Storia di Bida

“Lo Mi No Cambia Nada!”

SEGUN E RELATO DI GLADYS ALLEN

Tin bes hende sa puntra mi: “Si bo mester biba di nobo, kico lo bo cambia?” Ami por contesta nan francamente: “Lo mi no cambia nada!” Laga mi splica dicon mi ta pensa asina.

DEN zomer di 1929, tempo mi tawatin dos aña di edad, algo maravioso a pasa cu mi tata, Matthew Allen. El a haya e foyeto chikito Miyones na Bida Awor Lo No Muri Nunca!, publica door di Studiantenan Internacional di Bijbel, manera Testigonan di Yehova tawata conoci e tempo ei. Tata a cuminsa les’e ansiosamente. Y despues di djis un par di pagina, el a grita: “Esaki ta e miho cos cu mi a yega di lesa!”

Poco despues di esei Tata a haya otro publicacionnan di e Studiantenan di Bijbel. Mesora el a cuminsa conta tur e biciñanan loke e tawata siña. Sinembargo, den e area di cunucu caminda nos tawata biba no tawatin congregacion di Testigonan di Yehova. Door cu Tata a mira cu asociacion cristian regular ta un necesidad, na 1935 nos famia a muda bai Orangeville, Ontario, Canada, pasobra einan tawatin un congregacion.

E tempo ei, nan no tawata anima e muchanan tur biaha pa asisti na reunionnan di congregacion; por lo general nan tawata keda pafo di e luga di reunion y hunga te ora e adultonan caba. Tata no a gusta esaki. El a pensa: “Si e reunionnan ta bon pa mi, nan ta bon pa mi yiunan tambe.” Pues, aunke Tata tawata nobo na e congregacion, el a instrui mi ruman homber Bob, mi ruman mohenan Ella cu Ruby y ami pa join e adultonan na e reunionnan, y nos a haci esei. No a dura masha cu yiunan di otro Testigonan tambe a cuminsa sinta paden.  Asistencia y participacion na e reunionnan a bira un parti hopi importante di nos bida.

Tata tawata stima Bijbel y tawata un delicia pa tend’e conta historianan di Bijbel na un manera bibo. Cu esakinan el a impresiona nos curasonnan hoben cu lesnan vital, y ainda mi tin grato recuerdo di esakinan. Un di nan ta cu Yehova ta bendiciona hende cu ta obedec’e.

Tambe Tata a siña nos uza Bijbel pa defende nos fe. E tawata train nos pa haci esei door di bisa den wega: “Mi ta kere cu ora mi muri, mi ta bai shelo. Awor boso proba mi cu no ta asina.” Ami cu Rubi tawata bai den e concordancia y busca textonan cu nos por uza pa mustra cu e siñansa ei ta falso. Despues cu nos a lesa e textonan cu nos a haya, Tata tawata bisa: “Interesante, pero ainda mi no ta combenci.” Ata nos ta busca den concordancia atrobe. Hopi bes esaki por a sigui pa oranan largo te ora cu Tata a keda satisfecho cu e contestanan cu nos a dun’e. Esaki a pone cu ami cu Ruby tawata bon prepara pa splica nos creencianan y defende nos fe.

Mi A Vence Miedo di Hende

Apesar di e excelente entrenamento cu mi a ricibi na cas y na e reunionnan di congregacion, mi tin cu admiti cu tin rasgonan di e bida cristian cu tawata un reto pa mi. Mescos cu hopi hoben, mi no tawata gusta pa ta diferente for di otronan, specialmente di mi compañeronan di klas. Un di e prome pruebanan di mi fe tawatin di aber cu loke nos tawata yama marcha di informacion.

E idea tawata pa un grupo di ruman cana trankil door di e cayanan principal di e stad, cu borchi cu lema skirbi riba nan. Den nos pueblo di mas o menos 3.000 habitante, tur hende tawata conoce otro. Durante un marcha di informacion mi tawata cana na final di e grupo cu un borchi cu a bisa: “Religion Ta un Trampa y un Fraude.” Algun di mi compañeronan di scol a mira mi y mesora nan a cuminsa cana mi tras y canta e himno di Canada: “Dios Salba Rei.” Con mi a trata cu e asunto aki? Mi a haci oracion ferviente pa Dios duna mi forsa pa sigui den e marcha. Ora cu por fin e marcha a caba, mi a core bai Salon di Reino pa entrega mi borchi y bai cas. Sinembargo, e ruman na encargo a bisa mi cu un otro marcha ta bai cuminsa y cu nan tawatin mester di un hende mas pa carga un borchi. Pues, mi a sali atrobe haciendo oracion mas ferviente cu nunca. Sinembargo, e biaha aki mi coleganan di scol a cansa y nan a bai cas. Mi oracionnan pa yudansa a bira mas bien oracionnan di gradicimento!—Proverbionan 3:5.

Sirbidonan di tempo completo semper tawata bon bini na nos cas. Nan tawata un grupo di hende felis y placentero pa trata cu ne. Te asina leu cu mi ta corda, mi mayornan semper a laga nos cu ta yiu comprende cu sirbishi di tempo completo ta e miho carera cu nos por scohe.

Door di nan animacion, mi a cuminsa mi carera den e sirbishi di tempo completo na 1945. Despues mi a join mi ruman mohe Ella, kende tawata traha pionero na Londen, Ontario. Einan mi a conoce un rasgo di sirbishi cu mi a pensa cu nunca lo mi por a haci. E rumannan tawata bai di mesa pa mesa den e barnan local y ofrece e clientenan ehemplarnan di E Toren di Vigilancia y Consuelo (awor Spierta!). Ta bon cu e trabou aki tawata tuma luga riba diasabra atardi,  asina ei mi tawatin henter un siman pa resa pidi Dios curashi pa mi bai! No, e trabou ei no tawata facil pa mi, pero el a duna hopi satisfaccion.

Di otro banda, tambe mi a siña con pa laga edicionnan special di Consuelo cu a trata e persecucion cu nos rumannan tawata confronta den camponan di consentracion Nazi. Nos a laga esakinan specialmente serca comerciantenan Canades importante, incluso directornan di empresanan grandi. Atrabes di añanan mi a sinti cu Yehova semper ta apoya nos, basta nos ta depende riba dje pa haya fortalesa. Manera Tata tawata bisa, Yehova ta bendiciona hende cu ta obedec’e.

Mi A Acepta e Invitacion pa Sirbi na Quebec

Dia 4 di juli 1940, gobierno a prohibi e trabou di Testigonan di Yehova na Canada. Despues nan a kita e prohibicion, pero nos a sigui haya nos cu persecucion den e provincia Catolico Romano Quebec. Pa hala atencion riba e maltrato cu nos rumannan tawata ricibi einan, nos a cuminsa un campaña cu un tratado cu a denuncia esei fuertemente. Tema di e tratado tawata Quebec Su Odio Ardiente Contra Dios y Cristo y Libertad Ta un Berguensa pa Canada Completo. Nathan H. Knorr, miembro di e Cuerpo Gobernante di Testigonan di Yehova, a reuni cu cientos di pionero den e stad di Montreal pa splica nos ki consecuencianan loke nos ta bai haci lo por trece cu ne. Ruman Knorr a bisa nos cu si nos bai di acuerdo pa participa den e campaña, nos tin cu spera cu nan lo aresta nos y sera nos den prizon. Y ta esei mes a sosode tambe! Durante e tempo ei, nan a aresta mi 15 biaha. Ora nos a sali den sirbishi di veld nos tawata haci sigur di bai cu nos skeiro di djente y peña pa por si acaso nos mester a pasa anochi den prizon.

Na principio nos tawata haci gran parti di nos trabou anochi pa hala menos atencion posibel. Mi tawata bai cu un suministro extra di tratado den un tas cu mi a colga na mi garganta bou di mi jas. Ora e tas tawata yen di tratado e tawata keda bol y laga mi parce hende na estado. Esei a cumbini mi ora mi a drenta un bus yen di hende pa bai un teritorio. Varios bes cabayeronan cu bon manera a lanta for di nan stul pa laga e señora “na estado” sinta.

Segun cu tempo tawata pasa, nos a cuminsa cu e trabou di plama tratado durante dia. Nos tawata laga tratado na tres of cuater cas y despues nos tawata bai un otro teritorio. Generalmente e sistema aki tawata funciona bon. Sinembargo, si un pasto di e parokia a haya sa cu nos tawata den e area, nos por a spera problema. Na un ocasion, un pasto a instiga un grupo di 50 pa 60 adulto y mucha pa tira nos cu tomati y webo. Nos a bai sconde den cas di un ruman mohe cristian caminda nos a drumi anochi riba flur.

Na december 1958 ami cu mi ruman mohe Ruby a cuminsa siña Frances pasobra na Quebec tawatin un gran necesidad pa pionero pa predica na hende di abla Frances. Despues di esei nos a ser asigna na varios area den e provincia caminda e hendenan tawata papia Frances. Cada asignacion tawata un experencia unico. Tawatin un teritorio cu nos a bai di cas pa cas ocho ora pa dia pa dos aña largo, sin cu ningun hende a tende nos! E hendenan tawata djis bin wak ken ta na porta y despues sera nan cortinanan. Pero nos no a entrega. Awendia tin dos congregacion floreciendo den e pueblo ei.

Yehova A Sostene Nos den Tur Manera

Nos a cuminsa traha pionero special na 1965. Un asignacion cu nos tawatin como pionero special a yuda nos comprende plenamente e palabranan di Pablo, registra na 1 Timoteo 6:8, cu ta bisa: “Si nos tin cuminda y paña pa bisti, cu esakinan nos mester ta contento.” Nos mester a sigui un presupuesto stricto pa nos por a cubri nos gastonan. Pesei nos tawata aparta e cen pa paga verwarming, huur, coriente y cuminda. Ora nos caba di kita tur eseinan nos ta keda cu 45 cen pa gasta e resto di e luna si nos tawata kier.

Debi na nos fondonan limita, nos por paga pa nos cas ta cayente pa solamente un par di ora  anochi. Pues, nos camber nunca no tawata mas cayente cu 15° Celsius y hopi bes e tawata hopi mas friu. Un dia, yiu homber di un studiante di Ruby a bin bishita nos. Ora el a bai cas lo e mester a bisa su mama cu friu ta mata nos, pasobra desde e dia ei su mama tawata manda 18 florin tur luna pa nos cumpra azeta asina nos por a laga e verwarming keda sendi tur ora. Di ningun manera nos no a sinti falta di nada. Nos no tawata rico, pero semper nos tawatin e cosnan necesario. Nos a considera tur cos extra como un bendicion. Ki cierto ta e palabranan di Salmo 37:25: “Nunca mi no a mira e husto desampara, ni su desendientenan ta pidi pan”!

Apesar di e oposicion cu nos a confronta, mi tawatin e placer di mira un cantidad di hende cu mi a studia Bijbel cu ne haya un conocemento di e berdad. Algun di nan a scohe e sirbishi di tempo completo como nan carera, y esaki a duna mi un goso special.

Enfrentando Pruebanan Nobo cu Exito

Na 1970, Cornwall, Ontario, a bira nos asignacion nobo. Rond di un aña despues cu nos a yega Cornwall, Mama a bira malo. Tata a muri na 1957, y beurt pa beurt ami cu mi ruman mohenan tawata cuida Mama te dia cu el a muri na 1972. Nos partnernan den e trabou di pionero special, Ella Lisitza y Ann Kowalenko, a yuda nos para firme y a apoya nos cu hopi amor durante e tempo ei. Nan a percura pa nos studionan di Bijbel y otro responsabilidadnan durante nos ausencia. E palabranan di Proverbionan 18:24: “Tin un amigo cu ta mas pega cu un ruman”, ta masha cierto!

En berdad bida ta yen di reto. Pero cu Yehova su yudansa amoroso mi por a enfrenta nan. Ainda mi ta gosa di ta den e sirbishi di tempo completo. Bob, kende a muri na 1993, a traha mas cu 20 aña como pionero, di esakinan el a traha 10 aña precioso hunto cu su casa Doll. Mi ruman mohe mayo, Ella, cu a muri na october 1998, a traha pionero pa mas cu 30 aña y semper el a mantene su spirito di pionero. Na 1991, docter a bisa mi otro ruman mohe Ruby cu e tin cancer. Toch, el a uza su forsa limita pa predica e bon nobo. Tambe el a mantene su sentido di humor te e mainta di 26 di september 1999, dia cu el a muri. Aunke mi no tin mi ruman mohenan mas, mi tin un famia di ruman  homber y mohe spiritual pa yuda mi mantene mi sentido di humor.

Si mi pensa riba e manera cu mi bida a bai, kico lo mi cambia? Nunca mi no a casa, pero mi a ser bendiciona cu mayornan amoroso, un ruman homber y ruman mohenan cu a pone e berdad na prome luga den nan bida. Mi ta anhela e tempo cu lo mi mira nan tur pronto ora nan resusita. Ya caba mi por sinti con Tata ta primi mi den su brasa y mi por imagina mi mama su lagrimanan ora nos ta duna otro un abraso fuerte. Ella, Ruby y Bob lo ta loco di alegria.

Mientrastanto, mi ta dicidido pa sigui uza e salu y energia cu mi a sobra pa duna honor y alabansa na Yehova. E sirbishi di pionero di tempo completo ta un bida maravioso y satisfaciente. Ta net manera e salmista a bisa relaciona cu esnan cu ta cana den e camindanan di Yehova: “Lo bo ta felis y lo bai bo bon.”—Salmo 128:1, 2.

[Plachi na pagina 26]

Tata a stima Bijbel y el a siña nos uz’e pa defende nos fe

[Plachi na pagina 28]

Di robes pa drechi: Ruby, ami, Bob, Ella, Mama y Tata na 1947

[Plachi na pagina 28]

Rei dilanti, di robes pa drechi: Ami, Ruby y Ella na un Congreso di Districto, 1998