Storia di Bida

Bieu y Satisfecho

SEGUN E RELATO DI MURIEL SMITH

Un hende tawata bati masha duro na mi porta. Mi a caba di yega cas pa come merdia despues di a predica henter mainta. Manera tawata mi custumber, mi tawata herbe awa pa traha un cop’i te y tawata cla pa rek mi pia pa tuma mi mei ora di sosiego. E hende tawata bati cu insistencia, y segun cu mi tawata cana bai porta, mi ta puntra mi mes ta ken por ta na porta na e ora aki. Mi a haya sa umbes. E dos hombernan dilanti mi porta a introduci nan mes como polis. Nan a declara cu nan a bini pa listra mi cas pa wak si mi tin literatura produci door di Testigonan di Yehova, un organisacion prohibi.

Dicon Testigonan di Yehova tawata prohibi na Australia, y con bini mi a bira Testigo? Tur esei a cuminsa cu un regalo di mi mama na aña 1910, tempo mi tawatin 10 aña.

MI FAMIA tawata biba den un cas di palo den e bario Crows Nest, den nort di Sydney. Un dia mi a yega cas for di scol y a haya mi mama ta papia na porta cu un homber. Mi tawata curioso pa sa ta ken e homber straño aki ta, bisti na bachi y cu un tas yen di buki. Mi a pidi despensa y a bai den cas. Sinembargo, un par di minuut despues Mama a yama mi. E di: “E homber aki tin poco buki masha interesante, y nan tur ta tocante e Scritura. Awor, como cu djis aki bo ta haci aña, bo por haya sea un shimis nobo of e bukinan aki. Cua lo bo kier?”

 Mi a contesta: “Am, Mami, mi kier e bukinan, danki.”

Asina na edad di dies aña, mi a haya e prome tres volumennan di Studio di e Scritura, skirbi pa Charles Taze Russell. E homber na porta a splica mi mama cu lo e tin cu yuda mi comprende e bukinan, ya cu probablemente nan lo ta mucho dificil pa mi. Mama a bisa cu gustosamente lo e haci esei. Lamentablemente, Mama a muri djis despues di esaki. Tata a traha duro pa percura pa ami cu mi ruman homber y mi ruman mohe, pero toch awor mi tawatin mas responsabilidad, y esakinan tawata parce demasiado pa mi. Riba dje tawatin un otro tragedia tras di porta.

Prome guera mundial a start na 1914, y apenas un aña despues nos tata stima a ser mata. Awor cu nos a bira huerfano nan a manda mi ruman homber cu mi ruman mohe bai biba serca famia, y ami nan a manda na un internat catolico. Tawatin biaha cu soledad tawata caba cu mi. Pero toch mi ta gradicido pa e chens cu mi a haya di satisface mi amor pa musica, specialmente pa piano. Añanan a pasa, y mi a caba scol. Na 1919 mi a casa cu Roy Smith, un bendedo di instrumentonan musical. Na 1920 nos a haya nos prome yiu, y atrobe mi tawata absorba den e precupacionnan di bida diario. Pero kico a para di e bukinan aya?

Un Biciña Ta Comparti e Berdad Spiritual

Durante tur e añanan ei, unda cu mi a bai, e “bukinan di Bijbel” a bai cu mi. Aunke nunca mi a echt lesa nan, den mi curason mi tawata sa cu e mensahe cu nan a contene tawata importante. Anto un dia na final di añanan ’20, un di nos biciñanan, Lil Bimson, a bin haci bishita. Nos a bai den sala, cai sinta y bebe poco te.

Diripiente Lil a grita: “Ata bo tin e bukinan ei!”

“Cua bukinan?” mi a puntr’e, tur confundi.

El a mustra riba e Studio di e Scritura cu tawatin den e cashi di buki. E dia ei Lil a fia nan, bai cas cu nan y a lesa nan cu smak. Su entusiasmo pa loke el a lesa pronto a bira masha bisto. Lil a busca mas literatura for di e Studiantenan di Bijbel, manera Testigonan di Yehova tawata conoci e tempo ei. Ademas, e no por a keda sin conta nos tur e cosnan cu e tawata siña. Un di e bukinan cu el a haya tawata E Harpa di Dios, y poco despues e buki a bin para na mi cas. Mi carera den Yehova su sirbishi a cuminsa finalmente ora mi a traha tempo pa lesa e publicacion aki basa riba Bijbel. Porfin, mi a haya contesta riba preguntanan fundamental cu mi tawatin y cu mi iglesia no por a contesta pa mi.

Afortunadamente, Roy a presta bon atencion na e mensahe di Bijbel, y nos tur dos a cuminsa studia Bijbel cu masha smak. Prome cu esei Roy tawata miembro di mazon. Awor nos famia tawata uni den adoracion berdadero, y dos bes pa siman un ruman homber tawata conduci un studio di Bijbel cu henter e famia. Nos a haya mas animacion ainda ora nos a cuminsa asisti na e reunionnan cu e Studiantenan di Bijbel tawata tene. E luga di reunion tawata un sala chikito na Sydney cu nan a huur den e bario di Newtown. E tempo ei tawatin menos cu 400 Testigo den henter e pais, pues mayoria ruman mester a biaha un distancia hopi largo pa asisti na reunion.

 Pa nos famia asisti na reunion, nos mester a crusa Haf di Sydney regularmente. Prome cu nan a traha e Brug di Haf di Sydney na 1932, nos mester a crusa cada biaha cu ferry cu ta transporta auto. Apesar cu e biahe aki a costa tempo y placa, nos tawata purba di no perde ningun di e alimentonan spiritual cu Yehova tawata percura. E esfuerso cu nos a haci pa bira firme den e berdad tawata bale la pena, ya cu Segundo Guera Mundial a cuminsa menasa y e cuestion di neutralidad lo a bai afecta nos famia directamente.

Un Tempo di Prueba y Bendicion

Principio di añanan ’30 tawata un periodo excitante pa mi cu mi famia. Mi a batisa na 1930, y na 1931 mi tawata presente na e congreso memorabel caminda nos tur a lanta para y bai di acuerdo pa adopta e bunita nomber Testigonan di Yehova. Ami cu Roy a haci nos best pa cumpli cu nificacion di e nomber ei door di participa den tur e metodonan y campañanan di predicacion cu e organisacion tawata curasha. Por ehempel, na 1932 nos a participa den un campaña special pa parti un foyeto chikito prepara pa e multitud di hendenan cu a bin mira apertura di e Brug di Haf di Sydney. Un punto sobresaliente pa nos tawata e uzo di auto cu ekipo di zonido, y nos tawatin e privilegio di por a pone loudspeaker riba nos auto di famia. Cu e tecnologia aki, nos tawata laga Ruman Rutherford su discursonan biblico graba resona den e cayanan di Sydney.

Sinembargo, cosnan tawata cambiando atrobe y bira mas y mas dificil. Pa 1932 e Gran Depresion economico tawatin un impacto grandi riba Australia, pesei ami cu Roy a dicidi di simplifica nos bida. Un manera cu nos a haci esaki tawata door di bai biba mas serca di e congregacion, y asina nos a baha nos gastonan di biahe considerablemente. Pero presion economico no tawata nada compara cu e teror di Segundo Guera Mundial cu a cohe mundo den su gara.

Como cu Testigonan di Yehova mundialmente ta obedece Hesus su mandamento pa nan no ta parti di mundo, nan a bira e blanco di persecucion, y Australia no tawata un excepcion. Proboca pa e furia di guera, tawatin hende cu a tilda nos di ta comunista. E opositornan aki a pretende ekibocadamente cu Testigonan di Yehova tawata uza e cuater emisoranan di radio cu nan tawatin na Australia pa manda mensahe pa e ehersito Hapones.

Ruman hombernan hoben cu nan a manda yama pa drenta den servicio militar a confronta hopi presion pa compromete nan fe. Mi ta contento di por bisa cu tur nos tres yiu hombernan a para firme pa nan creencianan y a mantene nan neutralidad. Nos yiu homber mayo, Richard, a haya un sentencia di 18 luna di prizon. Nos di dos yiu homber, Kevin, a logra haya despensacion a base di cu servicio militar ta contra su principionan. Pero lamentablemente nos yiu homber mas chikito, Stuart, a muri den un accidente di motocicleta riba caminda pa bai corte pa completa su defensa riba e cuestion di neutralidad. E tragedia aki tawata realmente duro. Pero nos a logra want’e door di keda concentra riba e Reino y riba Yehova su promesa di un resureccion.

Nan No A Haya e Berdadero Botin

Na januari 1941, gobierno a prohibi Testigonan di Yehova na Australia. Pero, mescos cu e apostelnan di Hesus, ami cu Roy a obedece Dios mas cu hende, y pa dos aña y mei nos a sigui predica na scondi. Tawata durante e periodo aki cu e dos polisnan bisti na civil, cu mi a menciona den introduccion, a bin bati na mi porta. Kico a pasa?

Wel, mi a invita nan paden. Ora nan tawata drentando mi a puntra: “Mi por djis caba di bebe mi cop’i te prome cu boso listra e cas?” Sorprendentemente, nan a bai di acuerdo, y mi a bai den cushina pa resa na Yehova y ordena mi pensamentonan. Ora mi a bin bek, un di e polisnan a drenta den e cuarto caminda nos ta studia y a bai cu tur cos cu tawatin e logo di Watchtower riba dje, incluso e literatura cu tawatin den mi tas di predica y mi Bijbel.

 Caba el a puntra: “Bo tin sigur cu bo no tin ningun otro literatura scondi den caha? Segun nos informacion, boso ta asisti na un reunion tur siman den un sala situa na fin di e caya aki y boso ta hiba hopi literatura einan.”

Mi a contesta: “Ta berdad, pero nan no ta einan awor.”

E di: “Si, nos sa esei sra. Smith. Tambe nos sa cu e literatura ta warda na cas di hende den henter e districto.”

Den camber di mi yiu homber nan a haya cinco caha di e foyeto chikito na Ingles Libertad of Catolicismo.

“Bo tin sigur cu bo no tin nada mas den garashi?” e polis a puntra.

“No, no tin nada eiden”, mi di.

Caba el a habri un cashi den comedor. El a haya formularionan bashi cu nos tawata uza pa yena e raport di congregacion. El a bai cu esakinan anto a insisti pa wak den garashi.

“E ora ei pasa djaki”, mi di.

Nan a sigui mi y nos a bai pafo den garashi y despues di a control’e, porfin nan a bai.

Wel, e dos polisnan ei a kere cu nan a haya un tremendo botin cu e cinco cahanan ei! Sinembargo, nan a laga e berdadero botin atras. Pasobra den e tempo ei mi tawata sirbi como secretario di congregacion, y mi tawatin lista cu nomber di e publicadonan di congregacion y otro informacion importante den cas. Ta bon cu e rumannan a spierta nos pa ta prepara pa tal tipo di ristamento, y pesei mi tawatin e documentonan ei bon scondi. Mi a hinca nan den envelop y a pone nan den bom di mi blekinan di te, sucu y hariña. Tambe mi tawatin algun warda den e couchi di parha, cu tawata pega cu e garashi. Pues e polisnan a cana pasa banda di e informacion cu nan tawata busca.

Den Sirbishi di Tempo Completo

Pa 1947, nos yiunan mas grandi ya tawatin nan mes famia. E ora ei ami cu Roy a dicidi cu nos lo por cuminsa den sirbishi di tempo completo. Den suit di Australia tawatin mester di predicado, pues nos a bende nos cas y a cumpra un caravan cu nos a yama Mizpa, cu kiermen “Toren di Vigilancia.” E estilo di bida aki a permiti nos predica den areanan hopi retira. Hopi bes nos tawata traha den teritorio di cunucu cu no tawata asigna na ningun congregacion. Mi tin masha grato recuerdo di e tempo ei. Un di mi studionan tawata cu un señora hoben cu yama Beverly. Prome cu e por a progresa yega na bautismo, el a bandona e area. Bo por imagina con contento mi a bira ora cu añanan despues un ruman mohe a bini serca mi na un congreso y a bisa cu ta Beverly! Mi a sinti mi masha felis cu despues di tur e añanan ei mi por a mir’e ta sirbi Yehova hunto cu su casa y yiunan.

Na 1979 mi tawatin e privilegio di asisti na e Scol di Sirbishi di Pionero. Un di e cosnan cu nan a enfatisa na e scol ei tawata cu pa un persona por persevera den e sirbishi di pionero, e mester tin un bon rutina di studio personal. Pa mi, esei ta un gran berdad. Studia, bai reunion y sirbishi tawata henter mi bida. Mi ta consider’e un privilegio cu mi por a sirbi como pionero regular pa mas cu 50 aña.

Luchando cu Problema di Salu

E ultimo decadanan aki si mi a confronta algun desafio special. Na 1962 docter a haya sa  cu mi tin glaucoma, esta, presion den wowo. E tempo ei mi bista a bai atras hopi lihe pasobra e tratamento disponibel tawata poco limita. Roy su salu tambe a bai atras, y na 1983 el a haya un atake celebral pisa cu a lag’e parcialmente paralisa y sin por papia. El a fayece na 1986. El a duna mi hopi apoyo practico durante mi sirbishi di tempo completo, y mi ta sinti su falta hopi.

Apesar di e contratiemponan aki, mi a purba mantene un bon rutina spiritual. Mi a cumpra un auto fuerte cu ta pas pa sirbishi di veld den nos teritorio cu ta mita cunucu, y cu yudansa di mi yiu mohe Joyce mi a sigui cu mi sirbishi di pionero. Mi bista a sigui bai atras pocopoco te ora cu mi no por a wak mas cu un wowo. Docternan a pone un wowo di glas na su luga. Pero cu vergrootglas y literatura letter grandi ainda mi por a studia tres pa cinco ora pa dia, uzando e tiki bista cu a keda den e otro wowo.

Studio personal semper tawata algo precioso pa mi. Pues bo por imagina e shock teribel cu mi a haya ora cu un atardi cu mi tawata studiando, diripiente mi no por a wak nada nada. Tawata como si fuera un hende a paga lus. Mi a perde mi bista completamente. Con mi a sigui studia? Wel, maske mi ta basta sordo, mi ta depende di e audiocassettenan y di e sosten amoroso di mi famia pa mantene mi spiritualmente fuerte.

Perseverando te na Fin

Awor cu mi tin mas cu 100 aña, mi salu a sigui bai atras y mi tawatin cu baha man na mi actividadnan. Tin biaha mi ta sinti mi un tiki perdi. De echo, awor cu mi no por mira nada nada, tin biaha mi ta echt perdi! Mi tin masha gana di conduci algun studio di Bijbel atrobe, pero manera mi salu ta aworaki, mi no por sali mas y bai busca nan. Na principio esei a haci mi deprimi, pero mi tawatin cu siña acepta mi limitacionnan y keda contento cu loke mi por haci. Esaki no tawata facil. Sinembargo, ta un privilegio grandi cu tur luna mi por raporta e poco ora cu mi a dedica na papia tocante nos gran Dios, Yehova. Ora oportunidadnan presenta pa papia tocante Bijbel mi ta probecha di nan, claro uzando tacto si. Por ehempel, ora verpleegster, hende cu ta bende cos of otronan bini na cas.

Un di mi bendicionnan cu ta duna mi mas satisfaccion ta di mira cuater generacion di mi famia ta adora Yehova fielmente. Algun di nan a haci esfuerso pa sirbi como pionero na luganan cu tin mas mester di predicado, tambe tin ta sirbi como anciano of sirbido ministerial y na Betel. Claro cu mescos cu hopi hende di mi tempo, mi a spera cu e fin di e sistema aki lo a yega hopi mas prome. Pero mi a mira un tremendo aumento durante e shete decadanan cu mi a traha den sirbishi! Pa mi ta un gran satisfaccion di por tawata envolvi den algo asina magnifico.

E verpleegsternan cu ta bishita mi ta bisa cu mester ta mi fe ta tene mi na bida. Mi ta di acuerdo cu nan. Ser activo den e sirbishi di Yehova ta resulta den e miho bida cu tin. Mescos cu Rei David, di berdad mi por bisa cu mi ta bieu y satisfecho.—1 Cronicanan 29:28.

(Ruman Muriel Smith a muri dia 1 di april 2002, den e tempo cu nos tawata finalisa e articulo aki. El a muri net un luna prome cu el a haci 102 aña, y e tawata realmente un bon ehempel di fieldad y perseverancia.)

[Plachi na pagina 24]

Tempo mi tawatin rond di cinco aña y na edad di 19 aña, ora cu mi a conoce mi casa, Roy

[Plachi na pagina 26]

Nos auto y e caravan cu nos a yama Mizpa

[Plachi na pagina 27]

Ami cu mi casa Roy, na 1971