Yehova Ta Bendiciona y Proteha Hende Obediente

“Esun cu scucha mi lo biba confiadamente, y lo biba trankil, sin miedo di maldad.”—PROVERBIONAN 1:33.

1, 2. Dicon ta importante pa nos obedece Dios? Duna un ehempel.

UN PAR di puyito chikito, tur na lana hel, ta cana piki cuminda den yerba. Nan ta asina concentra, cu nan no sa mes cu tin un warawara ta bula rond den laira. Diripiente e mama ta saca un zonido skerpi di advertencia y ta span su halanan. E puyitonan ta core bai serca dje, y den cuestion di un par di seconde nan ta safe scondi bou di su hala. E warawara ta bandona su atake. * Ki les nos por saca? Cu obediencia ta scapa bida!

² E les aki ta importante specialmente pa cristiannan djawe, pasobra Satanas ta haciendo tur esfuerso posibel pa e gara e pueblo di Dios como su victima. (Revelacion 12:9, 12, 17) Su meta ta pa caba cu nos spiritualidad, pa asina nos perde Yehova su aprobacion y nos chens di biba pa semper. (1 Pedro 5:8) Pero si nos keda serca di Dios y reacciona asina cu E duna nos guia pa medio di su Palabra y organisacion, nos por tin sigur cu lo E cuida nos. Un skirbido di salmo a bisa: “E lo cubri bo cu su plumanan, y bou di su halanan lo bo busca refugio.”—Salmo 91:4.

Un Nacion Desobediente Ta Bira Victima

3. Kico e desobediencia constante di Israel a hiba na dje?

³ Tanten cu e nacion di Israel a obedece Yehova, nan tawata beneficia regularmente di su cuido atento. Pero cada bes e pueblo tawata bandona nan Creador y acudi na dios di palo y piedra, “cosnan vano cu no ta di probecho ni ta libra.” (1 Samuel 12:21) Despues cu e nacion tawatin siglonan ta rebeldia contra Dios, nan a desvia asina tanto, bira asina apostata, cu no tawatin moda di haci mas. Pesei Hesus a lamenta: “O Herusalem, Herusalem, abo cu ta mata e profetanan y ta piedra esnan cu ta wordo manda serca dje! Cuanto biaha mi no tawata kier a hunta bo yiunan, manera un galiña ta hunta su puyitonan bou di su halanan, y boso no tawata kier. Mira, boso cas ta keda desola pa boso!”—Mateo 23:37, 38.

4. Con a bira bisto na aña 70 di nos era cu Yehova a bandona Herusalem?

⁴ Na aña 70 di nos era a bira bisto na un manera hopi tristo cu Yehova a desola of bandona Israel rebelde. E aña ei e ehersito Romano a baha riba Herusalem, cu nan emblemanan cu imagen di aguila teni na halto, y a causa un masacre teribel. Na e ocasion ei e stad tawata yen di hende cu a bini pa celebra Pasco Hudiu. Apesar di tur nan sacrificionan, nan no a logra gana Dios su fabor. Loke a pasa tawata  un recordatorio tragico di loke Samuel a bisa Saul e Rei desobediente: “Acaso SEÑOR tin mes tanto delicia den ofrendanan kima y sacrificionan cu den obediencia na e bos di SEÑOR? Mira, obedece ta miho cu sacrificio, y scucha ta miho cu vet di carne chubato.”—1 Samuel 15:22.

5. Ki clase di obediencia Yehova kier di nos, y con nos por sa cu e tipo di obediencia ei ta posibel?

⁵ Maske Yehova ta para ariba pa nos obedec’e, e ta bon conciente si cu nos ta hende imperfecto, y cu nos tin limitacion. (Salmo 130:3, 4) Loke e kier di nos ta pa nos ta sinsero di curason, y pa nos obedec’e door cu nos tin fe, amor y temor di dje, un temor sano di no kier desagrad’e. (Deuteronomio 10:12, 13; Proverbionan 16:6; Isaias 43:10; Mikeas 6:8; Romanonan 6:17) Un ‘nubia grandi di testigo’ cu a biba prome cu e era cristian a mustra cu ta posibel pa obedece Dios di e manera ei, pasobra nan a keda integro apesar cu nan a enfrenta pruebanan masha grandi, y asta morto. (Hebreonan 11:36, 37; 12:1) Nan a haci Yehova su curason masha contento! (Proverbionan 27:11) Pero tawatin otronan cu no a keda obediente, maske prome nan tawata fiel. Un di nan ta Rei Yoas di antiguo Huda.

Mal Amistad A Hiba un Rei na Ruina

6, 7. Ki clase di Rei Yoas tawata tanten cu Yoiada tawata na bida?

⁶ Como baby, Rei Yoas (of Yehoas) a scapa na wowo di hangua di ser asesina. Ora Yoas a cumpli shete aña di edad, cu curashi Sumo Sacerdote Yoiada (of Yehoiada) a sak’e for di scondi y hacie Rei. Debi cu Yoiada, un homber cu temor di Dios, a actua como Yoas su tata y consehero, e gobernante hoben aki “a haci bon den bista di SEÑOR tur e dianan di e sacerdote Yoiada.”—2 Cronicanan 22:10–23:1, 11; 24:1, 2.

⁷ Un di e bon cosnan cu Yoas a haci ta di renoba e tempel di Yehova. Traduccion di Mundo Nobo ta bisa cu e cos ei tawata “pega cu curason di Yoas.” El a corda Sumo Sacerdote Yoiada cu mester a colecta e impuesto di tempel ‘cu Moises a impone’, for di Huda y Herusalem pa financia e trabou di reparacion. Pues, ta parce cu Yoiada a logra anima e hoben Rei pa studia e Lei di Dios y obedec’e. Como resultado, e trabou riba e tempel y e articulonan di uzo di e tempel a caba den poco tempo.—2 Cronicanan 24:4, 6, 13, 14; Deuteronomio 17:18.

8. (a) Kico tawata e cos principal cu a hiba na Yoas su caida spiritual? (b) Na kico e desobediencia di e Rei a hib’e?

⁸ Lamentablemente, Yoas su obediencia na Yehova no a dura. Dicon? E Palabra di Dios ta splica nos: “Ma despues di morto di Yoiada e oficialnan di Huda a bin y a buig dilanti di Rei, y Rei a scucha nan. Y nan a bandona e cas di SEÑOR, e Dios di nan tatanan, y a sirbi e imagennan di Acera y e idolonan; asina furia a bin riba Huda y Herusalem pa motibo di e culpa di nan aki.” E mal influencia di e oficialnan di Huda a pone e Rei stop di scucha Dios su profetanan. Un di e profetanan aki tawata Zakarias, yiu di Yoiada. Cu curashi el a scual tanto Yoas como e pueblo pa nan desobediencia. Na luga di repenti, Yoas a laga nan piedra Zacarias mata. Esta un homber desobediente y sin heful Yoas a bira! Anto tur esaki ta debi cu el a sucumbi na e mal influencia di e hendenan cu e  tawata anda cu ne!—2 Cronicanan 24:17-22; 1 Corintionan 15:33.

9. Con e fin di Yoas y e oficialnan ta enfatisa e bobedad di desobedece Yehova?

⁹ Con a bai cu Yoas y e oficialnan malbado cu el a anda cu ne, despues cu nan a bandona Yehova? Un forsa militar di Asiria, djis “un cantidad chikito di homber”, a invadi Huda y “a destrui tur e oficialnan di e pueblo for di meimei di e pueblo.” Ademas e invasornan a obliga e Rei entrega su mes pertenencianan, y tambe e oro y e plata di e tempel. Yoas a scapa, pero el a keda un homber kibra y enfermo. Poco tempo despues, algun di su mes sirbidonan a conspira contra dje y asesin’e. (2 Cronicanan 24:23-25; 2 Reinan 12:17, 18) E palabranan di Yehova na Israel ta un gran berdad: “Si bo no obedece SEÑOR bo Dios pa percura di cumpli cu tur su mandamentonan y su statutonan . . . , e maldicionnan aki lo bin riba bo y alcansa bo”!—Deuteronomio 28:15.

Obediencia A Scapa un Secretario

10, 11. (a) Dicon ta bon pa nos reflexiona riba loke Yehova a conseha Baruk? (b) Kico Yehova a conseha Baruk?

¹⁰ Bo sa sinti bo desanima debi cu poco hende cu bo topa den e sirbishi cristian ta mustra interes den e bon nobo? Bo sa sinti un tiki envidia di hende bon para cu ta hiba un bida di placer? Si ta asina, reflexiona riba Baruk e secretario di Yeremias, y riba e conseho amoroso cu Yehova a dun’e.

¹¹ Baruk tawata den e proceso di skirbi un mensahe profetico ora cu Yehova a dirigi Su atencion na dje mes. Dicon? Debi cu Baruk a cuminsa lamenta su suerte den bida y desea algo miho cu su privilegio special di sirbishi na Dios. Yehova a nota e cambio di actitud aki den Baruk y el a dun’e un conseho cla pero bondadoso. El a bis’e: “Bo ta busca cosnan grandi pa bo mes? No busca eseinan; pasobra mira, Mi ta bai trece desaster riba tur carni, . . . ma lo Mi duna bo bo bida como botin, na tur luga cu bo bai.”—Yeremias 36:4; 45:5.

12. Dicon nos no mester busca “cosnan grandi” pa nos mes den e mundo actual?

¹² Ora bo lesa e palabranan cu Yehova a dirigi na Baruk, bo por sinti e interes profundo cu Dios tawatin pa e bon homber aki cu a sirbie cu fieldad y curashi hunto cu Yeremias? Awe tambe Yehova tin interes profundo den cristiannan cu ta sinti e tentacion di bai tras di loke den nan bista por parce un bida mas dushi den e sistema di cosnan aki. Felismente, hopi di nan a reacciona bon, mescos cu Baruk, ora rumannan spiritual responsabel a conseha nan. (Lucas 15:4-7) Si, laga nos tur comprende bon cla cu no tin futuro pa hende cu ta busca “cosnan grandi” pa nan mes den e mundo aki. Pa di prome, hende asina no ta logra haya berdadero felicidad. Pero e cos di mas piyo ta cu pronto nan lo pasa bai hunto cu e mundo aki y tur su deseonan egoista.—Mateo 6:19, 20; 1 Huan 2:15-17.

13. Ki les di humildad nos por saca for di e relato di Baruk?

¹³ E relato di Baruk ta siña nos un les di humildad tambe. Ripara cu Yehova no a conseha Baruk directamente; El a uza Yeremias, y Baruk lo mester a conoce Yeremias su imperfeccionnan y su manianan. (Yeremias 45:1, 2) Toch Baruk no a laga orguyo domin’e. El a mira humildemente ta ken en realidad tawata conseh’e: Yehova. (2 Cronicanan 26:3, 4, 16; Proverbionan 18:12; 19:20) Pesei, si nos ‘dal un paso robes prome cu nos realisa esei’, y nos ricibi e conseho cu nos tin mester for di e Palabra di Dios, laga nos imita Baruk su madures, su manera spiritual di comprende cos y su humildad.—Galationan 6:1, NW.

14. Dicon ta bon pa nos obedece esnan cu ta dirigi nos?

¹⁴ Ora nos tin un actitud humilde asina, esei ta yuda esnan cu ta duna nos conseho tambe. Hebreonan 13:17 ta bisa: “Obedece boso lidernan [literalmente na Griego, “esnan cu ta dirigi boso”] y somete boso mes na nan; pasobra nan ta tene warda riba boso alma, como esnan cu lo duna cuenta. Laga nan haci esaki cu goso  y no cu tristesa, pasobra esaki lo no ta bentahoso pa boso.” Cuanto bes ancianonan no ta acerca Yehova fervientemente den oracion pa pidie duna nan e curashi, e sabiduria y e tacto cu nan tin mester pa por cumpli cu e parti dificil aki di nan trabou di cuida e carnenan! Laga nos “reconoce hombernan asina.”—1 Corintionan 16:18.

15. (a) Con Yeremias a mustra cu e tawatin confiansa den Baruk? (b) Con Baruk a ser recompensa door cu el a obedece humildemente?

¹⁵ Nos sa cu Baruk a ahusta su manera di pensa, pasobra despues Yeremias a dun’e un tarea hopi dificil: e mester a bai na e tempel anto lesa na bos halto e mensahe di huicio cu e mes a skirbi for di boca di Yeremias. Baruk a obedece? Si, el a haci “conforme tur loke profeta Yeremias a orden’e.” Asta el a lesa e mesun mensahe ei pa e oficialnan di Herusalem tambe, algo cu sin duda a exigi hopi curashi. (Yeremias 36:1-6, 8, 14, 15) Imagina bo con gradicido Baruk lo tawata un 18 aña despues ora e Babilonionan a vence e stad, y Yehova a ten’e na bida door cu el a scucha Yehova su spiertamento y a stop di busca “cosnan grandi” pa su mes.—Yeremias 39:1, 2, 11, 12; 43:6.

Obediencia Durante Sitiamento di un Stad Ta Scapa Bida

16. Con Yehova a mustra compasion pa e Hudiunan na Herusalem durante e sitiamento Babilonico na aña 607 prome cu Era Comun?

¹⁶ E compasion cu Dios ta sinti pa hende obediente tawata bisto un biaha mas ora e fin di Herusalem a yega na aña 607 prome cu Era Comun. Ora cu e sitiamento tawata den su etapa mas intenso, Yehova a bisa e Hudiunan: “Mira, Mi ta pone bo dilanti e caminda di bida y e caminda di morto. Esun cu keda den e stad aki lo muri pa medio di spada, hamber y pest; ma esun cu sali y entrega su mes na e Caldeonan cu ta ataca boso lo biba, y e lo tin su mes bida como botin.” (Yeremias 21:8, 9) Apesar cu e habitantenan di Herusalem a merece destruccion, Yehova a mustra compasion pa esnan cu a obedec’e, asta na e ultimo momento crucial ei. *

17. (a) Den ki dos sentido Yeremias su obediencia tawata na prueba ora Yehova a mand’e bisa e Hudiunan sitia pa nan ‘entrega nan mes na e Caldeonan’? (b)  Con nos por saca probecho for di Yeremias su ehempel di obediencia cu curashi?

¹⁷ No tin duda cu Yeremias mes tambe mester tawata obediente pa el a bisa e Hudiunan entrega nan mes. Pa cuminsa, e tawatin celo pa e nomber di Dios. E no tawata kier pa e enemigonan difama Dios su nomber ora nan pretende cu ta nan idolonan sin bida a duna nan victoria. (Yeremias 50:2, 11; Lamentacionnan 2:16) Ademas, Yeremias tawata sa cu e tawata poniendo su mes bida na peliger door di  manda e pueblo entrega nan mes, pasobra hopi hende lo a mira loke el a bisa como un traicion. Toch e no a perde curashi. El a papia e declaracionnan di Yehova obedientemente. (Yeremias 38:4, 17, 18) Nos tambe ta hiba un mensahe impopular, mescos cu Yeremias. Hende a desprecia Hesus pa motibo di e mesun mensahe ei. (Isaias 53:3; Mateo 24:9) Pesei, laga nos no sinti “temor pa hende.” Laga nos mustra curashi y obedece Yehova y confia completamente den dje, mescos cu Yeremias.—Proverbionan 29:25.

Obediencia Ora Gog Ataca

18. Ki test di obediencia Yehova su sirbidonan ta bai enfrenta den futuro?

¹⁸ Pronto henter Satanas su mundo malbado lo ser destrui den un “gran tribulacion” sin precedente. (Mateo 24:21) Sin duda, tanto prome como durante e gran tribulacion, e pueblo di Dios lo pasa den testnan grandi di nan fe y nan obediencia. Bijbel ta bisa nos por ehempel cu Satanas, den su papel di “Gog di tera di Magog” lo lansa un atake total contra Yehova su sirbidonan. E ta bai mobilisa forsanan militar cu Bijbel ta describi como “un ehersito poderoso . . . , manera un nubia cu ta tapa tera.” (Ezekiel 38:2, 14-16) Yehova ta habri su “halanan” pa proteha hende obediente, y e pueblo di Dios, den minoria y sin ningun arma, lo busca refugio bou di nan.

19, 20. (a) Dicon tawata importante pa e Israelitanan na Lama Cora ta obediente? (b)  Con nos por saca beneficio awe door di medita cu oracion riba e relato di Lama Cora?

¹⁹ E situacion aki ta pone nos corda tempo cu Israel a sali for di Egipto. Despues cu Yehova a dal Egipto cu dies plaga devastador, el a guia su pueblo na e Tera Priminti, pero no via e caminda di mas cortico. El a hiba nan Lama Cora, caminda lo tawata facil pa hinca nan den un skina y ataca nan. For di un punto di bista militar, e decision ei a parce masha malo. Si abo tabat’ei, lo bo a obedece e palabra di Yehova duna via Moises y marcha bai Lama Cora cu pleno confiansa, maske bo tawata sa cu e Tera Priminti a keda den otro direccion?—Exodo 14:1-4.

²⁰ Ora nos lesa Exodo capitulo 14 nos ta mira con Yehova a libra su pueblo den un demostracion impresionante di poder. Relatonan asina por fortalece nos fe hopi si nos tuma tempo pa studia nan y medita riba nan! (2 Pedro 2:9) Na su turno, un fe fuerte ta fortalece nos pa obedece Yehova asta ora loke e ta pidi di nos ta parce di bai contra logica humano. (Proverbionan 3:5, 6) Pesei, puntra bo mes: ‘Mi ta traha duro pa fortifica mi fe door di studia Bijbel diligentemente, haci oracion, medita y asocia regularmente cu e pueblo di Dios?’—Hebreonan 10:24, 25; 12:1-3.

Obediencia Ta Duna Speransa

21. Ki bendicionnan esnan cu obedece Yehova ta haya awor y den futuro?

²¹ Ora cu obediencia na Yehova ta caracterisa hende su bida, nan ta mira cumplimento di Proverbionan 1:33 for di awor. E ta bisa: “Esun cu scucha Mi [cu obediencia] lo biba confiadamente, y lo biba trankil, sin miedo di maldad.” E palabranan di consuelo aki lo cumpli na un  manera maravioso durante e dia di vengansa di Yehova cu ta na caminda! De echo, Hesus a bisa su disipelnan: “Ora cu e cosnan aki cuminsa tuma luga, wak ariba y lanta boso cabes, pasobra boso redencion ta yegando serca.” (Lucas 21:28) Claramente, ta esnan cu ta obediente na Dios so lo tin e confiansa pa haci loke e palabranan aki ta bisa.—Mateo 7:21.

22. (a) Ki otro motibo Yehova su pueblo tin pa confi’e? (b)  Ki asuntonan nos siguiente articulo lo trata?

²² Otro cos cu ta duna nan confiansa ta cu “SEÑOR Dios no ta haci nada, sin cu e revela su conseho secreto na su sirbidonan, e profetanan.” (Amos 3:7) Awendia Yehova no ta inspira profeta manera den pasado. En bes di esei el a apunta un grupo cu ta sirbi como esclabo fiel, pa nan duna su hendenan di cas cuminda spiritual na ora. (Mateo 24:45-47) Pesei ta masha importante pa nos ta cla pa obedece e “esclabo” aki. Manera nos siguiente articulo lo mustra, e obediencia ei ta refleha nos actitud pa Hesus tambe, kende ta shon of doño di e “esclabo.” Ta e, ‘nacionnan lo obedece.’—Genesis 49:10.

[Nota]

Bo Ta Corda?

• Kico e desobediencia constante di Israel a hiba na dje?

• Con e hendenan cu Rei Yoas a anda cu ne a influensi’e, tanto ora e tawata hoben como despues?

• Ki lesnan nos por siña for di Baruk?

• Dicon Yehova su pueblo obediente no tin nodo di sinti miedo segun cu e mundo actual ta yega su fin?

[Preguntanan di Estudio]

[Plachi na pagina 13]

Bou di guia di Yoiada, e hoben Yoas a obedece Yehova

[Plachi na pagina 15]

Mal amistad a influensia Yoas pa laga mata e profeta di Dios

[Plachi na pagina 16]

Abo lo a obedece Yehova y bira testigo di su poder impresionante di salba?