Informe di Proclamadonan di Reino

‘E Palabra di Dios Ta Activo’

RIBA e isla tropical di Caribe, Hamaica, mayoria hende conoce Bijbel. De echo, casi tur cas tin un Bijbel King James Version, y cierto hendenan a mira pa nan mes cu “e palabra di Dios ta bibo y activo.” (Hebreonan 4:12) E siguiente experencia ta mustra cu e poder activo di Bijbel por cambia hende su bida.

Un homber cu yama Cleveland a caba di yega cas for di trabou ora cu un Testigo di Yehova a yega na su porta. E Testigo a comparti un par di punto cu ne den Bijbel, y despues a lag’e cu e yudansa pa studia Bijbel titula Conocimentu cu Ta Hiba na Bida Eterno. Cleveland no por a imagina su mes ki efecto e Palabra di Dios lo a bai tin den su bida.

Cleveland tawata haci oracion tres biaha pa dia pa pidi Dios yud’e haya sa con ta e manera corecto pa ador’e. Cleveland tawata combenci cu su mayornan no tawata adora Dios na e manera corecto, pero despues di a investiga otro religionnan el a keda desilusiona. Apesar cu el a yega di tende di Testigonan di Yehova, e tawata duda cu ta nan tin e berdad. Toch Cleveland a acepta pa studia Bijbel cu e Testigonan cu a bishit’e. Pakico? Pa el a mustra nan cu Testigonan ta robes!

Den poco tempo Cleveland a siña cu e relacionnan inmoral cu e tawatin cu dos diferente hende mohe no a agrada Dios. (1 Corintionan 6:9, 10) Despues di apenas dos studio el a tuma curashi y kibra su relacion cu e hende mohenan. El a cuminsa asisti na reunionnan cristian na Salon di Reino tambe. Pero esaki a resulta di ta otro prueba.

Cleveland tawata hopi activo den e team di futbol di su bario, y e partidonan tawata strob’e di bai reunion. Kico lo e haci? Apesar cu su coach, su amigonan y e otro hendenan di su team a pone hopi presion riba dje, Cleveland a dicidi di bandona e team di futbol. Si, e Palabra di Dios a bira activo den dje y a influenci’e pa bira un miho persona!

E poder di e Palabra di Dios tawata bisto tambe ora Cleveland a cuminsa comparti su conocemento biblico cu otro hende. (Echonan 1:8) Como resultado, dos di e hendenan cu tawata den su team di antes a cuminsa asisti na reunion di Testigonan di Yehova. Despues cu Cleveland a cualifica pa bira publicado di e bon nobo, el a ricibi hopi goso di por uza e Palabra di Dios den e ministerio pa yuda otro hende.

E Palabra di Dios a sigui motiva Cleveland, y cu tempo el a simbolisa su dedicacion na Yehova door di batisa den awa, y e tin e privilegio di por sirbi como minister di tempo completo y como sirbido ministerial den congregacion.

Na Hamaica mescos cu rond mundo, miles di hende a bin haya sa cu di berdad e Palabra di Dios “ta bibo y activo.”

[Mapa/Plachi na pagina 8]

(Pa texto den su formato completo, wak publicacion)

HAMAICA

[Reconocemento]

Mapa y globo: Mountain High Maps® Copyright © 1997 Digital Wisdom, Inc.