Imita e Gran Maestro

“Bai y haci tur e nacionnan disipel di mi . . . , y siña nan pa cumpli cu tur loke mi a ordena boso.”—MATEO 28:19, 20.

1, 2. (a) Den un sentido, con nos tur ta maestro? (b) Ora di siña otro hende, ki responsabilidad unico cristiannan berdadero tin?

ABO ta un maestro? Den un sentido, nos tur ta. Cada biaha cu bo indica un persona cu a perde caminda e direccion corecto, mustra un colega di trabou con pa haci un tarea spesifico of siña un mucha mara feter, bo ta siñando un hende. Bo ta haya un satisfaccion ora bo por yuda un otro hende, no ta berdad?

² E trabou di siña otro hende ta representa un responsabilidad unico pa cristiannan berdadero. Nos a haya e tarea di ‘haci e nacionnan disipel y siña nan.’ (Mateo 28:19, 20) Den e congregacion tambe nos tin varios oportunidad pa siña otro hende. Tin hombernan capas nombra pa sirbi como “wardado y maestro”, cu e meta pa edifica e congregacion. (Efesionan 4:11-13, NW) Mohenan maduro tin cu ‘siña loke ta bon’ na mohenan mas hoben como parti di nan actividadnan cristian di tur dia. (Tito 2:3-5) Nos tur tin cu anima nos compañeronan creyente, y nos por haci caso di e spiertamento ei door di uza Bijbel pa edifica nos rumannan. (1 Tesalonicensenan 5:11) Pa nos ta un privilegio di por ta un maestro di e Palabra di Dios y di por comparti balornan spiritual cu por trece beneficio duradero!

3. Con nos por bira maestronan mas eficas?

³ Pero, con nos por bira maestronan mas eficas? Esei ta principalmente door di imita Hesus e Gran Maestro. Pero algun hende lo puntra nan mes: ‘Con nos por imita Hesus? E tawata perfecto.’ Claro cu nos no por ta maestronan perfecto. No obstante, sea cu nos ta hopi capas of no, nos por haci nos best si pa imita e manera cu Hesus a siña hende. Laga nos analisa con nos por aplica cuater di su metodonan: simplesa, pregunta eficas, rasonamento logico y comparacion adecua.

Siña na un Manera Simpel

4, 5. (a) Pakico simplesa ta un caracteristica clave di e berdad di Bijbel? (b) Pa por siña di un manera simpel, pakico ta importante pa tene cuenta cu nos vocabulario?

⁴ E berdadnan basico di e Palabra di Dios no ta complica. Hesus a bisa den oracion: “Mi ta alaba bo, o Tata, . . . cu Bo a sconde e cosnan aki pa sabinan y inteligentenan y a revela nan na mucha chikito.” (Mateo 11:25) Yehova a laga revela su propositonan na esnan cu tin un curason sinsero y humilde. (1 Corintionan 1:26-28) Pues, un caracteristica principal di e berdad di Bijbel ta cu e ta simpel.

⁵ Ora bo ta conduci un studio di Bijbel of ta rebishita un persona interesa, con bo por siñ’e na un manera simpel? Wel, kico nos a siña for di e Gran Maestro? Hesus a uza un idioma simpel cu nan por a capta, pa garantisa cu tur esnan cu a scuch’e por a comprend’e, pasobra hopi di nan no tawata “educa ni siña.” (Echonan 4:13) Pa nos por siña otro hende di un manera simpel anto, nos mester cuminsa na tene cuenta cu nos vocabulario. Nos no tin nodi uza palabra of frase cu ta zona impresionante pa por combence otro hende di e berdad di e  Palabra di Dios. Un papia ‘extrabagante’ por intimida otro hende, specialmente esnan cu no tin mucho scol of capasidad. (1 Corintionan 2:1, 2, NW) Hesus su ehempel ta mustra cu palabranan simpel y bon scohi por transmiti e berdad di un manera combencente.

6. Con nos por evita di yena un studiante di Bijbel cu demasiado informacion?

⁶ Siña na un manera simpel ta encera tambe cu nos tin cu tene cuidou pa no yena e studiante di Bijbel cu demasiado informacion. Hesus a tene cuenta cu e limitacionnan di su disipelnan. (Huan 16:12) Nos tambe tin cu tene cuenta cu e studiante. Por ehempel, ora di conduci un studio den e buki Conocimentu cu Ta Hiba na Bida Eterno, nos no tin nodi splica tur detaye. * No ta necesario tampoco pa pasa lihe riba e informacion, como si fuera e cos importante ta pa trata mas tanto paragraf posibel. Mas bien, ta sabi pa adapta e velosidad di e studio na e necesidad y capasidad di e studiante. Nos meta ta pa yuda e studiante bira un disipel di Cristo y un adorado di Yehova. Nos tin cu tuma tur e tempo necesario pa yuda e studiante interesa comprende claramente kico e ta siñando. Asina, e berdad por touch su curason y motiv’e na accion.—Romanonan 12:2.

7. Ki sugerencianan por yuda nos siña otro hende na un manera simpel ora nos ta duna discurso den congregacion?

⁷ Ora nos ta duna discurso den congregacion, specialmente ora tin personanan nobo den auditorio, con nos por papia cosnan cu ta facil pa ‘comprende’? (1 Corintionan 14:9) At’aki tres sugerencia cu por yuda. Di prome, splica expresionnan desconoci cu bo tin cu uza. Nos comprendemento di e Palabra di Dios a duna nos un vocabulario unico. Si nos uza expresionnan manera “e esclabo fiel y prudente”, “otro carnenan”, y “Babilonia e Grandi”, nos lo tin cu splica nan cu frasenan simpel cu ta clarifica cada uno. Di dos, evita di uza mucho palabra. Demasiado palabra y frasenan mucho complica por pone e auditorio perde interes. Nos discurso ta bira mas cla ora nos saca e palabranan y frasenan innecesario afo. Di tres, no purba cubri demasiado material. Den nos investigacion nos lo por topa hopi detaye interesante. Pero ta miho organisa e material den un par di punto principal, uzando solamente e informacion cu ta yuda proba e puntonan ei y cu por ser desaroya claramente den e tempo asigna.

Uzo Eficas di Pregunta

8, 9. Con nos por scohe un pregunta cu ta adapta na interes di e doño di cas? Duna ehempel.

⁸ Corda cu Hesus tawata un experto den haci pregunta pa laga su disipelnan expresa loke nan tawatin na mente y pa stimula nan y entrena nan manera di pensa. Cu su preguntanan, Hesus a alcansa y motiva nan curason na un manera bondadoso. (Mateo 16:13, 15; Huan 11:26) Con nos por haci uzo eficas di pregunta, mescos cu Hesus?

⁹ Ora nos ta predica di cas pa cas, nos por haci pregunta pa lanta interes, preparando e caminda pa nos papia tocante e Reino di Dios. Con nos por scohe un pregunta cu ta adapta na interes di e doño di cas? Ser un bon observado. Ora bo ta acerca un cas, wak kico tin rond di e cas. Tin co’i hunga den cura, loke ta indica cu tin mucha ta biba na e cas? Si ta asina, nos lo por puntra e doño di cas: ‘Bo a yega di puntra bo  mes con mundo lo ta ora bo yiunan bira grandi?’ (Salmo 37:10, 11) Tin varios slot riba e porta dilanti, of tin un sistema di siguridad? Nos lo por puntra: ‘Bo ta kere cu lo yega e dia ora hende manera ami cu bo por sinti nos mes sigur den nos cas y riba caya?’ (Mikeas 4:3, 4) Tin un subida pa rolstul? E ora ei nos por puntra: ‘Lo yega un dia ora tur hende na bida lo gosa di bon salu?’ (Isaias 33:24) Bo por haya hopi sugerencia den e foyeto Con pa Cuminsá i Continuá Consideracionnan Bíblico, pagina 2-7. *

10. Con nos por uza pregunta pa “saca” loke e studiante di Bijbel tin den su mente y curason, pero kico nos tin cu corda?

¹⁰ Con nos por haci bon uzo di pregunta ora di conduci studio di Bijbel? Nos si no por lesa curason manera Hesus. Sinembargo, pregunta cu tacto pero bon dirigi por yuda nos “saca” loke tin den e studiante su mente y curason. (Proverbionan 20:5) Por ehempel, supone cu nos ta studiando e capitulo “Pakico Hibando un Bida Piadoso Ta Trece Felicidad”, den e buki Conocimentu. E ta duna Dios su punto di bista riba deshonrades, fornicacion y otro asuntonan. Kisas e studiante ta contesta e pregunta riba e paragraf corectamente, pero e ta di acuerdo cu loke e ta siñando? Nos lo por puntra: ‘Yehova su punto di bista riba e asunto ei ta parce bo rasonabel?’ ‘Con bo por aplica e principionan di Bijbel aki den bo bida?’ Pero corda cu bo mester ta respetuoso, y trata e studiante cu dignidad. Nos lo no kier haci pregunta cu ta humilia e studiante di Bijbel of pon’e sinti berguensa.—Proverbionan 12:18.

11. Den ki maneranan oradonan publico por haci bon uzo di pregunta?

¹¹ Discursantenan publico tambe por haci bon uzo di pregunta. Pregunta retorico—pregunta cu e auditorio no tin nodi contesta na bos halto—por yuda esnan presente pensa y rasona. Hesus a haci e tipo di preguntanan ei algun biaha. (Mateo 11:7-9) Ademas, despues di e comentarionan di introduccion, un orado lo por haci pregunta pa resalta e puntonan importante cu lo e bai trata. Lo e por bisa: “Den nos consideracion djawe, nos lo bai haya contesta riba e siguiente preguntanan . . .” Anto, na conclusion, lo e por referi na e preguntanan ei pa repasa e puntonan principal.

12. Duna un ehempel cu ta mustra con ancianonan cristian por uza pregunta pa yuda un compañero di adoracion haya consuelo for di e Palabra di Dios.

¹² Den nan trabou di pastoreo, ancianonan cristian por uza pregunta pa yuda un ruman “cu ta falta animo” haya consuelo for di e Palabra di Yehova. (1 Tesalonicensenan 5:14) Por ehempel, pa yuda un ruman cu ta sinti su mes deprimi, un anciano lo por dirigi atencion na Salmo 34:18. E ta bisa: “SEÑOR ta serca di e hende di curason kibra, y ta salba esnan di spirito abati.” Pa haci sigur cu e ruman desanima ta comprende cu esaki ta conta pa e tambe, e anciano lo por puntr’e: ‘Serca di ken Yehova ta? Abo sa sinti bo “kibra” y “abati”? Si Yehova ta serca di hende asina manera Bijbel ta bisa, esei no ta nifica cu e ta serca di bo tambe?’ Un rasonamento tierno asina lo por trankilisa esun cu ta abati, y rebiba su spirito.—Isaias 57:15.

Rasonamento Logico

13, 14. (a) Con nos por rasona cu un persona cu ta bisa cu e no ta kere den un Dios cu e no por mira? (b) Pakico nos no mester spera cu tur hende lo keda combenci?

¹³ Den nos ministerio, nos kier alcansa  curason cu rasonamento sano y combencente. (Echonan 19:8; 28:23, 24) Esei ta nifica cu nos tin cu cuminsa rasona na un manera sofistica pa por combence otronan tocante e berdad di e Palabra di Dios? Sigur cu no. Un rasonamento no tin nodi ta complica pa e ta corecto. Argumento logico presenta den un manera simpel hopi bes ta mas eficas. Wak un ehempel aki.

¹⁴ Con nos lo por contesta un hende cu ta bisa cu e no ta kere den un Dios cu e no por mira? Nos por rasona cu ne riba e lei di naturalesa di causa y efecto. Ora nos observa un efecto, nos ta acepta cu mester tin un causa. Nos lo por bisa: ‘Supone cu bo ta den un area completamente bandona y bo topa un cas bon construi yen di comestibel (efecto), lo bo acepta mesora cu un hende (causa) a traha e cas ei y yena su cashinan di cushina. Asina tambe, ora nos mira e diseño bisto den naturalesa y e abundancia di alimento den e “cashinan” (efecto) di tera, no ta logico pa acepta cu ta un Persona (causa) a percura pa esei?’ Bijbel ta bisa bon cla: “Esun cu a traha tur cos ta Dios.” (Hebreonan 3:4) Sinembargo, maske con sano nos rasonamento por ta, lo e no combence tur hende. Bijbel ta corda nos cu ta solamente esnan cu ta “corectamente dispuesto” lo bira creyente.—Echonan 13:48, NW; 2 Tesalonicensenan 3:2.

15. Con asina nos por rasona pa resalta Yehova su cualidadnan y manera di haci cosnan, y ki dos ehempel ta demostra con nos por rasona den e forma ei?

¹⁵ Ora nos ta siña otro hende, sea den sirbishi di veld of den congregacion, nos por uza rasonamento logico pa resalta Yehova su cualidadnan y manera di haci cosnan. Particularmente eficas ta e manera cu Hesus a yega di rasona cu e palabranan ‘cuanto mas.’ (Lucas 11:13; 12:24) Ora nos kier mustra un contraste entre dos cos, e tipo di rasonamento aki por haci un impresion profundo riba hende. Pa mustra con ilogico e doctrina di fierno ta, nos lo por bisa: ‘Niun tata amoroso lo castiga su yiu door di hinca man di su yiu den un candela. Cuanto mas e idea so di un candela di fierno ta repugnante pa nos amoroso Tata celestial! (Yeremias 7:31) Pa mustra cu Yehova ta interesa den cada un di su sirbidonan personalmente, nos lo por bisa: ‘Si Yehova conoce cada un di e miles di miyones di streya pa nomber, cuanto mas lo E no ta interesa den hende cu ta stim’e y cu a ser cumpra cu e sanger precioso di su Yiu!’ (Isaias 40:26; Echonan 20:28) E tipo di rasonamento combencente ei por yuda nos alcansa curason di otro hende.

Comparacion Adecua

16. Pakico comparacion ta un metodo di siñansa balioso?

¹⁶ Un bon comparacion ta manera specerij cu por haci nos manera di siña otro hende mas apetitoso. Pakico comparacion ta un metodo di siñansa balioso? Un educado a remarca: “E capasidad di pensa den forma abstracto [sin yudansa di ehempel] ta un di e logronan humano di mas dificil.” Ilustracionnan y comparacionnan ta graba cuadronan significativo den nos mente y ta yuda nos capta ideanan nobo mas plenamente. Hesus a sobresali cu su comparacionnan. (Marco 4:33, 34) Laga nos considera con nos por haci uzo di e metodo di siñansa aki.

17. Cua ta e cuater factornan cu ta haci un comparacion eficas?

¹⁷ Kico ta haci un comparacion eficas? Di prome, e mester pas pa nos auditorio y uza sircunstancianan cu nos oyentenan por comprende mesora. Nos por corda con Hesus a basa hopi di su comparacionnan riba cosnan di tur dia di esnan cu a scuch’e. Di dos, un comparacion mester cuadra rasonablemente cu e punto cu ta ser splica. Si e comparacion no ta mucho adecua, ta stroba so e por stroba e oyentenan di capta e punto. Di tres, un comparacion no mester inclui demasiado detaye. Corda con Hesus a duna e detayenan necesario pero a omiti esnan no esencial. Di cuater, ora nos ta trece un comparacion, nos mester haci sigur di splica con e ta aplica. Di otro manera, algun oyente lo no capta e punto.

18. Kico ta un comparacion adecua?

 ¹⁸ Kico ta un comparacion adecua? Nos no tin nodi bini cu un historia largo y complica. Un comparacion cortico por ta masha eficas. Simplemente purba pensa riba ehempelnan di e punto cu nos ta tratando. Por ehempel, supone cu nos ta papiando riba e tema di cu Yehova ta un Dios cu ta pordona, y nos kier ilustra e punto na Echonan 3:19, caminda e ta bisa cu Yehova ta ‘kita’ of limpia nos erornan. E palabra ‘kita’ mes caba ta transmiti e idea hopi cla, pero ki ehempel concreto nos por uza pa ilustra e punto? Un gum, un spons? Nos lo por bisa: ‘Ora Yehova ta pordona nos picanan, ta como si fuera e ta limpia nan cu un spons (of un gum) kita afo.’ Cu un comparacion simpel asina, e oyentenan no por keda sin capta e punto.

19, 20. (a) Unda nos por haya bon comparacion? (b) Duna algun ehempel di comparacionnan eficas cu a ser publica den nos literatura. (Mira e cuadro tambe.)

¹⁹ Unda bo por haya un comparacion adecua, incluso ehempelnan di bida real? Busca nan den bo mes bida of den e bida y experencianan di bo compañeronan di creencia. Hopi cos por sirbi como fuente di comparacion, manera cos bibo, obhetonan sin bida, articulo di cas, of un suseso actual bon conoci den comunidad. Pa bo haya un bon ilustracion, bo mester ta semper alerta, y “observa” cuidadosamente e sircunstancianan di tur dia rond di nos. (Echonan 17:22, 23) Un obra di referencia riba e arte di papia den publico ta splica: “E orado cu ta observa bida di hende y su varios ocupacionnan, cu ta papia cu tur tipo di hende, cu ta analisa cosnan cuidadosamente y cu ta haci pregunta te ora e comprende nan, lo acumula hopi informacion cu lo e por uza como material di comparacion cu lo ta util p’e ora e mester di nan.”

²⁰ Otro fuente rico di bon comparacion ta E Toren di Vigilancia, Spierta! y otro literatura produci door di Testigonan di Yehova. Bo por siña masha hopi door di observa con e publicacionnan aki ta haci uzo di comparacion of ilustracion. * Tuma por ehempel e comparacion cu bo por haya den paragraf 11 di capitulo 17 den e buki Conocimentu. E ta compara e distinto personalidadnan den congregacion cu e variedad di vehiculonan cu ta core hunto cu bo riba caminda. Kico ta haci e comparacion ei eficas? Ripara cu e ta basa riba un sircunstancia di tur dia, e ta cuadra rasonablemente cu e punto cu ta ser splica, y su aplicacion no ta laga duda. Nos lo por uza comparacionnan publica ora nos ta siña otro hende, talbes door di adapta nan na e necesidadnan di un studiante di Bijbel of door di cambia nan un poco pa nos uza den un discurso.

21. Ki recompensa un bon maestro di e Palabra di Dios ta ricibi?

²¹ Un bon maestro ta haya gran recompensa. Ora nos ta siña, nos ta comparti cu otro; nos ta duna di nos mes pa yuda nan. E dunamento ei ta trece bendicion, pasobra Bijbel ta bisa: “Ta mas bendiciona pa duna cu pa ricibi.” (Echonan 20:35) Pa maestronan di e Palabra di Dios, e bendicion ei ta e goso di sa cu nos ta dunando algo di un balor berdadero y duradero: e berdad tocante Yehova. Tambe nos por tin e satisfaccion cu nos ta imitando e Gran Maestro, Hesucristo.

[Nota]

Bo Ta Corda?

• Con nos por siña di un manera simpel ora di conduci un studio di Bijbel y ora di duna discurso den congregacion?

• Con nos por haci uzo eficas di pregunta ora di predica di cas pa cas?

• Con nos lo por uza rasonamento logico pa resalta Yehova su cualidadnan y su manera di trata?

• Unda nos por haya bon comparacion?

[Preguntanan di Estudio]

 [Cuadro/Plachi na pagina 23]

Bo Ta Corda e Comparacionnan Aki?

Aki ta sigui djis un par di comparacion eficas. Pakico bo no ta busca e referencia y tuma nota con e comparacion a yuda enfatisa e punto cu ta ser considera?

• Mescos cu un pareha ta schaats hunto suavemente riba un pista di ijs, esun cu kier forma un bon matrimonio ta depende principalmente di un bon partner.—E Toren di Vigilancia, 15 di mei 2001, pagina 16.

• Ora bo ta expresa bo sintimentonan ta mescos cu ora bo ta tira un bala. Bo por tir’e suavemente of bo por tir’e asina duro cu e ta lesiona bo partner.—Spierta!, 8 di januari 2001, pagina 10.

• Siña mustra amor ta mescos cu siña un idioma nobo.—E Toren di Vigilancia, 15 di februari 1999, pagina 18, 22-3.

• Imagina cu bo ta sufri di un enfermedad cu sigur lo caba cu bo bida a menos cu bo opera. Con lo bo sinti bo si e gastonan di operacion ta hopi mas halto cu loke bo por paga? Kico si asta tur e recursonan combina di bo famia y amigonan no por pag’e? Ta frustrante pa haya bo confronta cu un dilema asina den cua bo bida ta na peliger!—E Toren di Vigilancia, 15 di februari 1999, pagina 13.

• Spiritismo ta haci pa demoñonan loke as ta haci pa yagdo: E ta atrae nan victima.—Conocimentu cu Ta Hiba na Bida Eterno, pagina 111.

• Nos por compara e manera cu Hesus ta rescata desendiente di Adam cu un benefactor rico cu ta cansela debe di un compania (ocasiona pa un gerente deshonesto) y ta bolbe habri e fabrica pa e beneficio di su tantisimo empleadonan.—E Toren di Vigilancia, na Spaño di 15 di februari 1991, pagina 13.

• Mescos cu un amante di arte lo haci tur su esfuerso pa e drecha un obra di arte daña, Yehova por pasa por halto di nos imperfeccionnan, mira e bon den nos y cu tempo duna nos e posicion perfecto cu Adam a pone nos perde.—E Toren di Vigilancia, na Spaño di 15 di februari 1990, pagina 22.

[Plachi na pagina 20]

Cristiannan berdadero ta maestronan di e Palabra di Dios

[Plachi na pagina 21]

Ancianonan por uza pregunta pa yuda un compañero di adoracion haya consuelo for di e Palabra di Dios