Desaroya Obediencia Segun Cu e Fin Ta Yega Serca

‘Nacionnan lo obedece Silo.’—GENESIS 49:10.

1. (a) Den pasado, si bo kier a obedece Yehova, kico esei a nifica hopi bes? (b) Cua profecia tocante obediencia Yacob a expresa?

DEN pasado, hopi bes tawata asina cu si bo kier a obedece Yehova bo mester a obedece su representantenan. Entre e representantenan aki tawatin angel, patriarca, hues, sacerdote, profeta y rei. Bijbel a asta yama e trono di e reinan di Israel e trono di Yehova. (1 Cronicanan 29:23) Pero lamentablemente, hopi di e gobernantenan di Israel a desobedece Dios y a trece calamidad riba nan mes y nan pueblo. Toch Yehova no a laga hende leal na dje sin speransa. El a consola nan cu e promesa di nombra un Rei cu lo ta incapas pa bira corupto, y cu hende husto lo obedece cu gusto. (Isaias 9:6, 7) Ora e patriarca Yacob tawata riba su cama di morto el a profetisa tocante e gobernante benidero aki. El a bisa: “E septer lo no kita for di Huda, ni e bara di gobernado for di meimei di su pia, te ora Silo bin, y nacionnan lo obedec’e.”—Genesis 49:10.

2. Kico “Silo” ta nifica, y riba ken Silo lo a eherce gobernacion real?

² “Silo” ta un expresion Hebreo cu ta nifica “Esun di Ken E Ta”, of “Esun na Ken E Ta Pertenece.” Pues, loke Silo tawata bai hereda ta nada menos cu e derecho di goberna (cu ta loke e septer, of baston di rei, a simbolisa) y e poder di manda (loke e bara di gobernado a  representa). Ademas, su gobernacion real lo no tawata riba e desendientenan di Yacob so, sino riba tur ‘nacion.’ Esaki ta cuadra cu loke Yehova a priminti Abraham: “Bo desendientenan lo posee e porta di nan enemigonan. Y den bo desendientenan [literalmente, simiña] tur e nacionnan di e tera lo ta bendiciona.” (Genesis 22:17, 18) Na aña 29 di nos era Yehova a confirma ken e simiña aki ta, ora el a ungi Hesus di Nazaret cu spirito santo.—Lucas 3:21-23, 34; Galationan 3:16.

E Prome Reino di Hesus

3. Ki gobierno Hesus a ricibi ora el a subi na shelo?

³ Ora Hesus a subi na shelo e no a cuminsa goberna mesora riba e nacionnan di mundo. (Salmo 110:1) Pero toch el a ricibi un “reino” y subditonan cu a obedec’e. Apostel Pablo a identifica e reino ei ora el a skirbi: “[Dios] a libra nos [cristiannan ungi cu spirito] di e poder di scuridad, y a traslada nos pa e reino di su Yiu stima.” (Colosensenan 1:13) Dios a cuminsa libra nan na Pentecoste di aña 33 di nos era, ora el a drama spirito santo riba e siguidonan fiel di Hesus.—Echonan 2:1-4; 1 Pedro 2:9.

4. Con e prome disipelnan di Hesus a mustra cu nan tawata obediente, y con Hesus a yama nan como grupo?

⁴ Como “ambassadornan pa Cristo”, obedientemente e disipelnan ungi cu spirito a cuminsa recohe mas hende pa bira “conciudadano” cu nan den e reino spiritual ei. (2 Corintionan 5:20; Efesionan 2:19; Echonan 1:8) Ademas, pa nan por tin e aprobacion di nan Rei Hesucristo, nan mester a keda “perfectamente uni den e mesun mente y den e mesun opinion.” (1 Corintionan 1:10) Como grupo nan a forma “e esclabo fiel y prudente”, un grupo cu ta haci trabou di un encargado of mayordomo fiel.—Mateo 24:45; Lucas 12:42.

Bendiciona Door Cu Nan A Obedece Dios Su “Mayordomo”

5. Con Yehova a instrui su pueblo for di antiguedad?

⁵ Semper Yehova a percura pa su pueblo tin maestro. Por ehempel, despues cu e Hudiunan a bolbe for di Babilonia, Esdras cu un par di otro homber capasita a haci mas cu djis lesa e Lei di Dios pa e pueblo; nan a “splica” e lei y a ‘duna e nificacion, pa nan comprende’ e Palabra di Dios.—Nehemias 8:8.

6, 7. Con e grupo esclabo a percura cuminda spiritual na ora pa medio di su Cuerpo Gobernante, y dicon ta corecto pa nos ta sumiso na e grupo esclabo?

⁶ Na aña 49 di nos era, ora un cuestion a lanta tocante sircuncision, e cuerpo gobernante di e grupo esclabo di e tempo ei a trata e asunto cu oracion y a yega na un conclusion basa riba Bijbel. Ora nan a  anuncia via carta kico nan a dicidi, e congregacionnan a obedece e guia cu nan a ricibi, y nan a disfruta di hopi bendicion for di Dios. (Echonan 15:6-15, 22-29; 16:4, 5) Den nos tempo tambe e esclabo fiel a aclara cierto asuntonan importante pa medio di su Cuerpo Gobernante; por ehempel tocante e posicion neutral di un cristian, santidad di sanger y uzo di droga y tabaco. (Isaias 2:4; Echonan 21:25; 2 Corintionan 7:1) Yehova a bendiciona su pueblo debi cu nan a obedece su Palabra y e esclabo fiel.

⁷ Door di somete nan mes na e grupo esclabo, Dios su pueblo ta mustra cu nan ta sumiso na nan Doño Hesucristo tambe. Den nos tempo e sumision ei ta asta mas significativo, pasobra manera e profecia cu Yacob a duna riba su cama di morto a indica, awor Hesus su autoridad ta mas amplio.

Silo Ta Bira Gobernante Legitimo di Tera

8. Con y na ki tempo e autoridad di Cristo a ser amplia?

⁸ E profecia di Yacob a bisa cu ‘nacionnan lo obedece Silo.’ Claramente anto, no ta riba Israel spiritual so Cristo lo a goberna. Kico su gobernacion lo a abarca? Revelacion 11:15 ta contesta: “E reino di mundo a bira e reino di nos Señor, y di su Cristo; y e lo reina pa semper y semper.” Bijbel ta revela cu Hesus a ricibi e autoridad ei despues di “shete periodo di tempo” profetico, “e temponan di e paganonan”, cu a termina na aña 1914. * (Daniel 4:16, 17; Lucas 21:24) Na e aña ei Cristo su “presencia” invisibel como Rei Mesianico a cuminsa, y a yega e tempo pa e sali ‘goberna meimei di su enemigonan.’—Mateo 24:3, NW; Salmo 110:2.

9. Kico Hesus a haci ora el a ricibi su Reino, y ki efecto indirecto esei tawatin riba humanidad, y specialmente riba su disipelnan?

⁹ E prome cos cu Hesus a haci despues cu el a ricibi poder di Rei tawata di tira Satanas, kende ta desobediencia en persona, “abou riba tera” hunto cu su demoñonan. For di e tempo ei padilanti e mal spiritonan aki a trece calamidad riba humanidad manera nunca prome. Na mes momento nan a yuda crea un ambiente den cua no ta facil pa obedece Yehova. (Revelacion 12:7-12; 2 Timoteo 3:1-5) De echo, e obhetivo principal di Satanas su guera spiritual ta Yehova su unginan, esnan cu “ta warda e mandamentonan di Dios y tin e testimonio di Hesucristo”, hunto cu nan compañeronan e “otro carnenan.”—Revelacion 12:17; Huan 10:16.

10. Cumplimento di cua profecianan di Bijbel ta garantisa nos cu e guera spiritual di Satanas contra cristiannan berdadero lo fracasa?

¹⁰ Pero Satanas ta condena na fracaso, pasobra esaki ta “e dia di Señor”, y nada no por stroba Hesus di completa su ‘conkista.’ (Revelacion 1:10; 6:2) Entre otro lo e percura pa e seyamento final di e 144.000 Israelita spiritual tuma luga. Tambe lo e proteha “un multitud  grandi cu ningun hende no por a conta, di tur nacion y tur tribu y pueblo y lenga.” (Revelacion 7:1-4, 9, 14-16) Pero un diferencia cu tin entre nan y nan compañeronan ungi ta, cu ta riba tera e multitud grandi lo bai sirbi Hesus como su pueblo obediente. (Daniel 7:13, 14) E solo echo cu nan a aparece riba panorama mundial ya ta un evidencia concreto di cu Silo ta gobernando caba riba “e reino di mundo.”—Revelacion 11:15.

Awor Ta Tempo pa ‘Obedece e Bon Nobo’

11, 12. (a) Ken so lo sobrevivi e fin di e sistema mundial actual? (b) Hende cu absorba “e spirito di mundo” ta desaroya ki tipo di personalidad?

¹¹ Tur hende cu kier haya bida eterno mester siña obedece, pasobra Bijbel ta mustra bon cla cu “esnan cu no conoce Dios y . . . esnan cu no ta obedece e evangelio [of, bon nobo] di nos Señor Hesus” lo no sobrevivi Dios su dia di vengansa. (2 Tesalonicensenan 1:8) Pero debi na e ambiente malbado y e spirito di rebeldia cu ta reina actualmente contra e leinan y principionan di Bijbel, no ta facil pa obedece e bon nobo.

¹² Bijbel ta yama e actitud di rebeldia aki contra Dios “e spirito di mundo.” (1 Corintionan 2:12) Den un carta pa e cristiannan di prome siglo na Efeso, apostel Pablo a describi e efecto di e spirito aki bisando: “Boso tawata cana antes segun e curso di e mundo aki, segun e prins di e poder di laira, di e spirito cu ta obra awor den e yiunan di desobediencia. Nos tur tambe tawata biba antes meimei di nan, den e pasionnan di nos carni, cumpliendo cu e deseonan di carni y di mente, y tawata di naturalesa yiunan di furia, mescos cu e otronan.”—Efesionan 2:2, 3.

13. Con cristiannan por tin exito den resisti e spirito di mundo, y ki bon resultado esei ta duna?

¹³ Ta bon cu e cristiannan di Efeso no a keda esclabo di e spirito di desobediencia ei. No, nan a bira yiu obediente di Dios door di somete nan mes na su spirito y a cosecha su fruta sano y abundante. (Galationan 5:22, 23) Awe tambe e spirito di Dios, e forsa mas poderoso di universo, ta yudando miyones di hende bira obediente na Yehova, y como resultado nan por tin “e siguransa completo di speransa te na fin.”—Hebreonan 6:11; Zacarias 4:6.

14. Con Hesus a spierta tur cristian cu ta biba den e ultimo dianan tocante algun cos spesifico cu lo a test nan obediencia?

¹⁴ Tene na mente tambe cu nos tin e apoyo poderoso di Silo, kende hunto cu su Tata lo no laga ningun enemigo, ni demoño ni hende, test nos obediencia mas di loke nos por soporta. (1 Corintionan 10:13) De echo, Hesus a yuda nos den nos guera spiritual door di describi varios problema cu nos lo a bin enfrenta awor durante e ultimo dianan. El a haci esei via shete carta cu el a duna nos den un vision cu apostel Huan a ricibi. (Revelacion 1:10, 11) Sin duda, e consehonan cu nan ta contene tawata vital pa e cristiannan di e tempo aya, pero nan ta conta principalmente durante “e dia di Señor” cu a cuminsa na 1914. Pesei, ta bon pa nos presta atencion na e mensahenan ei! *

Evita Indeferencia, Inmoralidad y Materialismo

15. Pakico nos mester paga tino pa nos no ser afecta door di e mesun problema cu a afecta e congregacion na Efeso, y con nos por haci esei? (2 Pedro 1:5-8)

¹⁵ E prome carta di Hesus tawata pa e congregacion na Efeso. Hesus a cuminsa na elogia e congregacion pa su perseverancia, y despues el a bisa nan: “Ma mi tin esaki contra bo, cu bo a bandona bo prome amor.” (Revelacion 2:1-4) Awendia tambe tin cristian cu antes tawatin celo, pero cu a perde e amor ferviente cu nan tawatin pa Dios. Esei por suak un hende su relacion cu Dios, y pesei mester tuma medida lihe. Con e por rebiba e amor ei? Door di studia Bijbel, asisti na reunion, haci oracion y  medita cu regularidad. (1 Huan 5:3) Ta berdad cu tur esaki ta exigi esfuerso of “diligencia”, pero e ta bale la pena sigur. (2 Pedro 1:5-8) Si bo examina bo mes cu frankesa y mira cu bo amor a fria, corigi e problema aki lihe, manera Hesus a anima nos cu urgencia: “Corda for di unda bo a cai, y repenti y haci e obranan cu bo tawata haci prome.”—Revelacion 2:5.

16. Ki influencianan a existi den e congregacionnan na Pergamo y Tiatira cu a pone nan spiritualidad na peliger, y dicon loke Hesus a bisa nan ta bon pa nos awe?

¹⁶ Hesus a elogia e cristiannan na Pergamo y Tiatira pa nan integridad, nan perseverancia y nan celo. (Revelacion 2:12, 13, 18, 19) Pero nan tawata bou di influencia di un par di hende cu tawata manifesta e actitud malbado di Balam y Yezabel, kendenan a corumpi Israel di antiguedad door di influencia e nacion pa comete inmoralidad sexual y adora Baal. (Numbernan 31:16; 1 Reinan 16:30, 31; Revelacion 2:14, 16, 20-23) Pero, kico di nos tempo, “e dia di Señor”? Nos por detecta e mesun tipo di influencia ei awe tambe? Si, pasobra ta inmoralidad ta e motibo principal di expulsion den e pueblo di Dios. Pesei mes ta hopi importante pa nos evita di asocia cu ken cu por corumpi nos moralmente, sea nan ta den congregacion of pafo! (1 Corintionan 5:9-11; 15:33) Hende cu kier ta subdito obediente di Silo ta evita tur tipo di dibirticion cuestionabel y pornografia, sea riba papel of via Internet.—Amos 5:15; Mateo 5:28, 29.

17. Ki punto di bista y actitud e cristiannan na Sardis y Laodicea tawatin, pero kico Hesus a pensa di nan condicion spiritual?

¹⁷ Cu excepcion di un par di persona so, e congregacion di Sardis no a ricibi ningun elogio. E tawatin “e nomber di ta bibo”, esta, e tawata parce bibo. Pero indeferencia spiritual a podera di dje asina tanto cu den bista di Hesus e tawata “morto.” Pa nan, obedece e bon nobo tawata practicamente djis un formalidad. Esta un denuncia fuerte! (Revelacion 3:1-3) E congregacion na Laodicea su situacion no tawata mucho diferente. Nan tawata broma cu nan rikesa material, bisando: “Mi ta rico”, pero den bista di Cristo nan tawata “deplorabel y miserabel, pober, ciego y sunu.”—Revelacion 3:14-17.

18. Con nos por evita di bira spiritualmente lou den bista di Dios?

¹⁸ Awendia, algun cristian cu antes tawata fiel tambe a cai den e mesun forma di desobediencia. Kisas nan a laga e spirito di mundo  baha e sentido di urgencia cu nan tawatin den bida, y pone nan desaroya un actitud spiritualmente lou pa loke ta studio di Bijbel, oracion, reunionnan cristian y predicacion. (2 Pedro 3:3, 4, 11, 12) Ta sumamente importante pa nan obedece Cristo y inverti den rikesa spiritual. Si, nan tin cu “cumpra serca [Cristo] oro rafina den candela”! (Revelacion 3:18) Ser rico den e sentido berdadero ei kiermen entre otro cu nos ta ‘rico den bon obra, generoso y dispuesto pa comparti.’ Si nos inverti den e recursonan spiritual precioso aki, nos lo ‘montona pa nos mes e tesoro di un bon fundeshi pa futuro, pa nos gara loke ta e bida berdadero.’—1 Timoteo 6:17-19.

Elogia pa Nan Obediencia

19. Ki elogio y animacion Hesus a duna e cristiannan na Smirna y Filadelfia?

¹⁹ E congregacionnan na Smirna y Filadelfia ta resalta como ehempelnan di obediencia, pasobra Hesus no tawatin ningun motibo pa corigi nan den su cartanan. El a bisa esnan na Smirna: “Mi conoce bo tribulacion y bo pobresa, sinembargo, bo ta rico.” (Revelacion 2:9) Esaki ta net contrario cu e cristiannan na Laodicea cu a broma cu nan rikesa mundano, siendo cu den sentido spiritual nan tawata pober! Claro cu Diabel no a keda contento di mira ningun hende mustra fieldad y obediencia na Cristo. Pesei Hesus a spierta nan: “No tene miedo di loke bo ta bai sufri. Mira, Diabel ta bai tira algun di boso den prizon, pa boso wordo pone na prueba, y boso lo sufri tribulacion dies dia largo. Sea fiel te na morto y lo mi duna bo e corona di bida.” (Revelacion 2:10) Mescos Hesus a elogia e cristiannan di Filadelfia, bisando: “[Bo] a warda mi palabra [esta, obedece mi], y no a nenga mi nomber. Mi ta bin pronto; tene firme na loke bo tin, pa ni un hende no kita bo corona.”—Revelacion 3:8, 11.

20. Con miyones di hende awe a warda e palabra di Hesus, y apesar di ki sircunstancianan?

²⁰ Den e “dia di Señor”, cu a cuminsa na 1914, un resto fiel y nan compañeronan, e miyones di otro carnenan cu tin awor, tambe a warda e palabra di Hesus door di cumpli cu nan ministerio celosamente y mantene nan integridad firmemente. Algun di nan a sufri debi cu nan a obedece Cristo, mescos cu nan rumannan den prome siglo. Hende a asta sera algun di nan den prizon y campo di consentracion. Otronan a warda Hesus su palabra door di tene nan ‘wowo simpel’ apesar cu nan ta rondona pa rikesa y golosidad. (Mateo 6:22, 23, NW) Si, den tur situacion y tur sircunstancia, cristiannan berdadero ta sigui haci Yehova su curason contento cu nan obediencia.—Proverbionan 27:11.

21. (a) Ki obligacion spiritual e grupo esclabo lo sigui cumpli cu ne? (b)  Con nos por mustra cu di berdad nos kier obedece Silo?

²¹ Segun cu e gran tribulacion ta yega serca, “e esclabo fiel y prudente” ta keda cu e determinacion di no compromete nan obediencia na Cristo nan Doño. Pesei, entre otro cos, nan ta sigui prepara alimento spiritual na ora pa e cas di Dios. Pues, laga nos sigui mustra aprecio pa Yehova su maravioso organisacion teocratico, y tur loke e ta percura pa nos. Asina nos ta mustra cu nos ta sumiso na Silo, kende lo recompensa henter su pueblo obediente cu bida eterno.—Mateo 24:45-47; 25:40; Huan 5:22-24.

[Nota]

Bo Ta Corda?

• Ki papel Hesus tin, di acuerdo cu loke Yacob a profetisa riba su cama di morto?

• Con nos por mustra cu nos ta reconoce cu Hesus ta Silo, y cua spirito nos mester evita?

• Ki conseho apropiado pa nos tempo tin den e cartanan na e shete congregacionnan di Revelacion?

• Den ki maneranan nos por imita e cristiannan di e congregacionnan di Smirna y Filadelfia di antiguedad?

[Preguntanan di Estudio]

[Plachi na pagina 18]

Yehova ta bendiciona su pueblo debi cu nan ta obedece e “mayordomo” fiel

[Plachi na pagina 19]

Debi na e influencia di Satanas, no ta facil pa obedece Dios

[Plachi na pagina 21]

Un relacion fuerte cu Yehova ta yuda nos obedec’e