“E Ta Hiba Mi Canto di Awanan Keto”

E CLIMA cayente den e paisnan cu Bijbel ta papia di dje ta pone cu e carnenan mester bebe awa tur dia. Pesei, un parti importante di e trabou di un wardado di carne ta pa duna su tou awa. Tin bes e wardadonan ta saca awa for di pos y bash’e den un baki pa nan carnenan por bebe. (Genesis 29:1-3) Sinembargo, specialmente den temporada di awasero, bo ta haya cu e areanan rond di e roi- y riunan chikito ta bira luganan di trankilidad yen di “awanan keto.”—Salmo 23:2.

Un bon wardado mester sa unda e por haya tanto awa como un bon luga di come pa su tou. Si e conoce un area bon, e por garantisa sobrevivencia di su carnenan. David, kende a cuida carne pa hopi aña den e seronan di Huda, a compara e guia spiritual cu Dios ta duna cu e guia di un wardado di carne cu ta guia su carnenan na bon luganan di come y awa cu ta importante pa nan keda na bida. David a bisa: “E ta hiba mi canto di awanan keto.”—Salmo 23:1-3.

Despues di hopi aña, mediante profeta Ezekiel, Yehova a uza un ilustracion similar. El a priminti cu lo E recohe su pueblo for di tur pais caminda nan a ser plama, mescos cu un wardado ta reuni su carnenan. El a sigura nan: “Lo Mi . . . trece nan na nan mes tera. Lo Mi alimenta nan riba e seronan di Israel, banda di e coridanan di awa.”—Ezekiel 34:13.

Yehova Dios ta masha interesa tambe pa hende ricibi awa spiritual. E buki di Revelacion ta describi “un riu di e awa di bida” cu ta basha for di e trono di Dios. (Revelacion 22:1) Dios ta invita tur hende pa bebe for di e riu aki. “Esun cu kier, [por] tuma e awa di bida pornada.”—Revelacion 22:17.

E awa di bida simbolico aki ta representa tur e percuracionnan cu Dios a haci pa hende por gana bida eterno. Tur hende por bebe di e awa ei door di siña ‘conoce e unico Dios berdadero, y Hesucristo, kende El a manda.’—Huan 17:3.