Storia di Bida

Un Privilegio Precioso di Participa den Expansion Despues di Guera

SEGUN E RELATO DI FILIP S. HOFFMANN

Segundo Guera Mundial a caba di yega su fin na mei di 1945. Na december di e mesun aña ei, Nathan H. Knorr, kende tawata supervisa e actividad di predica di Testigonan di Yehova rond mundo, a bishita Dinamarca cu su secretario di 25 aña, Milton G. Henschel. E rumannan a huur un sala grandi pa e bishita tan spera ei. Nos, e rumannan mas hoben, a keda emociona principalmente door di e discurso di Ruman Henschel, pasobra e tawatin nos edad, y el a scohe pa papia riba e tema: “Corda tambe riba bo Creador den e dianan di bo hubentud.”—Eclesiastes 12:1.

DURANTE e bishita ei nos a haya sa cu tawatin cosnan hopi interesante ta tuma luga pa adelanto di e trabou di predica rond mundo, y cu nos por a forma parti di nan. (Mateo 24:14) Por ehempel, nan a cuminsa un scol nobo na Merca pa entrena rumannan hoben pa bai den e trabou di misionero. Ruman Knorr a enfatisa cu si nos haya un invitacion pa bai e scol, ta “un pasashi di ida so” nos lo haya, y cu nos lo no sa na ki parti di mundo nan lo asigna nos. Toch un par di nos a aplica pa bai.

Prome cu mi describi mi experencianan despues di guera, laga mi bai bek na e aña cu mi a nace: 1919. Varios suseso cu a tuma luga prome y durante e guera a influencia mi bida hopi.

E Zwarte Schaap di Famia Ta Trece Berdad di Bijbel

Ora mi mama tawata na estado di su prome yiu, esta ami, el a pidi Dios pa si mi sali mucha homber mi bira misionero. Su ruman homber tawata un studiante di Bijbel, manera nan  tawata yama Testigonan di Yehova e tempo ei, pero su famia tawata mir’e como e zwarte schaap di famia. Nos tawata biba serca di Kopenhagen, y ora e Studiantenan di Bijbel tawata tene nan congresonan anual na Kopenhagen, Mama tawata invita Tio Thomas pa keda serca nos. Pa aña 1930, su conocemento increibel di Bijbel y su rasonamento logico a combence Mama pa bira un Studiante di Bijbel.

Mama tawata stima Bijbel. Di acuerdo cu e mandamento na Deuteronomio 6:7, el a siña ami y mi ruman mohe ‘ora e tawata sinta den su cas, ora e tawata cana riba caminda, ora e tawata bai drumi of lanta.’ Segun tempo a pasa mi a cuminsa participa den e trabou di predica di cas pa cas. Mi tawata gusta combersa riba temanan manera alma inmortal y fierno, cosnan cu e iglesianan tawata siña hende. Mi por a mustra bon cla for di Bijbel cu e siñansanan ei tawata robes.—Salmo 146:3, 4; Eclesiastes 9:5, 10; Ezekiel 18:4.

Nos Famia Ta Bira Uni

Despues di e congreso na Kopenhagen na 1937, e rumannan di e deposito di literatura di sucursal di Testigonan di Yehova na Dinamarca tawatin mester di yudansa temporal. Net mi a caba di studia na un scol di comercio, y como cu mi no tawatin nada ta stroba mi, mi a ofrece pa yuda na e deposito. Ora cu e trabou na e deposito a caba, nan a pidi mi pa yuda na sucursal. Poco tempo despues mi a sali for di cas y bai biba na sucursal na Kopenhagen, apesar cu mi no a batisa ainda. Door di asocia tur dia cu cristiannan maduro, mi a progresa spiritualmente. E aña despues, dia 1 di januari 1938, mi a simbolisa mi dedicacion na Yehova Dios door di batisa den awa.

Na september di 1939, Segundo Guera Mundial a cuminsa. Anto dia 9 di april 1940, soldanan Aleman a ocupa Dinamarca. Como cu nan a duna Danesnan basta libertad, nos por a sigui cu nos actividad di predica.

E ora ei, un cos maravioso a pasa. Tata a bira un Testigo activo y leal, y felicidad di nos famia a bira completo. Pesei, ora nan a invita ami y cuater otro Danes pa bai e di ocho klas di Scol di Galad, henter mi famia a apoya mi. E curso di cinco luna a cuminsa na september 1946, y nan a ten’e na e bunita scol serca di South Lansing, parti nort di New York.

 Entrenamento na Galad y Despues

Na Galad nos a sera amistadnan masha bunita. Riba un anochi mi tawata cana keiro den cura di e scol hunto cu Harold King di Inglatera, y nos tawata papia tocante unda nan lo manda nos despues cu nos caba cu nos curso. Harold di: “Mi no ta kere cu mi a mira e punta di seronan blanco di Dover pa ultimo bes caba.” E tawatin rason. Pero 17 aña a pasa prome cu e por a mira e seronan ei atrobe, y di e 17 añanan ei el a pasa cuater aña y mei den cashot di un prizon Chines! *

Ora nos a caba di gradua, nan a manda mi Texas, Merca, pa sirbi como superintendente biahero, bishitando congregacionnan di Testigo di Yehova pa yuda nan den sentido spiritual. Nan a ricibi mi man habri. E rumannan di Texas a haya interesante di tin serca nan un mucha homber Europeo cu a caba di sali di Scol di Galad. Pero despues di apenas shete luna na Texas, nan a manda mi Brooklyn, New York. Ei Ruman Knorr a manda mi traha den oficina, y mi a haya ordo pa siña trabou di tur departamento. Despues lo mi mester a bai Dinamarca bek, y pone tur loke mi a siña na practica. Mi mester a haci sigur pa tur cos ser haci mescos cu na Brooklyn. E intencion tawata pa pone tur sucursal rond mundo funciona mescos, pa nan por traha mas eficiente. Despues Ruman Knorr a manda mi Alemania.

Poniendo Instruccionnan na Practica na Sucursalnan

Ora mi a yega Wiesbaden, Alemania, na juli di 1949, hopi stad di Alemania tawata na ruina ainda. E rumannan cu tawata dirigi e trabou di predica tawata hombernan cu a ser persigui for di tempo cu Hitler a subi na poder na 1933. Algun di nan a pasa ocho, dies, y tin bes asta mas aña den camponan di consentracion! Mi a traha tres aña y mei cu e sirbidonan di Yehova ei. Nan ehempel unico ta pone mi corda un comentario di Gabriele Yonan, un historiado Aleman, kende a skirbi: “Despues di conoce Auschwitz y e Holocaust, si no tawata pa e ehempel cu e grupo cristian integro aki a pone tempo di e dictadura di Socialismo Nacional, nos lo mester a duda si ta posibel pa cumpli cu e siñansanan cristian di Hesus.”

Mi trabou na e sucursal ei tawata mescos cu loke mi mester a haci na Dinamarca: introduci un sistema nobo y uniforme di trata cu asuntonan di e organisacion. E cambionan no tawata kiermen cu e manera cu e rumannan tawata traha antes no tawata bon, sino cu a yega ora pa e diferente sucursalnan y oficinanan central cuminsa coopera mas estrecho cu otro. Asina cu e rumannan di Alemania a comprende esaki, nan a yena cu entusiasmo y un excelente spirito di cooperacion.

Na 1952 mi a ricibi un carta for di oficina di Ruman Knorr cu a bisa pa mi muda bai e sucursal na Bern, Suisa. Entrante 1 di januari 1953, mi a ser nombra superintendente di e sucursal ei.

 Mas Goso na Suisa

No mucho tempo despues cu mi a yega Suisa, mi a sera conoci cu Esther na un congreso, y poco tempo despues nos a compromete. Na augustus di 1954 Ruman Knorr a manda yama mi pa bin Brooklyn, caminda nan a revela na mi un trabou nobo y emocionante. Debi cu e cantidad y tamaño di sucursalnan rond mundo a aumenta asina tanto, nan a introduci un areglo nobo. A parti mundo den diferente zona, y pone un superintendente di zona sirbi cada uno di nan. Nan a duna mi dos zona pa mi sirbi: Europa y e area di Mediteraneo.

Poco tempo despues di mi bishita breve na Brooklyn, mi a bai Suisa bek y cuminsa prepara pa e trabou di zona. Ami cu Esther a casa, y el a cuminsa sirbi hunto cu mi na e sucursal di Suisa. Den mi prome biahe mi a bishita casnan di misionero y sucursalnan na Italia, Grecia, Chipre, paisnan di medio oriente y na costa nort di Africa, y tambe Spaña cu Portugal: 13 pais en total. Despues di bishita Bern atrobe, mi a sigui mi biahe y bishita tur pais Europeo na parti west di e Cortina di Hero. Mi tawata for di cas pa seis luna den nos prome aña di matrimonio, sirbiendo nos rumannan cristian.

Sircunstancia Ta Cambia

Na 1957 Esther a haya sa cu e tawata na estado, y ya cu un sucursal no ta traha pa mayornan cu yiu chikito, nos a dicidi di muda bai Dinamarca. Tata a ofrece nos pa keda serca dje. Esther a cuida nos yiu mohe Rakel y mi tata, y ami tawata yuda na e sucursal nobo cu nan a caba di traha. Mi a sirbi como instructor di e Scol di Ministerio di Reino pa superintendentenan di congregacion, y mi a sigui sirbi como superintendente di zona tambe.

Traha como superintendente di zona a nifica cu mi mester a haci biahe largo, y desafortunadamente door di esei mi mester a keda hopi tempo sin wak nos yiu. Esaki tawatin su consecuencianan. Un biaha mi a keda na Paris pa un tempo, y nos a establece un imprenta chikito einan. Esther cu Rakel a bin bishita mi cu trein. Nan trein a para na Gare du Nord. Ami cu Leopold Jontes, di sucursal, a bai ricibi nan. Rakel a keda para riba trapi di e wagon di trein, el a wak Leopold, wak mi, wak Leopold atrobe, anto bula brasa Leopold!

 Otro cambio dramatiko a tuma luga tempo mi tawatin 45 aña. Mi a stop di traha den e ministerio di tempo completo pa mi por traha pa cria mi famia. Debi na mi experencia trahando como Testigo di Yehova mi a logra haya trabou como gerente di exportacion. Despues di traha rond di nuebe aña pa e mesun compania, ora Rakel a caba scol nos a dicidi di responde na e animacion pa muda bai caminda tawatin mas mester di predicado di Reino.

Buscando pa sa ki oportunidad por tin na Norwega, mi a puntra un uitzendburo ki trabou por tin pa mi. Nan contesta no tawata nada alentador. No tawatin mucho speransa pa un homber di 55 aña. Toch mi a tuma contacto cu e sucursal na Oslo, anto huur un cas serca di e pueblo di Drøbak, confiando cu lo mi haya un oportunidad di trabou. Mi a haya un tambe, y despues di esei nos a pasa un temporada hopi dushi di sirbishi di Reino na Norwega.

E cos di mas dushi tawata ora cu mayoria ruman di nos congregacion tawata bai nort pa traha den teritorio cu no a cai bou di ningun congregacion. Nos tawata huur un casita na un luga di kampeer, y tur dia nos tawata sali bai bishita e cunucunan plama den e seronan fantastico. Tawata un goso pa conta e hendenan amigabel ei tocante e Reino di Dios. Nos tawata laga hopi literatura, pero ta te su siguiente aña nos por a bin rebishita e hendenan. Toch nan no tawata lubida nos. Ainda Esther cu Rakel ta corda un biaha cu nos a bai bek y nan a brasa nos manera cos cu nos ta nan famia cu nan tawatin hopi tempo sin mira. Despues di pasa tres aña na Norwega nos a bai Dinamarca bek.

E Goso di Bida di Famia

Poco tempo despues Rakel a compromete cu Niels Højer, un predicado pionero celoso. Despues cu nan a casa, Niels cu Rakel a sigui traha como pionero te ora nan a cuminsa haya yiu. Niels ta un bon esposo y un excelente tata. E tin hopi interes den su famia. Tempran un mainta el a bai cant’i awa cu su yiu riba bais pa nan mira solo sali. Un biciña a puntra e mucha kico nan a haci einan. El a contesta: “Nos a resa na Yehova.”

Un par di aña despues, ami cu Esther a mira Benjamin cu Nadja, nos dos prome nietonan, batisa. Niels tambe tabat’ei, y diripiente mi a topa cu ne cara cara. El a wak mi den mi cara y bisa: “Homber no sa yora.” Pero direct despues nos tur dos tawata yora y brasa otro. Esta un goso ta di tin un yerno cu bo por hari y yora cu ne!

Adaptando Ainda na Sircunstancia

Otro bendicion a presenta ora nan a pidi ami cu Esther bai Dinamarca bek pa sirbi na sucursal. Pero pa e tempo ei ya nan tawatin plan canando pa traha un sucursal hopi mas grandi na Holbæk. Mi tawatin e privilegio di supervisa e trabou di construccion, haci completamente door di trahadonan boluntario cu no a cobra pa traha. Apesar cu nos a haya un winter hopi pisa, pa fin di aña 1982 e proyecto tawata practicamente cla, y nos tur a keda encanta di muda pa e edificio mas grandi y miho ekipa aki!

Mesora ami a cuminsa traha den oficina, y Esther tawata traha como telefonista. Pero despues e mester a opera pa haya hep falso, y un aña y mei despues e mester a opera halblas. Apesar cu tur esnan cu ta traha na sucursal a trata nos cu hopi consideracion, nos a dicidi cu lo ta miho pa tur hende si nos bandona sucursal. Nos a muda bai e congregacion cu nos yiu mohe y nos famia tawata pertenece na dje.

Actualmente Esther su salu no ta bon. Pero mi por bisa cu tur frankesa cu den tur nos añanan di sirbishi hunto, y cu asina tanto cambio di sircunstancia, semper e tawata un sosten y un compañero maravioso pa mi. Apesar cu nos salu ta bai atras, nos tur dos ta participa te caminda nos por den e trabou di predica. Ora mi wak bek riba mi bida, mi ta pensa cu gratitud riba e palabranan aki di un skirbido di salmo: “O Dios, Bo a siña mi for di mi hubentud.”—Salmo 71:17.

[Nota]

[Plachi na pagina 24]

Bahando un cargamento di literatura na sucursal di Alemania, cu tawata den construccion na 1949

[Plachi na pagina 25]

Algun di mi compañeronan di trabou tawata Testigonan manera esakinan, cu a sali for di campo di consentracion

[Plachi na pagina 26]

Cu Esther awe y riba dia cu nos a casa na Betel di Bern, na october di 1955