Somete Bo Mes Lealmente na Autoridad Cu Dios A Duna

“SEÑOR ta nos Hues, SEÑOR ta nos Dunador di lei, SEÑOR ta nos Rei.”—ISAIAS 33:22.

1. Ki factornan a haci Israel di antiguedad un nacion unico?

NA 1513 prome cu nos era, e nacion di Israel a bini na existencia. E tempo ei e no tawatin stad capital ni tera ni rei visibel, y e pueblo a consisti di exesclabo. Sinembargo, e nacion nobo ei tawata unico den un otro sentido tambe. Yehova Dios tawata su Hues, Dunador di lei y Rei invisibel. (Exodo 19:5, 6; Isaias 33:22) Ningun otro nacion por a bisa esei!

2. Ki pregunta ta lanta tocante e manera cu Israel tawata organisa, y dicon e contesta ta importante pa nos?

² Ya cu Yehova ta un Dios di ordo y tambe di pas, cualke nacion goberna door di dje lo mester ta bon organisa. (1 Corintionan 14:33) Den caso di Israel sigur tawata asina. Pero con un organisacion visibel riba tera por ta dirigi door di un Dios invisibel? Ta bon pa nos wak con Yehova a goberna e nacion antiguo ei, y paga tino specialmente na con El a trata cu Israel. Esei lo mustra con importante ta pa nos somete nos mes lealmente na autoridad cu Dios a duna.

Con Antiguo Israel A Ser Dirigi

3. Ki areglonan practico Yehova a haci pa su pueblo por a ricibi guia?

³ Aunke Yehova tawata e Rei invisibel di Israel, el a nombra hombernan fiel como su representantenan visibel. Tawatin lider, cabes di famia grandi y anciano pa sirbi e pueblo como consehero y hues. (Exodo 18:25, 26; Deuteronomio 1:15) Sinembargo, nos no mester pensa cu tal hombernan den puesto di responsabilidad lo por a husga cu discernimento y comprendemento sin faya, sin cu nan tawatin guia di Dios. Nan no tawata perfecto, y nan no por a lesa curason di otro adoradonan. Apesar di esei, huesnan cu a teme Dios por a duna nan compañeronan creyente yudansa util, door cu nan tawata basa nan mes riba e Lei di Yehova.—Deuteronomio 19:15; Salmo 119:97-100.

4. Ki tendencianan e huesnan fiel di Israel lo mester a paga bon tino pa evita, y dicon?

⁴ Pero ser hues a encera mas cu djis conoce  e Lei. Como hende imperfecto, e ancianonan tawatin cu paga tino pa domina cualkier mal tendencia di nan mes, manera egoismo, parcialidad of golosidad, ya cu tal cosnan lo por a afecta nan huicio. Moises a bisa nan: “No haci distincion di persona den husgamento; tende chikito y grandi igual. No tene miedo di hende, pasobra husgamento ta di Dios.” Si, e huesnan di Israel tawata husga pa Dios. Nan tawatin un privilegio extraordinario!—Deuteronomio 1:16, 17.

5. Ademas di instala hues, ki otro percuracionnan Yehova a haci pa cuida su pueblo?

⁵ Yehova a haci otro percuracionnan tambe pa yena e necesidad spiritual di su pueblo. For di prome cu nan a yega e Tera Priminti, El a manda nan traha un tabernakel como centro di adoracion berdadero. Tambe El a instala un areglo di sacerdote pa duna siñansa, ofrece sacrificio y kima sencia mainta y atardi. Dios a nombra Aron, ruman grandi di Moises, como e prome sumosacerdote di Israel, y El a pone Aron su yiunan pa yuda nan tata cu su debernan.—Exodo 28:1; Numbernan 3:10; 2 Cronicanan 13:10, 11.

6, 7. (a) Ki relacion tawatin entre Levitanan sacerdote, y esnan cu no tawata sacerdote? (b) Ki les nos por siña for di e echo cu e Levitanan tawatin diferente asignacion? (Colosensenan 3:23)

⁶ Tawatin relativamente poco sacerdote, y e tarea di percura pa e necesidadnan spiritual di varios miyon hende tawata enorme. Pesei Yehova a haci areglo pa otro miembronan di e tribu di Levi apoya nan. El a bisa Moises: “Bo mester duna e Levitanan na Aron y na su yiu hombernan; nan ta henteramente duna na dje for di entre e yiunan di Israel.”—Numbernan 3:9, 39.

⁷ E Levitanan tawata bon organisa. Nan tawata parti den tres famia: e Gersonitanan, e Coatitanan y e Meraritanan, y cada famia tawatin nan trabou. (Numbernan 3:14-17, 23-37) Algun di e asignacionnan por a parce mas importante cu otro, pero tur tawata esencial. Door di nan asignacionnan di trabou, e Levitanan Coatita tawata hopi serca di e arca sagrado di pacto y e articulonan di e tabernakel. Sinembargo, tur Levita, sea Coatita of no, tawatin privilegionan maravioso. (Numbernan 1:51, 53) Lamentablemente, algun di nan no a aprecia nan privilegionan. Na luga di somete nan mes na esnan cu Dios a duna autoridad, nan a bira malcontento y a sucumbi na orguyo, ambicion y yaluci. Entre nan tawatin un Levita yama Core.

“Boso Ta Busca e Sacerdocio Tambe?”

8. (a) Ken Core tawata? (b) Kico lo por a pone Core cuminsa mira e sacerdotenan for di un punto di bista meramente humano?

⁸ Core no tawata cabes di e tribu di Levi ni di e famia di Coatitanan. (Numbernan 3:30, 32) Pero e tawata un cabesante respeta den Israel. Kisas Core a asocia intimamente cu Aron y su yiunan debi na su responsabilidadnan. (Numbernan 4:18, 19) Door cu Core por a mira personalmente cu nan tawata hende imperfecto, kisas e por a rasona:  ‘E sacerdotenan aki ta definitivamente imperfecto. Toch mi mester ta sumiso na nan? No ta mucho tempo atras cu Aron a traha un bishe di oro. Nos pueblo a adora e bishe y a cai den idolatria. Awor Aron, ruman di Moises, ta sirbi como sumosacerdote! Esta un faboritismo! Anto mira kico a pasa cu e yiunan di Aron, Nadab cu Abihu. Figura bo, nan a falta asina tanto respet pa nan privilegionan di sirbishi cu Yehova mester a mata nan!’ * (Exodo 32:1-5; Levitico 10:1, 2) Sea cual sea Core su manera di rasona, un cos ta bisto: El a cuminsa mira e sacerdocio for di un punto di bista humano. Esei a pon’e rebela contra Moises cu Aron, y na mes momento, contra Yehova.—1 Samuel 15:23; Santiago 1:14, 15.

9, 10. Di kico Core y e otro rebeldenan a acusa Moises, y dicon nan mester por tawata sa miho?

⁹ Como cu Core tawata un homber cu influencia, no tawata mucho dificil pa el a logra haya hende su tras cu ta pensa mescos cu ne. Core, Datan cu Abiram a haya 250 simpatisado, y tur tawata lider di e congregacion. Hunto nan a bai serca Moises y Aron y a bisa nan: “Henter e congregacion ta santo, cada un di nan, y SEÑOR ta meimei di nan. Pakico anto boso ta halsa boso mes riba e asamblea di SEÑOR?”—Numbernan 16:1-3.

¹⁰ E rebeldenan ei mester por a sa miho pa nan no reta e autoridad di Moises. Aron cu Miriam a caba di haci mescos no mucho tempo prome. Dicon? Nan a rasona mescos cu Core! Di acuerdo cu Numbernan 12:1 y 2, nan a puntra: “Ta pa medio di Moises so SEÑOR a papia anto? E no a papia pa medio di nos tambe?” Yehova a scucha. El a manda Moises, Aron cu Miriam reuni na entrada di e tent di reunion pa e mustra ta ken el a scohe como lider. E ora ei Yehova a bisa bon cla: “Si tin un profeta meimei di boso, ami, SEÑOR, lo haci mi mes conoci na dje den un vision. Lo mi papia cu ne den un soño. Cu mi sirbido Moises no t’asina; e ta fiel den henter mi cas.” Despues di esei Yehova a dal Miriam cu lepra temporalmente.—Numbernan 12:4-7, 10.

11. Con Moises a trata cu e situacion cu a presenta relaciona cu Core?

¹¹ Core y esnan cu a tuma su banda mester tawata na haltura di loke a pasa. No tawatin excuse pa nan rebeldia. Toch Moises a purba rasona cu nan cu pasenshi. El a urgi nan pa mustra mas aprecio pa nan privilegionan, bisando: “No ta basta [“ta poco cos”, NW] pa boso cu e Dios di Israel a separa boso for di e congregacion di Israel, pa hala boso serca dje?” No, no tawata “poco cos”! E Levitanan tawatin hopi privilegio caba. Kico mas nan por a desea? E siguiente palabranan di Moises a revela kico tawatin den nan curason: “Boso ta busca e sacerdocio tambe?” * (Numbernan 12:3; 16:9, 10) Pero, con Yehova a reacciona riba e acto di rebelion aki contra esnan na ken El a duna autoridad?

E Hues di Israel Ta Interveni

12. Bou di ki condicion Israel lo por a keda cu un bon relacion cu Dios?

¹² Ora Yehova a duna Israel e Lei, El a bisa e pueblo cu si nan obedec’e nan lo a bira “un nacion santo”, y cu e nacion lo keda santo tanten cu nan sigui biba cu e areglo di Yehova. (Exodo 19:5, 6) Awor cu tawatin un rebeldia abierto ta tuma luga, a bira tempo pa e Hues y Dunador di lei di Israel interveni! Moises a bisa Core: “Mañan abo y tur bo compañeronan sea presente dilanti di SEÑOR, tanto abo como nan, hunto cu Aron. Y cada un di boso cohe su weya pa candela y pone sencia aden, y cada un di boso  bin cu su weya pa sencia dilanti di SEÑOR, dosshenticincuenta weya pa candela; tambe abo y Aron, cada un cu su weya pa candela.”—Numbernan 16:16, 17.

13. (a) Dicon e echo cu e rebeldenan a ofrece sencia dilanti Yehova tawata un frescura di nan parti? (b) Con Yehova a trata cu e rebeldenan?

¹³ E Lei di Dios a bisa cu ta sacerdote so por a ofrece sencia. E echo so cu Levita cu no ta sacerdote lo a ofrece sencia na Yehova mester a pone nan recapasita. (Exodo 30:7; Numbernan 4:16) Pero Core cu su simpatisadonan si no a recapasita! Su siguiente dia Core a “reuni henter e congregacion contra nan [Moises cu Aron] na entrada di e tent di reunion.” E relato ta conta: “E ora ei SEÑOR a papia cu Moises y Aron, bisando: ‘Separa boso for di entre e congregacion aki, pa mi caba cu nan mesora.’” Pero Moises cu Aron a suplica Yehova pa E spar nan bida. Yehova a bai di acuerdo cu nan suplica. Pero pa loke ta Core y su grupo, “a bin candela for di SEÑOR y a caba cu dosshenticincuenta homber cu tawata ofrece sencia.”—Numbernan 16:19-22, 35. *

14. Dicon Yehova a tuma accion pisa contra e congregacion di Israel?

¹⁴ Pa straño cu por parce, ainda e Israelitanan cu a mira con Yehova a trata cu e rebeldenan no a siña un les. “Su manece henter e congregacion di e yiunan di Israel tawata murmura contra Moises y Aron, bisando: “Ta boso ta esnan cu a causa morto di e pueblo di SEÑOR.” E Israelitanan a tuma parti pa e conspiradonan! Awor si Yehova su pasenshi a caba. Ningun hende no por a intercede pa e pueblo mas awor, ni Moises cu Aron. Yehova a manda un plaga riba esnan desobediente, y “esnan cu a muri door di e plaga tawata diescuater mil sheteshen, sin conta esnan cu a muri pa motibo di Core.”—Numbernan 16:41-49.

15. (a) Pakico e Israelitanan lo mester a acepta e liderato di Moises y Aron sin pensa dos bes? (b) Kico e relato aki a siña bo tocante Yehova?

¹⁵ Tur e hendenan ei a perde nan bida sin ta na nodi. Nan mester a djis uza nan sinti. Por ehempel, nan lo por a puntra nan mes: ‘Ta ken a risca nan bida door di aparece dilanti Farao? Ta ken a exigi pa e Israelitanan sali liber? Ta ken so Dios a invita pa subi Sero Horeb despues di e liberacion di Israel pa papia cu e angel di Dios cara cara?’ Definitivamente, e eventonan remarcabel den bida di Moises y Aron a duna prueba cu nan tawata leal na Yehova y cu nan a stima e pueblo. (Exodo 10:28; 19:24; 24:12-15) Yehova no tawatin placer den ehecuta e rebeldenan. Pero ora a bira bisto cu e pueblo lo a persisti den nan rebelion, El a tuma accion decisivo. (Ezekiel 33:11) Tur e cosnan aki tin hopi nificacion pa nos awe. Dicon?

Identifica Yehova Su Medio di Comunicacion Awe

16. (a) Ki evidencia lo mester a combence e Hudiunan di prome siglo cu Hesus tawata e representante di Yehova? (b) Pakico Yehova a remplasa e sacerdocio di Levi, y cu kico El a remplas’e?

¹⁶ Awendia tin un “nacion” nobo cu tin Yehova como su Hues, Dunador di lei y Rei invisibel. (Mateo 21:43) E “nacion” aki a bini na existencia den prome siglo di nos era. E tempo ei ya tawatin un bunita tempel na Herusalem en bes di e tabernakel di tempo di Moises, y ainda e Levitanan tawata den funcion. (Lucas 1:5, 8, 9) Pero na aña 29 di nos era un otro tempel, uno spiritual cu Hesucristo como Sumosacerdote, a bini na existencia. (Hebreonan 9:9, 11) E asunto di ken Dios a duna autoridad a bolbe lanta. Ken  Yehova tawata bai uza pa guia e “nacion” nobo aki? Hesus a demostra di ta completamente leal na Dios. El a stima e pueblo. Asta el a haci hopi señal maravioso. Sinembargo, mayoria di e Levitanan a nenga di acepta Hesus, mescos cu nan antepasadonan cabesura a haci. (Mateo 26:63-68; Echonan 4:5, 6, 18; 5:17) Finalmente Yehova a remplasa e sacerdocio di Levi cu uno hopi diferente, un sacerdocio real. E sacerdocio real aki ta existi te dia djawe.

17. (a) Ki grupo ta forma e sacerdocio real awe? (b) Con Yehova ta uza e sacerdocio real?

¹⁷ Di ken e sacerdocio real aki ta consisti awe? Apostel Pedro ta contesta e pregunta aki den su prome carta inspira. Pedro a skirbi e miembronan ungi di e curpa di Cristo: “Boso ta un rasa scohi, un sacerdocio real, un nacion santo, un pueblo peculiar, pa boso por proclama e alabansanan di esun cu a yama boso for di scuridad na su lus maravioso.” (1 Pedro 2:9) E palabranan aki ta mustra cu como grupo e unginan cu ta sigui e pasonan di Hesus ta forma e “sacerdocio real” aki cu Pedro a yama tambe “un nacion santo.” Ta nan ta e medio di comunicacion cu Yehova ta uza pa duna su pueblo instruccion y guia spiritual.—Mateo 24:45-47.

18. Kico ancianonan nombra tin di aber cu e sacerdocio real?

¹⁸ Ancianonan nombra cu ta sirbi den puestonan di responsabilidad den e congregacionnan di Yehova su pueblo rond mundo ta representa e sacerdocio real. E hombernan aki merece nos respet y apoyo sinsero, sea cu nan ta ungi of no. Dicon? Door cu ta pa medio di spirito santo Yehova a nombra e ancianonan aki. (Hebreonan 13:7, 17) Con esei por ta?

19. Con asina ancianonan ta ser nombra door di spirito santo?

¹⁹ E ancianonan aki ta cumpli cu e rekisitonan menciona den e Palabra di Dios, cu ta un producto di Dios su spirito. (1 Timoteo 3:1-7; Tito 1:5-9) Pesei por bisa cu ta spirito santo a nombra nan. (Echonan 20:28) Ancianonan mester conoce e Palabra di Dios hopi bon. Nan tin cu odia tur loke por parce parcialidad den husgamento, mescos cu e Hues Supremo cu a nombra nan.—Deuteronomio 10:17, 18.

20. Kico ta duna bo aprecio pa ancianonan cu ta traha duro?

²⁰ En bes di bai contra nan autoridad, nos ta aprecia e ancianonan trahado aki di berdad! Nan bida di sirbishi fiel, den hopi caso pa varios decada, ta inspira confiansa den nos. Fielmente nan ta prepara pa reunion di  congregacion y ta conduci nan, ta traha scouder cu scouder hunto cu nos predicando e bon nobo di e Reino, y ta duna conseho biblico ora tin mester. (Mateo 24:14; Hebreonan 10:23, 25; 1 Pedro 5:2) Nan ta bishita nos ora nos ta malo y ta consola nos ora nos ta tristo. Lealmente y sin egoismo nan ta apoya interesnan di Reino. Yehova su spirito ta riba nan; nan tin su aprobacion.—Galationan 5:22, 23.

21. Kico ancianonan mester ta conciente di dje y pakico?

²¹ Claro cu anciano no ta perfecto. Door cu nan ta conciente di nan limitacionnan, nan no ta purba domina e tou, Dios su herencia. Mas bien nan ta considera nan mes ‘trahado hunto cu nan rumannan, pa nan goso.’ (1 Pedro 5:3; 2 Corintionan 1:24) Ancianonan humilde y trahado ta stima Yehova, y nan sa cu mas nan imit’e, mas nan lo por beneficia e congregacion. Cu esaki na mente, nan ta purba constantemente pa desaroya e cualidadnan di Dios, manera amor, compasion y pasenshi.

22. Con e repaso aki di e relato di Core a fortalece bo fe den Yehova su organisacion visibel?

²² Nos ta sumamente contento cu Yehova ta nos Gobernante invisibel, Hesucristo ta nos Sumosacerdote, miembronan di e sacerdocio real ta nos maestro, y ancianonan cristian fiel ta nos consehero! Maske ningun organisacion dirigi door di hende no por ta perfecto, nos ta felis di por ta sirbi Dios den compania di compañeronan creyente fiel, cu ta somete nan mes gustosamente na autoridad cu Dios a duna!

[Nota]

Kico Bo A Siña?

• Ki percuracionnan amoroso Yehova a haci pa e Israelitanan?

• Dicon no tawatin excuse pa Core su rebeldia contra Moises cu Aron?

• Ki les nos por saca for di e manera cu Yehova a trata cu e rebeldenan?

• Con nos awe por demostra cu nos ta aprecia Yehova su areglonan?

[Preguntanan di Estudio]

[Plachi na pagina 9]

Bo ta mira tur asignacion den Yehova su sirbishi como un privilegio?

[Plachi na pagina 10]

‘Pakico anto boso ta halsa boso mes riba e asamblea di Yehova?’

[Plachi na pagina 13]

Ancianonan nombra ta representa e sacerdocio real