Yehova Ta Percura pa Bo

“Tirando tur boso precupacion riba [Dios], pasobra E ta percura pa boso.”—1 PEDRO 5:7.

1. Den ki aspecto importante Yehova y Satanas ta completamente contrario di otro?

YEHOVA y Satanas ta completamente contrario di otro. Ken cu ta sinti su mes atrai na Yehova por solamente sinti asco di Diabel. E Encyclopædia Britannica (1970) ta indica e contraste aki. E ta bisa relaciona cu e actividadnan di Satanas cu ta ser describi den e buki biblico di Job: ‘Satanas su mision ta pa cana pariba pabou riba tera en busca di actonan of personanan cu e por acusa di maldad; su funcion pues ta lo contrario di e “wowo di SEÑOR”, cu ta move bai bin riba henter e tera pa E por sostene tur loke ta bon (2 Cro. 16:9). Satanas no ta gusta ningun tiki cu hende ta mustra bondad inegoista na otro y e ta pone nan na prueba pa esei. Ta Dios mes ta permiti Satanas haci esaki pero bou di Dios su autoridad y control y denter di e limitenan cu Dios ta pone.’ Si, esta un contraste grandi!—Job 1:6-12; 2:1-7.

2, 3. (a) Con loke a pasa cu Job ta un bon ehempel di e nificacion di e palabra “Diabel”? (b) Con Bijbel ta mustra cu Satanas ta sigui acusa e sirbidonan di Yehova riba tera?

² E palabra “Diabel” ta bini di un palabra Griego cu ta nifica “acusado falso”, “calumniado.” E buki di Job ta revela cu Satanas a acusa Yehova su fiel sirbido Job di ta sirbi Dios pa motibo di interes personal. El a bisa: “Ta pornada Job ta teme  Dios?” (Job 1:9) E relato ta sigui mustra cu apesar di su pruebanan, Job a hala mas serca Yehova. (Job 10:9, 12; 12:9, 10; 19:25; 27:5; 28:28) Despues di tur su sufrimento, el a bisa Dios: “Ta tende mi a tende di bo, ma awor mi wowo ta mira bo.”—Job 42:5.

³ Satanas a stop di acusa Dios su sirbidonan fiel cu a biba for di tempo di Job en adelante? No. E buki di Revelacion ta mustra cu den e tempo di fin aki, Satanas ta sigui acusa e rumannan ungi di Cristo y sigur tambe nan compañeronan fiel. (2 Timoteo 3:12; Revelacion 12:10, 17) Pesei ta necesario pa nos tur como cristian berdadero somete nos mes na nos Dios amoroso Yehova. Nos mester sirbie motiva pa un amor profundo y asina demostra cu e acusacion di Satanas ta falso. Asina nos lo haci Yehova su curason contento.—Proverbionan 27:11.

Yehova Ta Busca Manera pa Yuda Nos

4, 5. (a) Na contraste cu Satanas, kico Yehova ta busca riba tera? (b) Pa nos por ricibi Yehova su aprobacion, kico nos mester haci?

⁴ Diabel ta cana pariba pabou riba tera en busca di ken e por acusa y devora. (Job 1:7, 9; 1 Pedro 5:8) Na contraste, Yehova ta busca manera pa yuda esnan cu tin mester di su forsa. Profeta Hanani a bisa Rei Asa: “Wowo di SEÑOR ta move bai bin door di henter tera, pa E por sostene fuertemente esnan cu nan curason ta completamente di dje.” (2 Cronicanan 16:9) Ki un gran diferencia entre Satanas su inspeccion malicioso y Yehova su cuido amoroso!

⁵ Yehova no ta spiona nos pa E tuma nota di delaster un fayo cu nos haci. E salmista a skirbi: “Si Abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) E contesta indirecto ta: ningun hende lo por keda para. (Eclesiastes 7:20) Si nos hala serca Yehova cu un curason completo, su wowonan lo ta riba nos, no pa condena nos, sino pa observa nos esfuersonan y pa contesta nos oracionnan pa yudansa y pordon. Apostel Pedro a skirbi: “E wowonan di SEÑOR ta riba e hustonan, y su horeanan ta atento pa scucha nan oracion, ma e cara di SEÑOR ta contra esnan cu ta haci malo.”—1 Pedro 3:12.

6. Con e caso di David ta un consuelo y a la bes un advertencia pa nos?

⁶ David tawata imperfecto y el a peca gravemente. (2 Samuel 12:7-9) Pero el a desahoga su curason dilanti Yehova y a hala serca dje den oracion ferviente. (Salmo 51:1-12, titulo riba e Salmo) Yehova a scucha su oracion y a pordon’e, maske David a carga consecuencianan desagradabel di su pica. (2 Samuel 12:10-14) Esaki mester ta un consuelo y a la bes un advertencia pa nos. Ta un consuelo pa sa cu Yehova ta dispuesto pa pordona nos erornan si di berdad nos repenti, pero ta bon pa para keto y realisa nos mes cu pica hopi bes ta trece consecuencianan serio. (Galationan 6:7-9) Si nos kier hala serca Yehova, nos tin cu keda mas leu posibel for di tur loke ta desagrad’e.—Salmo 97:10.

Yehova Ta Hala Su Pueblo Serca Dje

7. Ki clase di hende Yehova ta busca, y con E ta hala nan serca dje?

⁷ David a skirbi den un di su salmonan: “Aunke SEÑOR ta halsa, toch E ta atende e hende humilde; ma e hende orguyoso E ta conoce djaleu.” (Salmo 138:6) Asina tambe un otro salmo ta bisa: “Ken ta manera SEÑOR nos Dios, kende ta sinta riba trono den haltura, kende ta humilia su mes pa mira e cosnan cu ta den shelo y riba tera? E ta lanta hende pober for di stof.” (Salmo 113:5-7) Si, e Creador todopoderoso di universo ta humilia su mes pa wak riba tera, y su wowonan ta mira “hende humilde”, “hende pober”, hende cu ta “suspira y keha pa motibo di tur e abominacionnan cu ta wordo haci.” (Ezekiel 9:4) Yehova ta hala e hendenan ei na dje mediante su Yiu. Hesus a bisa tempo cu e tawata riba  tera: “Ni un hende no por bin serca mi, si no ta e Tata cu a manda mi a hal’e . . . Ni un hende no por bin serca mi, si esaki no ta duna na dje di e Tata.”—Huan 6:44, 65.

8, 9. (a) Dicon nos tur tin cu bini na Hesus? (b) Kico ta asina remarcabel di e areglo di rescate?

⁸ Si bo wak bon, tur hende lo mester bini serca Hesus y pone fe den e sacrificio di rescate pasobra nan a nace pecado, aleha for di Dios. (Huan 3:36) Nan mester reconsilia cu Dios. (2 Corintionan 5:20) Dios no a warda pa hende pecado bin rog’e pa haci un areglo pa nan por sera pas cu ne. Apostel Pablo a skirbi: “Dios ta demostra su mes amor pa cu nos den esaki, cu tempo nos tawata pecado ainda, Cristo a muri pa nos. . . . Pasobra si tempo cu nos tawata enemigo, nos a wordo reconsilia cu Dios door di morto di su Yiu, cuanto mas, siendo reconsilia, nos lo ta salba pa medio di su bida.”—Romanonan 5:8, 10.

⁹ Apostel Huan a confirma e berdad sublime aki cu Dios ta reconsilia hende cu ne, ora el a skirbi: “Pa medio di esaki e amor di Dios a wordo manifesta den nos, cu Dios a manda su Yiu unigenito den mundo pa nos por a biba pa medio di dje. Den esaki amor ta consisti, no cu ta nos a stima Dios, ma cu ta el a stima nos y a manda su Yiu pa ta e propiciacion [of, reconsiliacion] pa nos picanan.” (1 Huan 4:9, 10) Ta Dios a dal e prome paso, no hende. Bo no ta sinti bo atrai na un Dios cu a mustra asina tanto amor pa nos como hende, siendo no solamente “pecado” sino asta “enemigo”?—Huan 3:16.

Nos Tin Cu Busca Yehova

10, 11. (a) Kico nos tin cu haci pa busca Yehova? (b) Con nos mester mira e sistema di cosnan di Satanas?

¹⁰ Ta claro cu Yehova no ta obliga nos bini serca dje. Ta nos tin cu busc’e; na moda di papia ‘fula y realmente hay’e, maske E no ta leu di cada un di nos.’ (Echonan 17:27) Nos tin cu reconoce cu Yehova tin derecho di exigi nos sumision. Disipel Santiago a skirbi: “Pesei, somete boso na Dios. Resisti Diabel y e lo hui for di boso. Hala serca Dios y E lo hala serca boso. Limpia boso mannan, boso pecadonan; y purifica boso curason, boso di curason dobel.” (Santiago 4:7, 8) Nos no mester basila pa tuma un posicion firme contra Diabel y na fabor di Yehova.

¹¹ Esaki ta nifica cu nos ta distancia nos mes for di Satanas su sistema di cosnan malbado. Santiago a skirbi tambe: “Boso no sa cu amistad cu mundo ta enemistad pa cu Dios? Pesei, ken cu kier ta amigo di mundo ta haci su mes enemigo di Dios.” (Santiago 4:4) Di lo contrario tambe, si nos kier ta amigo di Yehova, nos tin cu spera cu e mundo di Satanas lo odia nos.—Huan 15:19; 1 Huan 3:13.

12. (a) Ki palabranan di consuelo David a skirbi? (b) Ki advertencia Yehova a duna mediante profeta Azarias?

¹² Ora Satanas su mundo ta bai contra nos den un of otro manera, nos tin cu acerca Yehova den oracion y pidi su yudansa. David, kende Yehova a rescata masha hopi biaha, a skirbi e palabranan aki cu ta consola nos: “SEÑOR ta serca di tur esnan cu ta sclama na dje, serca di tur esnan cu ta sclama na dje den  berdad. E lo cumpli cu e deseo di esnan cu ta tem’e; tambe E lo tende nan sclamacion y lo salba nan. SEÑOR ta warda tur cu ta stim’e, ma tur e malbadonan E lo destrui.” (Salmo 145:18-20) E salmo aki ta mustra cu Yehova por salba nos individualmente ora cu nos ta pasa den prueba y cu lo E salba su pueblo colectivamente ora di e “gran tribulacion.” (Revelacion 7:14) Yehova lo keda serca nos si nos keda serca dje. Guia pa “e spirito di Dios”, profeta Azarias a declara loke nos por considera como un berdad general: “SEÑOR ta cu boso ora boso ta cu ne. Y si boso busc’e, E lo laga boso hay’e; ma si boso bandon’e, E lo bandona boso.”—2 Cronicanan 15:1, 2.

Yehova Mester Ta Real pa Nos

13. Con nos por mustra cu Yehova ta real pa nos?

¹³ Apostel Pablo a skirbi di Moises cu “el a keda firme, como si fuera e tawata mira Esun cu ta invisibel.” (Hebreonan 11:27) Naturalmente Moises nunca no a echt mira Yehova. (Exodo 33:20) Pero Yehova tawata asina real p’e cu tawata como si fuera el a mir’e. Asina tambe, despues cu Job a pasa su pruebanan, su wowonan di fe a mira Yehova mas cla, como un Dios cu ta permiti su sirbidonan fiel pasa door di prueba pero cu nunca no ta bandona nan. (Job 42:5) Bijbel ta bisa di Enok y Noe cu nan “a cana cu Dios.” Nan a haci esaki door di busca maneranan pa agrada Dios y obedec’e. (Genesis 5:22-24; 6:9, 22; Hebreonan 11:5, 7) Si Yehova ta mes real pa nos cu E tawata pa Enok, Noe, Job y Moises, nos lo tuma nota di dje of “reconoc’e” den tur nos camindanan, y lo E ‘dirigi nos bereanan.’—Proverbionan 3:5, 6.

14. Kico ta nifica “pega” na Yehova?

¹⁴ Djis prome cu e Israelitanan a drenta e  Tera Priminti, Moises a conseha nan: “Boso mester sigui SEÑOR boso Dios y tin temor p’e; y boso mester warda su mandamentonan, scucha su bos, sirbie y pega na dje.” (Deuteronomio 13:4) Nan mester a sigui Yehova, tem’e, obedec’e y pega na dje. Relaciona cu e palabra traduci den e versiculo aki como “pega”, un experto biblico ta bisa cu “e lenguahe ta indica un relacion masha pega y intimo.” E salmista a declara: “E comunion intimo di SEÑOR ta cu esnan cu ta tem’e.” (Salmo 25:14) Nos por tin e relacion precioso y pega aki cu Yehova si E ta real pa nos y si nos stim’e asina tanto cu nos tin miedo di desagrad’e den cualkier manera.—Salmo 19:9-14.

Bo Ta Conciente di Yehova Su Cuido?

15, 16. (a) Con Salmo 34 ta mustra cu Yehova ta percura pa nos? (b) Kico nos tin cu haci si nos tin problema pa corda e bon cosnan cu Yehova a haci pa nos?

¹⁵ Un di e mañanan di Satanas ta di purba pone nos perde for di bista e echo cu nos Dios Yehova constantemente ta percura pa su sirbidonan fiel. Rei David di Israel tawata bon conciente di Yehova su cuido protectivo asta ora el a confronta un situacion sumamente peligroso. Ora David a hay’e obliga ta play loco dilanti di Rei Akis di Gat, el a compone un cantica, un salmo masha bunita, cu a inclui e expresion aki di fe: “O engrandece SEÑOR cu mi, y laga nos halsa su nomber hunto. Mi a busca SEÑOR, y El a contesta mi, y a libra mi for di tur mi temornan. E angel di SEÑOR ta campa rond di esnan cu ta tem’e, y ta rescata nan. O purba y mira cu SEÑOR ta bon; bendiciona ta e hende cu ta tuma refugio den dje! SEÑOR ta serca di e hende di curason kibra, y ta salba esnan di spirito abati. Hopi ta e afliccionnan di e husto, ma SEÑOR ta libr’e for di nan tur.”—Salmo 34:3, 4, 7, 8, 18, 19; 1 Samuel 21:10-15.

¹⁶ Abo ta combenci di Yehova su poder di salba? Bo ta conciente di e proteccion cu su  angelnan ta brinda nos? Bo mes a yega di purba y mira cu Yehova ta bon? Cua tawata e ultimo biaha cu bo tawata hopi conciente cu Yehova a haci bon pa bo? Purba corda. Tawata e biaha cu bo a bishita e ultimo cas den sirbishi, ora cu bo tawata sinti cu bo no por mas, anto net e ora ei bo a haya un combersacion masha dushi cu e doño di cas? Bo a corda yama Yehova danki cu El a duna bo net e extra forsa cu bo tawatin mester y cu el a bendiciona bo? (2 Corintionan 4:7) Di otro banda, kisas bo tin problema pa corda un cierto cos bon cu Yehova a haci pa bo. Podise bo tin cu bai bek un siman, un luna, un aña of mas atras? Si esei ta e caso, pakico no haci un esfuerso conciente pa hala mas serca Yehova y purba mira con E ta guia bo y dirigi bo? Apostel Pedro a conseha cristiannan: “Humilia boso mes . . . bou di e man poderoso di Dios . . . tirando tur boso precupacion riba dje, pasobra E ta percura pa boso.” (1 Pedro 5:6, 7) Si, lo bo keda sorprendi cuanto Yehova ta percura pa bo!—Salmo 73:28.

Sigui Busca Yehova

17. Kico nos mester haci pa nos por sigui busca Yehova?

¹⁷ Mantene nos relacion cu Yehova mester ta algo cu nos ta traha riba dje continuamente. Hesus a bisa den oracion na su Tata: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Siña conoce Yehova y su Yiu ta rekeri esfuerso continuo di nos parti. Nos tin mester di e yudansa di oracion y spirito santo pa comprende “e profundidadnan di Dios.” (1 Corintionan 2:10; Lucas 11:13) Tambe nos tin mester di guia di “e esclabo fiel y prudente” pa alimenta nos mente cu cuminda spiritual “na su debido tempo.” (Mateo 24:45) Mediante e canal ei, Yehova a conseha nos pa lesa su Palabra tur dia, asisti na nos reunionnan cristian regularmente y participa di henter curason den e trabou di predica ‘e evangelio di e reino.’ (Mateo 24:14) Di e maneranan ei nos lo sigui busca nos Dios amoroso Yehova.

18, 19. (a) Kico nos mester ta dicidido pa haci? (b) Si nos resisti Diabel y sigui busca Yehova, con nos lo ser bendiciona?

¹⁸ Satanas ta haci tur loke ta na su alcanse pa trece persecucion, oposicion y presion for di tur skina riba e pueblo di Yehova. E ta purba desbarata nos pas y daña nos bon relacion cu Yehova. E no kier pa nos sigui cu nos trabou di busca hende di curason honrado y yuda nan bini na Yehova su banda di e cuestion di cu si Dios tin derecho di goberna como esun supremo di universo. Pero nos mester ta dicidido pa keda fiel na Yehova, cu e confiansa cu lo E libra nos for di e malbado. Si nos laga e Palabra di Dios guia nos y nos keda activo cu su organisacion visibel, nos por tin sigur cu semper Yehova lo t’ei pa apoya nos.—Isaias 41:8-13.

¹⁹ Pesei laga nos tur resisti Diabel y su mañanan firmemente, y semper keda busca nos Dios stima Yehova, kende lo no keda sin ‘fortalece nos.’ (1 Pedro 5:8-11) Asina nos lo ‘conserva nos mes den e amor di Dios, sperando cu gran anticipacion e misericordia di nos Señor Hesucristo pa bida eterno.’—Hudas 21.

Con Lo Bo Contesta?

• Kico e palabra “Diabel” ta nifica, y dicon e merece e nomber ei?

• Con e manera cu Yehova ta observa e habitantenan di tera ta diferente for di esun di Diabel?

• Dicon un persona mester acepta e rescate pa e acerca Yehova?

• Kico ta nifica “pega” na Yehova, y con nos por sigui busc’e?

[Preguntanan di Estudio]

[Plachi na pagina 15]

Apesar di su pruebanan, Job a bin comprende cu Yehova a percura p’e

[Plachi na pagina 16, 17]

Si nos lesa Bijbel tur dia, asisti regularmente na reunionnan cristian y participa cu celo den e trabou di predica, nos lo keda corda cu Yehova ta percura pa nos