mira cu en berdad ‘Dios ta meimei di nan’? (1 Corintionan 14:25) Bo ta apoya esnan cu ta siña tur nacion e berdad? Si ta asina, sigui demostra bo gratitud duradero pa e berdad y ricibi e privilegio di cana den dje pa semper.

Con Lo Bo Contesta?

• Den asuntonan di adoracion, ki similaridad tin entre e prome cristiannan y Testigonan di Yehova?

• Kico ta e unico evenemento religioso cu esnan cu ta cana den e berdad ta celebra?

• Ken ta “e autoridadnan cu ta goberna”, y con cristiannan ta mira nan?

• Den ki sentido e berdad ta un laso di union?

[Preguntanan di Estudio]

[Plachi na pagina 21]

Semper reunionnan cristian tawata un bendicion pa esnan cu ta cana den e berdad

[Plachi na pagina 23]

Hesus a manda su siguidonan conmemora su morto como sacrificio

[Plachi na pagina 24]

Mescos cu e prome cristiannan, Testigonan di Yehova ta mustra respet pa “e autoridadnan cu ta goberna”