Sembra Husticia y Cosecha Dios Su Bondad Amoroso

“ESUN cu para borg pa un stranhero siguramente lo sufri pa esei, ma esun cu no ta gusta para borg lo ta sigur.” (Proverbionan 11:15) Di un manera masha combencente e proverbio breve y alcaso aki ta anima hende pa actua responsabel! Si bo ta para borg pa un persona dudoso, bo ta buscando problema pa bo curpa. Evita di para borg, y asina evita problema cu placa. E expresion “para borg” na e idioma Hebreo original ta bisa ‘duna man’, un gesto cu den Israel di antiguedad a sirbi como firma un acuerdo.

Ta claro cu e principio cu ta aplica den e caso aki ta: “Loke un hende sembra, esaki tambe e lo cosecha.” (Galationan 6:7) Profeta Oseas a declara: “Sembra den husticia, cosecha den misericordia [“bondad amoroso”, NW].” (Oseas 10:12) Si, sembra husticia door di actua na harmonia cu Dios su leinan, y lo bo cosecha su bondad amoroso. Uzando e principio aki bes tras bes, Rei Salomon di Israel na un manera combencente ta anima accion corecto, abla decente y un bon actitud. Un examinacion di su palabranan sabi sigur lo anima nos pa beneficia nos mes door di sembra husticia.—Proverbionan 11:15-31.

Sembra “Amabilidad”, y Cosecha “Honor”

Segun e rei sabi: “Un mohe amabel ta obtene honor, y hombernan violento ta obtene rikesa.” (Proverbionan 11:16) E versiculo aki ta ilustra e contraste entre honor duradero cu un mohe amabel, un “mohe cu gracia”, por haya y e rikesa temporal cu un homber violento of bruto ta obtene.—Beibel na papiamentu koriente.

Con un persona por cultiva amabilidad of gracia cu ta resulta den honor? Salomon a conseha: “Retene sabiduria sano y discrecion, asina nan lo ta . . . adorno na bo garganta.” (Proverbionan 3:21, 22) Y e salmista a papia di ‘gracia cu ta basha for di lip di un rei.’ (Salmo 45:1, 2) Si, sabiduria sano of practico, discrecion [“habilidad di pensa”, NW] y un bon uzo di nos lenga ta halsa un persona su balor y ta hacie mas amabel. Esei sigur ta e caso serca un mohe discreto. Abigail, esposa di e homber bobo Nabal, ta un ehempel. E tawata “inteligente y bunita di aparencia”, y Rei David a elogi’e pa su “discernimento.”—1 Samuel 25:3, 33.

Un mohe deboto cu ta realmente amabel, sigur lo ricibi honor. Hende lo papia bon di dje. Si e ta casa, lo e ricibi honor for di su casa. De echo, su conducta ta trece honor riba henter e famia. Y su honor no ta algo pasahero. “Un bon nomber ta mas di desea cu gran rikesa, y  aprecio ta miho cu plata y oro.” (Proverbionan 22:⁠1) E bon nomber cu e ta traha serca Dios tin un balor permanente.

E situacion aki ta contrario na esun di un opresor of di un hende violento, un “homber bruto.” (Proverbionan 11:16, Beibel na papiamentu koriente) Un opresor ta ser cataloga hunto cu hombernan malbado y cu e adversarionan di e adoradonan di Yehova. (Job 6:23; 27:13) Un homber asina ‘no ta pone Dios su dilanti.’ (Salmo 54:3) Door di oprimi y probecha di hende inocente, e persona ei kisas ta “montona plata manera stof.” (Job 27:16) Sinembargo, na un momento dado lo e cai drumi sin lanta, y cualkier dia por bira e ultimo dia cu e ta habri su wowonan. (Job 27:19) E ora ei tur su rikesa y logronan lo no tin ningun balor.—Lucas 12:16-21.

Esta un les importante Proverbionan 11:16 ta siña nos! Cu poco palabra e rei di Israel a mustra nos kico ta e resultado di tanto amabilidad como violencia. Asina e ta urgi nos pa sembra husticia.

“Bondad Amoroso” Ta Trece Recompensa

Dunando un otro les den relacion humano, Salomon ta bisa: “E hende misericordioso [“di bondad amoroso”, NW] ta haci bon na su mes alma, ma e hende cruel ta tormenta su mes carni.” (Proverbionan 11:17) Segun un experto biblico: “E esencia di e proverbio ta cu e manera cu un persona ta comporta su mes cu otro hende, sea ta bon of malo, tin consecuencianan inespera y inintencional pa e persona mes.” Considera e ehempel di un hoben cu yama Lisa. * Maske no ta su intencion, semper e ta laat pa su afspraaknan. Ta masha normal pa e yega 30 minuut of mas laat na afspraak cu el a haci pa topa cu otro proclamadonan di Reino pa bai predica. Lisa su manera di anda no ta benefici’e. E por critica otronan si nan ta cansa di perde tempo balioso, y despues ta evita di traha afspraak cu ne?

Un perfeccionista—un persona cu ta exigi mucho di su mes—tambe ta cruel cu su mes. Si semper e ta lucha pa logra metanan inalcansabel, e ta cansa su curpa y haya un desilusion tras otro. Di otro banda, nos ta beneficia nos mes ora nos ta pone metanan realistico y rasonabel. Kisas nos no ta comprende cosnan cu mesun facilidad cu otro hende. Of podise malesa of biehes ta limita loke nos por haci. Laga nos nunca fada debi na nos progreso spiritual, pero semper sigui mustra cu nos ta rasonabel ora nos ta trata cu nos limitacionnan. Nos lo ta felis ora nos ta haci ‘tur nos esfuerso’ di acuerdo cu nos sircunstancia.—2 Timoteo 2:15; Eclesiastes 7:16.

Dunando mas detaye con un persona husto ta beneficia su mes, mientras cu un persona cruel ta perhudica su mes, e rei sabi ta declara: “E malbado ta ricibi pago engañoso, ma esun cu sembra husticia ta haya un recompensa berdadero. Esun cu para firme den husticia lo obtene bida, y esun cu sigui maldad lo causa su mes morto. Esnan cu ta di curason perverso ta un abominacion pa SEÑOR, ma esnan perfecto den nan caminda ta su delicia. Siguramente e hende malbado lo no keda sin castigo, ma e desendientenan di e husto lo wordo libra.”—Proverbionan 11:18-21.

Den varios manera e versiculonan aki ta enfatisa e punto basico aki: Sembra husticia y cosecha su recompensa. Kisas e hende malbado ta recori na engaño of gamblemento pa saca algo for di nada. Siendo cu e pagonan ei ta engañoso, lo e por keda desilusiona. Esun cu ta traha di un manera honesto ta haya recompensa berdadero ya cu e tin un cierto siguridad. Door cu e persona perfecto, of sin culpa, tin Dios su aprobacion, e tin e speransa di haya bida eterno. Pero kico e persona malbado lo cosecha? Hende malbado lo no keda sin haya castigo. (Proverbionan 2:21, 22) Esta un bon spiertamento pa sembra husticia!

Hende Discreto Ta Realmente Bunita

Salomon ta sigui: “Manera un renchi di oro den snuit di porco, asina un mohe bunita  sin discrecion ta.” (Proverbionan 11:22) Den tempo biblico, renchi den nanishi tawata un adorno popular. Ora un hende mohe tawatin un renchi den su nanishi of entre su dos buraconan di nanishi, hende a ripara e hoya aki mesora. Pero den snuit di un porco, e hoya bunita aki lo ta completamente fuera di luga! Esei tambe ta e caso ora un persona tin un bunita aparencia, pero e no ta ‘discreto.’ Maske cuanto cos bunita e persona ei bisti, sea homber of mohe, e no ta keda bon. Nan no ta pas cu ne, nan no ta hacie ningun tiki atractivo.

Ta cierto cu ta masha normal cu nos ta precupa cu loke otro hende ta pensa di nos aparencia. Pero pakico bo mester ta asina malcontento cu bo cara of figura, of precupa demasiado tocante nan? Nos no por haci nada cu mayoria di nos caracteristicanan. Ademas, nos aparencia no ta e cos di mas importante. No ta cierto cu mayoria hende cu nos ta gusta y ta admira, ta hende cu un aparencia bastante hewon? Atraccion fisico no ta e clave pa felicidad. Loke realmente ta conta ta e bunitesa interno cu bo ta cultiva door manifesta cualidadnan duradero cu ta refleha Dios su personalidad. Laga nos tur ser discreto y cultiva e cualidadnan ei.

“E Hende Generoso Lo Prospera”

Segun Rei Salomon: “Deseo di e husto ta resulta den cos bon so, ma expectativa di e malbado ta resulta den furia so.” Pa ilustra esaki, el a agrega: “Tin cu ta reparti y toch ta haya mas; tin cu ta retene mas di loke ta husto, ma toch ta resulta den pobresa.”—Proverbionan 11:23, 24.

Ora nos ta reparti—es decir comparti—e conocemento di e Palabra di Dios diligentemente cu otro hende, sigur nos mes ta comprende su “hanchura y largura y haltura y profundidad” miho. (Efesionan 3:18) Di otro banda, e persona cu no ta uza su conocemento, ta core peliger di perde loke e tin. Si, “esun cu sembra scars lo cosecha scars tambe; y esun cu sembra generosamente lo cosecha generosamente tambe.”—2 Corintionan 9:6.

E rei a sigui bisa: “E hende generoso lo prospera, y esun cu duna di bebe tambe lo haya di bebe.” (Proverbionan 11:25) Ora nos ta uza nos tempo y recursonan material generosamente pa promove adoracion berdadero, Yehova ta keda hopi contento cu nos. (Hebreonan 13:15, 16) Lo e ‘habri e bentananan di shelo, y basha asina tanto bendicion, cu nos lo no tin suficiente luga pa conten’e.’ (Malakias 3:10) Djis tira un bista riba e prosperidad spiritual cu su sirbidonan ta disfruta di dje awe!

Y den un otro ehempel mas caminda Salomon ta mustra e contraste entre e deseonan di e persona husto y esnan di e malbado, e ta bisa: “Esun cu tene maishi atras, pueblo lo maldicion’e, ma bendicion lo ta riba cabes di esun cu ta bende maishi.” (Proverbionan 11:26) Bo por haci ganashi door di cumpra cierto producto ora prijs ta abou y warda pa bende nan te ora e producto ei bira scars y su prijs subi. Maske bo por logra cierto ganashi cu e practica aki di limita e consumo di un producto mientras bo tin un stock warda, hende en general si lo menosprecia un persona cu ta haci esaki pa motibonan egoista. Di otro banda, e persona  cu no ta probecha di un situacion di emergencia pa e haci ganashi bruto, lo tin aprobacion di e pueblo.

Animando nos pa sigui desea loke ta bon of husto, e rei di Israel ta bisa: “Esun cu diligentemente busca loke ta bon ta busca fabor, ma esun cu busca maldad, maldad lo bin riba dje. Esun cu confia den su rikesa lo cai, ma e husto lo florece manera blachi berde.”—Proverbionan 11:27, 28.

E Husto Ta Gana Alma

Salomon ta ilustra con actonan bobo por resulta den consecuencianan perhudicial: “Esun cu tormenta su mes cas lo hereda biento.” (Proverbionan 11:29a) Acan su malecho a trece maldicion riba e mes, y nan a piedra e cu su famia mata. (Hosue, capitulo 7) Awe, e cabes di un famia cristian y otro miembronan di su famia por haya nan den malecho cu ta pone cu nan ta ser expulsa for di e congregacion cristian. Door cu un cabes di famia mes ta faya cu e mandamentonan di Dios of door cu e ta tolera malecho serio den su famia, e ta trece maldicion riba su propio cas. E, y podise otro miembronan di famia, ta ser expulsa for di e asociacion cristian como malechornan cu no a repenti. (1 Corintionan 5:11-13) Kico lo e haya? Biento so, esta, algo cu no tin berdadero substancia ni balor.

E versiculo ta sigui bisa: “E bobo lo ta sirbido di esun cu ta sabi di curason.” (Proverbionan 11:29b) Door cu un persona bobo no tin sabiduria practico, bo no por confi’e cu hopi responsabilidad. Ademas, debi cu e ta maneha su asuntonan di un manera robes, e por haya su mes di un of otro manera den debe serca un otro hende. Un persona bobo asina sigur lo bira “sirbido di esun cu ta sabi di curason.” Ta claro anto cu ta di vital importancia pa nos uza sano huicio y sabiduria practico den tur loke nos ta haci.

E rei sabi ta sigura nos cu “fruta di e husto ta un palo di bida, y esun cu ta sabi ta gana alma.” (Proverbionan 11:30) Con esaki ta tuma luga? Wel, via su abla y conducta, un persona husto ta alimenta otro hende den sentido spiritual. Asina e ta anima nan pa sirbi Yehova, y cu tempo nan lo por ricibi e bida cu Dios ta haci posibel.

‘Cuanto Mas e Pecado Lo Wordo Recompensa!’

Di un manera combencente e proverbionan menciona ariba ta urgi nos pa sembra husticia! Dunando un aplicacion diferente na e principio cu ta bisa “loke un hende sembra, esaki tambe e lo cosecha”, Salomon ta declara: “Si e husto wordo recompensa riba tera, cuanto mas e malbado y e pecado!”​—⁠Proverbionan 11:⁠31.

Aunke un persona husto ta haci esfuerso pa haci loke ta corecto, e ta faya de bes en cuando. (Eclesiastes 7:20) Y pa su fayonan lo e ser “recompensa” door di ricibi disiplina. Pero kico di un malbado cu deliberadamente ta scohe un estilo di bida robes y no ta haci ningun esfuerso pa subi e caminda di rectitud? E no ta merece un ‘recompensa’ mas grandi, esta, un castigo severo? Apostel Pedro a skirbi: “Si ta cu dificultad e husto ta wordo salba, kico lo para di e impio y e pecado?” (1 Pedro 4:18) Pesei anto, laga nos semper ta determina pa beneficia nos mes door di sembra husticia.

[Nota]

[Plachi na pagina 28]

“Amabilidad” a trece “honor” pa Abigail

[Plachi na pagina 30]

“E malbado ta ricibi pago engañoso, ma esun cu sembra husticia ta haya un recompensa berdadero”

[Plachi na pagina 31]

‘Sembra generosamente, y cosecha generosamente’