Pregunta di Lector

• Lucifer ta un nomber cu Bijbel ta uza pa Satanas?

E nomber Lucifer ta aparece un biaha so den e Scritura, y esei ta den solamente algun version di Bijbel. Por ehempel, den King James Version nan a traduci Isaias 14:12 di e siguiente manera: “Mira con bo a cai for di shelo, o Lucifer, yiu homber di mainta!”

E palabra Hebreo traduci como “Lucifer” ta nifica “esun cu ta briya.” E Septuaginta ta uza e palabra Griego cu ta nifica “esun cu ta causa aurora.” Pesei, algun version ta traduci e palabra original na Hebreo como “streya di marduga” of “streya briyante di marduga.” Pero e Vulgata na Latin di Jeronimo si ta uza “Lucifer” (cu ta nifica cargado di lus), y ta pesei, e palabra aki ta aparece den algun version di Bijbel.

Ken e Lucifer aki ta? E expresion “streya di marduga” of “Lucifer” ta parti di loke Isaias profeticamente a manda e Israelitanan pronuncia como un ‘proverbio contra rei di Babilonia.’ Pues, e palabra “Lucifer” ta parti di un declaracion cu ta dirigi primeramente na e dinastia di Babilonia cu a cuminsa cu Nabucodonosor. Un otro declaracion cu ta mustra cu e expresion “streya di marduga” ta describi un hende y no un criatura spiritual, ta esun cu ta bisa: “Lo bo wordo tira abou den Seol.” Seol ta e graf comun di humanidad, y no un luga cu Satanas e Diabel ta ocupa. Ademas, esnan cu mira Lucifer den e condicion aki ta puntra: “Ta esaki ta e homber cu a haci tera tembla?” Ta claro anto cu “Lucifer” ta referi na un hende y no na un criatura spiritual.​—Isaias 14:4, 15, 16.

Dicon e dinastia babilonico a haya e descripcion unico ei? Nos tin cu tuma nota cu ta te despues cu e rei di Babilonia a cai el a ser yama streya di marduga y cu esaki tawata den forma di mofa. (Isaias 14:3) Orguyo egoista a pone reinan di Babilonia halsa nan mes riba hende rond di nan. E dinastia tawata asina arogante cu Bijbel a describie ta broma: “Lo mi subi na shelo; lo mi haci mi trono mas halto cu e streyanan di Dios, y lo mi sinta riba e sero di asamblea, na e partinan mas retira di nort. . . . lo mi haci mi mes mescos cu e Haltisimo.”—Isaias 14:13, 14.

“E streyanan di Dios” ta e reinan den e liña real di David. (Numbernan 24:17) Cuminsando cu David, e “streyanan” aki a goberna for di Sero di Sion. Despues cu Salomon a traha e tempel na Herusalem, nan a uza e nomber Sion pa referi na henter e stad. Bou di e pacto di lei, tur homber Israelita mester a bai Sion tres bes pa aña. Pesei, el a bira conoci como e “sero di asamblea.” Door cu Nabucodonosor a dicidi cu e ta bai domina e reinan di Huda y remove nan for di e sero ei, e ta declara cu e tin intencion di halsa su mes riba e “streyanan.” En bes di duna merito na Yehova pa e victoria cu el a logra riba e reinan ei, di un manera arogante el a pone su mes na luga di Yehova. Pesei, ta despues cu e dinastia babilonico a cai, a haci cherche di dje y yam’e “streya di marduga.”

Ta berdad si cu e orguyo di e gobernantenan di Babilonia a refleha e actitud di “e dios di e mundo aki”, Satanas e Diabel. (2 Corintionan 4:4) Pasobra e tambe ta anhela poder y ta desea di halsa su mes riba Yehova Dios. Pero Lucifer no ta un nomber cu Bijbel ta duna Satanas.

 • Dicon 1 Cronicanan 2:13-15 ta referi na David como e di shete yiu homber di Yese (Isai), mientras cu 1 Samuel 16:10 i 11 ta referi na David como e di ocho yiu homber?

Despues cu Rei Saul di Israel di antiguedad a bandona adoracion berdadero, Yehova Dios a manda profeta Samuel bai ungi un yiu homber di Yese como rei. E registro biblico di e suseso historico aki, cu Samuel mes a skirbi den siglo 11 prome cu Era Comun, ta menciona David como e di ocho yiu di Yese. (1 Samuel 16:​10-13) Sinembargo, e relato cu e sacerdote Esdras a skirbi mas o menos 600 aña despues ta bisa: “Isai a engendra Eliab, su primogenito, despues Abinadab, esun di dos, y Simea, esun di tres, Natanael, esun di cuater, Radai, esun di cinco, Ozem, esun di seis, David, esun di shete.” (1 Cronicanan 2:​13-15) Kico a sosode cu un di David su ruman hombernan, y dicon Esdras a laga su nomber afo?

Bijbel ta declara cu Yese “tawatin ocho yiu homber.” (1 Samuel 17:12) Aparentemente un di su yiunan no a biba suficiente pa e por casa y tin yiu. Door cu e no tawatin desendiente, e no tawatin derecho riba herencia di tribu ni e no tawata relevante pa e registronan di genealogia di e famia di Yese.

Awor laga nos ban den tempo di Esdras. Pensa riba e marco di sircunstancia den cua el a compila e bukinan di Cronicanan. E exilio na Babilonia a termina rond di 77 aña mas prome, y e Hudiunan a reestablece nan mes den nan pais. Rei di Persia a duna Esdras autoridad pa nombra hues- y maestronan di e Lei di Dios y pa haci e cas di Yehova bunita. Pa confirma e herencianan di tribu y pa haci sigur cu ta hende autorisa so a sirbi como sacerdote, nan tawatin mester di listanan di genealogia exacto. Pesei Esdras a traha un relato completo di e nacion su historia y tambe un registro cla y confiabel di e liña di desendencia di Huda y di David. Pa e registronan aki e nomber di e yiu homber di Yese cu a muri sin desendencia no tawata relevante. Pesei, Esdras a laga nomber di e yiu aki keda afo.