Siña un Les for di Ooievaar

“ASTA ooievaar cu ta bula na shelo conoce su temporadanan, . . . ma mi pueblo no conoce e ordenansa di SEÑOR.” (Yeremias 8:7) Cu e palabranan ei profeta Yeremias a proclama Yehova su huicio contra e pueblo apostata di Huda, cu a bandona Yehova nan Dios y a bai adora diosnan straño. (Yeremias 7:18, 31) Dicon Yeremias a uza ooievaar pa siña e Hudiunan infiel un les?

E Israelitanan tawatin custumber di mira ooievaar, y specialmente e ooievaar blanco, ora nan tawata bula pasa door di paisnan cu Bijbel ta papia di dje. Ooievaar ta un parha grandi, pia largo, cu ta cana busca cuminda den awa seco. Su nomber Hebreo ta e forma femenino di un palabra cu ta nifica “esun leal; esun di bondad amoroso.” Esaki ta un nomber masha apropiado, pasobra distinto for di mayoria otro parha, un pareha di ooievaar ta keda hunto pa resto di nan bida. Despues di pasa e lunanan di winter den regionnan mas cayente, mayoria ooievaar ta bini bek aña tras aña, hopi bes na e mesun neishi cu nan a uza anteriormente.

Tin mas maneranan remarcabel cu e ooievaar su comportacion instintivo ta un bon ehempel di lealtad. Tanto e macho como e embra ta yuda brui e webonan y alimenta nan yiunan. E buki Our Magnificent Wildlife (Nos Naturalesa Magnifico) ta splica: “Como mayor, ooievaar ta extraordinariamente fiel. Na Alemania un ooievaar macho a dal den kabel di coriente y a muri. Su par a sigui brui e webonan su so durante 3 dia, y a bandona e neishi un biaha so djis un rato pa bai busca cuminda. . . . Den un otro caso, ora nan a tira un ooievaar embra mata, e tata a sigui cria e yiunan.”

En berdad, ooievaar ta cumpli cu e nificacion di su nomber—“esun leal”—dor cu debi na su instinto e ta keda fiel na su par henter su bida y ta cuida su yiunan cu ternura. Pues, ooievaar a sirbi como un bon ehempel pa e Israelitanan infiel y cabesura.

Pa hopi hende awe, lealtad y fieldad ta ideanan anticua; admirabel pero impractico. E aumento di diborcio, abandono, fraude y otro formanan di engaño ta demostra cu hende no ta duna balor mas na lealtad. Na contraste, Bijbel si ta duna hopi balor na lealtad cu ta ser motiva pa amor y bondad. E ta curasha cristiannan pa “bisti e hende nobo, cu a wordo crea segun Dios den husticia y santidad [“lealtad”, NW] berdadero.” (Efesionan 4:24) Si, e personalidad nobo ta yuda nos ser leal, pero tambe nos por siña un les di lealtad for di e ooievaar.