Stimula Door di “e Echonan Poderoso di Dios”

“Nos ta tende nan den nos mes lenga ta papia di e echonan poderoso di Dios.”—ECHONAN 2:11.

1, 2. Ki suseso asombroso a tuma luga na Herusalem na Pentecoste di aña 33 di nos era?

UN MAINTA casi meimei di aña 33 di nos era, un cos asombroso a sosode cu un grupo di homber y mohe disipel di Hesucristo cu tawata reuni den un cas priva na Herusalem. “Diripiente a bin un zonido for di shelo, manera un biento violento y fuerte, y esaki a yena henter e cas caminda nan tawata sinta. Y nan a mira loke tawata parce lenganan di candela . . . . Y nan tur a wordo yena cu spirito santo y a cuminsa papia den otro lenganan.”—Echonan 2:2-4, 15.

² Un multitud grandi a forma dilanti e cas. Algun di e hendenan tawata Hudiu di otro tera, “hombernan deboto” cu a bini Herusalem pa celebra e fiesta di Pentecoste. Nan a keda asombra, pasobra cada un di nan tawata tende e disipelnan papia den su idioma natal “di e echonan poderoso di Dios.” Pero tur e hendenan cu tawata papiando tawata Galileo: Con nan por tawata papiando tur e idiomanan ei anto?—Echonan 2:5-8, 11.

3. Ki mensahe apostel Pedro a duna e multitud na Pentecoste?

³ Un di e Galileonan ei tawata apostel Pedro. El a splica nan cu un par di siman prome, hombernan inhusto a asesina Hesucristo.  Sinembargo, Dios a lanta su Yiu for di morto. Despues di esei Hesus a aparece na hopi di su disipelnan, incluso na Pedro y otronan cu tawata presente ora e tawata splica esaki. Apenas dies dia prome, Hesus a subi na shelo. Ta e a drama spirito santo riba su disipelnan. E cosnan aki tawata relevante pa e Hudiunan cu tawata celebrando Pentecoste? Sigur cu si. E morto di Hesus a habri caminda pa nan por haya pordon di pica y ricibi “e don di spirito santo” si nan mustra fe den dje. (Echonan 2:22-24, 32, 33, 38) Pues, con e hendenan presente a reacciona na e “echonan poderoso di Dios” cu nan a tende di dje? Y con e relato aki por yuda nos determina con ta bayendo cu nos sirbishi na Yehova?

Motiva na Accion!

4. Cua profecia di Yoël a cumpli riba dia di Pentecoste di aña 33 di nos era?

⁴ Despues cu e disipelnan na Herusalem a ricibi spirito santo, nan no a perde tempo. Nan a cuminsa comparti e bon nobo di salbacion cu otro hende, cuminsando cu e multitud reuni riba e mainta ei. Nan predicacion a cumpli cu un profecia remarcabel cu profeta Yoël yiu di Petuel a skirbi ocho siglo prome: “Lo mi basha mi spirito riba henter humanidad; y boso yiu hombernan y yiu mohenan lo profetisa, boso ancianonan lo soña soñonan, boso hobennan lo mira visionnan. Y tambe riba e sirbidonan homber y mohe lo mi basha mi spirito den e dianan ei . . . prome cu e dia grandi y temibel di SEÑOR bin.”—Yoël 1:1; 2:28, 29, 31; Echonan 2:17, 18, 20.

5. Den ki sentido cristiannan di prome siglo a profetisa? (Mira nota na pia di pagina.)

⁵ Esei a nifica cu Dios tawata bai lanta henter un generacion di profeta homber y mohe, mescos cu David, Yoël y Debora, anto uza nan pa pronostica cosnan cu lo mester pasa den futuro? No. E ‘yiu hombernan y yiu mohenan, y sirbidonan homber y mohe’ cristian lo a profetisa, den sentido cu e spirito di Yehova lo a impulsa nan pa declara “e echonan poderoso” cu Yehova a haci, y lo bai haci. Pues, nan lo a sirbi como bosero di e Haltisimo. * Pero con e multitud a reacciona?—Hebreonan 1:1, 2.

6. Ora e multitud a tende e discurso di Pedro, kico hopi di nan a ser impulsa pa haci?

⁶ Ora e multitud a caba di tende Pedro su splicacion, hopi di nan a ser motiva na accion. Nan a “ricibi su palabra” y “a wordo batisa; y e dia ei a wordo añadi na nan mas o menos tres mil alma.” (Echonan 2:41) Ya cu nan tawata Hudiu natural y proselita, nan tawatin un conocemento basico di e Scritura caba. E conocemento aki, hunto cu e fe cu nan a haya den loke nan a tende for di Pedro, a forma e base pa nan batisa “den nomber di e Tata y di e Yiu y di e spirito santo.” (Mateo 28:19) Despues di batisa “nan tawata dedica nan mes continuamente na e siñansa di e apostelnan.” Na mes momento nan a cuminsa comparti nan fe nobo cu otro hende. Si,  “tur dia nan tawata constantemente di un acuerdo den tempel . . . alabando Dios. Y nan tawata bon mira serca henter e pueblo.” Como resultado di nan actividad di predica, continuamente Yehova “tawata agrega na e iglesia esnan cu tawata wordo salba.” (Echonan 2:42, 46, 47) Congregacionnan cristian a lanta un tras di otro den hopi di e paisnan caminda e creyente nobonan aki tawata biba. No tin duda cu e crecemento aki tawata por lo menos en parte debi na nan esfuerso celoso pa predica e “evangelio” ora nan a bai nan tera bek.—Colosensenan 1:23.

E Palabra di Dios Ta Activo

7. (a) Kico ta atrae hende di tur nacion na Yehova su organisacion awe? (b) Ki potencial pa mas aumento abo ta mira den e campo mundial, y localmente? (Mira e nota na pia di pagina.)

⁷ Kico nos por bisa di esnan cu tin deseo di bira sirbido di Dios awe? Nan tambe tin cu studia e Palabra di Dios cu cuidou. Door di hacie nan ta bin conoce Yehova como un Dios cu ta “yen di compasion y gracia, kende no ta rabia lihe y kende ta abunda den misericordia y berdad.” (Exodo 34:6; Echonan 13:48) Nan ta siña tocante un percuracion amoroso di Yehova: e rescate pa medio di Hesucristo. Su sanger drama por limpia nan di tur pica. (1 Huan 1:7) Tambe nan ta bin aprecia e proposito cu Dios tin pa resusita “tanto e hustonan como e malbadonan [“inhustonan”, NW].” (Echonan 24:15) Amor pa e Fuente di e “echonan poderoso” aki ta brota den nan curason, y nan ta ser motiva pa predica e berdadnan precioso aki. Despues nan ta bira sirbidonan dedica y batisa di Dios, y ta sigui ‘crece den e conocemento di Dios.’ *—Colosensenan 1:10b; 2 Corintionan 5:14.

8-10. (a) Con e experencia di un señora cristian ta mustra cu e Palabra di Dios “ta activo”? (b) Kico e experencia aki a siña bo tocante Yehova y e manera cu E ta trata cu su sirbidonan? (Exodo 4:12)

⁸ E conocemento cu e sirbidonan di Dios ta haya door di studia Bijbel no ta aribariba. E conocemento ei ta toca bo curason, e ta cambia bo manera di pensa y ta bira parti di bo. (Hebreonan 4:12) Por ehempel, un señora cu yama Camille tawata traha na un cas di cuido pa hende grandi. Un di su pashentnan tawata Martha, un Testigo di Yehova. Door cu Martha tawata sufri di verkalking pisa, mester a vigil’e constantemente. Mester a cord’e pa come, y asta guli su cuminda. Pero manera nos lo mira, tawatin un cos si cu no a kita for di Martha su mente.

⁹ Un dia Martha a mira Camille ta yora, aflihi debi na cierto problemanan personal. Martha a pone su brasa rond di Camille y a invit’e pa studia Bijbel cu ne. Pero un hende den Martha su condicion por dirigi un studio di Bijbel? Si! Apesar cu Martha a lubida mayoria cos, e no a lubida su magnifico Dios, ni e no a lubida e berdadnan precioso cu el a siña den Bijbel. Durante e studio Martha a bisa Camille pa e lesa cada paragraf, busca e textonan di Bijbel cita, lesa e pregunta na pia di e pagina anto contest’e. Nan a sigui asina pa un tempo, y apesar di Martha su limitacionnan Camille a progresa den su conocemento di Bijbel. Martha a realisa cu Camille tawatin mester di asociacion cu otro hende interesa den sirbi Dios. Cu esei na mente el a duna su studiante un shimis y un par di sapato, pa Camille tawatin algo apropiado pa bisti ora e bai su prome reunion na Salon di Reino.

¹⁰ Martha su interes amoroso, su ehempel y su conviccion a conmove Camille. El a dicidi cu loke Martha tawata purba siñ’e for di Bijbel mester tawata di importancia vital, pasobra Martha a lubida tur cos, menos loke el a siña den Bijbel. Despues, ora nan a manda  Camille na un otro luga pa traha, el a realisa cu a bira tempo pa e tuma accion. Prome chens cu el a haya, el a cana drenta un Salon di Reino, bisti cu e shimis y e sapatonan cu Martha a dun’e, anto a pidi un studio di Bijbel. Camille a progresa bon, te cu el a batisa.

Stimula pa Imita Yehova Su Normanan

11. Ademas di ta celoso den e trabou di predica, con nos por demostra cu e mensahe di Reino a stimula nos?

¹¹ Awe tin mas cu seis miyon Testigo di Yehova cu, mescos cu Martha y awor Camille tambe, ta predica “e evangelio aki di e reino” rond mundo. (Mateo 24:14; 28:19, 20) Mescos cu e cristiannan den prome siglo, e “echonan poderoso di Dios” ta conmove nan profundamente. Nan ta realisa cu nan ta hende sumamente privilegia, pasobra nan ta carga Yehova su nomber y El a drama su spirito riba nan. Pesei nan ta haci tur esfuerso pa “cana na un manera digno di Señor, pa agrad’e den tur sentido” door di biba di acuerdo cu su normanan den tur aspecto di nan bida. Entre otro esei ta encera cu nan ta respeta Dios su normanan den loke ta bistimento y estilo di cabei.—Colosensenan 1:10a; Tito 2:10.

12. Ki conseho spesifico tocante bistimento y estilo di cabei tin registra na 1 Timoteo 2:9 y 10?

¹² Si, Yehova a establece norma cu ta toca nos aparencia personal. Apostel Pablo a menciona algun di Dios su rekisitonan den e area aki. “Mi kier pa hende mohe dorna nan mes cu bisti apropiado, decente y modera, no cu cabei tur na vlecht y oro of perla of bisti costoso, sino mas bien cu bon obra, manera ta pas pa mohenan cu ta teme Dios.” * Kico e  palabranan aki ta siña nos?—1 Timoteo 2:9, 10.

13. (a) Kico kiermen pa nos ‘bisti na un manera apropiado’? (b) Dicon nos por bisa cu Yehova su normanan ta rasonabel?

¹³ E palabranan di Pablo ta mustra cu cristiannan mester “dorna nan mes cu bisti apropiado.” Nan aparencia no mester ta slons ni sushi. Tur hende, asta hende di poco recurso, por cumpli cu e normanan rasonabel ei door di haci sigur cu nan paña ta limpi y presentabel. Por ehempel, tur aña Testigonan na un pais di Sur America ta cana hopi kilometer door di selva y despues nabega hopi ora den canoa, pa nan asisti na nan congreso di districto. No ta nada straño pa un di nan cai den riu of scheur su paña den mata durante e biahe. Pues, ora nan yega na e area caminda e congreso ta bai tuma luga, hopi bes nan aparencia por ta un tiki for di ordo. Door di esei nan ta tuma tempo pa cose boton, drecha zip y laba y strica e pañanan cu nan ta bai uza pa e congreso. Nan ta balora nan invitacion pa come na Yehova su mesa, y nan kier ta bisti na un manera apropiado.

14. (a) Kico kiermen pa nos bisti “decente y modera”? (b) Si nos kier bisti manera hende “cu ta teme Dios”, kico esei ta encera?

¹⁴ Pablo a sigui mustra cu nos mester bisti “decente y modera.” Esei ta nifica cu nos aparencia no mester hala mucho atencion na nos mes, ni strabagante, probocativo, mucho sunu, ni duna e impresion cu nos ta core tras di moda. Ademas, nos moda di bisti mester mustra cu nos “ta teme Dios.” Bon cos pa pensa ariba, no? E idea no ta pa nos bisti drechi ora di asisti na reunion di congregacion, anto na otro ocasion si bisti pa loco numa. Semper nos aparencia personal mester refleha un actitud honorabel y respetuoso, pasobra ta 24 ora pa dia nos ta minister cristian. Claro cu nos paña di trabou y di scol mester pas cu e tipo di actividad cu nos ta haciendo. Pero semper nos mester bisti decente y cu dignidad. Si semper nos manera di bisti refleha cu nos ta kere den Dios, nunca nos lo no tin nodi keda sin duna testimonio informal door cu nos tin berguensa di nos aparencia.—1 Pedro 3:15.

‘No Stima Mundo’

15, 16. (a) Pakico ta importante pa nos evita di imita mundo su manera di bisti y su estilonan di cabei? (1 Huan 5:19) (b) Ki motibo practico tin pa nos evita di bai tras di estilo pasahero di bisti y di cabei?

¹⁵ E conseho skirbi na 1 Huan 2:15 y 16 tambe ta yuda nos scohe nos manera di bisti y nos estilo di cabei. E ta bisa: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo.”

 ¹⁶ Esta oportuno e conseho ei ta! Den e tempo aki ora cu presion di pareu ta mas fuerte cu nunca, nos no mester laga mundo dicidi pa nos con nos mester bisti. Moda di bisti y estilo di cabei a bai atras durante ultimo añanan. Ni e manera di bisti di hende profesional y den negoshi no ta un manera confiabel pa cristiannan determina kico ta apropiado pa nan. Esaki ta un motibo mas pa semper nos corda cu si nos kier biba segun Dios su normanan, nos no mester ‘ta conforme e mundo aki.’ Ta asina so nos por “dorna e doctrina di Dios nos Salbador den tur cos. ”— Romanonan 12:2; Tito 2:10.

17. (a) Ki preguntanan nos lo por pensa ariba ora nos ta cumpra paña of evalua un cierto estilo? (b) Pakico cabesnan di famia tin cu paga tino riba aparencia di nan miembronan di famia?

¹⁷ Prome cu bo dicidi di cumpra un paña, ta bon pa bo puntra bo mes: ‘Dicon e style aki ta hala mi atencion? E tin di aber cu un celebridad di mundo di entretenimento cu mi ta admira? E ta ser uza door di miembronan di un cierto gang of un grupo cu ta promove un actitud independiente y rebelde?’ Ademas nos tin cu examina e paña bon. Si ta un shimis of un saya, con largo e ta? Con e ta sinta na bo curpa? E ta decente y apropiado? Lo e anima hende pa trata bo cu respet? Of e ta preta na curpa, probocativo of slons? Puntra bo mes: ‘Mi por pone otro hende trompica door di bisti e paña aki?’ (2 Corintionan 6:3, 4) Dicon e preguntanan ei mester interesa nos? Pasobra Bijbel ta bisa: “Ni Cristo no a agrada su mes.” (Romanonan 15:3) Un cabes di famia cristian tin cu paga tino riba aparencia di su miembronan di famia. Door cu e ta respeta e glorioso Dios cu nan ta adora, un cabes di famia lo no duda pa ofrece conseho firme y amoroso ora ta necesario.—Santiago 3:13.

18. Kico ta motiva abo pa paga bon tino con bo ta bisti y ki estilo di cabei bo ta uza?

¹⁸ E mensahe cu nos ta hiba ta origina di Yehova, e ehempel maximo di dignidad y santidad. (Isaias 6:3) Bijbel ta anima nos masha pa nos imit’e “manera yiunan stima.” (Efesionan 5:1) Nos manera di bisti y nos estilo di cabei por duna sea un bon of un mal impresion di nos Tata celestial. Sin duda, nos kier haci su curason contento!—Proverbionan 27:11.

19. Ki beneficionan nos ta haya ora nos ta declara “e echonan poderoso di Dios” na otro hende?

¹⁹ Con abo ta sinti tocante “e echonan poderoso di Dios” cu bo a siña? Nos ta hopi privilegia mes di por a siña e berdad! Door cu nos ta mustra fe den e sanger drama di Hesucristo, nos picanan ta pordona. (Echonan 2:38) Danki na esei, nos tin frankesa di expresion serca Dios. Nos no tin miedo di morto manera hende cu no tin speransa. Mas bien, nos tin Hesus su garantia di cu un dia “tur cu ta den graf lo tende su bos, y lo sali.” (Huan 5:28, 29) Yehova tawata hopi bondadoso di a revela tur e cosnan aki na nos. Ademas El a drama su spirito riba nos. Pesei, nos gratitud pa tur e bon regalonan aki mester impulsa nos pa respeta su normanan eleva y alab’e cu celo door di declara “e echonan poderoso” aki na otro hende.

[Nota]

Con Lo Bo Contesta?

• Ki “echonan poderoso” e pueblo a tende di dje na Pentecoste di aña 33 di nos era, y con nan a reacciona?

• Con un hende por bira disipel di Hesucristo, y kico ser un disipel di dje ta encera?

• Dicon ta importante pa nos paga tino na nos manera di bisti y nos estilo di cabei?

• Ki factornan nos mester tuma na consideracion pa dicidi si un paña of un cierto style ta apropiado?

[Preguntanan di Estudio]

[Plachi na pagina 15]

Pedro a anuncia cu Hesus a lanta for di morto

[Plachi na pagina 17]

Bo aparencia personal ta duna un bon impresion di e Dios cu bo ta adora?

[Plachi na pagina 18]

Mayornan cristian mester paga tino riba aparencia di nan miembronan di famia