Ta Forsanan Malbado Ta na Mando?

“Ta reina un confusion total na mundo, como si fuera podernan sobrenatural ta trata concientemente di blokia tur salida di emergencia.”—Jean-Claude Souléry, periodista.

‘E echo cu hende ta sinti cu nan no por haci masha cu e situacion sa lanta e idea serca nan cu un poder masha malbado ta activo.’—Josef Barton, historiado.

E CONSTERNACION total cu e atakenan terorista di 11 di september 2001 a causa, a pone hopi hende para keto y pensa profundamente. Michael Prowse a skirbi den Financial Times di Inglatera: “Ni bestia lo no a comete—ni por a comete—e barbaridadnan ei contra otro.” Un editorial di New York Times a remarca cu ademas di e planiamento cu e atake a rekeri, “ta importante tambe pa pensa riba e odio inmenso cu mester a existi pa por a realisa e atake ei. Ta un odio cu ta surpasa loke ta comun den guera, cu no conoce limite, cu no ta respeta ningun combenio.”

Hende di varios creencia ta pensa cu posiblemente tin un poder sumamente maligno tras di tur maldad. Un comerciante di Sarajevo cu tawata testigo di e horornan di e odio etnico na Bosnia a declara: “Despues di un aña di e guera di Bosnia mi ta kere cu ta Satanas ta dirigi cosnan. Ta un locura total.”

Ora a puntra e historiado Jean Delumeau si e ta kere den Diabel, el a contesta: “Con mi por nenga e poder di maldad ora mi mira tur loke ta sosodiendo y loke a sosode for di dia cu mi a nace: Segundo guera mundial cu mas di 40 miyon victima; Auschwitz y camponan di morto; e genocidio na Cambodia; e tirania sangriento di e regimen di Ceauşescu; tortura como un forma di gobernacion den hopi luga na mundo. E lista di horornan ta interminabel. . . . Pues mi ta kere cu nos tin rason ora nos yama e actonan ei ‘diabolico.’ Ta un Diabel, cu ta e simbolo di e spirito y poder di maldad cu ta activo den mundo, a inspira e actonan ei; no un Diabel cu cacho y pata di cabrito.”

Mescos cu Jean Delumeau, pa hopi hende e cosnan horibel cu ta tumando luga awe den sosiedad humano, for di den seno di famia te riba esena internacional, ta “diabolico.” Pero kico esaki ta nifica? Mester atribui e horornan ei na podernan impersonal di maldad, of tin cierto forsanan den forma di personanan maligno cu ta influencia hende pa comete crimennan cruel cu ta piyo cu e maldad humano di semper? Acaso e forsanan malbado ei ta wordo organisa y dirigi door di un prins di maldad—Satanas e Diabel?

[Reconocemento di plachi na pagina 3]

Muchanan: Potret di U.S. Coast Guard