Ki Ora Yehova Ta Bendiciona Esfuerso Sinsero?

“LAGA mi bai, pasobra dia ta bai habri.”

“Lo mi no laga bo bai si bo no bendiciona mi.”

“Con ta bo nomber?”

“Yacob.”

“Bo nomber lo no ta Yacob mas, sino Israel; pasobra bo a lucha cu Dios y cu hende, y bo a vence.”—Genesis 32:26-28.

E combersacion interesante ei a tuma luga despues cu Yacob a duna un demostracion remarcabel di su agilidad atletico na edad di 97 aña. Aunke Bijbel no ta describie como un atleta, el a lucha man na man henter anochi cu un angel. Dicon? Pasobra Yacob tawata masha precupa pa e promesa cu Yehova a haci na su antepasado, un promesa cu tawata parti di su herencia spiritual.

Hopi aña prome, Yacob su ruman homber Esau a renuncia su derecho di prome yiu a cambio di un tayo di bonchi stoba. Awor Yacob ta tende cu Esau ta na caminda hunto cu 400 homber. Ta di comprende cu Yacob ta nervioso, y pesei e kier pa Yehova dun’e un confirmacion cu su famia lo prospera den e tera na otro banda di Riu Yordan. Yacob ta actua dicidido na harmonia cu su oracion. E ta manda regalonan generoso pa Esau cu ta na caminda. Tambe e ta tuma pasonan preventivo; e ta parti su campamento na dos y ta laga su casanan y yiunan crusa na e roi di Yabok. Cu hopi esfuerso y lagrima, e ta forsa su mes mas ainda door di lucha henter anochi cu un angel pa e por a ‘roga gracia’ pa su mes.—Oseas 12:4; Genesis 32:1-32.

Considera un otro ehempel mas prome cu esei: Esun di Raquel, Yacob su di dos casa y esun mas stima. Raquel ta bon na haltura cu Yehova a priminti di bendiciona Yacob. Lea, ruman mohe di Raquel y prome casa di Yacob, ta ser bendiciona cu cuater yiu homber mientras cu Raquel ta keda steril. (Genesis 29:31-35) Pero en bes di sinta haya duele di su mes, Raquel ta sigui roga Yehova den oracion y ta actua determina na harmonia cu su oracion. Mescos cu su antepasado Sara a haci cu Agar, Raquel ta hiba su cria Bilha pa Yacob como un esposa secundario ya asina, manera Raquel ta expres’e:  “Door di dje ami tambe por tin yiu.” * Bilha ta haya dos yiu homber cu Yacob, esta, Dan y Neftali. Na Neftali su nacemento Raquel ta declara cuanto esfuerso emocional el a haci: “Cu gran lucha mi a lucha cu mi ruman, y di berdad mi a vence.” Raquel ta ser bendiciona mas ainda ora e mes haya dos yiu homber, Yosef y Benjamin.—Genesis 30:1-8; 35:24.

Dicon Yehova a bendiciona e esfuersonan fisico y emocional di Yacob cu Raquel? Pasobra nan a pone Yehova su boluntad na prome luga y a aprecia nan herencia. Tambe nan a resa sinseramente pidi Yehova su bendicion den nan bida y a dal pasonan decisivo na harmonia cu e boluntad di Dios y cu nan mes peticionnan.

Hopi hende awe, mescos cu Yacob y Raquel, por duna testimonio cu si nos kier ricibi Yehova su bendicion, nos mester haci esfuerso diligente. Hopi bes nan esfuersonan ta bai compaña cu lagrima, desanimacion y frustracion. Elizabeth, un mama cristian, ta corda cuanto esfuerso sinsero e mester a haci pa bolbe cuminsa asisti na reunionnan cristian despues di un ausencia largo. Esei tawata un tarea dificil p’e como cu e tawatin cinco yiu chikito, un casa incredulo y un careda di 30 kilometer pa core cu auto pa e yega na e Salon di Reino mas serca. El a bisa: “Mi tawatin mester di hopi disiplina propio pa mi por a bai reunion cu regularidad. Pero mi tawata sa cu esei ta bon pa mi y pa mi yiunan. Esei a yuda nan mira cu e caminda aki tawata bale la pena.” Yehova a bendiciona su esfuersonan. Di su tres yiu hombernan cu ta activo den e congregacion cristian, dos ta den sirbishi di tempo completo. Contento cu nan progreso spiritual, Elizabeth ta bisa: “Nan a crece spiritualmente bai laga mi.” Ki un bendicion pa su esfuerso sinsero!

Esfuerso Sinsero Cu Yehova Ta Bendiciona

Un cos ta sigur. Esfuerso sinsero y trabou duro ta duna recompensa. Mas esfuerso nos hinca den un proyecto of asignacion, mas satisfaccion nos lo ricibi a cambio. Ta asina Yehova a traha nos. Rei Salomon a skirbi: “Tur hende [mester] come y bebe y mira e bon cu tin den tur su trabou—esaki ta e regalo di Dios.” (Eclesiastes 3:13; 5:18, 19) Pero pa nos ricibi un bendicion di Dios, nos tin cu haci sigur cu nos esfuersonan ta bon dirigi. Por ehempel, ta rasonabel pa spera Yehova su bendicion ora asuntonan spiritual ta na di dos luga den nos bida? Un cristian dedica por spera di ricibi Yehova su aprobacion si e acepta un trabou of promocion cu ta nifica cu e mester perde e reunionnan cristian, caminda e ta haya asociacion y instruccion cu ta fortifica su fe?—Hebreonan 10:23-25.

Si un hende traha duro henter su bida pa un carera di mundo of pa prosperidad material—lagando cosnan spiritual un banda—esei no necesariamente kiermen cu lo e “mira e bon.” Hesus a describi e consecuencianan di esfuerso mal dirigi den su comparacion di e sembrado. Hesus a splica cu e simiña cu a wordo sembra “meimei di mata di sumpiña ta e hende cu ta tende e palabra, y e precupacionnan di e mundo aki y e engaño di rikesa ta hoga e palabra, y e ta keda sin duna fruta.” (Mateo  13:22) Pablo tambe a spierta nos pa e mesun trampa y a agrega cu esnan cu sigui un rumbo materialista “ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion.” Kico por yuda bo evita tal estilo di bida spiritualmente dañino? Pablo a sigui bisa: ‘Hui pa e cosnan aki y no fiha bo speransa riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.’—1 Timoteo 6:9, 11, 17.

No ta importa cuanto aña nos tin of cuanto tempo nos tin ta sirbi Yehova; nos tur por beneficia door di imita e esfuerso sinsero cu Yacob y Raquel a demostra. Den nan esfuerso pa haya Dios su aprobacion, nan nunca a lubida nan herencia, ni maske con spantoso of frustrante nan sircunstancia por tawata. Awe, e presionnan y dificultadnan cu nos ta confronta por ta mesun spantoso, frustrante of asta desanimante. E tentacion ta pa bandona e lucha y bira un victima mas di e atake di Satanas. Podise Satanas ta uza cualkier un di e medionan cu e tin na su disposicion—sea ta dibirticion of recreo, deporte of hobby, carera of prosperidad material—pa logra su proposito. Hopi bes e espectativanan por ta masha bunita pero masha poco bes nan ta ser realisa. Mayoria biaha esnan cu ser engaña of tenta pa entrega na e actividadnan ei ta ripara cu na final di cuenta nan ta keda decepciona. Pero laga nos, mescos cu Yacob y Raquel, cultiva e actitud di un luchado sinsero y vence e trampanan di Satanas.

Diabel tin masha gana di mira nos resigna y entrega, y pensa cu ‘esaki ta un caso perdi. No tin solucion. No ta bale la pena purba.’ Pesei ta sumamente importante pa nos tur tene cuidou pa nos no desaroya un actitud di resignacion, pensando cu ‘niun hende stima mi’ y ‘Yehova a lubida mi.’ Si nos entrega na pensamentonan asina, nos ta caba cu nos mes. Esei lo no indica cu nos a laga nos mannan cai y no ta sigui lucha te ora nos haya un bendicion? Corda, Yehova ta bendiciona nos esfuerso sinsero.

Sigui Lucha pa Yehova Su Bendicion

Nos bienestar spiritual ta depende principalmente di e echo cu nos ta comprende dos berdad basico cu tin di aber cu nos bida como un sirbido di Yehova. (1) No ta un hende so ta haya tur problema, malesa of situacion dificil den bida, y (2) Yehova ta scucha e sclamacion di esnan cu sinseramente ta pidie yudansa y un bendicion.—Exodo 3:7-10; Santiago 4:8, 10; 1 Pedro 5:8, 9.

No ta importa con dificil bo sircunstancia ta of con limita bo ta sinti bo; no entrega na “e pica cu ta mara nos asina facil”, esta, falta di fe. (Hebreonan 12:1) Sigui lucha te ora bo ricibi un bendicion. Tene pasenshi, y corda riba Yacob, kende na edad avansa a lucha henter anochi pa un bendicion. Mescos cu e cunukero cu ta sembra y caba ta warda pa e tempo di cosecha, warda cu pasenshi pa Yehova bendiciona bo actividad spiritual, maske con limita bo ta sinti cu bo actividad ta. (Santiago 5:7, 8) Y semper corda e palabranan di e salmista: “Esnan cu sembra cu awa na wowo lo cosecha cu grito di alegria.” (Salmo 126:5; Galationan 6:9) Para firme, y keda den fila di e luchadonan.

[Nota]