“Resisti Diabel”
“Resisti Diabel”
“Resisti Diabel y e lo hui for di boso.”—SANTIAGO 4:7.
1. Con nos por describi e mundo actual, y dicon e unginan y nan compañeronan mester ta masha alerta?
“DIOS a disparce, ma Diabel a keda.” E palabranan ei di e escritor Frances André Malraux ta pas bon pa e mundo cu nos ta biba aden, ya cu e obranan di hende sigur ta refleha mas e mañanan di Diabel cu e boluntad di Dios. Satanas ta hiba hende den mal caminda uzando “tur poder y señalnan y maraviyanan falso, y cu tur e engaño di inikidad pa esnan cu ta perece.” (2 Tesalonicensenan 2:9, 10) Sinembargo, den e “ultimo dianan” aki Satanas ta concentra tur su esfuerso riba Dios su sirbidonan dedica, y e ta bringa contra cristiannan ungi “kendenan ta warda e mandamentonan di Dios y tin e [“trabou di duna”, NW] testimonio di Hesucristo.” (2 Timoteo 3:1; Revelacion 12:9, 17) E cristiannan ungi aki, hunto cu nan compañeronan cu tin e speransa di biba riba tera, mester ta masha alerta.
2. Con Satanas a gaña Eva cu astucia, y ki temor apostel Pablo a expresa?
2 Satanas ta un gañado di marca mayor. Uzando un colebra como capa, el a gaña Eva. El a laga Eva kere cu e por a haya mas felicidad si e actua independiente di Dios. (Genesis 3:1-6) Un cuater mil aña despues, apostel Pablo a expresa e temor di cu kisas e cristiannan ungi na Corinto lo bira victima di Satanas su mañanan. Pablo a skirbi: “Mi tin miedo cu, mescos cu e colebra a gaña Eva cu su astucia, boso mentenan lo wordo desvia for di e debocion simpel y puro na Cristo.” (2 Corintionan 11:3) Satanas ta bruha hende su mente y ta troce nan manera di pensa. Mescos cu el a gaña Eva cu astucia, e por pone cristiannan rasona robes y kere cu nan felicidad ta depende di algo cu Yehova y su Yiu ta desaproba.
3. Yehova ta percura ki tipo di proteccion contra Diabel?
3 Nos por compara Satanas cu un yagdo di parha cu ta pone trampa pa cohe victimanan cu no ta sospecha di nada. Pa evita e trampanan di Satanas, nos tin cu “biba bou di e proteccion di e Haltisimo”, esta, e proteccion cu Yehova ta percura pa esnan cu ta reconoce den tur loke nan haci, cu ta Yehova ta e gobernante supremo. (Salmo 91:1-3) Nos tin mester di tur e proteccion cu Dios ta duna mediante su Palabra, su spirito santo y su organisacion pa asina nos “por para firme contra e trampanan di Diabel.” (Efesionan 6:11) E palabra Griego pa “trampanan” por ser traduci tambe como “maña” of “triki.” No tin duda cu Diabel ta uza hopi triki y maña den su intento pa gara e sirbidonan di Yehova.
Trampanan Cu Satanas A Pone pa e Prome Cristiannan
4. Den ki tipo di ambiente e prome cristiannan tawata biba?
4 Cristiannan cu a biba den e prome dos siglonan di nos era tawata biba na momento cu e Imperio Romano tawata den su tempo di gloria. E Pax Romana (Pas Romano) a yuda comercio florece. Y e prosperidad aki a trece hopi tempo liber pa e clase social na mando. E gobernantenan a percura pa e pueblo tin hopi dibirticion disponibel ya asina nan lo no a rebela. Durante algun periodo, tawatin mes tanto dia di fiesta cu dia di trabou. Pa distrai e hendenan, e lidernan a uza fondonan publico pa tene e pueblo su bariga yen y curason contento.
5, 6. (a) Dicon tawata inapropiado pa cristiannan frecuenta e teatro- y anfiteatronan Romano? (b) Ki triki Satanas a uza, y con cristiannan por a evit’e?
5 E situacion aki a forma un peliger pa e prome cristiannan? Wel, a base di e spiertamentonan cu escritornan cu a biba djis despues di e apostelnan a skirbi (manera por ehempel Tertuliano), nos por saca afo cu mayoria actividad di tempo liber di e temporada ei a representa un peliger moral y spiritual pa cristiannan berdadero. Pa cuminsa, mayoria fiesta y weganan publico a ser teni na honor di diosnan pagano. (2 Corintionan 6:14-18) Na e teatronan, asta hopi di e obranan clasico tawata sea masha inmoral of masha violento, yen di dramamento di sanger. Despues di tempo, e publico a perde smak den e obranan clasico y nan a ser remplasa pa shownan di mimica masha inmoral mes. Historiado Jérôme Carcopino ta bisa den su buki Daily Life in Ancient Rome (Bida Diario den Antiguo Roma): “Den e obranan teatral aki nan a permiti e actrisnan kita full sunu . . . Nan a drama sanger na abundancia. . . . [E actuacion] a refleha practicanan sexual innatural extremo cu ya a bira masha comun pa mayoria hende den e capital. E presentacionnan ei no a duna nan asco, pasobra ya pa hopi tempo e matansanan horibel di e anfiteatro a haci nan sin heful y a corumpi nan instintonan.”—Mateo 5:27, 28.
6 Den e anfiteatronan, gladiado a bringa contra otro te na morto of nan a bringa contra bestia salbahe, sea nan a mata e bestianan of e bestianan a mata nan. Criminalnan condena a ser benta pa bestia feros y, despues di tempo hopi cristian tambe. Asta den e prome siglonan ei, Satanas su triki tawata pa pone hende perde nan repudio contra inmoralidad y violencia te ora cu e cosnan ei a bira algo normal y e pueblo mes tawata exigi nan. E unico manera pa evita e trampa ei tawata door di keda leu di teatro y anfiteatro.—1 Corintionan 15:32, 33.
7, 8. (a) Dicon lo no tawata sabi pa un cristian bai wak careda di garoshi? (b) Con Satanas por a uza e bañonan Romano pa cohe cristiannan den trampa?
7 E Romanonan tawata tene caredanan di garoshi den stadionnan masha grandi. Esei sin duda tawata masha excitante, pero inaceptabel pa e cristiannan ya cu hopi bes e multitud a bira violento. Un escritor di siglo 3 a informa cu algun di e hendenan den tribuna tawata bringa cu otro, y Carcopino ta bisa cu “astrologo y prostituta tawatin nan negoshi” den e gangnan bou di e stadion. Ta bisto cu e stadion Romano no tawata un luga pa cristian bishita.—1 Corintionan 6:9, 10.
8 Kico di e famoso bañonan Romano? Un cos ta sigur, no tawatin nada malo den baña pa tene curpa limpi. Pero hopi di e bañonan Romano tawata facilidadnan masha grandi cu tawatin entre otro cambernan pa masashi, salanan pa haci deporte, pa hunga wega di placa y luganan pa come y bebe. Aunke teoreticamente tawatin oranan spesifico pa sea homber of mohe uza e bañonan, hopi bes nan a permiti ambos sexo baña hunto. Clemente di Alehandria a skirbi: “E bañonan ta habri pa tur hende sin distincion, homber cu mohe; y ei nan ta kita sunu pa entrega na libertinahe.” Pues, Satanas facilmente por a uza un establecimento publico aceptabel como un trampa pa cristiannan. Esnan sabi no a bai luganan asina.
9. Cua ta e trampanan cu e prome cristiannan mester a evita?
9 Wega di placa tawata un pasatempo popular den e pueblo ora e Imperio Romano tawata den su gloria. E prome cristiannan por a evita e gamblemento cu tawata tuma luga na e caredanan di garoshi door di djis keda sin bai einan. Na un escala chikito tambe nan tawatin wega di placa den cambernan patras na luganan di hospeda y den bar. Hungadonan tawata bet riba e cantidad di piedra of weso cu ta par of cu no ta par den man di e otro hungado. Wega di placa a duna e hendenan su bida mas smak, pasobra esei a ofrece nan e speransa di gana placa facil. (Efesionan 5:5) Ademas, hopi bes e mucha mohenan cu tawata sirbi den e barnan ei tawata prostituta, aumentando e peliger di inmoralidad sexual. Esakinan tawata algun di e trampanan cu Satanas a pone pa cristiannan cu a biba den e stadnan di e Imperio Romano. E situacion ta hopi diferente awe?
E Trampanan di Satanas Awe
10. Con e situacion awe ta parce e situacion cu tawata reina den e Imperio Romano?
10 En general, Satanas su trikinan no a cambia despues di tur e siglonan aki. Pa “Satanas no tuma bentaha” riba e cristiannan cu a biba den e stad inmoral di Corinto, apostel Pablo a duna nan conseho fuerte. El a bisa: “[Satanas] su trikinan no ta desconoci pa nos.” (2 Corintionan 2:11) Den hopi pais desaroya, e situacion awe ta casi mescos cu esun cu a reina durante e tempo di gloria di e Imperio Romano. Hopi hende awe tin mas tempo liber cu nunca. Loterianan di estado ta duna asta hende pober un rayo di speransa. Tin un abundancia di dibirticion barata pa ocupa e hendenan su mente cu ne. Stadionnan di deporte ta yen yen, hende ta bet, multitudnan sa bira violento y hopi bes hungadonan tambe. Musica degrada ta den hende su horea tur ora, y shownan masha inmoral ta ser presenta riba ecsenario di teatro y tambe riba pantaya di cine y television. Den algun pais, ta popular pa homber cu mohe baña hunto den sauna y fuentenan di awa cayente, pa no papia mes di landamento sunu na algun beach. Mescos cu den e prome siglonan di cristianismo, Satanas ta purba tenta e sirbidonan di Dios mediante actividadnan mundano den tempo liber.
11. Ki trampanan tin den e deseo pa relaha y disfruta di tempo liber?
11 Den un mundo caminda stress ta comun, ta normal pa sinti cu bo mester relaha bo mes of haya un cambio di actividad. Sinembargo, mescos cu e bañonan Romano tawatin rasgonan cu a forma un posibel peliger pa e cristiannan di prome, algun resort y luga di pasa facansi a resulta di ta un trampa cu Satanas a uza pa hiba cristiannan djawe na inmoralidad of bebemento di mas. Pablo a skirbi e cristiannan na Corinto: “No laga hende gaña boso: ‘Mal compania ta daña bon custumber.’ Uza boso sano huicio manera mester ta, y stop di haci pica; pasobra algun no tin conocemento di Dios.”—1 Corintionan 15:33, 34.
12. Cua ta algun triki cu Satanas ta uza pa gara e sirbidonan di Yehova djawe?
12 Nos a mira den e caso di Eva con Satanas a uza astucia pa bruha su pensamento. (2 Corintionan 11:3) Awe, un di e trampanan di Diabel ta pa pone cristiannan pensa cu si nan bai mas leu posibel den purba mustra hende cu Testigonan di Yehova ta mescos cu otro hende, nan lo logra atrae algun na e berdad cristian. Pero tin biaha nan ta bai mucho leu y net lo contrario ta sosode. (Hageo 2:12-14) Un otro triki di Satanas ta di duna cristiannan dedica, tanto hoben como adulto, e curashi pa hiba un bida dobel y “haci spirito santo di Dios tristo.” (Efesionan 4:30) Tin cristian cu a cai den e trampa aki door di haci mal uzo di Internet.
13. Ki trampa camufla ta un di e mañanan di Diabel, y ki conseho den Proverbionan ta na su luga aki?
13 Un otro trampa di Satanas ta practicanan sobrenatural camufla. Un cristian berdadero lo no mete deliberadamente den satanismo of spiritismo. Sinembargo, algun cristian sin ripara ta baha nan vigilancia ora ta trata di wak pelicula y serienan na television, hunga weganan di video y asta lesa buki pa mucha y comics cu ta enfatisa violencia of practicanan sobrenatural. Nos mester evita tur cos cu ta bai den direccion di cosnan sobrenatural. E proverbio sabi ta bisa: “Sumpiña y trampa ta den caminda di e hende perverso; esun cu ta warda su alma lo keda leu di nan.” (Proverbionan 22:5) Siendo cu Satanas ta “e dios di e mundo aki”, cualkier cos cu ta masha popular lo por tin un di su trampanan scondi den dje.—2 Corintionan 4:4; 1 Huan 2:15, 16.
Hesus A Resisti Diabel
14. Con Hesus a resisti e prome tentacion di Diabel?
14 Hesus a pone un excelente ehempel di resisti Diabel y pon’e hui. Despues cu Hesus a batisa y a yuna pa 40 dia, Satanas a bai tent’e. (Mateo 4:1-11) Su prome tentacion a purba probecha di e hamber natural cu Hesus tawatin despues di e yunamento. Satanas a invita Hesus pa haci su prome milager pa satisface un deseo fisico. Citando Deuteronomio 8:3, Hesus a nenga di uza su poder na un manera egoista y a pone alimento spiritual prome cu cuminda fisico.
15. (a) Ki deseo natural Satanas a probecha di dje pa tenta Hesus? (b) Cua ta un di Diabel su mañanan principal contra e sirbidonan di Dios djawe, y con nos por resistie?
15 Un punto interesante relaciona cu e tentacion aki ta cu Diabel no a purba laga Hesus comete un pica sexual. Den e caso aki, hamber a parce di ta e deseo fisico mas fuerte pa uza pa tenta Hesus, ya cu hamber di mes ta pone bo anhela cuminda. Ki tentacion Diabel ta uza pa desvia e pueblo di Dios awe? Nan ta hopi y varia, pero tentacionnan sexual ta un di e mañanan principal cu e ta uza den su intento pa kibra e integridad di Yehova su pueblo. Door di imita Hesus, nos por resisti Diabel y su tentacionnan. Mescos cu Hesus a derota Satanas su intentonan pa combenc’e door di corda riba textonan biblico apropiado, nos tambe por corda riba textonan manera Genesis 39:9 y 1 Corintionan 6:18 ora nos ta confronta tentacion.
16. (a) Con Satanas a tenta Hesus pa di dos biaha? (b) Den ki maneranan Satanas lo por purba tenta nos pa pone Yehova na prueba?
16 Siguientemente Diabel a reta Hesus pa bula for di e muraya di tempel y wak si Dios lo por a proteh’e mediante su angelnan. Citando Deuteronomio 6:16, Hesus a nenga di tenta of pone su Tata na prueba. Podise Satanas no ta tenta nos pa bula for di un muraya di tempel, pero si e por tenta nos pa pone Yehova na prueba. Nos ta sinti e tentacion pa wak te con leu nos por imita estilonan mundano den nos forma di bisti y peña sin ser spierta? Nos ta ser tenta pa participa den dibirticion dudoso? Si ta asina, anto kisas nos ta poniendo Yehova na prueba. Si nos tin e inclinacionnan ei, na luga di hui for di nos, Satanas lo keda banda di nos, purbando constantemente pa tenta nos pa bai contra Dios hunto cu ne.
17. (a) Con Diabel a tenta Hesus pa di tres biaha? (b) Con Santiago 4:7 por resulta cierto den nos caso?
17 Ora Satanas a ofrece Hesus tur e reinonan di mundo a cambio di un solo acto di adoracion, Hesus a bolbe resistie door di cita un texto biblico y tuma un posicion firme na banda di e adoracion exclusivo di su Tata. (Deuteronomio 5:9; 6:13; 10:20) Talbes Satanas no ta ofrece nos e reinonan di mundo, pero constantemente e ta tenta nos cu e gloria di cosnan material, asta cu e speransa di un pida reino personal. Nos ta reacciona mescos cu Hesus, dunando nos debocion exclusivo na Yehova? Si ta asina, loke a pasa cu Hesus lo pasa cu nos. E relato di Mateo ta bisa: “E ora ei Diabel a lag’e.” (Mateo 4:11) Satanas lo laga nos si nos tuma un posicion firme contra dje door di corda riba principionan biblico apropiado y pone nan na practica. Disipel Santiago a skirbi: “Resisti Diabel y e lo hui for di boso.” (Santiago 4:7) Un cristian a skirbi e sucursal di Testigonan di Yehova na Francia: “Di berdad Satanas ta astuto. Apesar di tur mi bon intencionnan, ta dificil pa mi domina mi sintimentonan y mi deseonan. No obstante, cu curashi, pasenshi y riba tur cos, cu e yudansa di Yehova, mi a logra mantene mi integridad y tene duro na e berdad.”
Completamente Ekipa pa Resisti Diabel
18. Ki armadura spiritual ta ekipa nos pa resisti Diabel?
18 Yehova a percura un armadura completo pa nos, pa nos por “para firme contra e trampanan di Diabel.” (Efesionan 6:11-18) Nos amor pa e berdad lo faha nos heup, es decir, prepara nos pa actividad cristian. Nos determinacion pa tene na Yehova su normanan husto lo ta manera un corasa cu ta proteha nos curason. Si nos pianan ta bisti cu e evangelio of bon nobo, nos lo participa cu regularidad den e trabou di predica y esaki lo fortalece y proteha nos spiritualmente. Nos fe fuerte lo ta manera un escudo grandi cu ta proteha nos contra “e flechanan sendi di e malbado”, su atakenan y tentacionnan astuto. Nos speransa sigur den e cumplimento di Yehova su promesanan lo ta manera un helm cu ta proteha nos pensamentonan y ta duna nos pas mental. (Filipensenan 4:7) Si nos bira experto den maneha e Palabra di Dios, lo e ta manera un spada cu nos por uza pa libra hende di ta catibo spiritual di Satanas. Tambe nos lo por uza e spada pa defende nos mes, mescos cu Hesus a haci ora Satanas a tent’e.
19. Fuera di “resisti Diabel”, kico mas ta necesario?
19 Si nos keda bisti cu e “armadura completo di Dios” aki y sigui haci oracion continuamente, nos por tin sigur di Yehova su proteccion ora Satanas ataca nos. (Huan 17:15; 1 Corintionan 10:13) Pero Santiago a mustra cu “resisti Diabel” so no ta basta. Mas cu tur cos, nos tin cu ‘somete nos na Dios’, kende ta percura pa nos. (Santiago 4:7, 8) Den e siguiente articulo nos lo trata con nos por haci esaki.
Con Lo Bo Contesta?
• Cua ta e trampanan di Satanas cu e cristiannan di prome mester a evita?
• Cua ta e mañanan cu Satanas ta uza awe pa purba gara sirbidonan di Yehova?
• Con Hesus a resisti e tentacionnan di Diabel?
• Cua ta e armadura spiritual cu ta yuda nos resisti Diabel?
[Preguntanan di Estudio]
[Plachi na pagina 8, 9]
Hesus a resisti Diabel firmemente
[Plachi na pagina 10]
Cristiannan di prome siglo a rechasa dibirticion violento y inmoral
[Reconocemento]
The Complete Encyclopedia of Illustration/J. G. Heck