Conocemento Exacto di Dios Ta Duna Consuelo

TIN hende tin problema pa comprende loke Bijbel ta bisa tocante e amor y e misericordia di Dios. Nan ta puntra: Si Dios kier caba cu maldad, E sa con pa hacie y E tin e poder pa hacie, anto dicon ainda tin tanto maldad? Loke nan no por caba di comprende ta con e tres cosnan aki por cuadra cu otro: (1) Dios ta todopoderoso, (2) Dios tin amor y bondad y (3) cos teribel ta sigui sosode. Nan ta rasona cu, ya cu e di tres punto ta un echo, anto por lo menos un di e prome dosnan mester ta falso. Nan ta pensa cu sea Dios no por caba cu maldad, of E no ta interesa pa hacie.

Un par di dia despues di e destruccion di World Trade Center na New York, un lider religioso prominente na Merca a bisa: “Den mi bida, centenares di hende a yega di puntra mi dicon Dios ta permiti tragedia y sufrimento. Pa mi ta franco mi mester bisa cu ni pa mi mes mi no a logra haya un contesta cu mi por ta satisfecho cu ne.”

Reaccionando riba e comentario aki, un profesor di teologia a skirbi cu el a keda impresiona cu “e bon teologia” cu e lider religioso ei a predica. Tambe el a apoya e punto di bista di un erudito cu a skirbi: “Nos no por comprende sufrimento pasobra nos no por comprende Dios.” Pero, di berdad nos no por comprende dicon Dios ta permiti maldad?

Origen di Maldad

Maske lidernan religioso por pretende otro cos, echo ta cu Bijbel no ta crea e impresion cu nos no por comprende dicon Dios ta permiti maldad. Pa nos por comprende e cuestion di pakico maldad ta existi, ta esencial pa nos realisa cu Yehova no a crea mundo cu maldad. El a crea e prome pareha humano perfecto, sin pica. Yehova a wak su obra di creacion y a haya cu e tawata “masha bon.” (Genesis 1:26, 31) Su proposito tawata pa Adam cu Eva rek e Paradijs di Eden te ora e cubri henter mundo, y pa nan yen’e cu hende felis bou di e proteccion di su soberania amoroso.—Isaias 45:18.

Maldad a cuminsa door di un criatura spiritual cu na principio tawata fiel na Dios, pero cu despues a cuminsa desea di ricibi adoracion. (Santiago 1:14, 15) Su rebeldia a sali na cla riba tera na momento cu el a influencia e prome pareha humano pa nan tambe opone Dios hunto cu ne. Na luga di obedece Dios su instruccion bon cla pa no come ni mishi cu e fruta di e palo di conocemento di bon y malo, Adam cu Eva a cohe fruta for di e palo y come. (Genesis 3:1-6) No solamente nan a desobedece Dios, pero nan a mustra tambe cu nan kier a biba independiente di dje.

 Un Cuestion Moral

E rebelion den Eden aki a lanta un cuestion moral cu ta di importancia pa henter universo. E rebeldenan ei a cuestiona cu Yehova ta goberna su criaturanan corectamente. E Creador tawatin derecho di exigi pa hende obedec’e den tur cos? Hende lo por biba miho si nan actua independiente?

Yehova a trata cu e desafio aki di su moda di goberna na un manera cu a mustra cu su amor, su husticia, su sabiduria y su poder ta den balansa perfecto. E por a uza su poder pa caba cu e rebelion mesora. Esei asta lo por a parce husto, pasobra E tawatin derecho di hacie. Pero esei lo no a resolve e cuestionnan moral cu a lanta. Di otro banda, Dios lo por a djis ignora e pica. Den bista di algun hende djawe, esei lo por tawata un muestra di amor. Pero e opcion aki tampoco lo no a yuda aclara si loke Satanas a pretende ta berdad of no, esta, cu hende lo biba miho si nan goberna nan mes. Ademas, si Dios a djis ignora e pica, esei lo no a anima mas persona pa desvia for di Yehova su caminda? E resultado lo ta cu creacion lo keda sufri pa semper.

Den su sabiduria, Yehova a permiti hende haci cos na nan mes manera pa un tempo. Aunke esei a nifica cu E mester a permiti maldad sigui existi pa un tempo, El a hacie pa hende haya chens di mustra si nan por goberna nan mes cu exito sin tin cu depende riba Dios y dicidiendo pa nan mes kico ta bon y malo. Kico tawata e resultado? Guera, inhusticia, opresion y sufrimento a caracterisa henter historia humano. E fracaso total di e rebelion contra Yehova lo mustra unabes pa semper cu e cuestionnan cu a lanta den Eden ta falso.

Entretanto, Dios a mustra nos su amor door di manda su Yiu Hesucristo, cu a entrega su bida humano como un sacrificio di rescate. Danki na esaki, hende obediente por libra for di e condena di pica y morto cu a bini door cu Adam a desobedece Dios. E rescate a  habri e caminda pa bida eterno pa tur hende cu eherce fe den Hesus.—Huan 3:16.

Ta un consuelo pa sa cu Yehova ta garantisa nos cu hende lo no sigui sufri pa semper. Segun un skirbido di salmo: “Aki poco tempo e malbado lo no t’ei mas; maske cuanto bo busca su luga, e lo no t’ei. Ma e humildenan lo hereda e tera, y lo deleita nan mes den pas abundante.”—Salmo 37:10, 11.

Un Futuro Sigur y Felis

E profecianan di Bijbel cu ta cumpli ta mustra cu e tempo pa Dios trece un fin na enfermedad, tristesa y morto ta serca. Wak ki un bista maravioso di futuro apostel Huan a ricibi den un vision. El a skirbi: “Mi a mira un shelo nobo y un tera nobo; pasobra e prome shelo y e prome tera a pasa, y lama no tawata existi mas. . . . Y Dios mes lo ta meimei di [humanidad], y E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.” Y pa enfatisa cu e promesanan aki ta digno di confiansa, Huan a ser bisa: “Skirbi, pasobra e palabranan aki ta fiel y berdadero.”—Revelacion 21:1-5.

Kico di e miles di miyones di hende inocente cu a muri for di tempo cu e rebelion a tuma luga den Eden? Yehova a priminti cu lo E lanta hende cu actualmente ta drumi den morto. Apostel Pablo a bisa cu e tin speransa den Dios cu “siguramente lo tin un resureccion di tanto e hustonan como e malbadonan.” (Echonan 24:15) Nan lo haya chens di biba den un mundo caminda ‘husticia ta biba.’—2 Pedro 3:13.

Mescos cu un tata amoroso ta permiti su yiu pasa den un operacion doloroso si e sa cu lo tin beneficio duradero, Yehova tambe a laga humanidad biba temporalmente cu maldad riba tera. Sinembargo, un eternidad di bendicion ta spera tur hende cu ta trata na haci Dios su boluntad. Pablo a splica cu “creacion a wordo someti na banidad, no di su mes boluntad, ma pa motibo di esun cu a somet’e, den speransa cu e creacion mes tambe lo wordo libra for di su sclabitud na corupcion pa drenta den e libertad glorioso di e yiunan di Dios.”—Romanonan 8:20, 21.

Esaki si ta noticia, anto un bon noticia, no manera e cosnan cu nos ta mira na television y lesa di dje den corant. E ta e miho noticia cu tin, y e ta bini di e “Dios di tur consuelo”, cu tin berdadero interes den nos.—2 Corintionan 1:3.

[Plachi na pagina 6]

Tempo a mustra cu hende no por goberna nan mes cu exito sin Dios

[Reconocemento]

Famia di Somalia: UN PHOTO 159849/M. GRANT; bom atomico: USAF photo; campo di consentracion: U.S. National Archives photo