“Nunca un Hende No A Papia Manera e Homber Aki”

“Tur tawata duna bon testimonio di dje, y tawata keda straña di e palabranan agradabel cu tawata sali for di su boca.”—LUCAS 4:22.

1, 2. (a) Pakico e oficialnan cu a ser manda pa aresta Hesus a regresa man bashi? (b) Kico ta mustra cu no ta e oficialnan so a keda impresiona cu Hesus su manera di siña?

E OFICIALNAN no a cumpli cu nan encargo. Nan mester a aresta Hesucristo, pero a regresa man bashi. E sacerdotenan principal y e Farizeonan a exigi un splicacion: “Pakico boso no a trec’e?” Berdad, pakico e oficialnan no a aresta un homber cu no a ofrece ningun resistencia fisico? E oficialnan a splica: “Nunca un hende no a papia manera e homber aki.” Nan a keda asina impresiona cu Hesus su manera di siña cu nan no tawata sa di unda pa saca e curashi pa aresta e homber pacifico aki. *—Huan 7:32, 45, 46.

² No ta e oficialnan ei so a keda impresiona cu Hesus su manera di siña. Bijbel ta bisa nos cu masha hopi hende tawata bini djis pa tend’e papia. “E palabranan agradabel cu tawata sali for di su boca” a straña e hendenan di su stad natal. (Lucas 4:22) Varios biaha el a papia for di un boto cu multitud di hende cu a bini hunto na oriya di Lama di Galilea. (Marco 3:9; 4:1; Lucas 5:1-3) Na un ocasion, “un multitud grandi” a keda un par di dia serca dje, asta sin bai cas pa come.—Marco 8:1, 2.

3. Kico tawata e motibo principal cu Hesus tawata un maestro asina sobresaliente?

³ Kico a haci Hesus un maestro sobresaliente? Amor tawata e motibo principal. * Hesus a stima e berdadnan cu el a trece dilanti, y el a stima e hendenan cu el a siña. Pero tambe Hesus tawatin un habilidad extraordinario di uza metodonan eficas pa siña otro hende. Den e articulonan di studio den e edicion aki, nos lo trata algun di e metodonan eficas cu el a uza, y con nos por imita nan.

Simpel y Cla

4, 5. (a) Pakico Hesus a uza lenguahe cla den su siñansa, y pakico esei ta remarcabel? (b) Con e Sermon Riba Sero ta un ehempel di e manera simpel cu Hesus a siña hende?

⁴ Hende cu hopi educacion gusta uza lenguahe cu nan oyentenan no por comprende. Pero si otro hende no comprende nos bon, con nan por beneficia di nos conocemento? Como maestro, nunca Hesus a uza lenguahe cu otro hende no por a comprende. Djis imagina e vocabulario extenso cu lo e por a uza. Toch, apesar di su conocemento amplio, el a pensa riba su oyentenan, no riba su mes. E tawata sa cu hopi di nan no tawata “educa ni siña.” (Echonan 4:13) Pa su  mensahe por a alcansa nan, el a uza lenguahe cu e hendenan ei por a comprende. Kisas e palabranan tawata simpel, pero e berdadnan cu nan a transmiti tawata profundo.

⁵ Tuma por ehempel e Sermon Riba Sero na Mateo 5:3–7:27. Hesus lo no a tuma mucho mas cu 20 minuut pa duna e sermon ei. Pero, su siñansanan ta profundo; nan ta yega na e raiz di asuntonan manera adulterio, diborcio y materialismo. (Mateo 5:27-32; 6:19-34) Sinembargo, no tin expresionnan complica ni extrabagante den dje. Eigenlijk, cualkier mucha lo por a comprende casi tur palabra mesora! Nada straño anto cu ora el a caba, e multitudnan—cu probablemente a inclui hopi cunukero, wardado di carne y piscado—“a keda asombra di su siñansa”!—Mateo 7:28.

6. Duna un ehempel di cosnan simpel cu Hesus a expresa pero cu tawatin gran nificacion.

⁶ Hopi bes Hesus a uza frasenan cortico y cla pa bisa cosnan simpel pero cu tawatin gran nificacion. Di e forma ei, den un era cu no tawata imprimi buki ainda, Hesus a imprimi su mensahe permanentemente den mente y curason di su oyentenan. Tuma nota di algun ehempel: “Ningun hende no por sirbi dos shon; . . . boso no por sirbi Dios y Rikesa.” “No husga, pa boso no wordo husga.” “Na nan fruta boso lo conoce nan.” “No ta esnan cu ta salu tin mester di docter, sino esnan cu ta malo.” “Tur esnan cu saca spada lo perece pa medio di spada.” “Duna Cesar loke ta di Cesar, y Dios loke ta di Dios.” “Ta mas bendiciona pa duna cu pa ricibi.” * (Mateo 6:24; 7:1, 20; 9:12; 26:52; Marco 12:17; Echonan 20:35) Te na e dia djawe, casi 2.000 aña despues cu Hesus a papia e palabranan penetrante ei, hende por corda nan facilmente.

Uzo di Pregunta

7. Pakico Hesus a haci pregunta?

⁷ Ta notabel cu Hesus tawata gusta haci pregunta. Hopi bes el a haci nan asta ora lo a tuma menos tempo pa djis bisa su oyentenan kico tawata e punto. Pakico e tawata haci pregunta anto? De bes en cuando el a haci preguntanan penetrante pa saca na cla kico tawata e motivacionnan di su oponentenan, y obliga nan di keda keto. (Mateo 12:24-30; 21:23-27; 22:41-46) Sinembargo, na  hopi ocasion Hesus a tuma tempo pa haci pregunta pa transmiti berdadnan, pa laga su oyentenan expresa kico nan tawatin den nan curason, y pa stimula y entrena su disipelnan pa pensa. Laga nos analisa dos ehempel cu tawatin di aber cu apostel Pedro.

8, 9. Con Hesus a haci uzo di pregunta pa yuda Pedro yega na e conclusion corecto riba e asunto di paga e belasting di tempel?

⁸ E prome tawata na e ocasion cu cobradonan di belasting a puntra Pedro si Hesus tawata paga belasting di tempel. * Sin busca drechi, manera Pedro sa haci mas biaha, el a contesta: “Si.” Sinembargo, un rato despues, Hesus a rasona cu ne: “‘Kico bo ta pensa, Simon? Ken e reinan di tera ta cobra tributo of belasting: nan yiu hombernan of stranheronan?’ Ora Pedro a contesta: ‘Stranheronan’, Hesus a bis’e: ‘Kiermen e yiunan ta liber [di belasting] anto.’” (Mateo 17:24-27) Cu e preguntanan aki, Pedro lo mester a comprende bon cla kico Hesus tawata kiermen. Pakico?

⁹ Den tempo di Hesus, tur hende tawata sa cu miembro di famia di reinan tawata liber di belasting. Pues, como e Yiu unigenito di e Rei celestial cu hende a adora na e tempel, Hesus no tawata obliga pa paga belasting. Tuma nota cu en bes di djis duna Pedro e contesta corecto, na un manera eficas pero trankil Hesus a haci uzo di pregunta pa yuda Pedro yega na e conclusion corecto—y talbes tambe el a yud’e mira e necesidad pa pensa miho prome cu e papia.

10, 11. Con Hesus a reacciona ora Pedro a kap horea di un homber kita afo riba e anochi di Pasco Hudiu di aña 33 di nos era, y con esaki ta mustra cu Hesus a mira e balor di haci pregunta?

¹⁰ E di dos ehempel ta di un incidente cu a tuma luga riba e anochi di Pasco Hudiu di aña 33 di nos era, ora un trupa di hende a bin aresta Hesus. E disipelnan a puntra Hesus si nan mester a sali na su defensa. (Lucas 22:49) Pedro no a warda riba un contesta y cu un spada el a kap horea di un homber kita afo (aunke kisas e intencion di Pedro tawata pa herid’e mas gravemente). Pedro a actua contra e boluntad di su maestro, pasobra Hesus tawata completamente cla pa entrega su mes y laga nan arest’e. Con Hesus a reacciona? Cu su pasenshi di semper, el a haci Pedro tres pregunta: “E copa cu mi Tata a duna mi, lo mi no beb’e?” “Bo ta kere cu mi no por pidi mi Tata, y mesora E lo pone mas cu diesdos legion di angel na mi disposicion? Con anto e Scrituranan por wordo cumpli, cu ta bisa cu t’asina mester sosode?”—Huan 18:11; Mateo 26:52-54.

¹¹ Reflexiona un rato riba e relato ei. Hesus, rondona pa un trupa rabia, tawata sa cu su morto tawata serca y cu ta e tawatin e tarea di santifica e nomber di su Tata y percura salbacion di e famia humano. Toch, na e momento ei mes el a tuma tempo pa graba berdadnan importante den mente di Pedro door di hacie  pregunta. No ta obvio cu Hesus a mira e balor di haci pregunta?

Exageracionnan Eficas

12, 13. (a) Ki otro metodo di siñansa Hesus a uza? (b) Con Hesus a exagera cosnan pa enfatisa e bobedad di critica e fayonan menor di nos rumannan?

¹² Den Hesus su ministerio, hopi bes el a haci uzo di un otro metodo eficas di siñansa. El a exagera cosnan intencionalmente cu e proposito di enfatisa un punto. Door di exagera cosnan, Hesus a crea cuadronan mental cu tawata dificil pa lubida. Laga nos considera un par di ehempel.

¹³ Den e Sermon Riba Sero, ora Hesus tawata enfatisa e necesidad pa “no husga” otro, el a bisa: “Pakico bo ta wak e stof den wowo di bo ruman, ma no ta ripara e balki cu tin den bo mes wowo?” (Mateo 7:1-3) Bo por visualisa e esena? Un persona cu gusta critica ta ofrece pa saca djis e stof for di “wowo” di su ruman. Kisas e ta pretende cu su ruman no por mira cosnan suficiente cla pa por husga di un manera aceptabel. Pero e mes tin henter un “balki”, of palo di spant pa wanta dak, cu ta strob’e di por husga na drechi. Ki un manera memorabel pa enfatisa e bobedad di critica e fayonan menor di nos rumannan siendo cu kisas nos mes ta comete fayonan grandi!

14. Pakico e palabranan di Hesus tocante sefta lebelebe y guli camel tawata un exageracion bastante impactante?

¹⁴ Na un otro ocasion, Hesus a denuncia e Farizeonan como “guiadonan ciego, cu ta sefta saca un lebelebe, y ta traga un camel.” (Mateo 23:24) Esaki tawata un exageracion bastante impactante. Pakico? E contraste entre un wimpiri [lebelebe] chikito y un camel cu tawata un di e bestianan mas grandi cu e oyentenan di Hesus a conoce, tawata impresionante. Segun calculo, lo mester di 70 miyon lebelebe pa iguala e peso di un camel promedio! Tambe, Hesus tawata sa cu e Farizeonan a sefta nan biña cu un sefta di paña. Nan a pega strictamente na lei pa no guli lebelebe y asina bira ceremonialmente impuro. Toch, figurativamente nan a manda henter un camel abou, cu tambe tawata impuro. (Levitico 11:4, 21-24) Hesus su punto tawata cla. Cu masha cuidou e Farizeonan a cumpli cu e rekisitonan mas minimo di e Lei, pero nan a neglisha e cosnan di mas peso—“husticia, misericordia y fieldad.” (Mateo 23:23) Hesus a desenmascara nan claramente pa loke nan tawata!

15. Kico ta algun les cu Hesus a siña hende door di uza exageracion?

¹⁵ Hesus a uza varios exageracion durante su ministerio. Wak algun ehempel aki. Cu e palabranan “fe manera un simiña [chikito] di mosterd” cu lo por move un sero, casi Hesus no por a haya un manera mas eficas pa enfatisa cu asta un poco fe por logra hopi. (Mateo 17:20) Un camel grandi cu ta purba preta pasa door di wowo di un hangua ta ilustra hopi bon con dificil ta pa un persona rico purba sirbi Dios mientras e kier hiba un bida materialista! (Mateo 19:24) Bo no ta keda encanta cu Hesus su comparacionnan bibo y su habilidad pa logra e efecto maximo cu un minimo di palabra?

Logica Irefutabel

16. Den ki manera Hesus a uza su inteligencia semper?

¹⁶ Cu su mente perfecto, Hesus tawata un experto den rasona cu hende na un manera logico. Toch, nunca el a haci mal uzo di e habilidad aki. Den su manera di siña, semper el a uza su inteligencia pa promove e berdad. Algun biaha el a uza logica potente pa refuta acusacionnan falso di su oponentenan religioso. Den hopi caso, el a uza rasonamento logico pa siña su disipelnan lesnan importante. Laga nos wak con Hesus a uza logica maestralmente.

17, 18. Ki logica poderoso Hesus a uza pa refuta un acusacion falso di e Farizeonan?

¹⁷ Wak ora Hesus a cura un homber posei pa demoño cu tawata ciego y no por a papia. Ora e Farizeonan a haya sa di esaki, nan a bisa:  “E homber aki ta saca demoño solamente pa medio di Beelzebub [Satanas], e prins di demoñonan.” Ripara cu e Farizeonan a admiti cu un poder sobrehumano tawata necesario pa saca Satanas su demoñonan. Sinembargo, pa e pueblo no kere den Hesus, nan a bisa cu ta Satanas a dun’e e poder ei. Pa mustra nan cu nan no a para pensa riba e implicacion logico di nan argumento, Hesus a contesta: “Tur reino cu ta dividi contra su mes ta keda ruina; y tur stad of cas cu ta dividi contra su mes lo no keda para. Y si Satanas saca Satanas afo, e ta keda dividi contra su mes; con su reino lo keda para anto?” (Mateo 12:22-26) Hesus a bisa nan na moda di papia: ‘Si ami ta, manera boso ta bisa, representante di Satanas, y ta traha contra loke Satanas a haci, e ora ei Satanas lo ta trahando contra su mes interesnan y lo cai pronto.’ Logica poderoso, no ta berdad?

¹⁸ Despues Hesus a rasona mas aleu riba e asunto aki. E tawata sa cu algun di e Farizeonan mes a saca demoño. Pesei, el a haci nan un pregunta simpel pero cu a caba cu nan argumento: “Si ami ta saca demoño pa medio di Beelzebub, ta pa medio di ken boso yiu hombernan [of disipelnan] ta saca nan?” (Mateo 12:27) Den un sentido, Hesus su argumento tawata esaki: ‘Si te na ora mes cu ta pa medio di e poder di Satanas mi ta saca demoño, anto boso disipelnan mester ta actuando bou di e mesun poder aki.’ Kico e Farizeonan por a bisa? Hamas nan lo a reconoce cu nan disipelnan tawata actua bou di poder di Satanas. Cu logica irefutabel, Hesus a mustra cu nan acusacion contra dje tawata un ridicules.

19, 20. (a) Den ki manera positivo Hesus a uza logica? (b) Con Hesus a uza e palabranan ‘cuanto mas’ den su rasonamento ora el a responde na e peticion di su disipelnan pa siña nan con pa haci oracion?

¹⁹ Ademas di uza logica pa tapa boca di su oponentenan, tambe Hesus a uza argumentonan persuasivo pa instrui berdadnan positivo y alentador tocante Yehova. Hopi bes, el a uza e palabranan ‘cuanto mas’ den su rasonamento pa yuda su oyentenan combence nan mes di algo pa medio di un berdad cu nan tawata conoce caba. Laga nos analisa djis dos ehempel.

²⁰ Ora Hesus a contesta e peticion di su disipelnan pa siña nan con pa haci oracion, el a conta e ilustracion di un homber cu door di ‘persisti’ [NW] finalmente a combence un amigo cu no tawata mucho dispuesto pa toch cumpli cu su peticion. Tambe Hesus a mustra con mayornan ta dispuesto pa “duna cosnan bon” na nan yiunan. Despues el a conclui: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” (Lucas 11:1-13) Hesus su punto no tawata pa mustra cu Dios ta mescos cu hende. Mas bien, su rasonamento ta basa riba e gran diferencia cu ta existi entre Dios y nos. Si un persona por combence un amigo pa yud’e maske e no tin gana, y si mayornan humano imperfecto ta cumpli cu e necesidadnan di nan yiunan, cuanto mas nos Tata celestial amoroso lo duna spirito santo na su sirbidonan leal cu ta acerc’e humildemente den oracion!

21, 22. (a) Con Hesus a rasona ora el a ofrece conseho riba con pa trata cu ansiedad tocante cos material? (b) Despues di a repasa algun di Hesus su metodonan di siñansa, na ki conclusion nos ta yega?

²¹ Hesus a rasona casi mescos ora el a ofrece conseho riba con pa trata cu ansiedad tocante  cosnan material. El a bisa: “Considera e rafnan, pasobra nan no ta sembra ni cosecha; y nan no tin luga pa warda provision, ni mangasina; y toch Dios ta alimenta nan; cuanto mas cu parha boso no ta bal! Considera e lelinan, con nan ta crece; nan no ta traha mata curpa, ni nan no ta hila . . . Ma si di tal manera Dios ta bisti e yerba di sabana, locual awe t’ei y mañan ta wordo tira den forno, cuanto mas E lo bisti boso, o hendenan di poco fe!” (Lucas 12:24, 27, 28) Berdad, si Yehova ta percura pa parha y flor, cuanto mas lo E no percura pa su sirbidonan! Sin duda, e rasonamento tierno pero poderoso ei a touch curason di Hesus su oyentenan.

²² Despues di a repasa algun di Hesus su metodonan di siñansa, nos por conclui facilmente cu e oficialnan cu no por a captura Hesus sigur no tawata exagerando ora nan a bisa: “Nunca un hende no a papia manera e homber aki.” Pero e metodo di siñansa cu talbes a haci Hesus mas conoci ta esun di ilustracion, of comparacion. Pakico el a uza e metodo aki? Y kico a haci su ilustracionnan asina eficas? E siguiente articulo lo contesta e preguntanan aki.

[Nota]

Bo Ta Corda?

• Ki ehempelnan ta mustra cu Hesus a siña di un manera simpel y cla?

• Pakico Hesus a uza pregunta ora el a siña otro hende?

• Con Hesus a uza exageracion como metodo di siñansa?

• Con Hesus a uza rasonamento logico pa siña su disipelnan e berdadnan alentador tocante Yehova?

[Preguntanan di Estudio]

[Plachi na pagina 9]

Hesus a uza lenguahe simpel cu pueblo comun por a comprende

[Plachi na pagina 10]

E Farizeonan a ‘sefta lebelebe pero a traga camel’