‘Bira Sabi pa Resto di Bo Bida’

“Mayoria hende ta uza nan prome añanan di bida pa haci nan ultimo añanan di bida infelis.” Asina Jean de La Bruyère, un escritor Frances di siglo 17 a bisa. En berdad, un hoben indeciso lo por keda titubia pa actua, y despues sinti su mes malcontento y desilusiona. Di otro banda, un hoben terco por persisti den un proceder bobo y despues perde tur su goso den bida ora e ta mas grandi. Tanto esun cu a keda sin haci bon como esun cu a haci malo lo por haya su mes ta yora malai despues.

Con hobennan por evita un futuro asina? E Palabra di Dios ta conseha hobennan cu ta indeciso: “Corda . . . riba bo Creador den e dianan di bo hubentud, prome cu e dianan malo bin y e añanan yega serca, di cualnan lo bo bisa: ‘Mi no tin goso den nan.’” (Eclesiastes 12:1) Si bo ta un hoben, dal paso positivo pa siña tocante “bo Creador” awor cu bo ta jong.

Ma con Bijbel ta yuda hobennan evita e locura di hubentud? E ta bisa: “Scucha conseho y acepta disiplina, pa bo por ta sabi pa resto di bo bida.” (Proverbionan 19:20) Tambe Bijbel ta mustra claramente cu esnan cu ta rechasa e sabiduria di Dios door di neglish’e of rebela den nan hubentud, of na cualkier edad, ta haya nan cu e frutanan amargo. (Proverbionan 13:18) Di otro banda, esnan cu ta haci caso di instruccionnan dibino lo haya “dianan largo, bida largo y pas”, un bida di placer y satisfaccion.—Proverbionan 3:2.