Informe di Proclamadonan di Reino

Un Medaya di Reconocemento pa un Salon di Reino

MINISTERIO di Medio Ambiente di Finlandia a declara aña 2000 como “Aña di Diseño di Hardin.” Un di e organisadonan a declara cu e “meta di haci diseño di hardin [landscaping] e tema di aña ta pa corda nos tur cuanto influencia un ambiente berde tin riba nos bida di tur dia y riba nos bienestar.”

Dia 12 di januari 2001, sucursal di Testigonan di Yehova na Finlandia a ricibi un carta di e Asociacion Finlandes di Industria di Diseño di Hardin. E carta a splica cu e Salon di Reino di Testigonan di Yehova na Tikkurila a ricibi un di e medayanan pa e tema di aña debi na e diseño hopi bunita di e hardin, y debi cu e ta asina bon teni. E carta a bisa tambe cu “e aparencia general di e tereno, tanto den zomer como den winter, ta agradabel, bunita y di un calidad halto.”

Testigonan di Yehova a ricibi e medaya durante un evento na cua 400 profesional y hende di negoshi a asisti na Hotel Rosendahl na Tampere, Finlandia. E Asociacion Finlandes di Industria di Diseño di Hardin a saca un comunicado di prensa tambe, cu a bisa: “Na varios parti di nos pais, y casi sin excepcion, Salonnan di Reino di Testigonan di Yehova ta masha bunita diseña. Ta dificil pa un hende cu pasa banda di nan keda sin admira e manera cu nan ta cuida nan cura. E Salon di Reino na Tikkurila ta un ehempel di un hardin magnifico den tur sentido. E edificio y e tereno grandi ta combina bon pa transmiti un sentido di trankilidad y ordo.”

Tin 233 Salon di Reino na Finlandia, y hopi di nan tin hardin masha bunita. Pero loke ta haci e luganan aki bunita mes, ta cu nan ta centronan di adoracion berdadero y di educacion biblico. Mas cu seis miyon Testigo di Yehova rond mundo ta stima nan Salon di Reino, sea cu e tin hopi comodidad of e ta humilde. Ta pesei nan ta asina dispuesto pa cuid’e cu amor y atencion. Porta di e Salonnan di Reino den bo comunidad ta habri pa tur hende!