Yoga—Simplemente un Programa di Ehercicio of Algo Mas?

AWENDIA hende ta masha interesa den un curpa delega y sano. Esaki a pone hopi di nan acudi na gym y clubnan di salu pa yuda nan. Pa mesun motibo, miles di hende den paisnan Europeo y di Norte America ta practica e arte Asiatico di yoga.

Hende cu ta sufri di stress, depresion y frustracion tambe a acudi na yoga pa haya consuelo y solucion. Specialmente for di e temporada di hippie, e decada di añanan ’60 di siglo 20, e interes den religionnan Asiatico y nan practicanan mistico a plama rond den paisnan Europeo y di Norte America. Artistanan di cine y musiconan di rock a haci meditacion transedental, un di e rasgonan di yoga, masha popular. En bista di e creciente interes den yoga, nos lo por puntra: ‘Yoga ta simplemente un programa di ehercicio cu lo duna esun cu practic’e un curpa sano y delega y cierto grado di pas mental? Un hende por practica yoga sin cu e ta mete cu religion? Yoga ta apropiado pa cristian?’

E Origen di Yoga

E origen di e palabra “yoga” ta conecta cu e palabra “yugo” na Papiamento. E por nifica uni of pone hunto bou di un yugo, mara of controla. Pa un Hindu, yoga ta un tecnica of disiplina cu ta hiba na union cu un gran forsa sobrenatural of spirito. Yoga a ser describi como “mara of uni tur poder di curpa, mente y alma na Dios.”

For di ki tempo hende a practica yoga? Den e Vaye di Indus, caminda awe ta Pakistan, nan a haya seyonan cu figura di hende sinta den varios posicion di yoga. Segun arkeologonan, e civilisacion di Vaye di Indus ta data entre 3.000 pa 1.000 aña prome cu Era Comun, casi den mesun periodo cu e cultura di Mesopotamia. Tanto artefactonan di Vaye di Indus como di Mesopotamia ta pinta un homber, cu a representa un dios, corona cu cacho di bestia y rondona door di bestia. Y esaki ta pone nos corda riba Nimrod, e “yagdo poderoso.” (Genesis 10:8, 9) E hindunan ta bisa cu  e figuranan sinta den posicion di yoga ta imagennan di e dios Siva, señor di bestia y señor di yoga, kende hopi bes ta ser adora mediante lingam, un simbolo di e organo sexual masculino. Pesei e buki Hindu World (Mundo di Hindu) ta yama yoga “un codigo di practicanan stricto di abnegacion propio, principalmente di origen preario [prome cu e pueblo Indio-Europeo], cu a contene resto di hopi concepto y rito antiguo.”

Inicialmente e metodonan di yoga a ser transmiti di un boca pa otro. Despues Patañjali, un Indio cu tawata un sabio di yoga, a pone nan por escrito den un forma detaya y a yama nan Yoga Sutra, locual te awe ta e manual basico di yoga. Segun Patañjali, yoga ta “un esfuerso metodico pa alcansa perfeccion mediante e control di diferente elemento di naturalesa humano, tanto fisico como mental.” For di su principio te cu awe, yoga ta un parti integral di religionnan Asiatico, y awor particularmente di hinduismo, jainismo y budismo. Algun practicante di yoga ta kere cu lo e yuda nan alcansa moksa, of liberacion, door di uni nan cu un spirito cu ta presente tur caminda.

Pesei nos ta bolbe puntra: ‘Un hende por practica yoga simplemente como ehercicio fisico pa desaroya un curpa sano y un mente relaha, sin cu e ta mete cu religion?’ En bista di yoga su origen, e contesta mester ta no.

Unda Yoga Por Hiba Bo?

E meta di yoga como un disiplina ta pa hiba un persona na e experencia spiritual di ser poni bou di “yugo” (of unie) cu un spirito sobrehumano. Pero ta cua spirito esei lo ta?

Den Hindu World, autor Benjamin Walker ta bisa di yoga: “Podise e tawata un sistema inicial di ritualnan magico, y yoga ainda tin den su nificacion un conotacion di podernan sobrenatural y di bruheria.” Filosofonan hindu ta admiti cu e practica di yoga por duna hende podernan sobrenatural, maske por lo general nan ta bisa cu esaki no ta e meta final di yoga. Por ehempel, den e buki Indian Philosophy (Filosofia Indio), expresidente di India, dr. S. Radhakrishnan, ta bisa di e practicante di yoga: “Control di e curpa mediante varios postura ta pone cu e no ta sinti e extremonan di cayente ni friu. . . . E yogui [practicante di yoga] por mira y tende na un distancia . . . Ta posibel transmiti pensamento for di un persona pa otro sin haci uzo di e mecanismonan normal di comunicacion. . . . E yogui por haci su curpa invisibel.”

Tin hende ta considera e esenanan di un yogui drumi riba un cama di clabo of cu ta cana riba carbon cayente como un engaño, y pa algun hende esei ta un chiste. Pero na India esakinan ta susesonan comun. Mescos ta conta pa e practica di para riba un pia mientras cu e yogui ta wak stret den solo pa oranan largo y tambe control di rosea cu ta permiti un persona ser dera den santo pa periodonan largo di tempo. Na juni 1995, e corant The Times of India a informa cu un mucha mohe di tres aña y mei a drumi den un trans segun cu nan a laga un auto cu a pisa mas cu 750 kilo core pasa riba su bariga. E multitud asombra a nota cu ora e mucha a bin bij e tawata bon bon. E informe a agrega: “Esei tawata puro poder di yoga.”

No tin duda cu hende normal no por haci ningun di e cosnan ei. Pesei un cristian mester puntra: Kico e hazañanan aki ta indica? Ta di Yehova Dios nan ta bini, “e Haltisimo riba henter tera”, of nan ta bini di un otro fuente? (Salmo 83:18) Bijbel ta papia cla riba e punto aki. Ora e Israelitanan tawata a punto di drenta e Tera Priminti, cu e Cananeonan tawata ocupa, Yehova a bisa e yiunan di Israel via Moises: “No siña imita e abominacionnan di e nacionnan ei.” Ki ‘abominacion’ of cosnan repugnante Yehova tawata kiermen? Moises a spierta nan contra “hende cu ta practica adivinacion of cu ta practica bruheria, of cu ta pronostica, of cu ta practica magia.” (Deuteronomio 18:9, 10) E cosnan aki ta repugnante pa Dios pasobra nan ta obra di  demoño y di e carni pecaminoso.—Galationan 5:19-21.

Yoga No Ta un Alternativa pa Cristiannan

Aunke instructornan di gym kisas no ta di acuerdo, yoga no ta simplemente ehercicio fisico. E buki Hindu Manners, Customs and Ceremonies (Cortesia-, Custumber- y Ceremonianan Hindu) ta conta e experencia di dos principiante di yoga cu tawata bou di guia di un guru. E buki ta cita un di nan cu a bisa: “Mi a haci esfuerso sobrehumano pa wanta mi rosea aden mas tanto posibel, y tawata hala rosea solamente ora mi tawata a punto di bai leu. . . . Un dia, precis diesdos or di merdia, mi tawata kier sa cu mi a mira un luna briyante, cu a parce di tawata zuai bai bini. Un biaha merdia mi a imagina mi cu tawatin scuridad completo rond di mi. Mi director . . . a keda masha contento ora mi a cont’e e visionnan aki. . . . El a sigura mi cu lo no a dura masha cu mi penitencia lo laga mi experencia resultadonan hopi mas sorprendente.” E di dos homber ta conta: “El a obliga mi keda wak den shelo tur dia sin kinipi wowo ni cambia di posicion. . . . Tin biaha mi tawata mira chispa di candela den laira; otro biahanan tawata parce manera mi ta mira globonan di candela y otro meteornan. Mi maestro tawata hopi contento cu e exito di mi esfuersonan.”

Aparentemente e cosnan straño cu nan a mira, segun e gurunan, ta net e resultadonan cu lo hiba nan na e berdadero meta di ehercicionan di yoga. Si, e meta final di yoga ta moksa, cu nan ta splica como e union cu un gran spirito impersonal. Nan ta describie como “e paro (intencional) di e proceso spontaneo di pensa.” Esaki claramente ta contrario na e meta describi pa cristiannan, cu a haya e conseho: “Presenta boso curpanan como sacrificionan bibo y santo, aceptabel pa Dios, cual ta boso sirbishi spiritual di adoracion [“cu boso facultad di rasona”, NW]. Y no sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.”—Romanonan 12:1, 2.

Ta keda na cada ken pa dicidi ki tipo di ehercicio fisico e ta haci. Sinembargo, cristiannan lo no permiti nada—sea ta entrenamento di curpa, comemento, bebemento, bistimento, dibirticion of cualkier otro cos—daña nan relacion cu Yehova Dios. (1 Corintionan 10:31) Pa esnan cu ta haci ehercicio simplemente pa nan salu, tin hopi manera di haci esei sin expone nan na e peligernan di spiritismo y di cosnan sobrenatural. Door di evita practicanan y creencianan cu ta origina di religion falso, nos por spera riba Dios su bendicion di un husto sistema nobo den cua nos lo por disfruta pa eternidad di un salu perfecto di curpa y mente.—2 Pedro 3:13; Revelacion 21:3, 4.

[Plachi na pagina 22]

Hopi hende ta disfruta di actividadnan sano cu no ta expone nan na spiritismo