Cristiannan Neutral den e Ultimo Dianan

“Nan no ta di mundo, mescos cu ami no ta di mundo.”—HUAN 17:16.

1, 2. Kico Hesus a bisa di e relacion cu tin entre su siguidonan y e mundo aki, y ki preguntanan su palabranan ta lanta?

RIBA e ultimo anochi di Hesus su bida como hende perfecto, su disipelnan a tend’e haci un oracion largo. Den e oracion ei el a bisa algo cu ta describi e bida di tur cristian berdadero. Papiando di su siguidonan, el a bisa: “Mi a duna nan bo palabra; y mundo a odia nan, pasobra nan no ta di mundo, mescos cu ami no ta di mundo. Mi no ta pidi bo pa saca nan for di mundo, ma pa bo warda nan di e malbado. Nan no ta di mundo, mescos cu ami no ta di mundo.”—Huan 17:14-16.

² Dos bes Hesus a bisa cu su siguidonan lo no ta parti di mundo. Ademas, e echo cu nan ta separa for di mundo lo hiba na tension; mundo lo odia nan. Pero cristiannan no tin nodi spanta; Yehova lo proteha  nan. (Proverbionan 18:10; Mateo 24:9, 13) En bista di e palabranan di Hesus, nos por puntra nos mes: ‘Pakico cristiannan berdadero no ta parti di mundo? Kico kiermen no ser parti di mundo? Si mundo ta odia cristiannan, con nan ta mira mundo? Con nan ta mira gobiernonan di mundo en particular?’ E contestanan biblico riba e preguntanan aki ta importante pasobra nan tin di aber cu nos tur.

“Nos Ta di Dios”

3. (a) Kico ta separa nos for di mundo? (b) Ki evidencia tin cu mundo ta “bou di control di e malbado”?

³ Nos relacion intimo cu Yehova ta un di e motibonan pakico nos no ta parti di mundo. Apostel Huan a skirbi: “Nos sa cu nos ta di Dios, y henter mundo ta bou di control di e malbado.” (1 Huan 5:19) E palabranan di Huan tocante mundo ta papia pa nan mes. E gueranan, crimen, crueldad, opresion, deshonestidad y inmoralidad cu ta reina den e mundo djawe ta duna evidencia cu mundo ta bou di influencia di Satanas, y no di Dios. (Huan 12:31; 2 Corintionan 4:4; Efesionan 6:12) Ora un persona bira un Testigo di Yehova, lo e no practica e cosnan malo ei mas, ni consenti cu nan. Door di esei e no ta parti di mundo.—Romanonan 12:2; 13:12-14; 1 Corintionan 6:9-11; 1 Huan 3:10-12.

4. Den ki maneranan nos ta mustra cu nos ta pertenece na Yehova?

⁴ Huan a bisa cu na contraste cu mundo, cristiannan “ta di Dios.” Tur persona cu dedica nan mes na Yehova ta pertenece na dje. Apostel Pablo a bisa: “Si nos biba, ta pa Señor nos ta biba, of si nos muri, ta pa Señor nos ta muri; pesei, sea cu nos biba of cu nos muri, ta di Señor nos ta.” (Romanonan 14:8; Salmo 116:15) Door cu nos ta pertenece na Yehova, nos ta dun’e debocion exclusivo. (Exodo 20:4-6) Pesei, un cristian berdadero no ta ambiciona nada di e mundo aki. Y aunke e ta respeta emblemanan nacional, e no ta adora nan, ni den accion ni cu su actitud. Sigur e no ta adora streyanan di deporte ni otro idolonan djawe. Claro cu e ta respeta e derecho cu otro hende tin di haci loke nan kier, pero e ta adora unicamente e Creador. (Mateo 4:10; Revelacion 19:10) Esaki tambe ta pone cu e no ta parti di mundo.

“Mi Reino No Ta di e Mundo Aki”

5, 6. Con sumision na e Reino di Dios ta separa nos for di mundo?

⁵ Cristiannan ta siguidonan di Cristo Hesus y ciudadano di e Reino di Dios. Esei ta otro motibo pakico nan no ta di mundo. Ora Hesus tawata den un huicio dilanti Poncio Pilato, el a bisa: “Mi reino no ta di e mundo aki. Si mi reino tawata di e mundo aki, mi sirbidonan lo a bringa pa mi no wordo entrega na e Hudiunan; ma t’asina cu mi reino no ta di e mundo aki.” (Huan 18:36) E Reino ta e medio cu lo santifica e nomber di Yehova, establece su derecho di ta e soberano universal y cumpli cu su boluntad riba tera y tambe den shelo. (Mateo 6:9, 10) Atraves di su ministerio Hesus a predica e bon nobo of evangelio di Reino, y el a bisa cu su siguidonan lo proclam’e te na fin di mundo. (Mateo 4:23; 24:14) Na 1914 e palabranan profetico di Revelacion  11:15 a ser realisa: “E reino di mundo a bira e reino di nos Señor, y di su Cristo; y E lo reina pa semper y semper.” Masha pronto, e Reino celestial ei lo ta e unico poder na mando riba humanidad. (Daniel 2:44) Na dado momento, asta e gobernantenan di e mundo aki lo haya nan obliga ta reconoce su autoridad.—Salmo 2:6-12.

⁶ Cu tur esei na mente, awe cristiannan berdadero ta ciudadano di e Reino di Dios, y nan ta sigui e conseho di Hesus di “busca prome e reino di Dios y su husticia.” (Mateo 6:33) Esei no kiermen cu nan no ta leal na e pais den cua nan ta biba, pero den sentido spiritual si nan ta keda separa for di mundo. E tarea principal di cristiannan awe, mescos cu den e prome siglo, ta pa ‘duna testimonio tocante e reino di Dios.’ (Echonan 28:23) Ningun gobierno humano no tin derecho di stroba e trabou ei cu Dios a duna hende.

7. Pakico cristiannan berdadero ta neutral, y con nan a demostra esaki?

⁷ Testigonan di Yehova ta pertenece na Yehova y ta siguido di Hesus y ciudadano di e Reino di Dios. Como tal, nan a keda neutral den e conflictonan nacional y internacional di siglo 20 y 21. Nan no a tuma parti pa ningun grupo, nan no a lanta arma contra ningun hende ni no ta boga pa ningun causa den e mundo aki. Den un demostracion remarcabel di fe apesar di e oposicion aparentemente aplastante, nan a sigui e principio expresa na e gobernantenan Nazi di Alemania na 1934: “Nos no ta interesa den asuntonan politico, pero nos ta completamente dedica na e reino di Dios bou di Cristo como su Rei. Nos lo no haci malo ni causa daño na ningun hende. Lo ta un delicia pa nos biba na pas y haci bon na tur hende ora nos haya oportunidad pa esei.”

Embahado- y Mensaheronan di Cristo

8, 9. Den ki sentido Testigonan di Yehova ta embahado y mensahero awe, y con esaki ta afecta nan relacion cu e nacionnan?

⁸ Pablo a describi su mes y su compañeronan cristian ungi como “ambassadornan pa Cristo, como si fuera Dios tawata spierta door di nos.” (2 Corintionan 5:20; Efesionan 6:20) For di 1914, ta corecto pa yama cristiannan ungi cu spirito ambassadornan pa e Reino di Dios, di cua nan ta e “yiunan.” (Mateo 13:38; Filipensenan 3:20; Revelacion 5:9, 10) Ademas, Yehova a saca for di e nacionnan “un multitud grandi” di “otro carnenan”, cristiannan cu tin un speransa aki riba tera, pa apoya e yiunan ungi den nan trabou como embahado. (Revelacion 7:9; Huan 10:16) Nos por yama e “otro carnenan” aki “mensaheronan” di e Reino di Dios.

⁹ Un embahado ni su personal no ta mete den asuntonan di e pais caminda nan ta sirbi. Mescos tambe, cristiannan ta keda neutral den e asuntonan politico di e nacionnan di mundo. Nan no ta tuma parti pa ningun grupo nacional, racial, social of economico ni bai contra nan. (Echonan 10:34, 35) Al contrario, nan “ta haci bon na tur hende.” (Galationan 6:10) E posicion neutral di Testigonan di Yehova ta pone cu ningun hende no tin motibo valido pa rechasa nan mensahe cu e pretexto cu nan ta tuma parti pa e  otro partido den division racial, nacional of di tribu.

Identifica pa Amor

10. Con importante amor ta pa un cristian?

¹⁰ Ademas di lo anterior, cristiannan ta neutral den e asuntonan di mundo debi na nan relacion cu otro cristiannan. Hesus a bisa su siguidonan: “Na esaki tur hende lo sa cu boso ta mi disipel, si boso tin amor un pa otro.” (Huan 13:35) Ta masha importante pa un cristian tin amor fraternal. (1 Huan 3:14) Mescos cu un cristian tin un relacion estrecho cu Yehova y Hesus, asina tambe su relacion cu otro cristiannan ta masha estrecho. Su amor no ta limita na esnan cu ta den e congregacion local. E amor ei ta extende na tur su “rumannan den henter mundo.”—1 Pedro 5:9.

11. Con e amor cu Testigonan di Yehova tin pa otro a influencia nan conducta?

¹¹ Awe, Testigonan di Yehova ta demostra nan amor fraternal door di cumpli cu e palabranan di Isaias 2:4: “Nan lo bati nan spadanan traha ploeg cu nan, y nan lo bati nan lansanan traha sker pa snui cu nan. Nacion lo no lanta spada contra nacion, y nunca mas nan lo train pa guera.” Siendo cu ta Yehova ta instrui cristiannan berdadero, nan ta na pas cu Dios y cu otro. (Isaias 54:13) Door cu nan ta stima Dios y nan rumannan, lo ta impensabel di nan parti pa uza arma contra nan rumannan cristian—of cualkier otro hende—den otro pais. Nan pas y nan unidad ta un parti esencial di nan adoracion, un demostracion cu nan en berdad tin e spirito di Dios. (Salmo 133:1; Mikeas 2:12; Mateo 22:37-39; Colosensenan 3:14) Nan ta “busca pas y siguie”, sabiendo cu “e wowonan di SEÑOR ta riba e hustonan.”—Salmo 34:14, 15.

Con Cristiannan Ta Mira Mundo

12. Ki actitud di Yehova pa cu hende di e mundo aki Testigonan di Yehova ta imita, y con nan ta hacie?

¹² Yehova a pronuncia un huicio desfaborabel riba e mundo aki, pero ainda E no a husga tur hende individualmente den e mundo aki. Lo E haci esei pa medio di Hesus na Su debido tempo. (Salmo 67:3, 4; Mateo 25:31-46; 2 Pedro 3:10) Mientrastanto, E ta mustra un gran amor pa humanidad. Asta El a duna su Yiu unigenito pa asina tur hende por haya e oportunidad di ricibi bida eterno. (Huan 3:16) Aunke hende ta critica nos esfuersonan constantemente, como cristiannan nos ta imita e amor di Dios door di conta otronan tocante e manera cu Dios ta percura salbacion.

13. Con nos mester mira autoridadnan?

¹³ Con nos mester mira gobernantenan di e mundo aki? Pablo a contesta e pregunta ei ora el a skirbi: “Laga tur hende somete nan mes na e autoridadnan cu ta goberna.  Pasobra no tin autoridad cu no ta di Dios, y esnan cu ta existi, ta Dios a establece nan [“den nan posicion relativo”, NW].” (Romanonan 13:1, 2) Hende ta ocupa posicionnan di autoridad “relativo” (sea mas halto of mas abou cu di un otro hende, pero semper inferior cu esun di Yehova) pasobra e Todopoderoso ta permiti nan esei. Un cristian ta somete su mes na autoridad di e mundo aki pasobra den e forma ei e ta mustra cu e ta obediente na Yehova. Pero kico cristiannan mester haci ora surgi un conflicto entre e rekisitonan di Dios y esnan di un gobierno humano?

E Lei di Dios y Esun di Cesar

14, 15. (a) Con Daniel a logra evita un conflicto riba e asunto di obediencia? (b) Ki posicion e tres Hebreonan a tuma ora no por a evita un conflicto den e asunto di obediencia?

¹⁴ Daniel y su tres compañeronan a pone un ehempel excelente di con pa balansa sumision na gobiernonan humano cu sumision na autoridad di Dios. Tempo cu e cuater hobennan Hebreo a haya nan mes den exilio na Babilonia, nan a obedece e leinan di e pais ei y a ser scohi masha lihe pa un entrenamento special. Daniel a realisa cu probablemente e training lo a hib’e na conflicto cu e Lei di Yehova. Pesei el a papia e asunto aki cu e mayordomo encarga. Esaki a haci areglonan special pa respeta e consenshi di e cuater Hebreonan. (Daniel 1:8-17) Testigonan di Yehova ta sigui e ehempel di Daniel ora nan ta splica autoridadnan nan posicion cu tacto pa asina evita problema innecesario.

¹⁵ Sinembargo, na un ocasion mas despues, no por a evita un conflicto riba e asunto di sumision aki. E rei di Babilonia a traha un imagen grandi den e vaye di Dura y a manda e funcionarionan halto, incluso e gobernantenan cu tawata controla cierto districtonan, pa bini hunto pa inaugur’e. Pa e tempo ei, e tres amigonan Hebreo di Daniel a ser nombra como gobernante di districto di Babilonia, pues e ordo a conta pa nan tambe. Na dado momento durante e ceremonianan, tur presente mester a buig dilanti e imagen. Pero e Hebreonan tawata sa cu esaki lo a bai contra e lei di Dios. (Deuteronomio 5:8-10) Pues ora cu tur otro hende a buig, nan a keda para. Door di desobedece e ordo di e rei, nan a core riesgo di muri un morto horibel, y ta un milager so a scapa nan bida; pero nan a prefera di risca nan bida y no desobedece Yehova.—Daniel 2:49–3:29.

16, 17. Con e apostelnan a responde ora a manda nan stop di predica, y pakico?

¹⁶ Den prome siglo, e lidernan Hudiu di Herusalem a manda yama e apostelnan di Hesucristo y a ordena nan pa stop di predica den nomber di Hesus. Con nan a reacciona? Hesus a duna nan e tarea di haci disipel den tur nacion, cu a inclui Hudea. Tambe el a bisa nan pa nan ser su testigonan den Herusalem y tambe den e resto di mundo. (Mateo 28:19, 20; Echonan 1:8) E apostelnan tawata sa cu e mandamentonan di Hesus a representa e boluntad di Dios pa nan. (Huan 5:30; 8:28) Pesei, el a bisa: “Nos mester obedece Dios mas cu hende.”—Echonan 4:19, 20; 5:29.

 ¹⁷ E apostelnan no tawata rebelde. (Proverbionan 24:21) Pero ora e gobernantenan humano a prohibi nan di haci e boluntad di Dios, unico cos cu nan por a bisa ta: ‘Nos mester obedece Dios, y no hende.’ Hesus a bisa cu nos mester “duna Cesar loke ta di Cesar, y Dios loke ta di Dios.” (Marco 12:17) Si nos desobedece un mandamento di Dios riba ordo di un hende, nos ta dunando e hende ei loke ta pertenece na Dios. Mas bien, nos ta paga bek tur loke nos debe na Cesar, pero nos ta reconoce e autoridad supremo di Yehova. E ta e Soberano Universal, e Creador, e berdadero Fuente di autoridad.—Revelacion 4:11.

Nos Lo Para Firme

18, 19. Ki posicion ehemplar hopi di nos rumannan a tuma, y con nos por sigui nan ehempel?

¹⁸ Actualmente mayoria gobierno ta reconoce e posicion neutral di Testigonan di Yehova, y nos ta masha gradicido pa esei. Sinembargo, den algun pais, e Testigonan a enfrenta oposicion severo. Atrabes di siglo 20 y te den nos tempo, algun di nos rumannan a hiba un lucha balente, den sentido spiritual, nan a lucha “e bon lucha di fe.”—1 Timoteo 6:12.

¹⁹ Con nos por para mes firme cu nan? Na prome luga, nos ta corda cu nos tin cu spera oposicion. Nos no mester bira angustia ni keda sorprendi ora nos haya nos cu ne. Pablo a spierta Timoteo: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12; 1 Pedro 4:12) Con nos por pensa di scapa di oposicion den un mundo caminda e influencia di Satanas ta reina? (Revelacion 12:17) Tanten cu nos ta fiel, semper lo tin algun cu ta ‘keda sorprendi y ta calumnia nos.’—1 Pedro 4:4.

20. Riba ki berdadnan fortalecedor nos tin cu corda?

²⁰ Na di dos luga, nos ta combenci cu Yehova y su angelnan lo apoya nos. Manera Eliseo di antiguedad a bisa: “Esnan cu ta cu nos ta mas cu esnan cu ta cu nan.” (2 Reinan 6:16; Salmo 34:7) Yehova lo tin su motibo pakico e ta permiti presion di opositornan sigui pa un tempo. No obstante, semper lo E duna nos e forsa cu nos tin mester pa persevera. (Isaias 41:9, 10) Algun a perde nan bida, pero esei no ta spanta nos. Hesus a bisa: “No tene miedo di esnan cu ta mata e curpa, ma cu no por mata e alma; ma mas bien tene miedo di Esun cu por destrui tanto alma como curpa den [“Gehena”, NW].” (Mateo 10:16-23, 28) Ta “stranheronan” nos ta den e mundo aki. Nos ta uza nos tempo aki pa “gara loke ta bida berdadero”, esta bida eterno den Dios su mundo nobo. (1 Pedro 2:11; 1 Timoteo 6:19) Ningun hende no por stroba nos di haya e recompensa ei basta nos keda fiel na Dios.

21. Kico nos tin cu corda semper?

²¹ Pesei, laga nos corda e relacion precioso cu nos tin cu Yehova Dios, y semper sea gradicido pa e bendicion di por ta un siguido di Cristo y ciudadano di e Reino. Laga nos stima nos rumannan di henter curason, y laga nos semper deleita den e amor cu nos ta ricibi di nan. Riba tur cos, laga nos haci caso di e palabranan di e salmista: “Spera riba SEÑOR; sea fuerte y E lo fortalece bo curason, si, spera riba SEÑOR.” (Salmo 27:14; Isaias 54:17) E ora ei, mescos cu hopi cristian cu a bai nos dilanti, nos lo para firme cu nos speransa sigur como fiel cristiannan neutral cu no ta di e mundo aki.

Bo Por Splica?

• Con nos relacion cu Yehova ta separa nos for di mundo?

• Como ciudadano di e Reino di Dios, con nos ta mantene un posicion neutral den e mundo aki?

• Den ki maneranan amor pa nos rumannan ta mantene nos neutral, separa for di mundo?

[Preguntanan di Estudio]

[Plachi na pagina 15]

Con nos sumision na e Reino di Dios ta influencia nos relacion cu e mundo aki?

[Plachi na pagina 16]

Un Hutu y un Tutsi ta traha felismente cu otro

[Plachi na pagina 17]

JRumannan cristian Hudiu y Arabe

[Plachi na pagina 17]

Cristiannan Serbio, Bosnio y Croata ta disfruta di otro su compania

[Plachi na pagina 18]

Kico ta e cos corecto pa haci ora gobernantenan ta manda nos kibra e lei di Dios?