Con e Berdadero Santonan Por Yuda Bo?

NA KEN e palabra Griego traduci como “santo” den e Scritura ta referi? An Expository Dictionary of New Testament Words ta remarca cu “den sentido plural, ora e ta referi na creyente, e ta encera tur creyente, y no djis e personanan cu ta excepcionalmente santo, of esnan cu, despues cu nan a muri, a ser acredita pa obranan excepcional di santidad.”

Pesei apostel Pablo a referi na tur e prome cristiannan como e berdadero santonan. Por ehempel, el a dirigi un carta skirbi den prome siglo di nos era “na e iglesia di Dios cu ta na Corinto, hunto cu tur e santonan cu ta den henter [e provincia Romano di] Acaya.” (2 Corintionan 1:1) Mas despues, Pablo a skirbi un carta “na tur Dios su stimanan na Roma, yama pa ta santonan.” (Romanonan 1:7) Obviamente e santonan aki no a muri ainda, ni no tawatin un cualidad sobresaliente cu a distingui nan for di e otro creyentenan. Riba ki base a distingui nan como santo?

Santifica Door di Dios

E Palabra di Dios ta mustra cu no ta hende of un organisacion ta declara un persona santo. E Scritura ta bisa: “[Dios] a salba nos y a yama nos cu un yamada santo, no conforme nos obranan, ma conforme su mes proposito y gracia.” (2 Timoteo 1:9) Ta Yehova ta declara un persona santo, segun Su gracia of bondad inmereci, y na harmonia cu Su proposito.

E santonan di e congregacion cristian ta participa den “un aliansa nobo.” E sanger drama di Hesucristo ta sirbi como base di e aliansa aki y ta santifica su participantenan. (Hebreonan 9:15; 10:29; 13:20, 24) Como hende limpi den bista di Dios, nan ta ‘un sacerdocio santo y ta ofrece sacrificionan spiritual cu ta aceptabel pa Dios pa medio di Hesucristo.’—1 Pedro 2:5, 9.

Hende Ta Pidi Santo pa Yuda Nan y Intercede pa Nan

Miyones di hende ta kere cu “santo” por drama poder special riba nan, y pesei nan ta venera nan door di uza relikia of door di pidi nan pa intercede pa nan. Bijbel ta siña hende haci esaki? Den e Sermon Riba Sero, Hesus a siña su siguidonan con pa acerca Dios, bisando: “Pues, haci oracion anto asin’aki: ‘Nos Tata cu ta den  shelo, bo nomber sea santifica.’” (Mateo 6:9) Ta na Yehova Dios so hende mester dirigi nan oracionnan.

Algun teologo ta cita Romanonan 15:30 den un intento pa proba cu e “santonan” por intercede pa nos. Ei nos ta lesa: “Mi ta roga boso, rumannan, pa medio di nos Señor Hesucristo y pa medio di e amor di e spirito, pa boso lucha hunto cu mi den boso oracionnan na Dios pa mi.” Acaso Pablo tawata anima e creyentenan ei pa haci oracion na dje of pa invoca su nomber ora di acerca Dios? No. Aunke Bijbel ta anima hende pa haci oracion na fabor di e berdadero santonan, ningun caminda Dios ta manda nos haci oracion na of pa medio di e santonan ei.—Filipensenan 1:1, 3, 4.

Sinembargo, Dios a nombra un Intercesor pa nos oracionnan. “Ami ta e caminda, y e berdad, y e bida”, Hesucristo a bisa. “Ni un hende no ta bin serca e Tata, sino pa medio di mi.” Tambe Hesus a bisa: “Tur loke boso pidi den mi nomber, esei lo mi haci, pa e Tata wordo glorifica den e Yiu. Si boso pidi algo den mi nomber, lo mi hacie.” (Huan 14:6, 13, 14) Nos por tin e siguransa cu Yehova mes kier tende oracion haci den e nomber di Hesus. Bijbel ta bisa relaciona cu Hesus: “Tambe e por salba pa semper esnan cu ta hala serca Dios pa medio di dje, como cu semper e ta biba pa intercede pa nan.”—Hebreonan 7:25.

Si Hesus ta dispuesto pa intercede na nos fabor, pakico hopi bes e fielnan den cristiandad ta invoca e “santonan” den oracion? Den su buki The Age of Faith, historiado Will Durant ta bai bek na origen di e practica aki. Aunke el a bisa cu hende ta teme Dios Todopoderoso y cu Hesus ta parce di ta mas acercabel, Durant ta declara: “Apenas hende a tribi na papia cu [Hesus] cara cara despues cu nan a ignora su declaracionnan den e Sermon Riba Sero totalmente. A parce nan cu ta mas sabi pa resa, no na Cristo, sino na un persona cu a ser canonisa como santo y cu lo mester ta den shelo, y pa roga su intersesion.” E precupacionnan aki tin base?

Bijbel ta siña nos cu ora nos haci oracion na Dios pa medio di Hesus, nos por tin “frankesa  y entrada cu tur confiansa pa medio di fe den dje.” (Efesionan 3:11, 12) Dios Todopoderoso no ta mucho leu for di humanidad pa por tende nos oracionnan. E salmista David a bisa cu confiansa den oracion: “Abo cu ta scucha oracion, serca Bo tur hende ta bin.” (Salmo 65:2) En bes di transmiti poder mediante relikia di “santonan” defunto, Yehova ta drama su spirito santo riba esnan cu ta pidie den fe. Hesus a rasona: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!”—Lucas 11:13.

E Papel di e Santonan

E santonan na kende Pablo a dirigi su cartanan a muri hopi siglo pasa y, cu tempo, nan mester a ricibi “e corona di bida”, cu ta un resureccion pa shelo. (Revelacion 2:10) Adoradonan di Yehova Dios ta realisa cu veneracion di e berdadero santonan aki no ta biblico y no por duna proteccion for di enfermedad, desaster natural, instabilidad economico, biehes of morto. Pesei, bo por puntra: ‘E santonan di Dios ta berdaderamente interesa den nos? Nos por spera cu nan ta actua na nos fabor?’

E profecia di Daniel a papia hopi di e santonan. Den siglo 6 prome cu Era Comun el a mira un vision conmovedor di cosnan cu ta culminando den nos tempo. For di lama a sali cuater bestia spantoso cu ta simbolisa gobiernonan humano cu no por satisface e berdadero necesidadnan di humanidad. Anto Daniel a profetisa: “Ma e santonan di e Haltisimo lo ricibi e reino y posee e reino pa semper, pa tur siglo cu ta bin.”—Daniel 7:17, 18.

Pablo a confirma e “herencia [aki] pa e santonan”, esta di ta coheredero cu Cristo den shelo. (Efesionan 1:18-21, NW) E sanger di Hesus a habri caminda pa 144.000 santo ser resusita y haya e gloria celestial. Apostel Huan a declara: “Bendiciona y santo ta esun cu tin parti den e prome resureccion; riba esakinan e di dos morto no tin poder, ma nan lo ta sacerdotenan di Dios y di Cristo y lo reina hunto cu ne pa mil aña.” (Revelacion 20:4, 6; 14:1, 3) Den vision, Huan a tende un grupo grandi di criatura celestial canta dilanti Hesus glorifica: “Cu bo sanger bo a cumpra pa Dios hende for di tur tribu y lenga y pueblo y nacion. Y bo a haci nan bira un reino y sacerdotenan pa nos Dios; y nan lo reina riba tera.” (Revelacion 5:9, 10) Esta un consuelo! Yehova Dios mes a scohe e homber- y mohenan aki cuidadosamente. Ademas, nan a sirbi fielmente riba tera y a enfrenta practicamente tur problema cu hende a yega di pasa aden. (1 Corintionan 10:13) Pesei nos por ta sigur cu e santonan resusita aki lo ta gobernantenan yen di misericordia y compasion cu ta tene cuenta cu nos debilidadnan y limitacionnan.

Bendicion bou di Gobernacion di Reino

Pronto e gobernacion di Reino lo tuma accion pa elimina tur maldad y sufrimento for di tera. E tempo ei, hende lo ta mas serca di Dios cu nunca. Huan a skirbi: “Mi a tende un bos duro for di e trono, bisando: ‘Mira, e tabernakel di Dios ta meimei di hende, y E lo biba meimei di nan, y nan lo ta su pueblo, y Dios mes lo ta meimei di nan.’” Esaki lo trece bendicion sin fin pa humanidad, pasobra e profecia ta continua: “E lo seca tur lagrima  kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.”—Revelacion 21:3, 4.

Ki un tempo di goso esei lo ta! E palabranan di Mikeas 4:3 y 4 ta describi mas aleu kico ta e resultadonan di e gobernacion perfecto di Cristo Hesus y e 144.000 santonan: “[Yehova] lo husga entre hopi pueblo y haci decision pa nacionnan leu y poderoso. E ora ei nan lo bati nan spadanan traha ploeg cu nan, y nan lo bati nan lansanan traha sker pa snui cu nan; nacion lo no lanta spada contra nacion, y nunca mas nan lo no train pa guera. Y cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehersitonan a papia.”

E santonan ta extende e invitacion pa hende tuma parti den e bendicionnan ei. Simbolisa pa un bruid, e berdadero santonan ta sigui bisa: “Bin!” E texto ta continua: “Y laga esun cu tende, bisa: ‘Bin.’ Y laga esun cu tin sed, bin; laga esun cu kier, tuma e awa di bida pornada.” (Revelacion 22:17) Kico e “awa di bida” ta encera? Entre otro, un conocemento exacto di e propositonan di Dios. Hesus a bisa den oracion na Dios: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) E conocemento aki ta disponibel mediante un studio regular di Bijbel. Ki contento nos por ta cu pa medio di e Palabra di Dios nos por haya sa e berdadero identidad di e santonan y siña con Yehova lo uza nan pa e beneficio eterno di humanidad!

[Plachi na pagina 4]

Pablo a skirbi cartanan inspira na e berdadero santonan

[Plachi na pagina 4, 5]

E fiel apostelnan di Hesus a bira berdadero santo

[Plachi na pagina 6]

Nos por resa cu confiansa na Dios mediante Hesucristo

[Plachi na pagina 7]

E santonan resusita lo goberna tera cu compasion