Consuelo den Tempo Trabahoso

AWENDIA bo no ta tende nada bon den noticia. Un hende a skirbi: “Susesonan di momento ta asina tristo cu hopi bes bo no sa si bo ta tribi di wak noticia di seis or of no.” Tur caminda na mundo tin guera, actonan terorista, sufrimento, crimen y enfermedad, y si e cosnan aki no a afecta nos directamente ainda, nan lo por cuminsa afecta nos un ora pa otro.

Bijbel a pronostica e situacion aki cu hopi exactitud. Hesus a describi nos tempo bisando cu lo tin guera grandi, pestilencia, scarsedad di cuminda y temblor. (Lucas 21:10, 11) Y apostel Pablo a skirbi tocante “temponan trabahoso” ora cu hende lo ta grosero, stimado di placa y odiado di loke ta bon. El a yama e tempo ei “e ultimo dianan.”—2 Timoteo 3:1-5.

Pues, e manera cu hende ta describi situacion di mundo den noticia tin un cierto paresido cu loke Bijbel a profetisa. Pero ta te ei e paresido ta keda tambe, pasobra Bijbel ta yuda nos mira cierto echonan cu noticia si no por. Dios su Palabra inspira por yuda nos comprende dicon tin tanto maldad, y asta con futuro lo ta.

Loke Dios Ta Pensa di Maldad

Bijbel ta splica loke Dios ta pensa di e situacion tristo cu ta reina awendia. Maske Dios a mira di antemano cu e dificultadnan actual lo  a presenta, esei no kiermen cu E ta di acuerdo cu nan, ni cu lo E sigui tolera nan pa semper. Apostel Huan a skirbi cu “Dios ta amor.” (1 Huan 4:8) Yehova tin interes profundo den hende, y E ta odia tur maldad. Nos tin tur motibo pa acudi na Dios pa consuelo, pasobra E ta bondadoso, E tin compasion, y E tin tanto e deseo como e poder pa caba cu maldad pa semper for di riba tera. Den Salmonan nos por lesa: “[E Rei cu Dios a nombra den shelo] lo libra esun den necesidad ora cu e sclama pa yudansa, esun aflihi tambe y esun cu no tin ningun hende pa yud’e. E lo tin compasion di e pober y di esun den necesidad, y E lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.”—Salmo 72:12-14.

Bo ta sinti duele di hende cu ta sufri? Probablemente cu si. Empatia, esta, sinti pa otro hende, ta un cualidad cu Yehova a hinca den nos, pasobra El a traha nos den su imagen. (Genesis 1:26, 27) Pesei nos por tin sigur cu Yehova no ta keda sin sinti ora E mira hende sufri. Hesus, cu conoce Yehova miho cu tur hende, a siña nos cu Yehova ta masha interesa den nos, y cu E tin tierno compasion.—Mateo 10:29, 31.

Creacion mes ta duna testimonio cu Dios tin interes den humanidad. Hesus a bisa cu Dios “ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:45) Apostel Pablo a bisa e pueblo di e stad di Listra: “[Dios] no a laga su mes sin testimonio, door cu El a haci bon y a manda awasero for di shelo y tempo di bon cosecha pa boso, y a satisface boso curason cu cuminda y alegria.”—Echonan 14:17.

Ken Ta Responsabel pa Maldad?

Otro cos interesante cu Pablo a bisa e pueblo di Listra ta esaki: “Den e generacionnan pasa [Dios] a permiti tur e nacionnan sigui nan mes camindanan.” Pues, e nacionnan, of cu otro palabra hende mes, ta esnan principalmente responsabel pa mayoria di e problemanan cu nan ta enfrenta. Dios no tin culpa.—Echonan 14:16.

Dicon Yehova ta permiti cos malo tuma luga? Lo E no haci nada nunca pa stop nan? Nos ta haya e contesta riba e preguntanan aki solamente den e Palabra di Dios, pasobra e contesta tin hopi di aber cu un otro persona spiritual y cu un cuestion cu e persona aki a lanta den e mundo invisibel di spirito.

[Plachi na pagina 4]

Hende ta sinti pa otro. Acaso Dios tin menos comprension pa hende cu ta sufri?

 [Reconocemento pa Potret na pagina 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Reconocemento pa Potret na pagina 3]

Mucha pasando hamber: UN PHOTO 146150 di O. MONSEN