“Pordona Otro”

BO TA kere cu Dios ta pordona bo picanan? Ta parce cu mayoria adulto na Merca ta kere esei. Dr. Loren Toussaint, e persona principalmente responsabel pa un estudio cu nan a haci na e Universidad pa Investigacion Social di Instituto di Michigan, ta informa cu di e 1.423 Mericanonan cu a participa na e encuesta, rond di 80 porshento di e adultonan riba 45 aña di edad a bisa cu Dios a pordona nan pa nan picanan.

Sinembargo, ta interesante pa nota cu ta solamente 57 porshento di esnan cu a participa na e encuesta a bisa cu nan ta pordona otro hende. E datonan ei ta haci nos corda e palabranan di Hesus den e Sermon Riba Sero: “Pasobra si boso pordona hende nan transgresionnan, boso Tata celestial tambe lo pordona boso. Ma si boso no pordona hende, boso Tata tampoco lo no pordona boso transgresionnan.” (Mateo 6:14, 15) Si, pa Dios pordona nos nos picanan, nos tambe mester ta cla pa pordona otro hende.

Apostel Pablo a recorda e cristiannan di Colosas e principio aki. El a urgi nan: “Boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci.” (Colosensenan 3:13) Ta berdad cu esaki no ta semper facil. Por ehempel, ora un hende papia cosnan malo y ofensivo di bo, lo por ta dificil pa bo pordona e persona ei.

Sinembargo, ora bo ta pordona otronan bo por haya hopi beneficio. Dr. David R. Williams, un sociologo, a bisa relaciona cu su investigacion: “Nos a ripara cu tin un relacion fuerte entre pordon y e salu mental di Mericanonan di edad medio y mas bieu.” Esaki ta na harmonia cu e palabranan di e Rei sabi, Salomon, kende a skirbi 3.000 aña pasa: “Un curason trankil ta bida pa e curpa.” (Proverbionan 14:30) Siendo cu e inclinacion pa pordona ta promove un bon relacion cu Dios y cu nos prohimo, nos tin motibo valido pa ser dispuesto pa pordona otro hende di curason.—Mateo 18:35.