“Laga Boso Conducta Ta Excelente Meimei di e Paganonan”

“Honra tur hende; stima e rumannan.”—1 PEDRO 2:17.

1, 2. (a) Ki comentario un coresponsal di corant a duna tocante Testigonan di Yehova? (b) Pakico Testigonan di Yehova ta purba mantene normanan halto di conducta?

VARIOS aña pasa, un coresponsal di corant na Amarillo, Texas, Merca, a bishita diferente misa den e area y a publica e resultadonan di su investigacion. Tawatin un grupo cu a impresion’e ya cu el haya cu esaki tawata diferente. El a bisa: “Tres aña largo mi a bai e congresonan anual di Testigonan di Yehova na Amarillo Civic Center. Ora mi tawata den nan, nunca mi a mira un di nan sende un sigaria, habri un bleki di cerbes of papia palabra malo. Nan tawata e multitud di hende mas limpi y cu miho comportacion cu mi a yega di topa. Tambe nan a sobresali pa nan bisti modesto y bon manera.” Otro corant y revistanan tambe a yega di bisa mescos di Testigonan di Yehova. Pakico e Testigonan ta ricibi elogio regularmente for di hende cu no tin mesun creencianan cu nan?

² Hende sa elogia e pueblo di Dios pa nan bon conducta. Aunke por lo general norma- y balornan ta bayendo atras, Testigonan di Yehova ta mira normanan halto di conducta como un obligacion, como parti di nan adoracion. Nan sa cu nan accionnan ta duna otro hende un impresion di ken ta nan Dios Yehova y nan rumannan cristian; cu nan bon comportacion nan ta biba e berdad cu nan ta predica. (Huan 15:8; Tito 2:7, 8) Laga nos mira anto con nos por mantene nos bon conducta y asina sigui tene na halto e excelente reputacion di Yehova y di su Testigonan, y mira tambe ki beneficio nos por saca ora nos haci esei.

E Famia Cristian

3. Contra kico famianan cristian tin mester di proteccion?

³ Tuma por ehempel nos comportacion den famia. E buki Die Neuen Inquisitoren: Religionsfreiheit und Glaubensneid (E  Inkisidornan Nobo: Libertad di Religion y Envidia Religioso) di Gerhard Besier y Erwin K. Scheuch, ta declara: “Pa [Testigonan di Yehova] e famia ta algo cu mester di un proteccion special.” E declaracion ei ta cierto, y awe tin hopi peliger contra cua e famia mester di proteccion. Tin yiunan cu ta “desobedecido na mayornan” y adultonan cu ta “sin amor” of cu ta “sin dominio propio.” (2 Timoteo 3:2, 3) Parehanan ta bringa cu otro, mayornan ta maltrata of neglisha nan yiunan, y muchanan ta lanta contra nan grandinan, uza droga, cai den inmoralidad of bai for di cas. Tur esaki ta e resultado di e influencianan destructivo di ‘e spirito di mundo.’ (Efesionan 2:1, 2) Nos tin cu proteha nos famia contra e spirito ei. Con? Door di sigui e conseho- y instruccionnan cu Yehova tin pa miembronan di famia.

4. Ki responsabilidad miembronan di un famia cristian tin pa cu otro?

⁴ Parehanan cristian ta reconoce cu nan tin obligacionnan emocional, spiritual y fisico pa cu otro. (1 Corintionan 7:3-5; Efesionan 5:21-23; 1 Pedro 3:7) Mayornan cristian tin responsabilidad pisa pa cu nan yiunan. (Proverbionan 22:6; 2 Corintionan 12:14; Efesionan 6:4) Y segun cu muchanan den casnan cristian ta crece, nan ta siña cu nan tambe tin obligacionnan. (Proverbionan 1:8, 9; 23:22; Efesionan 6:1; 1 Timoteo 5:3, 4, 8) Pa e miembronan di famia por cumpli cu nan obligacionnan, nan mester haci esfuerso, mustra determinacion y un spirito di amor y sacrificio propio. Na e grado cu nan tur ta cumpli cu e obligacionnan cu Dios a duna nan, na e mesun grado ei nan ta un bendicion pa otro y pa e congregacion. Mas importante ainda, nan ta honra Esun cu a origina famia, Yehova Dios.—Genesis 1:27, 28; Efesionan 3:15.

E Hermandad Cristian

5. Ki bendicionnan nos asociacion cu nos rumannan cristian ta trece pa nos?

⁵ Como cristiannan, nos tambe tin un responsabilidad  pa cu otro rumannan den e congregacion y, al fin y al cabo, tambe pa cu nos “rumannan den henter mundo.” (1 Pedro 5:9) Nos bienestar spiritual ta depende principalmente di e relacion cu nos tin cu e congregacion. Hunto cu nos rumannan spiritual, nos ta disfruta di asociacion cristian y di e alimento spiritual di “e esclabo fiel y prudente” cu ta fortalece nos. (Mateo 24:45-47) Si nos tin problema, nos por bai serca nos rumannan pa haya bon conseho basa riba principionan biblico. (Proverbionan 17:17; Eclesiastes 4:9; Santiago 5:13-18) Ora nos ta den necesidad, nos rumannan no ta bandona nos. Esta un berdadero bendicion di por ta parti di e organisacion di Dios!

6. Con Pablo a mustra cu nos tin un responsabilidad pa cu otro cristiannan?

⁶ Sinembargo, nos no ta den e congregacion djis pa ricibi; nos tin cu duna tambe. Si, Hesus a bisa: “Ta mas bendiciona pa duna cu pa ricibi.” (Echonan 20:35) Apostel Pablo a resalta e spirito di duna ora el a skirbi: “Laga nos tene firme na e confesion di nos speransa sin basila, pasobra Esun cu a priminti ta fiel; y laga nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.”—Hebreonan 10:23-25.

7, 8. Con nos ta demostra un actitud di duna tanto den nos congregacion como pa cu otro cristiannan den otro pais?

⁷ Den e congregacion, nos ta haci “confesion di nos speransa” ora nos ta duna comentario durante e reunion of participa den otro maneranan den e programa. E esfuersonan ei sigur ta anima nos rumannan. Tambe nos ta anima nan cu nos combersacionnan prome y despues di reunion. Na ocasionnan asina nos por fortalece esnan cu ta debil, curasha esnan cu ta falta animo y esnan enfermo. (1 Tesalonicensenan 5:14) Cristiannan sinsero ta duna den un manera generoso. Pa e motibo ei hopi persona cu asisti na nos reunionnan pa prome bes ta keda impresiona cu e amor cu nan ta mira entre nos.—Salmo 37:21; Huan 15:12; 1 Corintionan 14:25.

⁸ Pero nos amor no ta limita na nos congregacion so. E amor ei ta extende na henter e asociacion di nos rumannan rond mundo. Pa e motibo ei, por ehempel, tin un caha di contribucion pa e Fondo di Salon di Reino den tur Salon di Reino. Kisas nos mes Salon di Reino ta den un condicion excelente, pero nos sa cu miles di otro cristiannan den otro paisnan no tin un luga adecua pa nan tene reunion. Ora nos ta contribui pa e Fondo di Salon di Reino, nos ta mustra e amor cu nos tin pa personanan asina maske kisas nos no conoce nan personalmente.

9. Pa ki motibo basico Testigonan di Yehova ta stima otro?

⁹ Pakico Testigonan di Yehova stima otro? Wel, Hesus a manda nan haci esei. (Huan 15:17) Y e amor cu nan tin pa otro ta un evidencia cu e spirito di Dios ta obra riba cada un di nan y tambe como grupo. Amor ta parti di e “fruta di spirito.” (Galationan 5:22, 23) Segun cu Testigonan di Yehova ta studia Bijbel, asisti na reunionnan cristian y haci oracion constante na Dios, di naturalesa nan ta cuminsa mustra amor apesar cu nan ta biba den un mundo caminda e ‘amor di hopi hende a fria.’—Mateo 24:12.

Con pa Trata cu e Mundo Rond di Nos

10. Ki responsabilidad nos tin pa cu e mundo rond di nos?

¹⁰ Ora Pablo a papia di “e confesion di nos speransa”, e ta pone nos corda riba un responsabilidad adicional. E confesion of declaracion publico aki tin di aber cu e obra di predica e bon nobo na esnan cu ainda no ta nos rumannan cristian. (Mateo 24:14; 28:19, 20; Romanonan 10:9, 10, 13-15) E obra di predica ei ta un otro acto di duna. Pa participa den dje nos mester tin tempo y energia. Tambe nos mester prepara, entrena nos mes y uza  nos recursonan personal. Sinembargo, Pablo a skirbi: “Mi ta debedo tanto di Griego como di barbaro, tanto di e sabinan como di esnan cu no ta sabi. Pesei, di mi parti, mi ta ansioso pa predica e evangelio na boso tambe cu ta na Roma.” (Romanonan 1:14, 15) Mescos cu Pablo, laga nos no ta pichiri ora nos ta paga e “debe” aki.

11. Cua dos principionan biblico ta determina con nos relacion cu mundo mester ta, pero apesar di esei, kico nos tin cu reconoce?

¹¹ Nos tin mas responsabilidad pa cu esnan cu no ta nos rumannan? Sigur cu si. Claro cu nos ta reconoce cu “henter mundo ta bou di control di e malbado.” (1 Huan 5:19) Nos sa cu Hesus a bisa di su disipelnan: “Nan no ta di mundo, mescos cu ami no ta di mundo.” Sinembargo, nos ta biba den mundo, nos ta gana nos pan di cada dia den dje y beneficia di e servicionan cu e ta duna. (Huan 17:11, 15, 16) Pesei nos tin nos obligacionnan pa cu e mundo rond di nos. Kico eseinan ta? Apostel Pedro a contesta e pregunta ei. Djis prome cu e destruccion di Herusalem, el a skirbi un carta na e cristiannan den e area di Asia Menor, y un pasashi den e carta ei ta yuda nos mantene un relacion balansa cu e mundo rond di nos.

12. Den ki sentido cristiannan ta “peregrinonan y stranheronan”, y como tal, for di kico nan mester abstene nan mes?

¹² Pa cuminsa, Pedro a bisa: “Stimanan, mi ta roga boso como peregrinonan y stranheronan pa abstene boso di pasionnan carnal, cualnan ta bringa contra e alma.” (1 Pedro 2:11) Den sentido spiritual, cristiannan berdadero ta “peregrinonan y stranheronan” pasobra e berdadero enfoke den nan bida ta e speransa di bida eterno. Pa esnan ungi cu spirito esei lo ta un bida den shelo y pa e “otro carnenan” esei lo ta den un paradijs riba tera. (Huan 10:16; Filipensenan 3:20, 21; Hebreonan 11:13; Revelacion 7:9, 14-17) Pero, kico ta deseonan (pasionnan) carnal? Esakinan ta encera cosnan manera e deseo di ta rico, e deseo pa prominencia, deseonan sexual inmoral y e deseonan describi como “envidia” y “golosidad.”—Colosensenan 3:5; 1 Timoteo 6:4, 9; 1 Huan 2:15, 16.

13. Con deseonan carnal ta “bringa contra [nos] alma”?

¹³ E deseonan ei realmente ta “bringa contra [nos] alma.” Nan ta caba cu nos relacion cu Dios y asina pone nos speransa cristian (nos “alma”, of bida) na peliger. Por ehempel, si nos cultiva interes den cosnan inmoral, con nos por presenta nos mes como “sacrificionan bibo y santo, aceptabel pa Dios”? Si nos cai den e trampa di materialismo, nos ta ‘buscando prome e reino’? (Romanonan 12:1, 2; Mateo 6:33; 1 Timoteo 6:17-19) E miho cos cu nos por haci ta di sigui e ehempel di Moises, bira lomba pa e tentacionnan di mundo, y pone sirbishi na Yehova na prome luga den nos bida. (Mateo 6:19, 20; Hebreonan 11:24-26) Esei ta un factor importante pa alcansa un relacion balansa cu mundo.

‘Mantene un Conducta Excelente’

14. Pakico nos ta trata na mantene un conducta excelente como cristian?

¹⁴ Den e siguiente palabranan di Pedro nos por haya un otro guia vital: “Laga boso conducta ta excelente meimei di e paganonan, asina cu ora nan calumnia boso como malechor, nan por, pa medio di boso bon obranan cu nan ta observa, glorifica Dios den e dia di bishitacion.” (1 Pedro 2:12) Como cristiannan, nos ta trata di ta ehemplar. Na scol nos ta traha duro. Na trabou nos ta diligente y honesto, asta ora nos doño di trabou ta parce irasonabel. Den un cas dividi pa loke ta religion, e esposo of esposa creyente ta haci un esfuerso special pa sigui principionan cristian. No ta semper facil, pero nos sa cu nos conducta ehemplar ta agrada Yehova y hopi bes e tin un bon efecto riba hende cu no ta Testigo.—1 Pedro 2:18-20; 3:1.

15. Con nos por sa cu e norma halto di conducta di e Testigonan di Yehova ta ser reconoci ampliamente?

¹⁵ Mayoria Testigo di Yehova ta logra tene  nan na normanan ehemplar y bo por mira esei den comentarionan publica den otro fuentenan atrabes di añanan. Por ehempel, Il Tempo di Italia a skirbi: “Hende cu tin colega di trabou cu ta Testigonan di Yehova ta describi nan como trahadonan honesto, asina combenci di nan fe cu nan ta parce di ta obsesiona cu ne; no obstante, nan ta merece respet pa nan integridad moral.” Herald di Buenos Aires, Argentina, a bisa: “Testigonan di Yehova a duna prueba atrabes di añanan cu nan ta ciudadanonan cu ta traha duro, serio, prudente y cu tin temor di Dios.” E erudito Ruso Sergei Ivanenko a declara: “Rond mundo Testigonan di Yehova ta conoci como hende cu ta sigui lei impecablemente y particularmente como hende cu ta paga belasting manera mester ta.” E gerente di un luga cu Testigonan di Yehova a uza pa tene nan congreso na Zimbabwe a bisa: “Mi ta mira algun Testigo piki papel benta abou y limpia toilet. E sala di exhibicion ta keda mas limpi cu prome. Boso teenagernan ta muchanan cu principio. Mara henter mundo ta Testigo di Yehova.”

Sumision Cristian

16. Ki relacion nos tin cu autoridadnan, y pakico?

¹⁶ Pedro a papia tambe tocante nos relacion cu autoridadnan. E ta bisa: “Somete boso mes pa causa di Señor na tur institucion humano, sea na un rei como esun den autoridad, of na gobernadonan como esnan cu rei ta manda pa castiga malechornan y pa elogia esnan cu ta haci bon. Pasobra asina ta e boluntad di Dios, cu door di haci bon boso por silencia e ignorancia di hende bobo.” (1 Pedro 2:13-15) Nos ta masha gradicido pa e beneficionan cu nos ta ricibi di un gobierno ordena, y bou di e guia di Pedro su palabranan, nos ta obedece su leinan y paga nos belasting. Aunke nos ta reconoce e derecho cu Dios a duna gobiernonan pa castiga kibrado di lei, e motibo principal pakico nos ta somete nos na autoridad ta “pa causa di Señor.” Esei ta e boluntad di Dios. Ademas, nos no kier trece reproche riba e nomber di Yehova door di ser castiga pa malecho.—Romanonan 13:1, 4-7; Tito 3:1; 1 Pedro 3:17.

17. Ora “hende bobo” opone nos, kico nos por ta sigur di dje?

¹⁷ Desafortunadamente, algun “hende bobo” cu tin autoridad ta persigui nos of ta opone nos den otro maneranan—manera door di bini cu campañanan di difamacion contra nos. Pero, na Yehova su debido tempo, nan mentiranan lo ser desenmascara, y nan “ignorancia” lo ser silencia na un manera eficas. Nos historia di conducta cristian ta papia pa su mes. Esei ta e motibo pakico funcionarionan di gobierno hopi bes ta elogia nos como hacido di loke ta bon.—Romanonan 13:3; Tito 2:7, 8.

Esclabo di Dios

18. Como cristiannan, den ki maneranan nos por evita di haci mal uzo di nos libertad?

¹⁸ Awor Pedro ta duna e spiertamento: “Actua como hende liber, y no uza boso libertad como un capa pa maldad, ma uz’e como esclabonan di Dios.” (1 Pedro 2:16; Galationan 5:13) Awe, e conocemento cu nos tin di e berdad di Bijbel ta libra nos for di siñansa religioso falso. (Huan 8:32) Ademas, nos tin un boluntad liber, y nos por tuma nos propio desisionnan. Ma nos no ta haci mal uzo di nos libertad. Ora nos ta tuma desision tocante asociacion, paña, forma di aregla nos curpa, dibirticion—asta cos di come y di bebe—nos ta  corda cu cristiannan berdadero ta esclabo di Dios, y cu nos no ta agrada nos mes. Nos ta scohe pa sirbi Yehova en bes di ta esclabo di nos mes deseonan carnal of di ultimo moda y tendencianan di mundo.—Galationan 5:24; 2 Timoteo 2:22; Tito 2:11, 12.

19-21. (a) Con nos ta mira esnan cu ta ocupa puestonan di autoridad? (b) Con algun a mustra cu nan ta “stima [nan] rumannan”? (c) Kico ta nos responsabilidad di mas importante?

¹⁹ Pedro ta sigui bisa: “Honra tur hende; stima e rumannan, teme Dios, honra rei.” (1 Pedro 2:17) Ta Yehova Dios mes ta permiti hende ocupa varios posicion di autoridad, pesei nos ta mustra honor apropiado na e personanan ei. Nos por asta haci oracion relaciona cu nan, pa nan por laga nos cumpli cu nos ministerio na pas y deboto na Dios. (1 Timoteo 2:1-4) Pero, na mesun tempo, nos ta “stima e rumannan.” Nos ta traha semper pa e beneficio di nos rumannan cristian, no pa perhudica nan.

²⁰ Por ehempel, ora violencia etnico tawata ruinando un nacion Africano, e conducta cristian di Testigonan di Yehova a resalta. E corant Reformierte Presse di Suisa a informa: “Na 1995, e organisacion yama Derechonan Africano . . . por a proba cu tur iglesia, liber di Testigonan di Yehova, a participa [den e conflicto].” Ora noticia di e susesonan tragico a alcansa otro paisnan, mesora Testigonan di Yehova na Europa a manda alimento y yudansa medico pa nan rumannan y otro hende den e pais aflihi ei. (Galationan 6:10) Nan a haci caso di e palabranan di Proverbionan 3:27: “No laga di haci bon na esnan cu merece esaki, si ta den bo poder pa hacie.”

²¹ Pero tin un responsabilidad asta mas importante cu e honor cu nos ta debe na cualkier autoridad di e mundo aki y asta mas cu e amor cu nos tin cu mustra na nos rumannan. Kico esei ta? Pedro a bisa: “Teme Dios.” Nos debe Yehova hopi mas cu nos debe cualkier ser humano. Den ki sentido? Y con nos por balansa nos obligacionnan na Dios cu loke nos debe autoridadnan? E siguiente articulo lo contesta e preguntanan aki.

Bo Ta Corda?

• Ki responsabilidad cristiannan tin den famia?

• Con nos por mustra cu nos tin un actitud di duna den e congregacion?

• Ki responsabilidad nos tin pa cu autoridadnan di e mundo aki?

• Kico ta algun beneficio cu nos ta haya door di mantene un norma halto di conducta?

[Preguntanan di Estudio]

[Plachi na pagina 9]

Con e famia cristian por ta un fuente di gran goso?

[Plachi na pagina 10]

Pakico Testigonan di Yehova stima otro?

[Plachi na pagina 10]

Nos por mustra cu nos ta stima nos rumannan aunke nos no conoce nan personalmente?