Pregunta di Lector

Abel tawata sa cu e mester a haci un sacrificio di bestia pa e haya Dios su aprobacion?

E relato biblico cu ta conta con Cain cu Abel a haci nan ofrenda ta masha cortico. Na Genesis 4:3-5 nos ta lesa: “A sosode cu den curso di tempo Cain a hiba un ofrenda di fruta di e tera pa SEÑOR. Anto Abel, di su parti, tambe a hiba for di e promenan cu a nace di su crio di bestia chikito y di nan vet. Y SEÑOR a aprecia Abel y su ofrenda, ma Cain y su ofrenda e no a aprecia.”

Bijbel no ta bisa cu prome cu e suseso aki Yehova a duna informacion spesifico tocante sacrificio ni tocante ki tipo di sacrificio E ta acepta. Pues, Cain cu Abel aparentemente a haci nan ofrenda completamente di nan propio boluntad y manera nan a pensa ta bon. Nan no tawatin acceso na e Paradijs cu originalmente tawata e hogar di nan mayornan; nan a cuminsa sinti e efectonan di pica; y nan tawata separa for di Dios. Den nan condicion pecaminoso y lamentabel, nan mester a sinti un gran necesidad di acudi na Dios pa yudansa. E echo cu nan a ofrece Dios un regalo probablemente tawata un gesto boluntario pa nan haya Dios su aprobacion.

E resultado tawata cu Dios a acepta Abel su ofrenda, pero di Cain no. Dicon? Ta pasobra Abel a ofrece e cosnan corecto y Cain no? Nos no tin sigur si e tipo di ofrenda tawatin algo di haci cu esei, ya cu Dios no a bisa ningun di nan dos kico tawata aceptabel y kico no. Probablemente tur dos tipo tawata aceptabel. Bou di e Lei cu despues di tempo Yehova a duna e nacion di Israel, sacrificionan aceptabel no a consisti solamente di bestia of di partinan di bestia, sino tambe di grano gerooster, bohi di maishi, hariña fini, productonan horna y biña. (Levitico 6:19-23; 7:11-13; 23:10-13) Evidentemente, no ta solamente loke e sacrificionan di Cain cu Abel a contene a pone Dios acepta un y rechasa e otro.—Compara cu Isaias 1:11; Amos 5:22.

Siglonan despues, apostel Pablo a declara: “Pa medio di fe Abel a ofrece na Dios un miho sacrificio cu Cain, door di cual el a obtene e testimonio cu e tawata husto, ora Dios a duna testimonio di su regalonan.” (Hebreonan 11:4) Pues, tawata debi na Abel su fe cu Dios a reconoc’e como un persona husto. Pero fe den kico? Fe den Yehova su promesa cu lo E percura e Simiña cu lo ‘herida cabes di e colebra’ y restaura e pas y perfeccion cu humanidad a disfruta di dje na principio. Kisas ta e declaracion cu e Simiña lo ser ‘herida na su hilchi’ a pone Abel rasona cu un sacrificio cu a encera dramamento di sanger tawata necesario. (Genesis 3:15) Sinembargo, echo ta cu ta Abel su expresion di fe a haci su sacrificio ‘un miho sacrificio cu di Cain.’

Asina tambe, Cain no a ser rechasa pasobra el a ofrece e tipo di sacrificio robes, sino pasobra e no tawatin fe. Y su accionnan a mustra esei. Yehova a bisa Cain bon cla: “Si bo haci bon, lo bo no wordo acepta?” (Genesis 4:7) Dios no a rechasa Cain pasobra e tawata malcontento cu su ofrenda. Mas bien, Dios a rechasa Cain “pasobra su obranan tawata malo”, obranan marca pa yaluci, odio y finalmente asesinato.—1 Huan 3:12.