Un Tempo pa Alegra den e Paisnan di Balcan

Tawata 1922. E Studiantenan Sinsero di Bijbel, manera Testigonan di Yehova tawata yama e tempo ei, tawatin un reunion na Innsbruck, Austria. Franz Brand, un yoncuman di Apatin na Vojvodina, Serbia, tawata sinta den auditorio. Na momento cu e orado a menciona e nomber di Dios, Yehova, un grupo di bochinchero a cuminsa bu e orado. E no por a sigui y e reunion a para. Toch, loke Franz a tende a causa un impresion profundo riba dje, y el a cuminsa predica e bon nobo di Reino. Di e forma modesto ei a cuminsa un crecemento spiritual excitante den e paisnan di Balcan.

PA MAYORIA hende awe e nomber Yugoslavia ta pone nan pensa riba guera y dramamento di sanger. Loke ta bini na mente ta imagennan tristo di masacrenan teribel, refugiadonan desespera, casnan destrui y werfanonan angustia. Palabra no por describi e dolo y miseria insoportabel causa pa e guera cu a destrosa e Peninsula di Balcan for di 1991 pa 1995, cabando cu tur speransa pa un futuro prospero y liber di precupacion a base di esfuerso humano. Como consecuencia di e guera, e poblacion di loke tawata Yugoslavia ta pasando den hopi dificultad economico y pobresa extremo. *

En bista di e sufrimento ei lo bo no pensa mes cu lo por tin hende felis den e parti di mundo aki. Pero pa straño cu por parce, tin si. Por cierto, riba un dia na fin di siglo 20 nan tawatin motibo pa un alegria hopi special. Kico Franz Brand, e yoncuman menciona na cuminsamento tawatin di aber cu tur esaki?

Crecemento Spiritual den e Paisnan di Balcan

Franz Brand tawata encanta cu e berdadnan nobo cu el a tende y a dicidi cu e mester plama e bon nobo. El a haya trabou como barbero na Maribor, un stad den Slovenia serca di frontera cu Austria, y a cuminsa predica na su clientenan, kendenan generalmente tawata sinta keto scucha mientras e ta feita nan. Como resultado di su esfuersonan, a lanta un grupo chikito di proclamado di Reino na Maribor na cabamento di añanan ’20. Nan tawata duna discurso biblico den un restaurant, cu  despues a haya un nomber masha apropiado: Restaurant Marisco Novi svet (Mundo Nobo).

Despues di poco tempo e bon nobo a plama den henter e pais. E “Foto-Drama di Creacion” (un presentacion di ocho ora di pelicula, slides, y grabacion) a contribui hopi na e expansion aki. Anto den añanan ’30 ora Testigonan di Yehova a haya nan bou di oposicion severo na Alemania, pioneronan Aleman cu a hui for di nan patria a bin fortifica e fila di publicadonan den e Reino di Yugoslavia. Nan a sacrifica nan comodidad y interesnan personal y a haci un gran esfuerso pa bai predica te na e partinan mas leu di e pais yen di sero aki. Na prome instante, a parce cu tawatin masha poco reaccion riba nan mensahe. Den cuminsamento di añanan ’40, ta 150 publicado so a raporta sirbishi di veld.

Na 1941 a lanta un ola di persecucion feros cu a dura te 1952. Tawata un goso grandi ora cu finalmente dia 9 di september 1953, bou di e regimen comunista di General Tito, Testigonan di Yehova a haya reconocemento legal! E aña ei tawatin 914 publicado di e bon nobo, y e cantidad a sigui crece. Pa 1991, e cantidad di publicado a aumenta na 7.420 y 16.072 persona a asisti na e Memorial e aña ei.

Di 16 pa 18 di augustus 1991, Testigonan di Yehova a tene nan prome congreso internacional den e pais aki na Zagreb, Croacia. Na tur a asisti 14.684 persona, tanto local como di pafo. E congreso inolvidabel aki a prepara e pueblo di Yehova pa e pruebanan cu a bini den futuro. Entre e ultimo vehiculonan cu a pasa e punto di control entre Croacia y Serbia tawatin e busnan cu a hiba delegadonan Serbio cas bek. Despues cu e ultimo bus a pasa e control, e frontera a sera y guera a cuminsa.

Yehova Su Pueblo Tin Motibo pa Alegra

E añanan di guera a resulta den un prueba severo pa Testigonan di Yehova den e paisnan di Balcan. No obstante, nan tin motibo pa alegra pasobra Yehova a bendiciona su pueblo cu un aumento sobresaliente. For di 1991, e cantidad di publicado di Reino den e area cu un tempo tawata Yugoslavia a aumenta cu mas cu 80 porshento. Den e aña di sirbishi 2001 tawatin un maximo di 13.472 publicado.

E oficinanan di Zagreb y Belgrado (Serbia) tawata supervisa e obra di Testigonan di Yehova den henter e teritorio di ex Yugoslavia. Cu e aumento y cambionan politico, tawata necesario pa establece oficina nobo na Ljubljana (Slovenia) y Skopje (Macedonia). Tambe a busca oficina nobo na Belgrado y Zagreb. Rond di 140 miembro ta sirbiendo den e oficinanan aki. Mayoria di nan ta jong y yen di celo y amor pa Yehova. Hopi di nan ta traha riba traduccion di publicacionnan pa studia Bijbel na Croata, Macedonio, Serbio y Slovenio. Ta un bendicion cu mayoria di e revistanan y literatura di Testigonan di Yehova den e idiomanan aki ta ser publica simultaneamente cu e edicion original na Ingles! E publicacionnan aki ta yuda hopi hende haya consuelo y speransa.

Un otro motibo di goso ta e apoyo inegoista cu hopi sirbido di tempo completo cu a bini di otro pais ta duna. Den añanan resien nan a construi un cantidad di bunita Salon di Reino,  y esei a aumenta e goso di e congregacionnan. Asina mes, futuro lo a trece mas motibo di goso. Con asina?

Un Proyecto Unico

Hopi publicado a yega di puntra nan mes varios biaha: ‘Nos lo haya e Traduccion di Mundo Nobo un dia den nos idioma?’ Aña aden aña afo nan a anhela pa tende un anuncio relaciona cu esei na un congreso di distrito. Pero, con nan lo por a realisa un proyecto gigantesco asina, tumando na consideracion cu e teamnan di traduccion pa e idiomanan aki a ser forma apenas un par di aña pasa y tawata trata aki di relativamente poco traductor?

Despues di analisa asuntonan, e Cuerpo Gobernante a aproba un proyecto en conhunto den cua e teamnan di traduccion Croata, Macedonio y Serbio lo a coopera estrechamente cu otro y asina beneficia for di otro su trabou y aporte. E team Croata mester a dirigi e grupo.

Un Dia di Alegria

Nunca mas Testigonan di Yehova den e paisnan di Balcan lo lubida 23 di juli 1999. Nan mester a tene e Congresonan di Distrito “Dios Su Palabra Profetico” pareu na Belgrado, Sarajevo (Bosnia-Herzegovina), Skopje y Zagreb. Pa un tempo no tawata sigur si lo a tene e congreso na Belgrado pasobra durante e bombardeonan di OTAN, no tawata permiti pa tene reunion publico. E speransa di por asocia cu otro despues di lunanan di insiguridad a haci e rumannan masha contento! Sinembargo, e realidad mes a surpasa nan expectativanan.

Diabierna atardi, a haci un anuncio special den tur cuater stad di congreso. E 13.497 delegadonan tawata den gran expectativa pa loke ta bai sosode. Ora e orado finalmente a anuncia publicacion di e Traduccion di Mundo Nobo di e Scritura Griego Cristian na Croata y Serbio y a bisa e auditorio cu e traduccion Macedonio tawata na caminda, e delegadonan no por a contene nan mes. E aplauso duro no a permiti e orado caba e anuncio. Na e congreso di Sarajevo, diripiente a reina un silencio den e auditorio cu a ser coh’e completamente di sorpresa. Despues di esei a sigui un aplauso largo. Lagrima di goso tawata core riba cara di hopi ruman na Belgrado, y un aplauso tras di otro tawata interumpi e orado prome cu e por a caba e anuncio. Tur tawata masha contento!

E echo cu Testigonan di Yehova a obtene e derechonan pa imprimi un Bijbel Croata y tambe uno Serbio, a haci e regalo aki dobel balioso. Di e manera ei, cada un di e idiomanan tin awor e Traduccion di Mundo Nobo di e Scritura Griego Cristian combina cu un traduccion di e Scritura Hebreo di e mesun idioma ei den un solo volumen. Ademas, nan a imprimi e Bijbel Serbio tanto na alfabet Romano como Cirilico.

Gradicido pa tur e bendicionnan y guia cu nan a ricibi, e pueblo di Yehova den e paisnan di Balcan di berdad ta di acuerdo cu e palabranan di David: “Maske mi cana den e vaye di sombra di morto, mi no tin miedo di maldad, pasobra abo [Yehova] ta cu mi.” Apesar di tur e dificultadnan cu nan ta sigui confronta, nan ta determina pa haci ‘e goso di SEÑOR nan fortalesa.’—Salmo 23:4; Nehemias 8:10.

[Nota]

[Plachi na pagina 20]

E prome grupo di publicado di Maribor, Slovenia, ta predicando den teritorio leu