Pregunta di Lector

Ki ora un mohe cristian mester tapa su cabes pa motibonan religioso?

Apostel Pablo a skirbi: “Tur mohe cu ta haci oracion of ta profetisa sin tapa cabes, ta deshonra su cabes.” Dicon? Pa motibo di e principio biblico di hefatura cu ta bisa: “E homber ta e cabes di e mohe.” Den e congregacion cristian normalmente ta hende homber tin e responsabilidad di haci oracion y predica. Pesei, ora un mohe cristian ta atende cu asuntonan di adoracion cu normalmente su casa of un otro homber batisa lo mester atende, e mester tapa su cabes.—1 Corintionan 11:3-10.

Situacionnan den cua un mohe cristian tin cu tapa su cabes por surgi den su matrimonio. Por ehempel, ora e famia bini hunto pa studia Bijbel of pa come, normalmente ta e esposo ta dirigi e studio y representa nan den oracion na Dios. Sinembargo, si e esposo no ta Testigo, e responsabilidad aki ta cai riba su casa. Pesei, ora e ruman mohe cristian ta haci oracion na bos halto pa su mes y pa otronan of e ta conduci un studio di Bijbel cu su yiunan den presencia di su casa, ta apropiado pa e tapa su cabes. Si su esposo no ta presente, e no tin nodi tapa su cabes pasobra Dios a dun’e autoridad pa siña su yiunan.—Proverbionan 1:8; 6:20.

Pero kico si un yiu homber jong di e famia ta un sirbido dedica y batisa di Yehova Dios? Siendo cu e yiu homber ta un miembro di e congregacion  cristian, e mester ricibi instruccion di e miembronan masculino di e congregacion. (1 Timoteo 2:12) Si e tata ta un creyente, ta e mester siña su yiu homber. Sinembargo, si e tata no ta cu e famia, e ora ei e mama mester tapa su cabes si e ta conduci un studio di Bijbel cu e yiu homber batisa y e otro yiunan. Ta keda na e mama pa di­cidi si e ta pidi e yiu homber batisa pa haci oracion na ocasionnan manera un studio di Bijbel of ora di come. Kisas e no ta haya cu e yiu homber ta suficiente capas ainda pa haci esei, y e ta dicidi cu e mes ta haci oracion. Si e dicidi di haci oracion na e ocasionnan ei, e tin cu tapa su cabes.

Pa un ruman mohe por realisa cierto tareanan den congregacion, lo e tin cu tapa su cabes. Por ehempel, na un reunion di sirbishi den siman kisas no tin ruman homber batisa presente, sino ruman mohe so. Tambe por sosode cu no tin hende homber batisa na un reunion di congregacion. Si un ruman mohe tin cu cumpli cu responsabilidadnan cu normalmente un ruman homber lo a haci na un reunion di congregacion of reunion di sirbishi cu ta un areglo di e congregacion, e tin cu tapa su cabes.

Cristiannan mohe mester tapa nan cabes ora nan ta traduci un discurso biblico na un otro idioma of na idioma di seña, of ora nan ta lesa na bos halto e paragrafnan for di un publicacion basa riba Bijbel cu ta ser uza na un reunion di congregacion? No. Den e casonan ei, no ta e ruman mohe ta hibando delantera ni dunando siñansa. Mescos tambe, ruman mohe no tin nodi tapa cabes ora nan ta participa den demostracion, ta conta un experencia of ta duna un parti den e Scol di Ministerio Teocratico.

Aunke ta hombernan batisa so ta duna siñansa den e congregacion, tanto hende homber como hende mohe tin e responsabilidad di predica y siña pafo di e congregacion. (Mateo 24:14; 28:​19, 20) Pues, ora un mohe cristian ta papia cu hende cu no ta Testigo tocante e Palabra di Dios den presencia di un Testigo di Yehova masculino, e no tin nodi tapa cabes.

Sinembargo, e situacion ta diferente ora e tin cu conduci un studio di Bijbel na un cas caminda tin un homber dedica y batisa presente. Esaki ta un areglo haci di antemano pa duna siñansa caminda esun cu ta conduci e studio en realidad ta hiba delantera. Den e caso aki e areglonan di congregacion ta conta pa e studio. Si un Testigo femenino ta conduci e studio ei mientras tin un Testigo masculino batisa presente, ta corecto pa e ruman mohe tapa su cabes. Sinembargo, ta e ruman homber dedica mester haci oracion. Un ruman mohe no ta haci oracion den presencia di un ruman homber dedica, a menos cu tin motibonan excepcional, manera den caso cu e ruman homber no por papia.

De bes en cuando sa sosode cu un publicado di Reino masculino cu no a batisa ainda ta bai studio di Bijbel hunto cu un ruman mohe cristian. Si e ruman mohe ta desea e por pidi e publicado pa conduci e studio. Pero siendo cu no ta corecto pa e representa e ruman mohe batisa den oracion na Yehova, ta apropiado pa e ruman mohe haci oracion na e studio. Ora e ruman mohe ta conduci e studio of ta haci oracion na e ocasionnan aki, e mester tapa su cabes. Maske e publicado homber no ta batisa ainda, door cu e ta predica, hende pafo di e congregacion ta identific’e cu e congregacion.

Apostel Pablo a skirbi: “E mohe mester tin un simbolo di autoridad riba su cabes, pa motibo di e angelnan.” Si, ruman mohenan cristian tin e privilegio di sirbi como bon ehempel pa miyones di angel cu lealmente ta sigui somete nan mes na Yehova. Ta masha bon pa un mohe deboto na Dios cumpli debidamente cu e rekisito di tapa cabes ora cu esaki ta necesario!

[Plachi na pagina 26]

Hende mohe ta tapa cabes como un señal di respet pa e principio di hefatura