Unda Tur Biciña A Keda?

“Sosiedad moderno no sa kico ta biciña.”—Benjamin Disraeli, politico Ingles di siglo 19.

CUBANONAN di edad tin un manera unico pa promove nan bienestar: contacto den bario, of círculos de abuelos (grupo di grandinan), manera nan ta yama nan. Segun un informe di 1997, rond di 1 di cada 5 Cubano di mas edad ta forma parti di e gruponan ei, den cua nan ta haya compañerismo, apoyo y yudansa practico pa mantene un bida salu. “Ki ora cu docter di cas di un bario mester di yudansa cu un campaña di vacunacion”, segun e revista World-Health, “ta serca e círculos de abuelos nan ta haya personanan cu ta dispuesto y cla pa yuda.”

Pero lamentablemente, den mayoria parti di mundo ya no tin un comunidad den bario cu tin interes den hende. Tuma por ehempel e caso tragico di Wolfgang Dircks, kende tawata biba den un compleho di apartamento na west Europa. Algun aña pasa, The Canberra Times a informa cu aunke e 17 famianan cu tawata comparti e mesun edificio di apartamento cu Wolfgang a ripara cu e no tawata sali cas, “ningun di nan a dicidi di bai busca su drechi.” Ora e propietario a presenta finalmente, “el a descubri un skelet sinta dilanti television.” Riba scochi di e skelet tawatin un buki di programa di television habri cu fecha di 5 di december 1993. Wolfgang tawatin cinco aña morto. Esaki ta un testimonio tristo di e falta di interes cu biciñanan tin den otro! Nada straño cu un columnista a declara den The New York Times Magazine cu su bario, mescos cu hopi otro, a bira “un comunidad di hende straño.” Esaki ta e caso den bo area tambe?

Ta berdad cu tin algun comunidad den areanan di cunucu caminda ainda biciñanan ta hopi amigabel cu otro, y tambe algun comunidad den stad caminda e biciñanan ta purba mustra mas interes den otro. Toch, hopi habitante di stad ta sinti nan isola y vulnerable den nan mes bicindario. Nan ta sconde tras di e murayanan di anonimato y no kier pa hende sa nan drechi. Con asina?

 Tras di Murayanan di Anonimato

Claro cu mayoria di nos tin biciña cu ta biba pega cu nos. Refleho di e lus di television, sombra cu ta move visiblemente door di bentana, lusnan cu ta sende y paga, zonido di auto cu ta yega y bai, stap di pia den gang, yabi cu ta sera y habri porta, tur ta señalnan cu e bario ta “na bida.” Sinembargo, tur sintimento cu biciñanan echt mester di otro ta disparce ora hende cu ta biba pega cu otro no kier pa ningun hende sa nan drechi of ta ignora otro den e bida druk di tur dia. Hende por sinti cu nan no tin nodi mete cu biciña y cu nan no tin cuenta ni rason di duna nan. E corant Australiano Herald Sun ta admiti: “Door cu hende ta mas anonimo (niun hende no sa nan drechi) den nan bicindario directo, nan ta sinti cu nan comunidad no por stroba nan di haci nada. Awor ta mas facil pa ignora of exclui hende cu bo no ta gusta masha.”

E desaroyo aki no ta un sorpresa. Den un mundo caminda hende ta “stimado di nan mes”, comunidad ta cosechando e consecuencianan di e bida egoista cu hopi hende ta hiba. (2 Timoteo 3:2) E resultado ta cu hopi hende ta sinti cu nan ta so y aleha for di otronan. Y ora hende aleha for di otro, esei ta trece desconfiansa, specialmente ora crimen y violencia ta pone e comunidad na peliger. Desconfiansa, na su turno, ta pone hende perde compasion pa otro.

Sea cual sea e situacion den bo bario, sin duda lo bo ta di acuerdo cu bon biciña ta trece hopi beneficio pa un comunidad. Ora hende ta traha riba un meta comun, nan por logra hopi. Bon biciña por ta un bendicion tambe. E siguiente articulo lo mustra con.