Con Nos Mester Considera Prueba?

PRUEBA y mas prueba! Tur hende ta haya nan cu prueba. Nan por bini door di diferencia di personalidad, dificultad economico, problema cu salu, tentacion, presion di pareu pa haci loke ta malo, persecucion, desafionan contra nos posicion neutral of door di idolatria y hopi otro cos. Sea cual sea e prueba cu nos ta haya nos cu ne, hopi bes nan ta causa hopi ansiedad. Con nos por trata cu nan cu exito? E pruebanan aki ta beneficia nos di un of otro manera?

Nos Miho Apoyo

Aunke Rei David di antiguedad a hay’e cu yen di prueba den su bida, toch el a muri fiel. Con bin e por a wanta nan? El a señala na e fuente di su fortalesa ora el a bisa: “SEÑOR ta mi Wardado, lo mi no tin falta di nada.” Anto el a sigui bisa: “Maske mi cana den e vaye di sombra di morto, mi no tin miedo di maldad, pasobra abo ta cu mi; bo bara y bo garoti ta consola mi.” (Salmo 23:1, 4) Si, Yehova ta un fuente di apoyo cu no ta caba nunca. El a guia David atrabes di temponan di angustia, y E ta cla prepara pa haci mescos pa nos ora cu esei ta necesario.

Con nos por haya Yehova su apoyo? Bijbel ta mustra con, ora e ta bisa: “Purba y mira cu SEÑOR ta bon.” (Salmo 34:8) Esei ta un invitacion bondadoso, pero kico e ta encera? E ta un animacion pa sirbi Yehova y harmonisa nos bida completamente cu su boluntad. Un estilo di bida asina ta nifica cu nos mester entrega un poco di nos libertad, esta, haci sacrificio. Den algun caso esaki por hiba asta na prueba—persecucion y sufrimento. Sinembargo, esnan cu di henter curason ta acepta Yehova su invitacion nunca lo no sinti duele cu nan a hacie. Yehova lo trata nan hopi bon. Lo E guia nan y percura pa nan spiritualmente. Ora nan haya nan cu prueba, lo E sostene nan mediante su Palabra, su spirito santo y e congregacion cristian. Y cu tempo lo E recompensa nan cu bida eterno.—Salmo 23:6; 25:9; Isaias 30:21; Romanonan 15:5.

Esnan cu ta tuma e decision crucial aki pa sirbi Yehova y cu ta pega na nan decision ta ripara cu Yehova ta cumpli cu tur su  promesanan. Esei tambe tawata e experencia di e Israelitanan cu a sigui Hosue y a drenta e Tera Priminti. Una bes nan a crusa Riu Yordan, nan mester a wanta prueba, bringa bataya y siña lesnan doloroso. Pero e generacion ei a resulta di ta mas fiel cu nan tatanan cu a sali for di Egipto y muri den desierto. Pesei Yehova a apoya e personanan fiel aki, y relaciona cu nan estado na fin di e bida di Hosue, Bijbel ta bisa: “SEÑOR a duna nan sosiego na tur banda, conforme tur loke el a hura na nan tatanan . . . Ni un di e bon promesanan cu SEÑOR a haci na e cas di Israel no a faya; tur a keda cumpli.” (Hosue 21:44, 45) Esei tambe por ta e caso cu nos si nos depende completamente riba Yehova ora nos ta bou di prueba y den tur otro sircunstancia.

Kico por debilita nos confiansa den Yehova? Hesus a señala na un cos ora el a bisa: “Ningun hende no por sirbi dos shon . . . Boso no por sirbi Dios y Rikesa.” (Mateo 6:24) Si nos tin confiansa den Yehova, nos lo no busca siguridad caminda mayoria hende di mundo ta busc’e, esta, den cosnan material. Hesus a conseha su siguidonan: “Ma busca prome e reino di Dios y Su husticia, y tur e cosnan aki [cosnan material necesario] lo wordo añadi na boso.” (Mateo 6:33) Un cristian cu tin un punto di bista balansa di cosnan material y ta pone e Reino di Dios na prome luga den su bida ta tuma e decision corecto. (Eclesiastes 7:12) Claro cu lo e tin cu paga un prijs pa esei. Lo e tin cu sacrifica algun cos material. Pero lo e cosecha hopi recompensa. Y Yehova lo apoy’e.—Isaias 48:17, 18.

Loke Nos Por Siña di Prueba

Ta claro cu e echo cu nos ta ‘purba y mira cu Yehova ta bon’ no ta proteha nos di cosnan inespera den bida; ni e no ta proteha nos completamente di e atakenan di Satanas y su representantenan humano. (Eclesiastes 9:11) Como resultado di esei, por sosode cu e sinseridad y determinacion di un cristian ta ser poni na prueba. Dicon Yehova ta permiti su adoradonan pasa den e pruebanan ei? Apostel Pedro a duna un motibo ora el a skirbi: “Pa un tempo cortico, si ta necesario, boso a wordo aflihi pa medio di varios prueba, pa e prueba di boso fe, cu ta mas precioso cu oro cu ta perece, aunke cu e ta wordo proba door di candela, lo por resulta den alabansa y gloria y honor ora Hesucristo wordo revela.” (1 Pedro 1:6, 7) Si, prueba ta permiti nos demostra e calidad di nos fe y amor pa Yehova. Tambe nan ta yuda duna un contesta na e reproche- y acusacionnan di Satanas e Diabel.—Proverbionan 27:11; Revelacion 12:10.

Tambe prueba ta yuda nos cultiva otro cualidadnan cristian. Considera por ehempel, e palabranan di e salmista cu a bisa: “[Yehova] ta atende e hende humilde; ma e hende orguyoso E ta conoce djaleu.” (Salmo 138:6) Hopi di nos no ta humilde di naturalesa, pero prueba por yuda nos cultiva e cualidad necesario ei. Corda e ocasion den e tempo di Moises ora cu algun Israelita a fada di come mana siman tras siman, luna tras luna. Aparentemente esei tawata un prueba pa nan, aunke ta Yehova mes a manda mana milagrosamente pa nan. Ki proposito e prueba aki tawatin? Moises a bisa nan: “Den desierto [Yehova] a alimenta bo cu mana . . . pa e humilia bo y pa e pone bo na prueba.”—Deuteronomio 8:16.

Asina tambe nos humildad por ser poni na prueba. Con asina? Wel, con nos ta reacciona ora cu bin ahustenan den e organisacion di  Yehova? (Isaias 60:17) Nos ta apoya e trabou di predica y siña di henter nos curason? (Mateo 24:14; 28:19, 20) Nos ta ansioso pa acepta e splicacionnan di e berdad di Bijbel cu “e esclabo fiel y prudente” ta percura? (Mateo 24:45-47; Proverbionan 4:18) Nos ta resisti e tentacion pa tin e aparatonan di mas moderno, e pañanan di ultimo moda of e ultimo modelo di auto? Un persona modesto por contesta e preguntanan ei cu un si.—1 Pedro 1:14-16; 2 Pedro 3:11.

Prueba por yuda nos desaroya asta un otro cualidad: perseverancia. Disipel Santiago a bisa: “Considera esaki como puro goso, mi rumannan, ora boso haya boso mes den diferente pruebanan, sabiendo cu e prueba di boso fe ta produci perseverancia.” (Santiago 1:2, 3) Ora nos depende completamente riba Yehova pa wanta un prueba tras di otro, esaki lo yuda nos cultiva firmesa, constancia y integridad. E ta fortalece nos pa resisti e futuro atakenan di Satanas, e dios rabia di e mundo aki.—1 Pedro 5:8-10; 1 Huan 5:19; Revelacion 12:12.

Mantene un Punto di Bista Corecto di Prueba

Tempo cu Hesucristo e Yiu perfecto di Dios, tawata riba tera, el a confronta hopi prueba y a cosecha tambe hopi beneficio door cu el a wanta nan. Pablo a skirbi cu Hesus “a siña obediencia door di e cosnan cu el a sufri.” (Hebreonan 5:8) Hesus su lealtad te na morto a trece alabansa pa Yehova su nomber y a haci posibel cu e por a ofrece e balor di su bida humano perfecto como un rescate pa humanidad. Esaki a habri caminda pa esnan cu eherce fe den Hesus por tin e speransa di bida eterno. (Huan 3:16) Door cu Hesus a wanta su pruebanan fielmente, awor e ta nos Sumosacerdote y Rei entronisa.—Hebreonan 7:26-28; 12:2.

Kico di nos? Nos lealtad apesar di prueba tambe ta trece hopi beneficio. Relaciona cu esnan cu tin speransa celestial, Bijbel ta bisa: “Bendiciona ta un hende cu ta persevera den prueba; pasobra una bes cu el a pasa e prueba, e lo ricibi e corona di bida, cu Señor a priminti na esnan cu ta stim’e.” (Santiago 1:12) Hende cu tin speransa pa biba riba tera tin e siguransa cu si nan wanta fielmente, nan lo hereda bida eterno den paradijs riba tera. (Revelacion 21:3-6) Y mas importante ainda, nan perseverancia fiel lo trece alabansa pa e nomber di Yehova.

Segun cu nos ta sigui e pasonan di Hesus, nos por tin confiansa cu tur e pruebanan of tentacionnan cu nos haya nos cu ne den e sistema di cosnan aki, ta cosnan cu nos por logra trata cu ne. (1 Corintionan 10:13; 1 Pedro 2:21) Con asina? Door di depende riba Yehova, kende ta duna hende cu ta depende riba dje “poder supremo.” (2 Corintionan 4:7) Laga nos tin e mesun conviccion cu Job, kende asta ora e tawata bou di prueba severo a confirma su confiansa den Dios, bisando: “Ora cu e caba di pone mi na prueba, lo mi sali manera oro.”—Job 23:10.

[Plachi na pagina 31]

Hesus su lealtad bou di prueba a trece alabansa pa Yehova su nomber. Nos lealtad tambe por