“Disiplina Bo Mes”

CITIUS, altius, fortius: mas lihe, mas halto, mas fuerte! Esakinan ta e idealnan cu atletanan di Grecia y Roma di antiguedad tawata purba alcansa. Durante varios siglo tawatin eventonan atletico grandioso ta tuma luga na Olimpia, Delfi, Nemea y na e Istmo di Corinto, y supuestamente cu “bendicion” di e diosnan. Miles di hende tawata bai wak nan. Pa bo por tawatin e privilegio di participa den un di e weganan aki, bo mester a traha duro pa añanan largo. E ganadonan tawata ricibi gloria tanto pa nan mes como pa nan stad.

E weganan ei tawata parti di e ambiente cultural di e escritornan di e Scrituranan Griego Cristian. Pues, no ta nada straño cu nan a compara e careda spiritual di cristiannan cu eventonan atletico. Tanto apostel Pedro como Pablo a haci bon uzo di ilustracionnan basa riba e competencianan ei pa nan por a splica algun siñansa hopi importante. Den nos tempo, ainda e careda cristian intenso ei no a caba. E cristiannan di prome siglo tawatin cu enfrenta e sistema di cosnan Hudiu, pero nos tin cu ‘lucha’ cu un sistema mundial na rand di destruccion. (2 Timoteo 2:5; 3:1-5) Pa algun di nos, e “lucha di fe” por parce pisa y agotador. (1 Timoteo 6:12) Pues, nos por siña hopi door di samina un par di e ilustracionnan di atletismo uza den Bijbel.

E Miho Entrenado Posibel

Exito di un atleta ta depende hopi di su entrenado. Archaeologia Graeca ta splica di e weganan di antiguedad: “Nan tawata pone e participantenan hura cu nan a pasa dies luna completo haciendo ehercicio di preparacion.” Cristiannan tambe mester pasa den un entrenamento pisa. Esaki ta loke Pablo a conseha Timoteo, un anciano cristian: “Disiplina [“entrena”, NW] bo mes den santidad.” (1 Timoteo 4:7) Ta ken ta entrena “atleta” cristian? Yehova Dios mes! Apostel Pedro a skirbi: “E Dios di tur gracia, . . . E mes lo perfecciona [“termina boso entrenamento”, NW], confirma, fortalece y stablese boso.”—1 Pedro 5:10.

E expresion ‘lo termina boso entrenamento’ ta bini di un verbo Griego cu segun Theological Lexicon of the New Testament ta nifica basicamente “haci algo [of un persona] apto pa su proposito, y prepar’e pa su uzo.” Y Greek-English Lexicon di Liddell y Scott ta bisa cu por splica e verbo aki como “prepara, entrena of ekipa completamente.” Con Yehova ta ‘prepara, entrena of ekipa nos completamente’ pa e careda dificil di un cristian? Pa nos comprende e comparacion aki, laga nos mira algun di e metodonan cu entrenadonan tawata uza.

E buki The Olympic Games in Ancient Greece (Weganan Olimpico na Grecia di Antiguedad) ta bisa: “Esnan cu tawata entrena hobennan tawata uza dos metodo basico. Esun prome tawata pa anima e alumno pa e haci su maximo esfuerso fisico pa logra e miho resultadonan posibel. E di dos metodo tawata pa mehora su tecnica y su estilo.”

Yehova tambe ta anima y fortalece nos pa nos alcansa e maximo di nos potencial, y pa nos mehora nos habilidadnan den su sirbishi. Nos Dios ta duna nos animo via Bijbel, via su organisacion riba tera, y via nos compañeronan cristian maduro. Tin biaha e ta entrena nos cu disiplina tambe. (Hebreonan 12:6) Y tin bes e ta laga nos confronta diferente prueba y dificultad, pa nos por siña persevera. (Santiago 1:2-4) Ademas e ta duna nos e fortalesa cu nos tin mester. Profeta Isaias ta bisa: “Esnan cu spera riba SEÑOR lo haya forsa renoba; nan lo bula bai ariba cu hala manera aguila, nan lo core sin bira fatiga, nan lo cana sin cansa.”—Isaias 40:31.

 Na prome luga, Dios ta duna nos su spirito santo na abundancia, y e spirito aki ta duna nos forsa pa sigui sirbie na un manera aceptabel. (Lucas 11:13) Hopi sirbido di Dios a wanta prueba largo y dificil di nan fe. E hendenan ei ta homber y mohe normal, mescos cu cualkier un di nos. Pero debi cu nan a depende completamente riba Dios, nan a logra persevera. Si, e ‘excelencia di e poder [“poder mas aya di loke ta normal”, NW] ta di Dios y no di nos mes.’—2 Corintionan 4:7.

Un Entrenado Cu Ta Comprende pa Nos

Segun un experto, un di e responsabilidadnan di entrenadonan di antiguedad tawata di “husga ki tipo di ehercicio un atleta mester a haci pa un cierto deporte, y cuanto di e ehercicio ei e mester a haci.” Segun cu Dios ta entrena nos, e ta tene cuenta cu nos sircunstancia personal, nos habilidatnan, nos personalidad total y nos limitacionnan. Segun cu nos ta pasa den e entrenamento cu Yehova ta duna nos, masha hopi bes nos ta suplic’e mescos cu Job: “Corda cu bo a traha mi manera klei.” (Job 10:9) Con nos entrenado comprensivo ta reacciona? Esaki David a skirbi tocante Yehova: “E sa di kico nos ta traha; e ta corda cu ta stof nos ta.”—Salmo 103:14.

Kisas bo tin un problema grave di salu cu ta limita loke bo por haci den sirbishi, of kisas bo ta lucha cu un sintimento di falta di balor propio. Kisas bo ta luchando pa stop cu un mal custumber, of bo ta sinti cu bo no por enfrenta presion di bo pareunan den bo bario, na trabou of na scol. Maske ki sircunstancia bo por ta aden, no lubida nunca cu Yehova ta comprende bo problemanan miho cu ningun otro; asta miho cu bo mes! E ta un entrenado cu interes, y pesei semper e ta cla pa yuda bo si bo hala serca dje.—Santiago 4:8.

Entrenadonan di antiguedad “tawata por a distingui ki ora cansancio y debilidad tawata debi na ehercicio, y ki ora e tawata debi na factornan psicologico manera mal beis of depresion. . . . E entrenadonan tawatin asina tanto autoridad, cu nan por a asta vigila bida priva di  e atletanan y mete den nan bida ora nan a haya cu ta necesario.”

Bo sa sinti bo cansa of suak de bes en cuando debi na e tentacionnan y presionnan sin misericordia cu nos ta enfrenta den e mundo aki? Yehova, bo entrenado, tin hopi interes den bo. (1 Pedro 5:7) E ta mira mesora cualkier señal di debilidad of cansancio spiritual. Yehova ta respeta nos boluntad liber y nos derecho di tuma decision pa nos mes. Pero debi cu e ta interesa den nos bienestar eterno, e ta duna nos tur e yudansa y coreccion cu nos tin mester di dje. (Isaias 30:21) Di ki manera? Pa medio di Bijbel y literatura basa riba Bijbel, ancianonan spiritual den congregacion y nos hermandad mundial amoroso.

“Dominio Propio den Tur Cos”

Claro cu pa un atleta logra exito, e tawatin mester di mas cu djis un bon entrenado. Exito a depende hopi di e atleta mes, y di cuanto dedicacion el a hinca den su entrenamento. Y e entrenamento tawata pisa, pasobra e atleta mester a abstene completamente di sex, alcohol y cierto cuminda. Horacio, un poeta di prome siglo, prome cu Era Comun, a bisa cu e participantenan tawata “abstene di hende mohe y biña” pa nan por “alcansa e meta tan desea.” Y segun F. C. Cook, un erudito di Bijbel, hende cu tawata participa den e weganan mester a “domina nan mes [y] come salu . . . pa dies luna largo.”

Corinto tawata un stad serca di e luga caminda nan tawata tene e Weganan Istmico, y e hendenan di e stad tawata conoce e weganan bon. Pesei Pablo a uza e siguiente comparacion ora el a skirbi e cristiannan di Corinto: “Tur cu ta competi den e weganan ta eherce dominio propio den tur cos. ” (1 Corintionan 9:25) Cristiannan berdadero ta evita e estilonan di bida materialista, inmoral y impuro di mundo. (Efesionan 5:3-5; 1 Huan 2:15-17) Nan mester kita tur caracteristica cu no ta cuadra cu e siñansa di Bijbel y un bida deboto, y desaroya cualidadnan manera di Cristo na nan luga.—Colosensenan 3:9, 10, 12.

Con nos por haci esaki? Wak por ehempel con Pablo ta contesta e pregunta aki cu un ilustracion poderoso: “Mi ta golpia mi curpa y ta hacie mi esclabo, pa no sosode cu, despues cu mi a predica na otronan, mi mes wordo descualifica.”—1 Corintionan 9:27.

Pablo ta siña nos un punto hopi poderoso aki! E no kiermen cu nos mester haci nos curpa dolo di un manera of otro. Mas bien, e ta admiti cu e mes tambe tawatin cu lucha cu su mes. Tin bes e tawata haci cos cu e no tawata kier, y tin bes e tawata keda sin haci loke e tawata kier. Pero el a lucha pa no laga su debilidadnan domin’e nunca. E tawata ‘golpia su curpa’ den e sentido di domina su deseonan y inclinacionnan carnal cu tur su forsa.—Romanonan 7:21-25.

Tur cristian mester haci mescos. Por ehempel, Pablo a papia tocante e cambionan cu algun cristian na Corinto a haci. Prome nan tawata comete fornicacion, adora idolo, practica homosexualidad, ladronicia y cosnan asina. Kico a yuda nan cambia? E poder di e Palabra di Dios y di e spirito santo, hunto cu nan propio determinacion pa biba di acuerdo cu loke Dios ta bisa. Pablo a bisa: “Ma boso a wordo laba, ma boso a wordo santifica, ma boso a wordo hustifica den e nomber di Señor Hesucristo y den e spirito di nos Dios.” (1 Corintionan 6:9-11) Pedro tambe a skirbi tocante hende cu a bandona e tipo di mal custumbernan ei. Nan tur a haci cambionan grandi como cristian.—1 Pedro 4:3, 4.

 Esfuerso Bon Dirigi

Pablo su mente tawata completamente dirigi riba metanan spiritual, y e no tawata laga nada distra’e. El a ilustra esaki door di bisa: “Mi no ta box manera un hende cu ta dal den bashi.” (1 Corintionan 9:26) Con un boxdo di e tempo ei tawata mik su moketenan? E buki The Life of the Greeks and Romans (Bida di e Griegonan y Romanonan) ta contesta: “Nan tawatin mester di mas cu djis forsa bruto. Nan mester por a mira bon cua ta e puntonan debil di nan contrincante. Mes importante tambe tawata cierto golpinan habil cu nan a siña na scol di lucha libre, y nan habilidad di nek un contrincante.”

Nos carni imperfecto ta un di nos contrincantenan. Nos a saca afo caba cua ta algun di nos “puntonan debil”? Nos ta dispuesto di mira nos mes manera otro hende ta mira nos; principalmente manera Satanas kisas ta mira nos? Pa nos logra esei nos mester examina nos mes cu un actitud franco, y nos mester tin e boluntad pa haci cambio. Nos por gaña nos mes masha lihe. (Santiago 1:22) Ta masha facil pa nos hustifica un mal rumbo cu nos tuma! (1 Samuel 15:13-15, 20, 21) Pero, lo ta como si fuera nos ta “dal den bashi.”

Awe den e ultimo dianan, hende cu kier agrada Yehova y gana bida no por permiti nan mes di tarda pa scohe entre bon y malo, entre e congregacion di Dios y e mundo corupto aki. Nan mester evita di duda y bira “un hende di curason dobel [“indeciso”, NW], inconstante den tur su camindanan.” (Santiago 1:8) Nan no mester core pornada tras di cos sin balor. Si un hende core e careda aki sin laga nada distra’e, lo e ta felis y ‘su progreso lo ta bisto pa tur hende.’—1 Timoteo 4:15.

Si, ainda nos ta den e careda cristian. Den su amor, Yehova nos Gran Entrenado ta duna nos e instruccion y yudansa necesario pa nos por persevera y sali victorioso tambe. (Isaias 48:17) Mescos cu atletanan di antiguedad, nos tin cu disiplina nos mes, desaroya dominio propio, y no laga nada distrai nos den e lucha di fe. Nos lo tin recompensa grandi si nos esfuersonan ta bon dirigi.—Hebreonan 11:6.

[Cuadro na pagina 31]

‘Hunt’e cu Azeta’

Parti di e entrenamento di un atleta na Grecia di antiguedad tawata na encargo di e ‘huntado.’ Su trabou tawata di hunta e hombernan su curpa cu azeta prome cu nan bai haci ehercicio. Entrenadonan “a ripara cu un bon masashi di musculo prome cu entrenamento tawatin bon efecto, y cu un masashi leve y cu cuidou despues di un sesion largo di entrenamento tambe tawata bon pa yuda e atleta relaha y recupera”, segun e buki The Olympic Games in Ancient Greece.

Mescos cu azeta literal por relaha bo curpa y yud’e recupera, e Palabra di Dios por corigi y consola un “atleta” cristian cansa y yud’e recupera. Pesei Yehova ta manda anciano di congregacion pa resa cu un hende asina y, na moda di papia, ‘hunt’e cu azeta’ den nomber di Yehova. E medida aki ta esencial pa e persona por recupera spiritualmente.—Santiago 5:13-15; Salmo 141:5.

 

[Plachi na pagina 31]

Despues di haci un sacrificio, e atletanan tawata hura cu nan a train pa dies luna largo

[Reconocemento]

Musée du Louvre, Paris

[Reconocemento di plachi na pagina 29]

Copyright British Museum