Hobennan Cu Ta Stima e Berdad

“CON un hoben por tene su caminda puro?” Esaki ta loke un salmista Hebreo a puntra miles di aña pasa. (Salmo 119:9) Te awe ainda esei ta un bon pregunta, pasobra hobennan ta enfrenta hopi problema den mundo. Hopi hoben a haya AIDS debi na un bida sexual promiscuo. Un di cada dos hende infecta cu e enfermedad mortal aki tin 15 pa 24 aña di edad. Uzo di droga tambe ta hinca hobennan den hopi problema, y ta pone cu hopi di nan ta muri prome cu tempo. E influencia di muzik baho, pelicula, programa di television y video inmoral y violento, y pornografia riba Internet ta haci hobennan hopi daño mes. Pesei, e pregunta cu e skirbido di salmo a haci ta di gran interes pa hopi mayor y hoben di awendia.

E salmista a contesta su mes pregunta di e siguiente manera: “Door di mantene esei [su caminda] segun bo palabra.” Si, Bijbel, e Palabra di Dios, ta ofrece hobennan guia excelente, y hopi di nan ta hayando exito den bida door cu nan ta sigui e guia ei. (Salmo 119:105) Laga nos wak un par di ehempel di hobennan cu ta stima Dios y cu ta haci nan esfuerso pa keda fuerte den sentido spiritual, apesar cu nan ta biba den un mundo materialista y loco pa placer.

Aprecio pa e Guia di Nan Mayornan

Jacob Emmanuel a traha un par di aña como predicado di tempo completo (pionero), prome cu el a bai sirbi na e sucursal di Testigonan di Yehova na Mexico. E ta corda cu aprecio con bin el a desaroya e amor cu e tin pa e sirbishi di Dios: “Aunke tawatin cierto rumannan spiritual cu experencia cu mi a sera amistad cu ne y cu a yuda mi hopi, ta mi mayornan tawata e influencia principal riba mi. Nan a motiva mi pa stima e trabou di predica. Na un manera suave nan a guia mi riba e caminda corecto. Nunca mi no a sinti cu nan tawata pone presion riba mi.”

David tin varios aña caba den e sirbishi di tempo completo, y e ta corda cu e echo cu su mayornan a cuminsa sirbi como pionero special tempo cu e y su ruman tawata chikito, a haci un gran impresion riba dje. Despues cu su tata a muri, su mama a keda den e sirbishi di pionero special. Fuera di predica e bon nobo, su mama a percura pa nan. David ta conta: “Nunca nan no a obliga mi traha pionero, pero nos a disfruta asina tanto di traha pionero como famia, cu e compañerismo y e bon ambiente cu tin den e trabou a impulsa mi tambe pa drenta e trabou.” David ta bisa lo siguiente tocante e importancia di haya bon guia y atencion serca mayornan: “Tur anochi mi mama tawata lesa storia pa nos for di e buki For di paradijs perdí te na paradijs recobrá. * E manera cu el a conta nos e storianan a habri nos apetit pa alimento spiritual.”

Aprecio pa Reunionnan

Algun hoben tin dificultad pa sinti e balor di reunionnan cristian. Nan ta bai reunion door cu nan mayornan ta bai cu nan. Maske ta asina, si nan no stop di  bai reunion, por yega e dia cu nan ta bin gusta e reunionnan. Wak e ehempel di Alfredo. El a cuminsa den e sirbishi di tempo completo cu 11 aña di edad. E ta conta francamente cu tempo e tawatin rond di cinco aña, e tawata purba evita di bai reunion pasobra e tawata haya soño, pero su mayornan no tawata lag’e drumi durante reunion. E ta bisa: “Segun cu mi a crece, pocopoco mi a haya mas interes den e reunionnan, y principalmente ora mi a siña lesa y skirbi, pasobra e ora ei mi a cuminsa duna comentario cu mi mes palabra.”

Cintia, un mucha mohe di 17 aña cu ta sirbi como pionero regular, ta conta con bon asociacion a yud’e siña stima e sirbishi di Dios. E ta bisa: “Door cu mi tawatin un bon relacion cu e rumannan y mi tawata bai reunion regularmente, mi no a sinti falta di amigo di mundo ni di e actividadnan cu hobennan ta gusta, manera bai discoteca. E comentario- y experencianan cu mi tawata tende na reunion a lanta den mi un deseo di duna Yehova tur loke mi tin. Y como cu mi ta sinti cu e miho cos cu mi tin ta mi hubentud, mi a dicidi di uza mi hubentud den su sirbishi.”

Sinembargo, e ta reconoce esaki si: “Un tempo, prome cu mi a batisa, mi tawata uza huiswerk of otro actividad di scol facilmente como excuse pa keda sin bai reunion. Mi a keda sin bai varios reunion, y esaki a cuminsa afecta mi spiritualidad. Mi a cuminsa asocia cu un mucha homber cu no tawata studia Bijbel. Danki na Yehova cu mi a corigi mi rumbo na tempo.”

Un Decision Personal

Ora puntra Pablo, un otro hoben cu ta sirbi Yehova tempo completo, kico segun e ta e cos mas importante pa yuda bo desaroya amor pa e berdad di e Palabra di Dios, e ta contesta: “Segun mi, tin dos cos: studio personal regular y celo pa e trabou di predica. Mi ta masha gradicido na mi mayornan cu nan a siña mi e berdad tocante Yehova, y den mi bista esei ta e miho cos cu nan por a duna mi. Pero, mi mes mester ta combenci di pa ki motibo mi ta stima Yehova, y pa mi por haci esei mi tin cu conoce ‘e hanchura y e profundidad’ di e berdad di Bijbel. Ta asina so nos ta bin sinti un anhelo pa Yehova su Palabra, locual ta lanta den nos un deseo pa papia tocante dje; un deseo cu ta kima ‘manera candela.’ Un celo asina pa e trabou di predica lo yuda nos keda cu e aprecio cu nos ta sinti pa e berdad.”—Efesionan 3:18; Yeremias 20:9.

Jacob Emmanuel, cu nos a menciona caba, tambe ta corda con importante ta pa tuma un decision personal pa sirbi Yehova. E ta conta cu nunca su mayornan no a insisti pa e batisa. “Segun mi, ta bon cu cos a bai asina, pasobra mi por mira e bon resultado. Por ehempel, algun di e hobennan cu mi tawata asocia cu ne hopi, a dicidi di batisa hunto. Maske ta bon cu nan a dicidi di batisa, pa mi tawata bisto cu ta a base di emocion un par di nan a tuma e decision ei, y djis despues di nan bautismo nan celo pa actividadnan di Reino a fria. Den mi caso, mi  mayornan no a presiona mi pa dedica mi mes na Yehova. E tawata un decision personal.”

E Papel Cu Congregacion Ta Hunga

Algun hoben a siña e berdad di e Palabra di Dios riba nan mes, sin yudansa di nan mayornan. Den un sircunstancia asina, sin duda ta un reto pa siña haci loke ta bon y persevera den dje.

Noé ta corda cuanto e berdad a yud’e. For di tempo e tawata chikito e tawata rabia lihe y bira violento. Ora el a cuminsa studia Bijbel, tempo e tawatin 14 aña, su caracter a cuminsa drecha, y su mayornan, cu no tawata Testigo e tempo ei, a keda masha contento. Segun cu Noé a progresa den sentido spiritual, e kier a uza su bida na un manera mas completo den Dios su sirbishi. Actualmente e ta den sirbishi di tempo completo.

Alejandro tambe a cuminsa haya interes den e berdad cristian tempo e tawata hopi jong, apesar cu su mayornan si no tawatin interes. E ta expresa e aprecio cu e ta sinti pa e berdad di e siguiente manera: “Mi a lanta den un famia catolico tradicional. Pero mas y mas mi a cuminsa simpatisa cu comunismo ateista, pasobra Iglesia no tawatin contesta pa e preguntanan cu tawata molestia mi for di tempo cu mi tawata chikito. Yehova su organisacion a yuda mi gana conocemento di Dios. Esei a scapa mi bida literalmente, pasobra si mi no a studia Bijbel, casi sigur lo mi a cai den inmoralidad, alcoholismo of droga. Kisas asta lo mi a drenta un grupo revolucionario, cu consecuencia tristo.”

Con un hoben por keda busca e berdad y keda firme den dje sin e apoyo di su mayornan? Di mes, ancianonan y otro rumannan den congregacion ta hunga un papel hopi importante. Noé ta conta: “Nunca mi no a sinti mi mi so, pasobra semper Yehova tawata serca di mi. Ademas, mi tawatin apoyo di hopi ruman amoroso cu a bira mi tata, mi mama y mi rumannan spiritual.” Actualmente e ta sirbi na Betel y e ta uza su tempo den e sirbishi di Dios. Alejandro tambe ta conta: “Un cos cu semper lo mi keda gradicido p’e ta cu mi tawatin e bendicion di forma parti di un congregacion cu un cuerpo di anciano cu a mustra interes amoroso den mi como persona. Mi ta hopi contento pa esei, pasobra tempo mi a cuminsa studia Bijbel cu 16 aña, e inkietudnan di hubentud tawata afecta mi tambe. E famianan den e congregacion no a bandona mi nunca. Semper tawatin un hende pa ricibi mi cu hospitalidad, y comparti cu mi su cas, su cuminda, pero tambe su curason.” Actualmente Alejandro tin mas cu 13 aña den sirbishi di tempo completo.

Tin hende ta pensa cu religion ta pa hende grandi so. Pero hopi hoben a siña e berdad di Bijbel tempo cu nan tawata hopi jong, y nan a bin stima Yehova y keda fiel na dje. E palabranan di David skirbi na Salmo 110:3 ta pas pa e hobennan aki: “Bo pueblo lo pone su mes disponibel den e dia di bo poder; den e splendor di santidad, for di e matris di marduga, bo hobennan ta pa bo manera serena.”

Pa un hoben, ta un reto pa e siña e berdad y keda firme den dje. Ta dushi pa mira cu hopi hoben ta pega na Yehova su organisacion, bai reunion regularmente y studia Bijbel cu diligencia. Asina nan a logra desaroya un amor berdadero pa e Palabra di Dios y pa su sirbishi!—Salmo 119:15, 16.

[Nota]