Pregunta di Lector

Por papia di union di fe ora cumpra un edificio for di un otro grupo religioso y combertie den un Salon di Reino?

Por lo general Testigonan di Yehova ta evita di atende cosnan asina cu otro religionnan. Pero toch, un transaccion asina lo no ta un acto di union di fe. Nos por mir’e como simplemente un deal comercial cu ta tuma luga un solo biaha. E congregacion local di Testigonan di Yehova no ta colaborando cu un otro grupo religioso pa construi un luga di adoracion pa nan tur dos uza.

Den bista di Yehova, ki ora por papia di un acto di union di fe? Tuma nota di e instruccion cu apostel Pablo a duna: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad? Of ki harmonia Cristo tin cu Belial, of kico un creyente tin comun cu un incredulo? Of ki combenio e tempel di Dios tin cu idolo? . . . ‘Pesei, sali for di meimei di nan y separa boso mes, SEÑOR ta bisa. Y no mishi cu loke ta impuro; y lo mi ricibi boso.’” (2 Corintionan 6:14-17) Kico Pablo tawata kiermen cu e palabranan “compañerismo” y “comunion”?

E compañerismo cu Pablo ta menciona tin di aber claramente cu participacion den adoracion y actividadnan spiritual hunto cu hende cu ta adora imagen y hende incredulo. El a spierta e Corintionan pa no ‘tuma parti na e mesa di demoño.’ (1 Corintionan 10:20, 21) Di manera cu un acto di union di fe ta ora un religion ta participa den adoracion of tene comunion spiritual cu otro organisacionnan religioso. (Exodo 20:5; 23:13; 34:12) Ora cumpra un edificio cu un organisacion religioso tawata uza, ta haci esaki simplemente pa haya e structura basico necesario pa un Salon di Reino. Prome cu uz’e como Salon di Reino, ta saca tur obheto cu por tawatin conexion cu adoracion falso. Ora caba di prepara e edificio, ta dedic’e na Yehova cu e proposito exclusivo di ador’e. No tin comunion ni compañerismo entre adoracion berdadero y adoracion falso.

Ora di atende e detayenan relaciona cu un compra asina, mester mantene e contacto cu e otro partido na un minimo y limit’e estrictamente na e aspectonan di e compra. Ta bon pa miembronan di e congregacion cristian corda riba e spiertamento di Pablo pa no uni den un “yugo desigual cu incredulonan.” Aunke nos no ta sinti nos superior cu esnan cu tin otro fe, nos ta evita di participa cu nan den actividadnan social of join nan den nan adoracion. *

Awor, un congregacion por huur un edificio cu ta pertenece na un organisacion religioso? Generalmente, asunto di huurmentu ta pone cu e rumannan mester ta den contacto regular cu miembronan di otro religion, loke ta algo cu mester evita. Asta pa huur un edificio asina pa un solo ocasion, e cuerpo di anciano mester haci nan mes e siguiente preguntanan: Lo tin imagen y simbolo religioso paden of pafo di e edificio? Kico e comunidad lo bisa di e echo cu nos ta uza e luga ei? Uzamento di e luga ei lo pone un of mas persona den e congregacion trompica? (Mateo 18:6; 1 Corintionan 8:7-13) E ancianonan tin cu evalua e factornan aki y despues dicidi kico ta miho pa haci. Tambe nan mester tene cuenta cu nan consenshi y cu consenshi di e congregacion ora nan ta determina si mester cumpra y comberti un edificio asina den un Salon di Reino.

[Nota]

[Plachi na pagina 27]

E edificio aki tawata un sinagoga; a cumpr’e y combertie den un Salon di Reino